01 - வலைச்சரம் - படிக்காதவன் எழுதும் வலைச்சரம்

வாங்க மக்கா வாங்க. சும்மா சிவனேன்னு வேலைய செஞ்சுட்டு, குசும்ப கல்யாண கும்மி அடிச்சிட்டு இருந்த என்னைய வலைச்சரம் எழுத சொல்லிட்டாங்க முத்தக்கா!. எனக்கு அழுகாச்சி அழுகாச்சியா வந்த்துடுச்சி தெரியுமா?

பின்ன என்னங்க.. நான் பதிவெழுதறதே பல வருஷங்களுக்கு ஒரு முறை தான். ஆனா என்னையும் நம்பி வலைச்சரம் தொடுக்கச் சொன்ன முத்தக்கா விற்கு என் நன்றிகள் பல.

முதல் பதிவு அறிமுகப் பதிவாமே? அதான் என்னைப் பத்தி எனக்குத் தெரிஞ்ச வரையில் சொல்லி இருக்கேன்.


வலைப்பதிவர் பெயர்:

ஜீவா (ஜீவ்ஸ்) என்கிற ஐயப்பன்

வலைப்பூக்களின் பெயர் :

எண்ணங்களும் எழுத்துகளும் ,
இயன்றவரையிலும் இனியதமிழில் ,
எண்ணங்கள் இனியவை ,
தமிழில் புகைப்படக் கலை மற்றும்
கடுவெளி


( அறுக்க மாட்டாதவனுக்கு அம்பத்தெட்டு கருக்கருவான்னு பழமொழி நினைவுக்கு வந்தா என்னங்க செய்யறது )

தொடரமுடியாமல் அப்படியே நிற்கும் பதிவுகளை முக்கியமாக கடுவெளி மற்றும் எண்ணங்கள் இனியவை ( வெண்பா பதிவு ) போன்றவைகளைத் தொடரத்தான் ஆசை. ஆனால் அலுவலகப் பணி மற்றும் என் குழந்தையுடன் செலவிடும் நேரத்துடன் புகைப்படக் கலை என்னுடைய முழு ஓய்வு நேரத்தையும் மெல்ல மெல்ல உள்வாங்கி தன்னுள் இழுத்துக் கொண்டது.


தமிழில் புகைப்படக் கலை பதிவு ஆரம்பித்தப் போது சற்று தயக்கமாகத் தான் இருந்தது. "ஆரம்பிங்க ஐயப்பன்" என்று தைரியம் தந்த செல்லாவுடன் கூட்டு சேர்ந்து ஆரம்பித்து பின் சீவீஆர், சர்வேசன், ஆனந்த் என்று பலரும் சேர்ந்து இதை இன்றைக்கு இந்த அளவு உயர்த்தியிருப்பது மனதிற்கு மகிழ்ச்சி அளிக்கிறது.

இத்தனை வளர்ச்சிக்கு ஆசிரியக் குழு அனைவருக்கும், பங்கு பெற்ற நடுவர்களுக்கும், ஆர்வமாய் போட்டிகளில் பங்கேற்ற அனைவருக்கும் இதன் மூலம் என் நன்றியை புகைப் படக் குழு சார்பாக தெரிவித்துக் கொள்கிறேன்.



வாழ்விடம் / ஊர் :

பிறந்தது வாழியூர் எனும் கிராமம். வேலூரில் இருந்து கிட்ட தட்ட 35 கிலோ மீட்டர் தொலைவு. பெங்களூர் என்னத் தத்தெடுத்துக் கொண்டு பன்னிரண்டு வருடங்களாகிவிட்து.

வலைப்பூ அறிமுகம் செய்தவர்:

நமக்கு நாமே.. தன் கையே தனக்குதவி என்று மிகவும் நம்பிக்கையாய் ஆரம்பித்தது.

முதல் பதிவு ஆரம்பித்த நாள்,வருடம் :

முதல் முதலில் பதிவெழுதி போட்டது 11/21/2003 .


வலைப்பூ ஏன் ஆரம்பித்தீர்கள்:

தாளில் எழுதுவது எதையும் அவ்வப்போதே கிழித்துப் போடும் ஒரு பழக்கம் இருந்தது. சில சமயம் கிழித்துப் போடாதவற்றை எடுத்துப் படிக்கும் போது அட என்று தோன்றும் ( நெனப்பு தான் பொழப்பை கெடுக்குமாம் :)) ) .. சரி எழுதியதை இணையத்தில் போட்டு வைக்கலாம் என்று ஆரம்பித்தது தான்.



எழுத ஆரம்பித்தது மன்றமையம்( மன்ற மையம் ). அப்புறம் மெதுவாக மரத்தடி மற்றும் ராயர் காபி கிளப், அகத்தியர் போன்ற யாஹூக் குழுமங்களில் சேர்ந்து அதிகம் எழுத ஆரம்பித்த அப்போது கல்யாணம் ஆகி இருக்கவில்லை.

பின்பு நமக்கென தனியாய் ஒரு இடம் இருந்தால் நல்லது என்று http://iyappan.net என்று ஒரு வலைதளம் ஆரம்பித்து அதை தொடர்ந்து பராமரிக்காமல் போனதால் அது போயே போச்சு. அவ்வளவு காசு கொடுத்து அவஸ்தை படுவானேன் என்று வலைப்பதிவு ஆரம்பித்து விட்டேன்.

எழுதியவை எல்லாம் கல்யாணத்துக்கு முன்பு. இப்போது அதிகம் எழுத முடியவில்லை. குழந்தை என்னும் இனியக் கவிதையின் இனிமையை அனுபவித்துக் கொண்டு இருக்கிறேன். மீண்டும் எழுத வரவேண்டும்.

எனக்கு அதிகம் எழுத இடமளித்த மரத்தடி நிர்வாகிகளுக்கு என் நன்றிகள் பல. அப்போதெல்லாம் அடிக்கடி ஊக்கமளித்து எழுத வைத்த மதியக்காவிற்கும் நன்றி சொல்லியே ஆகவேண்டும்.

சந்தித்த அனுபவங்கள்:

பற்பல நல்லனுபவங்களும் .. சற்றே வேறுமாதிரியான அனுபவங்களும் உண்டு..

" நோய்நாடி நோய்முதல் நாடி அதுதணிக்கும்
வாய்நாடி வாய்ப்பச் செயல் ".

தீமைகளை விட நன்மைகள் அதிகம்


கிடைத்த நண்பர்கள்:

மிக அதிகம்.

கற்றவை:

எப்போ கற்றேன் ?? கற்றுக் கொள்ள முயற்சித்துக் கொண்டு இருக்கிறேன்.

எழுத்தில் கிடைத்த சுதந்திரம்:

கவியரசு கண்ணதாசன் அவர்களின் பாடல் தான் :)

போற்றுபவர் போற்றட்டும் புழுதி வாரித்
தூற்றுபவர் தூற்றட்டும் தொடர்ந்து செல்வேன்
ஏற்றதொரு கருத்தை எனதுள்ள மென்றால்
எடுத்துரைப்பேன் எவர்வரினும் நில்லேன் அஞ்சேன்

(-- சரியான வரிகளைச் சொல்லி தவறை சுட்டிக் காட்டிய இராம.கி அவர்களுக்கு நன்றி)

இது தாங்க எனக்கு இணையத்தில் கிடைத்த எழுத்து சுதந்திரம்

இனி செய்ய நினைப்பவை:
இயன்றவரையிலும் இனியதமிழில் எழுதவும் பேசவும் முயல்வது

என்னைப் பற்றிய முழுமையான குறிப்பு:

பிறந்தது வளர்ந்தது எல்லாம் தமிழகம் என்றாலும் தற்சமயம் இருப்பது பெங்களூர். வேலை செய்வது யாஹூ என்கிற பன்னாட்டு நிறுவனத்தில். வயது முப்பத்திரண்டு அகவைகள் முடிய போகிறது இந்த டிசம்பரோடு.
மற்றபடி என்னைப் பற்றி சொல்ல அதிகமில்லை.

முதலில் எழுதிய கவிதை (???!!)

உண்டு உண்டு என்ற போதும்
இல்லை இல்லை என்ற போதும்
ஏதோ சக்தி இயக்குது நம்மை
அதுவே கடவுள் என்பதென் உண்மை

இன்றைக்கும் இந்த நிலைப்பாடு மாறவில்லை. பார்க்கலாம் பிற்காலம் எப்படி மாறுதல்களைத் தரப் போகிறதென்று


முதலில் எழுதிய கதை ஏகலைவன் .

அது சரி இப்ப வலைச்சரத்தில் என்ன செய்யப் போகிறேன் :
அதான் இன்னும் தெரியல. நைட்டு குப்புறப் படுத்துக்கிட்டு யோசிச்சுட்டு நாளைக்கு சொல்றேன்.

சந்திக்கும் வரை..

- ஜீவ்ஸ்