வைடூரிய‌ங்க‌ள்!!!

சகோதரர் சீனா அவர்களுக்கு நான் மறுபடியும் நன்றி சொல்ல வேண்டும்!

ஏழு நாட்கள்! அனுபவங்கள், விசாலமான பார்வை இவற்றை சீதனமாகத்தந்த ஏழு நாட்கள்! எத்தனை பதிவர்கள்! கவித்துவம் மிக்க பதிவுகள்! நகைச்சுவையில் இழைந்த எழுத்துக்கள்! சோகங்களில் தோய்ந்த கதைகள்! வலியிலும் உணர்ச்சிப்பிரவாகமாய் வந்து விழுந்த அனுபவங்கள்! நல்லறிவுத்தெளிவைக் கொடுத்த அவற்றையெல்லாம் நவ ரத்தினங்களாய் கோர்ப்பதற்கு மனதிற்கு மகிழ்வாக இருந்தது! பெருமிதமாக இருந்தது!
இதற்கெல்லாம் காரணமாய் இருந்த, எனக்கு இத்தகைய நல்வாய்ப்பு தந்த சகோதரர் சீனா அவர்களுக்கு இதயம் கனிந்த நன்றி!

தினந்தோறும் எனக்கு அருமையான பின்னூட்டம் தந்து, என்னை உற்சாகப்படுத்திய சகோதரர் வை.கோபாலகிருஷ்ணன், திரு. பால கணேஷ், ரூபன், திருமதிகள் ரஞ்சனி நாராயணன், துளசி, கோமதி அரசு, அமைதிச்சாரல், பூந்தளிர், சகோதரர் வெங்கட், ஆதி வெங்கட், திருமதிகள் வேதா, ஸ்ரவாணி, ஆசியா ஓமர், ஏஞ்சலின், திரு.தமிழ் இளங்கோ,  

திருமதி. ராஜராஜேஸ்வரி! மற்றும் அனைவருக்கும் என் மனம் நிறைந்த நன்றி!

அடுத்து என் வலைப்பூவைப்பற்றிச் சொல்ல வேண்டும். கடந்த 2 வருடங்களாகவே நான் அடிக்கடி தமிழ்நாடு செல்ல வேண்டி வந்ததால் நான் விரும்பிய அளவு என்னால் மற்ற‌வர்களின் தளங்களுக்குச் சென்று பின்னூட்டங்கள் கொடுக்க முடிந்ததில்லை. அதையெல்லாம் பொருட்படுத்தாது எனக்கு அவ்வப்போது பின்னூட்டங்கள் கொடுத்து ஊக்கமும் உற்சகமும் தொடர்ந்து அளித்து வரும் அன்புள்ளங்கள் அனைவருக்கும் பின் தொடர்வோர்க்கும் உளமார்ந்த நன்றி!

இங்கே இறுதியாக வைடூரியங்களைப் பதித்து விட்டு அன்புடன் விடைபெறுகிறேன்!!

வைடூரியம் [ CAT'S EYE]

வைடூரியம் லேசான பச்சையும், பழுப்பு நிறமும் கொண்டதாகும். இந்த இரண்டு நிறமும் ஒரே கல்லில் காணப்படுவதோடு நடுவே ஒரு வெண்மை நிறத்தில் கோடு போன்ற அமைப்பும் காணப்படுகிறது.
இதை மேலும் கீழும் அசைத்தால் பூனைக் கண் போலத் தெரியும். இதனாலேயே வைடூரியத்திற்கு  CAT'S EYE என்ற ஆங்கிலப் பெயர் வந்தது.

 மஞ்சள் நிற பிரகாசமும் வெண்ணிற கற்றையும் உடையதே மிக உயர்ந்த வகை வைடூரியமாகும். வைடூரியம் அணிந்தால் தீராத நோய்கள் தீரும் என்று சொல்லப்படுகிறது.

இனி வைடூரிய‌ங்க‌ள் போல் த‌க‌த‌க‌க்கும் ப‌திவ‌ர்க‌ள்....!!!

நகைச்சுவையான எழுத்து தான் இவரது ஸ்பெஷல்! அதை விட்டு வெளியில் வந்து, சின்ன வயதில் உறவுக்காரக் குழந்தைகளுடன் கிணற்றங்கரையில் எரிச்ச குழம்பும் பழைய அமுதுமாய் பாட்டி கையால் வாங்கி சாப்பிட்டது, அதே இடத்தில் காயப்போட்டிருந்த வடாம் மாவை தின்றது, தாத்தா, பாட்டியுடன் பல்லாங்குழி ஆடியது என்று ஏக்கமாக மலரும் நினைவுகள் சிலவற்றை எழுதியிருக்கிறார் சகோதரர் ஆரண்யநிவாஸ் ராமமூர்த்தி!. எல்லோருடைய வாழ்க்கையிலும் இந்த கிணற்றங்கரை, ரயில் விளையாட்டு,  என்று நிச்சயம் நிறைய இருக்கும் ஆனனல் இத்தனை சுவரஸ்யமாகச் சொல்லத் தெரியுமா என்று தெரியவில்லை! இவரின் ஊதி ஓடும் ரயில் பதிவைப்படித்துப்பாருங்கள்!!

தனது மதுரைப்பயணத்தை சுகமான மலரும் நினைவுகளுடனும் இலேசான‌ சோகத்துடனும் அழகாக விவரிக்கிறார் திரு.அனந்து இங்கே!

முழுக்க முழுக்க தன் கிராமத்து நினைவுகளால் ஏக்கம் கொண்டிருக்கும் திரு.அரசன் தன் கிராமத்தைப்பற்றி அழகாக இங்கே எடுத்துரைக்கிறார்!

600 பதிவுகளுக்கு மேல் எழுதி வரும் ஜலீலா சமையல் குறிப்புகள் எழுதுவதில் வல்லவர். அதையும் தவிர மருத்துவக்குறிப்புகள், கட்டுரைகள் என்று எழுதி கலக்குகிறார். இங்கே துபாயில் பாச்சிலர்ஸ் வாழ்க்கை என்று மூன்று பதிவுகள் எழுதியிருக்கிறார்!

திருமதி.ராஜலக்ஷ்மியின் அருமையான பதிவு இது! இன்றைய குழந்தைகளிடமிருந்து காணாமல் போன குழந்தைத்தனத்தை எங்கிருந்து மீட்டுத் தருவது என்று கேட்கிறார் இவர் காண‌வில்லை என்ற‌  பதிவில்! படித்துப்பாருங்கள். இன்றைய யந்திர வாழ்க்கையை பிட்டு பிட்டு வைத்திருக்கிறார்.

அந்தக் கால தாலாட்டுப்பாடல்கள் தனி சுகம். அதையெல்லாம் மிக‌ அருமையாக விவரித்து, இந்தக்கால தாய்மாட்களுக்கு சீரியல்கள் தான் பெரிதாயிருக்கிரது என்றும் ஆதங்கம் கொள்கிறார். நியாயம் தானே?’‘ மாமன் அடிச்சாரோ மல்லியப்பூ செண்டாலே? அத்தை அடிச்சாளோ அரளிப்பூ செண்டாலே?’ போன்ற ஆத்மார்த்தமான பாடல்கள் எல்லாம் வழக்கொழிந்து போய்விட்டதை நினைக்கும்போது இது போன்ற எத்தனையோ நல்ல விஷ‌யங்கள் காலப்போக்கில் காற்றில் மறைந்து விட்டதை நினைத்து அவரைப்போல ஆதங்கம் தான் பெருகுகிறது..

பதிவர்கள் மன உளைச்ச‌லிலிருந்து விடுபட பல யோசனைகள் சொல்லி ஒரு வித்தியாசமான பதிவை எழுதியிருக்கிறார் கிராமத்து காக்கை!

தாயின் பிரிவை நினைத்து மனம் கலங்கி உருகி நெகிழ்கிறார் ரூபன் இங்கே!

சகோதரர் கே.பி.ஜனாவின் ஒரு பக்க சிறுகதைகள் எல்லமே ஆழ்ந்த அர்த்தம் பொதிந்ததாயிருக்கும். இந்த விளையும் பயிர் கூட அப்படித்தான். அவசியம் படித்துப்பாருங்கள்!!

இந்த சிறுகதை ‘ தோடுக்கார தாத்தா’ மனம் நெகிழ வைக்கிறது. எழில் அருமையாய் எழுதி நம்மை மனம் கலங்க வைக்கிறார்!

"குழந்தைகள் உலகில் போட்டி பொறாமையில்லை.சூதுவாது இல்லை.வஞ்சகம் இல்லை.அடுத்தவனுடையதை தட்டிப்பறிக்கும் ஆவேசமில்லை.தனக்குதனக்கு என்று ஒதுக்கி பதுக்கி வைத்துக்கொள்ளும் களவாணித்தனம் இல்லை.அங்கு எல்லாமே திறந்த புத்தகம்தான்.எந்தப்பக்கத்தையும் எவரும் வாசிக்கலாம்..எந்தப் பக்கத்திலும் எவரும் எழுதலாம்.அவர்களின் விரிந்துகிடக்கும் வானத்தில் கொட்டிக்கிடக்கும் அழகிய வண்ணங்களை எவரும் எடுத்து பூசிக்கொள்ளலாம்..எவருக்கும் பூசிவிடலாம்.” என்று குழந்தைகள் உலகை மிக அருமையாக விவரிக்கிறார் திரு.கருணா! அதை நிரூப்பிப்பது போல சிறந்த ஒரு குறும்படமும் உங்களுக்காக அன்பு என்ற தலைப்பில் காத்திருக்கிறது இங்கே!

பொதுவாக எந்த நல்ல விஷயத்தையும் வீட்டிலிருந்து ஆரம்பிக்க வேண்டும் என்று கூறுவது வழக்கம். வீடு நன்கிருந்தால் நாடு நன்கிருக்கும்  என்பதும் முதுமொழி. இப்போதெல்லாம் குழந்தைகள் தமிழ் மொழி கற்று எழுதுவதும் படிப்பதும் அரிதாகி விட்டது. இங்கு ரமா நம் தாய்மொழியை மறந்து விடாமல் தன் பெண்களுக்கு கற்றுக்கொடுத்து அவர்களின் தமிழார்வத்தை வளர்த்து, நல்ல விஷயத்தை வீட்டிலிருந்தே ஆரம்பிக்கிறார்!

உடல் உறுப்பு தானம் செய்வது பற்றி இங்கே கோவி.கண்ணன் விரிவாக எழுதியிருப்பது பாராட்டத்தக்கது.

தந்தைக்கே உபதேசம் செய்த முருகக்கடவுள் போல, இங்கே அன்னைக்கே உபதேசம் செய்யும் மகனின் வார்த்தைகள் ‘ அவன் பெரியவன்!’ என்ற பூரிப்பைக் கொடுக்கிறது அந்த தாயின் மனதிற்கு! கிருஷ்ணப்ரியா மிக அழகாக எழுதியிருக்கிறார் இங்கே!