நீருக்குள் மஹாலும், குல்ஃபியும்!

சரம் – மூன்று மலர் – நான்கு

உலகம் முழுவதும் உள்ள நட்புகள் அனைவருக்கும் புத்தாண்டு வாழ்த்துக்களை வலைச்சரம் மூலம் சொல்லிக் கொள்கிறேன். புதிதாக பிறந்திருக்கும் இந்த ஆண்டில் எல்லோருக்கும் எல்லாமும் கிடைக்க வேண்டும். நல்லதே நடக்கட்டும்.

இன்று வைகுண்ட ஏகாதசி. லட்சக்கணக்கான பக்தர்கள் இங்கே திருவரங்கத்தில் குழுமியுள்ளார்கள். பகல்பத்து உற்சவங்கள் முடிந்து இனி ராப்பத்து உற்சவங்கள் நடைபெறும். நேற்று நம்பெருமாள் நாச்சியார் திருக்கோலத்தில் காணப்பட்டார். வைகுந்த வாசல் வழியாக கடந்து இன்று சிறப்புமிக்க ரத்னங்களை அங்கியாக அணிந்து கொண்டு, திருமாமணி மண்டபம் என்று சொல்லப்படுகிற ஆயிரங்கால் மண்டபத்தில் காட்சியளிப்பார்.

சரி! நாம் ஜெய்ப்பூர் பயணத்தை தொடர்வோமா? ஆமேர் கோட்டையிலிருந்து புறப்பட்டு அடுத்து நாங்கள் சென்றது ”JAL MAHAL” என்று சொல்லப்படுகிற ஏரிக்கு நடுவில் இருந்த மஹால் பார்க்க…. அழகாக அமைக்கப்பட்ட இந்த மஹாலில் ராஜாக்கள் ஓய்வு எடுக்க வருவார்களாம். உள்ளே செல்ல அனுமதியில்லாததால், அங்கே கிடைக்கும் சுவையான குல்ஃபியை ரசித்து சாப்பிட்டுக் கொண்டே சாலையில் நின்று ஜல்மஹாலின் எழிலை பார்த்து ரசித்தோம்.

நாங்கள் சென்றது ஏப்ரல் மாதத்தில் என்பதால் அந்த வெயிலுக்கு அங்கு கிடைத்த ருசியான குல்ஃபிக்களை அந்த இரண்டு நாட்களும் முடிந்த வரை சாப்பிட்டோம். அப்போ அதன் விலை பத்து ரூபாய் மட்டுமே.

வட மாநிலங்களில் பாதாம், பிஸ்தா, முந்திரி போன்றவை அதிகம் கிடைக்கும் என்பதால் பத்து ரூபாய் குல்ஃபியிலும் ஏராளமாய் இந்த உலர்பழங்கள் இடப்பட்டிருந்தன. குல்ஃபியின் குச்சியில் ஒரு பேப்பர் தட்டை குத்தி தருகிறார்கள். ஒழுகினாலும் தட்டிலேயே இருக்கும் இல்லையா! நல்ல ஐடியா! சுண்டக்காய்ச்சின பாலில் இடப்பட்ட உலர்பழங்களும் சேர்ந்து அபார சுவை. இன்றும் அந்த சுவை என் நாவில்…:)

அடுத்து என்ன! நாங்கள் தங்க ஒரு இடத்தை தேட வேண்டுமே. முன்கூட்டியே பதிவு செய்து கொள்வது எப்போதுமே நல்லது. நாங்கள் திடீரென புறப்பட்டதால் சிரமப்பட்டு ஒருவழியாக ஏற்பாடு செய்தாகிவிட்டது. கொஞ்சம் ஓய்வு எடுத்துக் கொண்டு மாலையில் கிராமத்து சூழலுக்கு சென்று வரலாம் என்று என்னவர் சொல்ல, எங்கே என்று யோசித்தபடி உறங்கிப் போனேன்.

நீங்களும் நாளை வாருங்கள் – எங்கு சென்றோம் என்பதை நாளை சொல்கிறேன்.

சரி! இன்றைக்கான வலைச்சர அறிமுகங்களைக் காணலாம்!

உள்ளத்து உணர்ச்சிகளுக்கு வார்த்தைகளில் உயிர் கொடுத்தால் உண்மையில் ஜொலிக்கும் என்று தன்னுடைய தளத்தில் சொல்லும் ஜி.எம்.பி சார் தன்னுடைய  நினைவடுக்குகளிலிருந்து பயண அனுபவங்களை இங்கேபகிர்ந்து கொள்கிறார்.

காவியக்கவி என்ற தளத்தில் இனியா அவர்களின் கவிதைகள் நிறைய உண்டு.  ஒரு பானைச் சோற்றுக்கு ஒரு சோறு பதமாக இதோ இங்கே!

ராஜ்மாவில் சப்ஜி செய்து தான் சாப்பிட்டிருக்கிறேன். இங்கே மேனகா சாத்தியா அவர்களின் சசிகாவின் கிச்சனில் ராஜ்மா கட்லெட் செய்வது எப்படி என்பதை பார்த்து நீங்களும் அதைச் சுவைக்கலாம்!

தேனம்மை லெஷ்மணன் அவர்களின் சமையல் தளம். இங்கே பண்டிகைக் கால நைவேத்தியங்கள் ஏராளமாக இருக்கு. Sample பதிவாக இங்கே ஒன்று..

தில்லையகத்து துளசிதரன் சார் அவர்களின் பிரிவு தரும் வேதனை…. பிரிந்து போகா வேதனையை வாசித்துப் பாருங்களேன்!

என்ன நண்பர்களே, இன்றைய பதிவினை ரசித்தீர்களா? நாளை வேறு சில பதிவர்களின் இணைப்புகளோடும், பயணம் பற்றிய குறிப்புகளோடும் சந்திக்கிறேன்!

நட்புடன்

ஆதி வெங்கட்

திருவரங்கம்.