திருவரங்கமும் வைகுண்ட ஏகாதசியும்!

 வலைச்சரம் – 2 – மலர் - 6

108 திவ்யதேசங்களில் முதன்மையான திவ்ய தேசமாம், பூலோக வைகுண்டம் என்று சொல்லப்படுகிற திருவரங்கத்தில் ரங்கநாதர் பள்ளி கொண்டுள்ளார். திருவரங்கத்தில் பிறந்தவர்களுக்கு முக்தி கிடைக்குமாம். மூலவர் ரங்கநாதர் வானுலகிலிருந்து மண்ணிற்கு வந்தவர். தாயார் ரங்கநாயகி வில்வ மரத்தடியிலிருந்து எழுந்தருளியவள். படி தாண்டா பத்தினி. உற்சவங்கள் எல்லாம் சன்னிதி உள்ளேயே தான். இராமனுஜருக்கு மோட்சம் கிடைத்து "தானே உகுந்த திருமேனியாக" கோவில் உள்ளேயே உள்ளார்.

இங்கு ஆண்டு முழுவதும் உற்சவங்கள் தான். ரங்கனின் வரவை கேள்விப்பட்டவுடனேயே சின்னஞ்சிறு சிறுமிகள் முதல் வயதான மூதாட்டி வரை உற்சாகத்துடன் வாசல் தெளித்து தெருவையடைத்து போடும் இரட்டை இழைக் கோலங்களும், கொள்ளையான பூக்களும், நம் நாட்டு கலாச்சாரங்களை தெரிந்து கொள்ள கூட்டம் கூட்டமாக வரும் வெளிநாட்டவர்களும், காவிரியும், கொள்ளிடமும், கதை சொல்லும் கோபுரங்களும், நேரம் காலம் பாராது பெருமாளையும், தாயாரையும் தங்கள் உடல்நலத்தை கூட பொருட்படுத்தாது ஓடோடிச் சென்று தரிசனம் செய்யும் வயதானவர்களும் என நான் வியந்த விஷயங்களை சொல்லிக் கொண்டே போகலாம்.

அதோடு மட்டுமா! சுஜாதா, வாலி, ரா.கி.ரங்கராஜன் போன்ற பிரபலங்கள் பலரும் பிறந்த பூமி அல்லவா! சரி! வாங்க இன்று வைகுண்ட ஏகாதசி. திருவரங்கமே ரங்கனைக் காண களைகட்டியிருக்கிறது. நாமும் பதிவுகள் மூலம் ரங்கனை தரிசிக்கலாம். புண்ணியமும் உங்களை வந்து சேரட்டும்.

ஸ்ரீகிருஷ்ணரே ஒரே வழி சரணாகதி என்ற வலைப்பூவில் காட்டுமன்னார் கோவிலைச் சேர்ந்த கலையரசன் கலியப்பெருமாள் என்பவர் திருவரங்க கோயிலின் வரலாறையும், அமைப்பையும், சங்க இலக்கியங்களில் திருவரங்கமும் என அருமையாக குறிப்பிட்டுள்ளார் பாருங்களேன்.

நான் தொடர்ந்து தொடரும் தளங்களில் ஆன்மீகம் என்றாலே நம்ம இராஜராஜேஸ்வரி மேடம் பதிவுகள் தான் நினைவுக்கு வரும்... திருவரங்கத்தை பற்றியும் நிறைய பதிவுகள் எழுதியிருக்காங்க... இன்றைய அவர்களின் பதிவை இங்கே பாருங்க..

அம்மன் தரிசனம் என்ற தளத்தில் வைகுண்ட ஏகாதசியை சிறப்பாக சொல்வதற்கான காரணத்தை பகிர்ந்துள்ளார்கள்.

கருட சேவை என்ற வலைப்பூவில் திருவரங்க கோயிலில் காணப்படும் மிகப்பெரிய கருடாழ்வார் பற்றியும், அமிர்த கலச கருடனைப் பற்றியும் பகிரப்பட்டுள்ளது. சில கருட சேவைகளையும் கண்ணார நீங்கள் காணலாம் இத்தளத்தில்!

தன்னுடைய பெயர் சொல்ல விருப்பமில்லை என்று சொல்லும் இந்த தளத்தில் வைகுண்ட ஏகாதசியின் சிறப்புகளும், சொர்க்க வாசல் என்பதை விட பரமபத வாசல் என்று சொல்ல வேண்டும் என்று சொல்கிறார் பாருங்களேன்.

திருப்பாற்கடல் என்ற தளத்தில் நம்மாழ்வார் முக்தி அடைந்த நாளே வைகுண்ட ஏகாதசியாகும் என்றும், அரையர் சேவை என்று ஏன் சொல்கிறோம் என்றும் தகவல் தந்திருப்பதை பார்க்கலாமா?

மதுரைக்காரன் வலைப்பூவில் அரங்கநாத கோயிலின் வரலாறு சிறப்பாக சொல்லப்பட்டுள்ளது.

வைகுந்த ஏகாதசி என்ற தளத்தில் திருவாய்மொழித் திருநாள் என்றால் என்ன? அதன் சிறப்புகளும் குறிப்பிடப்பட்டுள்ளது… கூடவே பல கோவில்களின் பெருமாள்களை தரிசித்து புண்ணியம் பெறுவோம்.

BHAKTHI PLANET என்ற தளத்தில் நிரஞ்சனா என்பவர் வைகுண்ட ஏகாதசியின் சிறப்புகளையும், சொர்க்க வாசல் என்று பெயர் வந்ததன் காரணத்தையும் குறிப்பிட்டுள்ளார் – பாருங்களேன்.

தில்லியை அடுத்த நொய்டாவின் செக்டர் 34-ல் உள்ள விஷ்ணு சகஸ்ரநாம சத்சங்கத்தினர் தங்களது வலைப்பூவில் வைகுண்ட ஏகாதசி தோன்றியது ஏன்? என்று குறிப்பிட்டு பல தகவல்களை பகிர்ந்துள்ளனர்.

அரங்கனுக்கு உற்சவங்களின் போது அணிவிக்கப்படும் பாண்டியன் கொண்டை வந்த வரலாறைப் பற்றி கீதா மாமியின் ஆன்மீக பயணம் வலைப்பூவில் பார்க்கலாம்…

தமிழ்க் களஞ்சியம் என்ற தளத்தில் ஸ்ரீரங்கப் பெருமைகளை பார்க்கலாம்.

அமிர்த கெளரி என்பவர் அறிவோம் ஆன்மீகம் என்ற தளத்தில் வைகுண்ட ஏகாதசியை பற்றி சொல்வதைப் பாருங்களேன்.

தமிழுக்கு ஏற்றம் தரும் விழா என்ற தலைப்பில் சோழ நாட்டு திவ்ய தேசங்களை பற்றி பகிரப்பட்டுள்ளது. நானும் அதில் ஒன்றை இன்னும் தரிசிக்கவில்லை.

கோவை கமல் என்பவர் வைகுண்ட ஏகாதசி விரதத்தை கடைபிடிக்க வேண்டிய முறைகளை குறிப்பிட்டுள்ளார்..

வாழ்க பாரதம்! வளர்க இந்தியா என்ற வலைப்பூவில் காணப்படும் வைகுண்ட ஏகாதசியின் சிறப்புகள் பாருங்களேன்..

எல்லோருக்கும் பதிவுகள் மூலம் தரிசனம் கிடைத்ததா? இவ்வளவு சிறப்புகள் மிக்க திருவரங்கத்தில் என் மகள் பிறந்ததற்கும், நாங்கள் தற்சமயம் வசிக்குமிடமாகவும் இருப்பதில் மிக்க மகிழ்ச்சியடைகிறோம்.

நாளையோடு இந்த வலைச்சர பணி நிறைவடையப் போகிறது. நாளை என்ன தலைப்பில் பார்க்கப் போகிறோம் என்று யோசித்துக் கொண்டிருங்கள். 

மீண்டும் நாளை சந்திப்போம்,

ஆதி வெங்கட்

திருவரங்கம்.