வலையும்,திரையும்

மெத்தப் படித்தவர் முதல் பாமரர் வரை அனைத்துத் தரப்பினரையும் ஈர்ப்பது திரைப்படக்கலை.  இணையத்தில் இன்று வெளிவரும் பதிவுகளில் [கிட்டத்தட்ட எண்பது விழுக்காடு என்று கூடச்சொல்லி விடலாம்] திரைப்படங்கள் குறித்த பதிவுகளே பெரும்பான்மை இடத்தைப்பெற்றிருக்கின்றன. இந்தப் பதிவுகளின் எண்ணிக்கை கூடுதலாக இருந்தபோதும் தர அடிப்படையில் கணிக்கும்போது பெரும்பாலானவை கொஞ்சம் பின் தங்கித்தான் போய் விடுகின்றன .இவ்வாறு சொல்வது ஒரு சிலருக்கு சற்றுக் கசப்பாகக் கூட இருக்கலாம்...என்ன செய்வது..? உண்மை என்பது எப்போதும் சுடுவதுதானே ...!

கதை,திரைக்கதை,இயக்கம்,இசை,ஒளிப்பதிவு,கலைக்காட்சிகள் போன்ற பலவற்றின் கூட்டுக் கலவையும்,பலதுறை வல்லுநர்களின் முயற்சியும்தான் திரைப்படம் என்னும் ஊடகத்தை சாத்தியப்படுத்திக் கொண்டிருக்கின்றன என்பது அனைவரும் அறிந்ததுதான். ஆனாலும் பிடித்த நடிகர்களையும்,ஒரு சில கொச்சையான,தட்டையான சொற்களையும் முன் வைத்தே ஏராளமான திரைப்பதிவுகள் இன்று வலையில் வெளியாகிக் கொண்டிருக்கின்றன.

எல்லோருக்கும் எல்லா நுட்பமும் தெரிந்திருக்க முடியாது; அதற்கான அவசியமும் இல்லைதான்...ஆனாலும் விமரிசனம் என்று வரும்போது சொந்த விருப்பு வெறுப்புக்களச் சற்றே ஒதுக்கி வைத்து - எது தரமானது,எது தரமற்றது..அதற்கான காரணங்கள் என்ன என்று தர்க்க பூர்வமாக அலசும் திரை சார்ந்த பதிவுகளும்,தமிழின் தரமான படங்களோடு பிறமொழிப்படங்களையும், உலகப்படங்களையும் அறிமுகம் செய்து வைக்கும் பதிவுகளுமே திரைக்கலை பற்றிய புரிதலுக்கு வழியமைக்கும்.

அத்தகைய பதிவுகள் சில இன்றைய அறிமுகமாக....
மதுரை காமராசர் பல்கலைக்கழகத்தில் எனக்கு அறிமுகமான இரு பேராசிரியர்கள் திரு.மு.ராமசுவாமியும்,திரு அ.ராமசாமியும்.இருவருமே நாடகக் கலையில் தேர்ந்தவர்கள்.அதன் தொடர்ச்சியாகவும் நீட்சியாகவும் திரைக்கலையில் ஆர்வம் காட்டுபவர்கள்.திரை சார்ந்த கட்டுரைகளை எழுதுவதில் நுட்பமான தேர்ச்சி பெற்றவர்கள்.

மதுரை நகரில் நிஜநாடக இயக்கத்தைத் தோற்றுவித்துப் பல புது நாடக முயற்சிகளை நிகழ்த்திக் காட்டியிருக்கும் திரு மு.ராமசுவாமி அவர்கள், தஞ்சைத் தமிழ்ப்பல்கலைக்கழகப் பேராசிரியர்;நாடகத் துறையின் தலைவர். கன்னத்தில் முத்தமிட்டால், நான் கடவுள்,சண்டக்கோழி,பருத்திவீரன் போன்ற சில படங்களிலும் கூட அவரைப் பார்த்திருக்கலாம். அண்மையில் டிராமாசுவாமி என்னும் தளம் தொடங்கித்  தன் எழுத்துக்களைப்பதிவு செய்து வரும் அவர் வாகைசூட வா,

மற்றும் வழக்குஎண்18/9 ஆகிய திரைப்படங்களைக் குறித்த அருமையான விமரிசனங்களைத் தன் தளத்தில் வழங்கியிருக்கிறார்.வழக்குஎண்18/9 பற்றிய அவரது விமரிசனம் காணொளியாகவும்...அதே தளத்தில் கிடைக்கிறது.

அ.ராமசாமி எழுத்துக்கள் என்னும் பெயரில்தன் கட்டுரைகளை எழுதி வரும் பேரா.அ.ராமசாமி அவர்களும் நாடக ஆர்வலரே. புதுவை நாடகப்பள்ளியிலிருந்து திருநெல்வேலி மனோன்மணீயம் பல்கலை சென்ற இவர், இப்போது வருகைதரு பேராசிரியராகப்பணி புரிவது போலந்து நாட்டின் வார்சாவில்.இலக்கிய விமரிசனக்கட்டுரைகளோடு திரைப்படங்கள் குறித்த ஆழமான கட்டுரைகளையும் இவரது தளத்தில் அடிக்கடி காணலாம். உயிர்மை போன்ற சிற்றிதழ்களில் வெளியான சினிமா சார்ந்த கட்டுரைகளையும் வலையில் வெளியிட்டு வரும் அ.ராமசாமியின் அண்மைக்கட்டுரையான
நல்ல திரைப்படங்களைத் தெரிவு செய்யும் பாதைகள்: பகுப்பாய்வை நோக்கிய ஒரு ரசிகனின் பயணம் என்னும் பதிவு, தமிழ்த் திரைப்படம் குறித்த ஒட்டுமொத்தமான ஒரு பார்வையை முன் வைக்கிறது.

வணிகப்படம்,கலைப்படம் என்று பிரித்துக் கொள்ளாமல், தமிழ்ப்படம், பிற இந்தியமொழிப்படம், உலகத் திரைப்படம் எனப் பல மொழிப்படங்களையும் அலசிப் பிழிவதோடு திரைப்படம் சார்ந்த பொதுவான பார்வைகளையும் எந்தச் சமரசமும் அற்ற கறாரான பாணியில் பதிவு செய்யும் தளம் சுரேஷ் கண்ணனின் பிச்சைப்பாத்திரம். இவரது அண்மைப்பதிவுகளான நீர்ப்பறவையும்,  

இங்கிலீஷ்-விங்கிலீஷ் திரைப்படம் பற்றிய சசியின் இந்திய லட்டும் அமெரிக்க ஆங்கிலமும் என்னும் கட்டுரையும் உங்கள் பார்வைக்கு.

மேலோட்டமான பார்வை தவிர்த்து ஆழமான திரைப்படக் கட்டுரைகளை வழங்கும் மற்றொரு பதிவர் தில்லியில் வசிக்கும் நண்பர் வெ.சந்திரமோகன்.மிகச் சிறந்த ஓவியரும்,இலக்கிய வாசிப்பில் ஆர்வம் கொண்டவருமான  இவரது திரைப்பார்வை கூர்மையான அவதானிப்புக் கொண்டது.சந்தனார் என்னும் வலைப்பூவில் தன் கட்டுரைகளை எழுதி வரும் இவரது களவாடும் கலையா சினிமா? என்னும் பதிவு தமிழ்த் திரை பற்றிய பல உண்மைகளைத் துணிச்சலாக விண்டு வைக்கிறது.

இளையராஜா : உயிரில் கலந்த இசை..என்னும் சந்திரமோகனின் கட்டுரையும் திரை இசை குறித்த கட்டுரைகளில் சிறந்த ஒன்று.

மாற்று சினிமாவுக்கான தேடல் உள்ளவர்கள் விரும்பும் தளமான தமிழ்ஸ்டூடியோ.காம். திரைப்படம்,குறும்படம் பற்றிய பற்பல தகவல்களையும் தொகுப்புக்களையும் தரும் ஆவணக்காப்பகம் போல விளங்கி வருகிறது. குறும்பட ஆர்வலர்கள் எடுத்த தரமான படங்களும் இத் தளத்தில் உண்டு. சான்றுக்கு ஈழத் தமிழ்க்கவிஞர் சுமதி ரூபனும் அவர் கணவர் ரூபனும் எடுத்துள்ள மனுஷி என்னும் குறும்படம்....இங்கே .

குற்றப்பரம்பரை என்றே முத்திரை குத்தப்பட்ட இனம் பற்றித் தெரியாதவர்கள் காவல் கோட்டம் நாவல் மூலம் கொஞ்சம் தெரிந்து கொண்டிருக்கலாம்.அந்த இனத்தின் ஒடுக்கம் குறித்த ரேகை என்னும் குறும்படத்தை அறிமுகம் செய்திருக்கிறார் தில்லியிலிருந்து ராகவன் தம்பி என்னும் புனை பெயரில் எழுதும் வடக்கு வாசல் ஆசிரியர் யதார்த்தா பென்னேஸ்வரன்.

4/12 தேதியிட்ட சொல்வனம் இதழில் மிக அற்புதமாக அறிமுகம் செய்யப்பட்டிருக்கும் எறும்புகளின் கதறல் என்ற ஈரானியப்படம் குறித்த பதிவும் உலகப்படம் பற்றிய புரிதலுக்கு ஏற்றது.

பி.கு;
நல்ல தரத்திலான வேறு சில திரைவிமரிசனப்பதிவுகளை வாசகர்களாகிய  நீங்களும் பின்னூட்டங்களில் பகிர்ந்து கொள்ளலாமே....