எங்கள் சரவெடி 5

                 

43) மஞ்சுபாஷிணியின் கதம்ப உணர்வுகள் இவரின் பதிவுகள் போலவே இவரது பின்னூட்டங்களும் சுவையானவை! இவர் நம் பதிவுக்கு வந்து ரசிக்க மாட்டாரா என்று நினைக்க வைக்கும் இவரது பின்னூட்டங்கள். இவரது பக்தமீரா சமீபத்தில் ரசித்த ஒன்று. சமையல், விருது விளக்கத் தொடர் பதிவு, கதைகள் என்று எழுதும் பல்சுவைப் பதிவர்களில்  இவரும் ஒருவர்.  

  

44) விஜய். கவிஞர். ரசிக்கத்தக்கக் கவிதைகள் படைப்பவர் எங்கள் இன்னொரு தளமான இது நம்ம ஏரியாவில் பாடல் ஒன்றைப் பாடி அனுப்பியவர். சமீப காலமாக எழுதுவதில்லை. பின்னூட்டங்களில் கூடக் காணோம்! மாதிரிக்கு இரண்டு. 1   2   

   

45) E BOOKS DOWNLOAD தமிழின் பிரபல எழுத்தாளர்களின் புத்தகங்கள் தரவிறக்கத்துக்கு வேண்டுமா.. இங்கு செல்லலாம். 2011 க்குப் பிறகு சமீபத்தில் ஒன்றும் வலைஎற்றவில்லை என்றாலும் அவர் சேமிப்பில் வைத்துள்ள புத்தகங்களை நீங்கள் விரும்பினால் இறக்கிப் படித்துக் கொள்ளலாம். 

    

46) எஸ்ராமகிருஷ்ணன்   பிரபல எழுத்தாளர். இவருக்கு அறிமுகம் தேவையில்லை. நிறைய பேருக்கு இவர் பக்கம் தெரிந்திருக்கலாம். தெரியாத சிலருக்கு இந்தத் தகவல் உபயோகமாகலாம்! அவர் எழுத்துகளையும்,  தேர்ந்தெடுத்த சில சிறுகதைகளையும், அவர் லிஸ்ட்டில் நூறு புத்தகங்களையும், புத்தக விமர்சனங்களையும்  இன்னும் இன்னும் நீங்கள் விரும்புபவற்றையும் தேர்வு செய்து இந்தப் பக்கத்தில் ரசிக்கலாம். 

   

47) வரலாற்றுச் சுவடுகள் இந்த வருடம் ஜனவரியில் தொடங்கப் பட்ட வலைப்பக்கம். ஆங்காங்கு இவரின் பின்னூட்டங்கள் பார்த்து அவ்வப்போது இவர் தளம் சென்று படிப்பதுண்டு. இதுவரை 36 பதிவுகள் எழுதியிருப்பதாக இவர் தளம் கணக்குக் காட்டுகிறது பூமியைப் பற்றியும்,உறுப்புமாற்றுச் சிகிச்சை பற்றியும், விண்வெளி, சுற்றுப்புறச் சூழல் மாசு என்று இவர் தரும் பதிவுகள் அனைத்தும் பாடங்கள். பொழுது போக்கு அம்சங்கள் இல்லாமல் அறிவுக்கோர் தளம். 

    

48) கடுகு தாளிப்பு அகஸ்தியன் சார் பக்கம். கல்கியில் இவர் எழுதிய கமலா தொச்சு கதைகளைப் படித்து ரசிக்காதார் யார்? மாதிரிக்கு சமீபத்திய ஒன் லைனர்கள். ரா கி ரவுக்கு இவரின்அஞ்சலிக் கட்டுரை. 

    

49) மதுரகவி. ராம்வி (ரமாரவி). ஒரு சிறிய இடைவெளிக்குப் பின் மீண்டும் தொடங்கி உள்ளார்.சுற்றுலா சென்று வந்து இவர் எழுதும் பதிவுகள் ரசிக்கத் தக்கவை.  இந்தத் தொடரில் இவர் எழுதிய ஹாஸ்டல் நினைவுகள் தொடரில் வரும் அலமேலு அம்மா மற்றொரு பிரபல பதிவருக்குத் (வல்லிசிம்ஹன்) தெரிந்தவர் என்பது விசேஷம். 

    

50) அமைதிச்சாரல்  பேரன்ட்ஸ் க்ளப், குயில்களின் கீதங்கள், கவிதை நேரமிது,  என்று மற்றும் மூன்று வலைப்பூக்கள் நடத்தும் இவர் ஒரு சிறந்த புகைப்படக் கலைஞரும் கூட. கவிதைப் பக்கத்தில் மனம் கவர்ந்த சமீபத்துக் கவிதை. சமையல் முதல் பண்டிகை வரை எண்ணங்கள் முதல் கதைகள் வரை, என்று பல்வேறு சுவைகளிலும் எழுதும் பதிவர்.

    

51) சமுத்ரா - வார்த்தைகளிலிருந்து மௌனத்துக்கு  இவரது கலைடாஸ்கோப் பதிவுகள் மிக மிக சுவாரஸ்யமானவை. அணு. அண்டம், அறிவியல் பதிவுகள் மிக உபயோகமானவை. அறிவுபூர்வமானவை.  கவிதை, ஜோக்குகளும் உண்டு!

    

52) உண்மைத்தமிழன்  அறிமுகம் தேவை இல்லாத அனைவரும் அறிந்த மேலும் ஒரு பதிவர். நாங்களும் ரசிக்கிறோம். நீள நீளமாய் இவர் எழுதும் பதிவுகள் ஆச்சர்யப் படவைக்கும். சமீப காலமாக ஒரே சினிமா விமர்சனமாக எழுதும் இவரின் பதிவுகளில் இட்லி,தோசை, வடை, பொங்கல், சாம்பார் பதிவு நாங்கள் மிக ரசிக்கும் ஒன்று! காரசாரமான அரசியல் பதிவுகளும் உண்டு.

   

53) சிவகுமாரன் கவிதைகள் அழகு கவிதைகள் எழுதுபவர். எங்கள் மதுரைக்காரர்! கல்லூரிக் காலத்திலிருந்தே கவிதைகள் எழுதி வருவதாகத் தெரிவித்திருப்பதோடு, அந்தக் காலத்தில் எழுதியுள்ள கவிதைகளையும் அவ்வப்போது பதிவிடுவார். வார்த்தைகளால் மனம் மயக்குபவர்.  ரசிக்க உதாரணம் காட்ட வேண்டாமா? இதோ கவிலைகளும், மனக்குரலும்.

    

54) ஸாதிகா (எல்லாப் புகழும் இறைவனுக்கே) தற்போது ஹஜ் யாத்திரை மேற்கொண்டிருக்கும் பதிவர்.  சென்றுவந்த இடங்கள் பற்றியும், விழிப்புணர்வுப் பதிவுகளும், நகைச்சுவைக் கதை என்று எல்லா தளங்களிலும் எழுதுபவர். என் விகடன் ஒவ்வொரு ஊர் பதிப்பிலும் எந்தெந்த வலைப் பதிவர் பற்றி அறிமுகப் படுத்தியிருக்கிறார்கள் என்று பட்டியலிட்டுள்ளார் 

    

55) எண்ணங்கள் எழுத்துக்கள் பெரும்பாலும் நடிகர்த் திலகத்தை ஆராதிக்கும் பதிவர். சிவாஜி கணேசனின் பல பழைய படங்களையும்,  பாடல்களையும் பற்றிய பதிவுகள் நிறைந்த தளம். பொதுவான விஷயங்களோடு வேறு பல பழைய படங்களைப் பற்றியும் பேசும் சுவாரஸ்யமான தளம்.

    

56) இதயம் பேத்துகிறது ஜவர்லாலின் திறமைகளை ஓரிரு வரிகளில் சொல்லி விட முடியாது. பாடல்கள் எழுதுவார். இசையமைப்பார். அவரே அருமையாகப் பாடுவார். ஜென் கதைகள், உருப்படு, சிலப்பதிகாரம் (கதை வடிவில்) போன்ற புத்தகங்கள் எழுதியுள்ளார். ஆனந்தத்துக்கு ஒரு மிஸ்ட் கால் என்ற மொழிபெயர்ப்பு நூலையும் எழுதியுள்ளார். 6 சிக்மா பற்றி எழுதுவார். வகுப்பும் எடுப்பார். ஜோக்ஸ் எழுதுவார். ரா கி ர பற்றிய இவரின் அஞ்சலிக் கட்டுரை இங்கே.

    

57) என் ஜன்னலுக்கு வெளியே எழுத்தாளர் மாலனின் வலைப்பூ. குறிப்பிட்டு எதையும் சொல்லாமல் பக்கத்தைத் திறந்து பிடித்ததைப் படித்து ரசிக்கலாம்!  

   ========================    =========================    ===================

  

வலையால் விளையும் நன்மைகள்! 

ஒருவர் வலைப்பதிவர் ஆவதால், என்ன நன்மை? 

   

# நிறைய படிக்க வாய்ப்பு - எழுதுகின்ற ஆர்வம் எழும்போதே, அந்தப் பதிவிற்காக, பல தளங்களுக்குச் சென்று, படிக்கவும் ஆர்வம் ஏற்படும். உங்கள் எழுத்துக்களில் நாளுக்கு நாள் மெருகு ஏறும். நல்ல எழுத்தாளராக உருவாவீர்கள்! 

    

# உங்கள் தளத்தில் / பதிவில் படங்கள், காணொளிக் காட்சிகள் இணைக்க உங்கள் காமிராவை பயன்படுத்தியும், பெயிண்ட் போன்ற படம் வரைகின்ற மென்பொருள் உபயோகித்தும், விண்டோஸ் மூவி மேக்கர் கொண்டு குறும்படங்கள் தயாரித்தும், உங்கள் படைப்பாற்றல் திறனை வளர்த்துக் கொள்ள உதவியாக இருக்கும்.  

   

# வலைப் பதிவர் என்றால், கட்புலன் / காண்பு நிலை (visibility), பதிவிடாத மனிதர்களை விட கொஞ்சம் அதிகம் உண்டு. இந்த காண்பு நிலையை நல்ல விதத்தில் பயன்படுத்தி, சமுதாய / சுய முன்னேற்றத்திற்கு உபயோகித்துக் கொள்ளலாம். 

     

# வலைப் பதிவர் ஆனால், உங்களைப் பார்த்து, பேச, பழக, பலர் ஆர்வம காட்டுவார்கள். (கொலுவுக்குக் கூப்பிட்டு, சுண்டல் கூட கொடுப்பார்கள்!) பெரும்பாலும் அவர்கள் உங்கள் கருத்துடன் ஒத்துப் போகின்றவர்களாக இருப்பார்கள். அந்த அறிமுகங்களை சமூக நெட் வொர்க்கிங் வகையில் சமயோசிதமாக பயன்படுத்திக் கொள்ளலாம். (அப்பாதுரை சாருக்கு நெட் வொர்க்கிங் பற்றி நிறையத் தெரியும். சந்தர்ப்பம் கிடைத்தால், அவரை இது பற்றி மூன்றாம்சுழியில் எழுதச் சொல்லுங்கள்) 

     

# வலைப் பதிவருக்கு வலை மூலமாக நண்பர்கள் அதிகம் பேர் அமைவார்கள். உலகில், அதிக நண்பர்களைப் பெற்றவர்களே பாக்கியசாலிகள். அவர்களுக்கு என்றும் தனிமை இல்லை. 

          

# எல்லாவற்றுக்கும் மேலாக, 'வேலையில்லா மனிதனின் மனம், பிசாசுகள் உலாவும் வனம்' (An idle brain is devil's workshop) என்று கூறுவார்கள். வலைப்பதிவராகி, மூளைக்கும், மனதுக்கும், கைகளுக்கும், கணினிக்கும் பயிற்சி கொடுத்து, படைப்பாற்றலைப் பெருக்கிக் கொள்ளலாமே! 

            

  ========================    =========================    ===================  

         

நாளை சந்திப்போம்!