நான் யார் தெரியுமா?

வலையுலக நண்பர்கள் அனைவருக்கும் என் வணக்கம். முதலில் என்னைப் பற்றிய ஒரு சிறு அறிமுகம்.

நான் வித்யா சந்திரசேகரன். Scribblings என்ற வலைத்தளத்தில் கிறுக்கி வருகிறேன். 2006ஆம் ஆண்டு இறுதியில் என் தம்பி சில வலைத்தளங்களின் லிங்க் கொடுத்து படிக்கச் சொன்னான். நீயும் வேணும்னா ஒன்னு எழுதுன்னு சொல்லி உங்களை மீளாத் துயரத்தில் ஆழ்த்திவிட்டான்:)

2007ஆம் ஆண்டு ஜூலை மாதம் மூன்றாம் தேதி இந்தப் பதிவுலக்கு சனிப் பெயர்ச்சி ஏற்பட்டது. ஆசை, ஆர்வம், பொழுதுபோக்கிற்காக பதிவெழுத வந்து மூன்று வருடங்களாகிவிட்டது. அந்தக் கதை இங்கே. இந்த மூன்று வருடங்களில் பதிவுலகம் எனக்கு மறக்க முடியாதப் பாடங்களை சொல்லிக் கொடுத்திருக்கிறது. மனிதர்களை, மனங்களை, சுழல்களை புரிந்துக்கொள்ளும் பக்குவத்தை கொடுத்திருக்கிறது.

முதன் முதலில் யூத்புஃல் விகடனில் என் பதிவு வந்தபோது ஏற்பட்ட சந்தோஷம், சென்ற வாரம் என் தளத்தை அறிமுகம் செய்திருந்த தேவதை இதழைப் பார்த்தபோது இரு மடங்கானது. என் கிறுக்கல்களுக்கும் கிடைக்கும் அங்கீகாரமும் ஊக்கமும் உற்சாகத்தை அளிக்கின்றன. இது தான் எழுத வேண்டும், இப்படித்தான் எழுத வேண்டும் என்ற வரையறைகளை ஏற்படுத்திக்கொள்ளாமல் எல்லாவற்றைப் பற்றியும் எழுதிக்கொண்டிருக்கிறேன். எழுதுவேன். முக்கால்வாசி பதிவுகள் அனுபவப் பகிர்வுகள்தானென்றாலும், சினிமாவும், மொக்கை போடுவதும் பிடித்தமான விஷயங்கள். சீனா ஐயா என்னை தொடர்பு கொண்டு வலைச்சரம் ஆசிரியர் பொறுப்பை ஏற்கவியலுமா எனக் கேட்ட போது, உண்மையில் திக்கு முக்காடித்தான் போனேன். பின் எத்தனை ஜாம்பவான்கள் ஆற்றிய பணி அது. கண்டிப்பா சார்ன்னு சொல்லிட்டாலும் உள்ளுக்குள்ள கொஞ்சம் உதறல் இருந்துட்டுதான் இருக்கு. என்னதான் பயங்கரமா படிச்சு எக்ஸாம் எழுதினாலும் ரிசல்ட் வர்ற வரைக்கும் ஒரு டென்ஷன் இருக்குமில்லயா. அந்த மாதிரி ஒரு மனநிலையில் இருக்கேன்.

இந்த வாரம் முழுவதும் நோ அழுவாச்சி, நோ கவுஜை, நோ செண்டிமெண்ட், நோ அரசியல், நோ காதல். அப்ப என்னதான் பண்ணப்போறன்னு கேக்கறீங்களா? மொக்கை, சூர மொக்கை, மரணமொக்கை, சிரிக்க வைக்கும் அனுபவப் பகிர்வுகள், ஆட்டம் பாட்டம், சினிமா, அப்படியே போஜன்ம்ன்னு ஒரு மசாலா வாரத்துக்கு தயாராகுங்கள். உங்கள் கருத்துகளையும் ஆதரவையும் ஆவலோடு எதிர்பார்க்கிறேன். நாளை சந்திப்போம். வர்ட்டா:)