செல்விருந்து ஓம்பி வருவிருந்து காத்திருத்தல் !

அன்புள்ள பதிவர்களே !

ஒரு வார காலம், நமது நண்பர் அம்பி அவர்கள், பலவித தலைப்புகளில் அருமையான பதிவுகளை அடையாளம் கண்டு, அறிமுகப் படுத்தி, அமர்க்களப் படுத்தி விட்டார். சுய அறிமுகத்திற்குப் பிறகு, விளம்பரம் பற்றிய பதிவுகள், சமையல் பற்றிய பதிவுகள், இசை பற்றிய பதிவுகள், பல்வேறு கலைகளைப் பற்றிய பதிவுகள், பயணக் கட்டுரைகள் அடங்கிய பதிவுகள், நன்றி நவிலல் ஆகியவற்றை அருமையாகத் தொகுத்து வழங்கினார். ஆயுர்வேதம், களரி, வர்மக்கலை போன்றவற்றைப் பற்றி அதிகம் எழுத வில்லையே என்ற ஆதங்கத்துடன் விடை பெற்றார்.

அவருக்கு வலைச்சரம் சார்பினில் மனமார்ந்த நன்றியினைத் தெரிவித்து, நல்வாழ்த்துகளுடன் விடை அளிக்கிறோம்.
----------------------------------------------------------

அடுத்து இவ்வாரத்திற்கு, 02.06.2008 முதல் 08.06.2008 வரை, அருமை நண்பர் சிவமுருகன் ஆசிரியராகப் பொறுப்பேற்கிறார். அவரது மொத்த வலைப்பூக்கள் பதினான்கு. மதுரையைச் சார்ந்தவர். பெங்களூரில் பணி புரிபவர். கணினித் துறையிலிருந்து மனித வள மேம்பாட்டுத் துறைக்கு மாறியவர். பல குழுப்பதிவுகளிலும் பதிவுகள் பதிந்து வருகிறார். பன்மொழி வித்தகர். திருக்குறளை பல்வேறு மொழிகளில் குறிப்பாக சௌராஷ்ட்ரத்தில் மொழி பெயர்ப்பவர். மதுரையைப் பற்றிய அரிய புகைப்படங்கள் ஆயிரம் இட்டவர்.

ஆன்மீகத்தில் ஈடுபாடுடையவர். திருப்பாவை திரும்பாவை, மகிஷாசுர மர்த்தனி ஸ்தோத்ரம், நடனகோபால நாயகி சுவாமிகளின் கீர்த்தனைகள், சித்தர் பாடல்கள் என பலப்பல பதிவுகள் இடுபவர். மற்றொரு ஆன்மீகப் பதிவரான குமரனுடன், குழுப் பதிவுகளில் இணைந்து இயங்குபவர்.

இத்தனை பெருமைகளைப் பெற்ற நண்பர் சிவமுருகனை வருக வருக என வரவேற்பதில் பெரு மகிழ்ச்சி அடைகிறோம்.

சீனா ... (Cheena)
பொறுப்பாசிரியர்.
01.06.2008
----------------