இடுக்கண் களைவது... நட்பு. இது நேச வலைச்சரம்

இது... இமாவின் உலகின் இன்னொரு பக்கம்.

இமாவில் உலகம் உதித்த சமகாலத்தில், நண்பிகள் சிலரது வலைப்பூக்களும் மலர்ந்தன. ஆளை ஆள் மாற்றி, தும்பை விட்டு வாலைப் பிடித்துக் கலாய்த்துக் கருத்துச் சொல்லுவோம். அது ஒரு அழகிய காலம்.

அந்தக் கூட்டத்தில் நான்தான் சற்றுப் பெரியவளாக இருந்திருப்பேன். வலையுலகில் வயது மனதுக்குத்தான். இவர்களோடு சேர்த்து நானும் குழந்தையானேன். பின்பு ஒருவர் மற்றொருவரை அறிமுகம் செய்ய.. ஒருவர் இன்னொருவருக்கு ஏதாவது ஒன்றில் உதவ என்று எங்கள் வட்டம் பெரிதாகிற்று. எல்லோரையும் அறிமுகம் செய்ய விரும்பினாலும்... இடுகை நீண்டுவிடும் என்னும் காரணத்தால் மிகச் சிலரை மட்டுமே இங்கே குறிப்பிடுகிறேன்.

என் பக்கம் அடிக்கடி வரும் செல்ல மியாவுக்குப் பிடித்ததெல்லாம் உங்களுக்கும் பிடிக்கிறதா! இங்கே புதுமையான ஒரு வகை ரொட்டிக்கான சமையற்குறிப்பு கொடுத்திருக்கிறார். என் எழுத்து இதுவென்றாலும்... உண்மையில் தலைப்பு  'பெண் எழுத்து' என்று நினைவு. எப்போதும் நகைச்சுவையைக் கூடவே கொட்டி எழுதி வைப்பதால் இவர் வலையில் நான் தேடிய இடுகை, இந்த இடுகை வெளியாகும்வரை என் கண்ணில் படவேயில்லை. :-)

எனக்கு 'ஐரிஸ் ஃபோல்டிங்' வேலைப்பாட்டை அறிமுகம் செய்து வைத்தவர் வானதி. சுவையாகக் கதை சொல்லும் இவர்... 100% கற்பனையாக எழுதிய கதை.. சோளப் பொரிக்கு சண்டை போடுவியா? வேலை கிடைத்தும் வலைப்பூவைக் கைவிடவில்லை. மாறாக அங்கு கிடைக்கும் அனுபவங்களையே கதைகளாக்கிவிடுகிறார். யாயாவா? சுறாவா? என்று ஒரு கதை, படித்துப் பாருங்கள்.

மகிஸ் ஸ்பேஸ் மகிக்கு மஞ்சள் நிறம் பிடிக்கும். இயற்கை பிடிக்கும். சமையல் அதிகம் பிடிக்கும். 

எனக்குப் சரம்கட்டக் காட்டிக் கொடுத்தவர் இவர். மாட்யூலர் ஒரிகாமியும் செய்திருக்கிறார் இங்கே... சுட்டி அந்தப் பிரிவுக்கே கொண்டுபோய் விடும், பாருங்கள்.

என்னை ஈர்த்தது.... இவர்கள் குழந்தை மனம். மழலைகள் என்று எண்ணித் தவிர்த்தால் தப்பு. திடீரென்று 'அட!' என்கிற மாதிரி அழகாக ஒரு இடுகை வரும். கிராமத்து கருவாச்சியையும், அன்பை விட ஆயுதம் எதுவுமில்லாத சிவாவையும்தான் சொல்கிறேன். கலைநயத்துடன் கலையின் மனவலி... என்னை மன்னித்துவிடு சகோதரி. & தெருவோரச் சிறார்கள் . சிவாவின்.. தேடல் இங்கே. 

பிரியசகி சமீப காலமாக சங்கீதத்தில் மூழ்கியிருக்கிறார். :-) முன்பு!! வேலியும் மரங்களும் பற்றிச் சொன்னார். இவர் இடுகைகள் அனேகம் ஜெர்மன் அனுபவங்கள் பற்றியதாக இருக்கும் அல்லது தன் கைவேலையை இடுகையாகக் கொடுத்திருப்பார். பிரியா செய்த அழகிய காகிதப் பூக்கள் இங்கே காண்க.

நிஜமான காகிதப் பூக்கள் இங்கே கிடைக்கும். மங்குஸ்தான் பழம், சணல், வெண்ணெய் சுற்றி வந்த காகிதம் என்று எதை வேண்டுமானாலும் மீள்சுழற்சி செய்வார். 

இங்கே... இளையநிலா பொழிகிறது, ஏராளமான கவிதைகளும் க்வில்லிங் கலையுமாக. சில மாதங்கள் நாம் வலையுலகில் காணாதிருந்த இளமதி, அன்னையின் பிரிவுத்துயரிலிருந்து மெதுவே மீண்டு அன்னைக்குச் சமர்ப்பணமாக சில குறட்பாக்களோடு இந்த இடுகையை வெளியிட்டிருக்கிறார். மீண்டும் ஒளிவீச வருக இளமதி. 

வேலைகள், குடும்பச் சூழல் என்று ஏதோவொரு முக்கிய காரணத்தால் வலைப்பூக்களுக்கு விடுமுறை விட்டிருக்கும் நட்புக்களும் இருக்கிறார்கள். பொழுது இல்லையென்பது இல்லை. வலையுலகு வந்தால் வலையில் மாட்டிக்கொள்வோம், இருக்கும் நேரம் பனியாய்க் கரைந்து போகுமே என்னும் எண்ணம். :-)

ஜீனோ... பிரம்மா சுஜாதா. :-) ஜீனோ தமிழ் வலையுலகில் தனக்கென ஒரு குட்டி மூலையை வைத்திருந்தது. ஜீனோ பாடிய வாத்துப் பாடல் இங்கே. ;) இப்போ ஒரேயடியாக எங்கோ ஒளிந்திருக்கிறது ஜீனோ. 

ரத்தமின்றி.. கத்தியின்றி.. விஞ்ஞான புனைகதையொன்றை இயற்றிய பூங்கதிர்தேசத்தைச் சேர்ந்த சந்தனா மூன்றாம் முறை ஊர் சுற்றி வந்ததன்பின் சத்தமின்றி ஒளிந்துகொண்டார். ;(

இப்போது... இமாவும் ஒளிந்துகொள்ளவா!

மீண்டும் நாளை சந்திப்போம்.

இன்றைய நாள் உங்கள் அனைவருக்கும் நன்மை பயக்கும் நாளாக அமையட்டும்.

_()_