இணையத்தில் தமிழ் !

" தமிழ் இனி மெல்ல சாகும் " என்ற பயமொழி சற்றே மிகைபப்டுத்தப்பட்டதாகத் தோன்றினாலும் உலகின் மற்ற எந்த மொழிகளை விடவும் தமிழ் மொழியின் அழிவுக்கான ஆபத்து அதிகம்.

அரசியல் காரணங்களுக்காகத் திட்டமிடப்பட்ட மொழி தடையை எதிர்கொள்ளும் அபாயம் ஹிந்தியை தவிர்த்த இந்திய மொழிகள் அனைத்துமே எதிர்கொள்ளும் ஒன்றுதான் என்றாலும் " இந்திய தமிழர்களின் " தாய்மொழி மீதான அலட்சியம் அந்த அபாயத்தை இன்னும் அதிகமாக்குகிறது !

 இந்திய சுதிந்திரத்துக்குப் பிறகான மொழி இக்கட்டுகளிலிருந்து தமிழைக் காத்தது பெரியாரில் தொடங்கிய திராவிட எழுச்சி என்பதை யாராலும் மறுக்க இயலாது. ஆனால் அந்தத் திராவிட இயக்கத்தின் கொள்கைகளும் காலப் போக்கில் நீர்த்து போய்விட்ட நிலை !

இத்தனை இக்கட்டுகளிலும் தமிழ் மொழி பற்றிய அறிவு மேலை நாடுகளில் பரவியதற்கும், தமிழ் மொழி இணையத்தில் இடம் பிடித்ததற்கும் இரண்டு முக்கியக் காரணங்கள்...

ஐரோப்பிய மற்றும் ஆஸ்த்திரேலிய பிரதேசங்களில் தமிழ் மொழியை அறியப்படுத்திய பெருமை புலம் பெயர்ந்த ஈழ தமிழர்களையே சாரும். அனைத்தையும் இழந்த கையறு நிலையிலும், தாய் மண்ணில் சிக்கிய ஆன்மாவை மீட்க முடியாமல் வெறும் உயிரை பிடித்துப் புலம் பெயர்ந்த போதிலும் எம்மொழி என்ற பெருமையுடன் செம்மொழி செழிக்கப் பாடுபடுபவர்கள் ஈழத்தமிழர்கள்.

இணையத்தில் துடிப்பாகத் திகழும், அதிகமான பயன்பாட்டாளர்களைக் கொண்ட மொழிகளில் தமிழ் முன்வரிசையில் திகழ்கிறது...

முகநூல், வலைதளம் தொடங்கிக் கைப்பேசிகளுக்கான மென்பொருள், கனிப்பொறி, மற்றும் இணையத் தொழில்நுட்பத்தில் புதிதாய் தோன்றும் எதிலும் தன்னை இலகுவாக இணைத்துக்கொள்ளும் ஆற்றல் பெற்ற மொழியாகத் திகழ்கிறது மூத்த மொழியான தமிழ் !

புதிய தொழில்நுட்பத்தில் தமிழுக்கான இந்தப் பாதை சிலிக்கான் புரட்சி தொடங்கிய காலகட்டத்திலேயே போடப்பட்டுவிட்டது ! கணிப்பொறிகளுக்கான மென்பொருள் பணிக்காக அமெரிக்கா சென்ற தமிழ் இளைஞர்கள் ஆரம்பித்த பணி அது ! மொழி மீதான பற்றினால், தனிப்பட்ட முயற்சிகளினால் அவர்கள் உருவாக்க தொடங்கிய எழுத்துருக்கள், செயலிகள் போன்றவற்றின் பலனால் இணையத்தில் முன்னால் நிற்கிறது தமிழ் !

தமிழைக் காக்கவும் வளர்க்கவும் பாடுபடுவது பெரும்பாலும் சாதாரண மனிதர்கள்தான். திருவள்ளுவர் தொடங்கி ஒளவை வரை அறம் சார்ந்த விசயங்களையும், தன்னலமற்ற தொண்டினையும் போதித்த மொழி என்பதாலோ என்னவோ ஆளும் வர்க்கம் கண்டுக்கொள்ளாத மொழியாகவே தமிழ் வாழ்கிறது !

 கொஞ்சம் சிரித்துவிட்டு இன்றைய அறிமுகங்களைச் சந்திப்போம் !

தன்னைச் சுயபரிசோதனைக்கு உட்படுத்திக்கொள்வதற்குத் தேவையான முதல் தகுதி சுயபகடி !

மூன்று நாட்களாக வலைச்சரத்துக்காகத் தொடர்ந்து தட்டச்சுச் செய்து பழகியதால் மேஜையின் மீது அமரும் போதெல்லாம் தட்டச்சு செய்வதுபோலவே விரல்கள் இயங்குகின்றன... காலையில் காபியில் விரல்களால் அடித்துக் கைகளைச் சுட்டுக்கொண்டேன் !...

இந்த வாரம் முழுவதும் கார்தான்... மெட்ரோ ரயிலோ, பஸ்ஸோ கூடாது என்றிருக்கிறேன்... என் விரல்கள் பிரெஞ்சு கனவாட்டிகளின் முதுகுகளில் தட்டச்சு செய்துவிட்டால் ?!....

சர்தார்ஜி ஜோக்குகளை நான் பிறப்பதற்கு முன்பே பிரபலபடுத்திவிட்டார் குஷ்வந்த் சிங் !!!

ஒரு சர்தார்ஜி ஜோக்...

" இரு சர்தார்ஜிகள் செஸ் விளையாடிக்கொண்டிருக்கிறார்கள் ! "
" ..... "

என்ன ? ஜோக் அவ்வளவுதான் ! புரிந்ததா ?!....



சுறுசுறுப்புக்கும் புதிய தொழில்நுட்பத்தைக் கற்பதற்கும் வயது ஒரு தடையல்ல என்பதற்கு அடையாளமாய் gmbwrites, பூவையின் எண்ணங்கள் என இரண்டு வலைப்பூக்களில் பதியும் ஜி எம் பி அய்யா அவர்கள்... உங்களின் ஆசி எங்கள் அனைவருக்கும் தேவை !

சோழ நாட்டின் பெளத்தம் ஆராய்ந்த, வயது, அனுபவம் தொடங்கி அறிவிலும் மூத்த முனைவர் ஜம்புலிங்கம் அவர்களின் தளங்களின் சிறப்பை நான் சொல்லி அறியத்தேவையில்லை !

அதே போலத் திரு. கரந்தை ஜெயக்குமார் அவர்கள் ! வரலாறே மறந்துவிட்ட வரலாறு படைத்தவர்களுக்கு இணையத்தில் நீங்கா இடம் பிடித்துத் தருபவர் !

முத்துச்சிதறல் என்ற பெயரானாலும் திருமதி. மனோ சாமிநாதன் அவர்களின் தளம் கலைகளும் சிந்தனைகளுமாய்ச் சிதறிய முத்துக்களை ஒன்றாகச் சேர்த்து கோர்த்த நேர்த்தியான முத்தாரம் !

பிரான்சிலிருந்து தமிழ் பணியாற்றும் கி. பாரதிதாசன் அவர்கள்... தமிழ் இலக்கண இலக்கிய மின்வலை நடத்தும் வெண்பா கவி !

எத்தனையோ நினைக்கிறது நெஞ்சம்... சொல்ல முடிந்ததோ கொஞ்சம் எனத் தான் பேச நினைப்பதையெல்லாம் தன் பதிவுகளில் பேசும் மூத்த பதிவர் சென்னை பித்தன் !

எங்கள்பிளாக் என்று ஸ்ரீராம் கூறினாலும் படிப்பவர்கள் நம்ம ஏரியா எனக் கொண்டாடும் வலைப்பூவுக்குச் சொந்தக்காரர் ! பாஸிட்டிவ் செய்தி தொடங்கிப் பஜ்ஜி சொஜ்ஜி வரை எதுவும் கிடைக்கும் தளம் !

டி. என். முரளிதரனின் மூங்கில் காற்று... மூங்கிலிலிருந்து வெளியேறும் காற்றின் இசையைப் போலவே இவரது எழுத்துக்களும் நம் மனம் நிறைப்பவை !

நான் ரசித்துப் படித்தவற்றைப் பகிர்ந்துகொள்ளவே இந்த இணையத்தளம். வேறு எதையும் எதிர்பார்த்து அல்ல என்ற அறிவிப்பு மின்னும் மதுரை தமிழனின் அவர்கள் உண்மைகள் பதிவுகளைப் படித்தவர்களுக்கு அடுத்தப் பதிவு எப்போது என்ற எதிர்பார்ப்பு நிச்சயம் எழும் !

தலைநகரிலிருந்து தமிழ் பரப்பும் நண்பர் வெங்கட் நாகராஜ்... சமூக நிகழ்வுகளைச் சுவைபடச் சொல்லும் இவரது வலைப்பூவின் படங்களும் அருமையானவை !
வெளிச்சக்கீற்றுகளில் மின்னுகிறது சுட்டிப்பெண் ரோஷினி வெங்கட்டின் வருங்கால திறமை !

சமூகத்தின் வலிகள் அனைத்தையும் தன் எழுத்துச் சாட்டைக் கொண்டு சாடுபவர் வலிப்போக்கன். கடுமையான வார்த்தைகளுக்குப் பின்னால் ஒளிந்திருப்பது சமூகச் சீர்க்கேடு பற்றிய இவரது மனதின் வலி !

நிகழ்காலம் மறக்க தொடங்கிவிட்ட பெரியாரின் சிந்தனைத்துளிகளை இணையத்தில் சேமிக்கும் சகோதரி எழில் !

தேன்மதுரத்தமிழின் சங்க இலக்கியம் போற்றும் அதே வேளையில் நம் மூளையின் கதையையும் என்னைப் போன்ற சாமானிய மூளையில் ஏறும் அளவுக்கு எளிமையாய் விளக்கும் கிரேஸ் !

என்னைப் போன்றே பூந்தளிர் படித்து வளர்ந்த என் தலைமுறை நண்பர்... தளிர்சுரேஷின் முதல் கதை கோகுலத்தில் வெளியான செய்தியை படித்த போது எனக்கு உண்டான " செல்ல பொறாமையை " சொல்வதில் எனக்கு எந்தத் தயக்கமுமில்லை ! எண்ணங்களையெல்லாம் சிறந்த எழுத்தோவியமாக்குபவர் !

பதிணென் பருவத்தின் மறையாத என் நினைவுகளில் தங்கிவிட்ட மணவை முஸ்தபா, மணவை பொன்.மாணிக்கம் வரிசையில் இணையத்தில் மணவைக்குப் பெருமை சேர்க்கும் மணவை ஜேம்ஸ் ! தீதும் நன்றும் பிறர் தர வாரா என உரைக்கும் தமிழ் காதலர் !

" சந்தோஷமும் சோகமும் அல்லார்க்கும் எலவசம்பா! இத்த வேணுங்கறவ(ன்) இத்தயும் அத்த வேணுங்கறவ(ன்) அத்தயும் எட்த்துக்கோ நைனா. சாய்ஸ் ஈஸ் யுவர்ஸ்! " அப்டீன்னு ஷோக்கா டைட்டில் காட்டி... சமூக அவலங்கள சாடும் சைதை அஜீஸ் !

எல்லோரிடமும் உண்மையாக இருப்பவன் என்று கூறி, உண்மையானவன் தளம் நடத்தும் சொக்கன் சுப்ரமனியன் அவர்களின் தளம் உண்மையிலேயே அருமை !

படிப்பவரின் மனதில் நின்று இதமாய் வீசுபவை காவியக்கவி நடத்தும் இனியாவின் கவிச்சாரல்கள் !

தமிழ் சமூகத்தின் கேடுகளைக் கண்கள் சிவக்க அகச்சிவப்புத்தமிழில் சாடும் தோழர் இ.பு.ஞானபிரகாசன்... பதிவுகளை மட்டுமல்லாது இவரது பின்னூட்டங்களையும் படித்து வியப்பவன் நான்

எஸ்.பி.செந்தில்குமாரின் பயணங்கள், அனுபவங்கள், சுற்றுலா, சினிமா, ஆன்மீகம், விவசாயம் என எல்லாம் கலந்த கூட்டாஞ்சோற்றைச் சுவைத்தவர்கள் அதன் சுவையை மறக்க மாட்டார்கள் ! எழுத்தின் ருசிக்கு தொடுகையாய் புகைப்படங்களின் சுவை !!




சிந்திக்க... 

" தொட்டில் பழக்கம் சுடுகாடு வரைக்கும் ! " என்பார்கள்... பழகிய ஒன்றிலிருந்து விடுபடுவது அவ்வளவு எளிதல்ல...

ஆங்கில வார்த்தையான HABIT...

H எழுத்தை விலக்கிவிட்டு பார்த்தால் A BIT மிச்சமிருக்கும்...

A எடுத்தாலும் ஒரு BIT இருக்கிறது !

I விலக்கிபார்த்தால் IT IS THERE !

ஆக, நல்லவற்றைப் பழகுவோம் !


தொடருவோம்...


பட உதவி : GOOGLE

இப்பதிவு பற்றிய உங்கள் எண்ணங்களை பதிவு செய்யுங்கள். நன்றி.