பாரம்பரியம் காட்டும் பைந்தமிழ்ச் சான்றுகள்

வணக்கம் நண்பர்களே...

செந்தமிழ் நாடெனும் போதினிலே இன்பத்

தேன்வந்து பாயுது காதினிலே- எங்கள்

தந்தையர் நாடென்ற பேச்சினிலே- ஒரு

சக்தி பிறக்குது மூச்சினிலே 

- பாரதியார்

தொன்றுதொட்டே தமிழ் மக்கள் வாழ்ந்த நிலப்பரப்பு தமிழகம் என்ற பெயரால் அழைக்கப்பட்டது என்று புறநானூறும் சிலப்பதிகாரம் மணிமேகலை போன்ற காப்பியங்களும் சான்று காட்டுகின்றன.

வையக வரைப்பில் தமிழகம் கேட்ப 

(புறநானூறு, 168 :18)

இமிழ் கடல் வேலித் தமிழகம் விளங்க 

(பதிற்றுப்பத்து, இரண்டாம் பத்து, பதிகம்: 5)

இமிழ் கடல் வரைப்பில் தமிழகம் அறிய 

(சிலப்பதிகாரம், அரங்கேற்றுகாதை: 38)

சம்புத் தீவினுள் தமிழக மருங்கில் 

(மணிமேகலை, 17: 62)

இரண்டாயிரத்து ஐந்நூறு ஆண்டுகளுக்கும் மேல் பழைமை வாய்ந்த இலக்கிய மரபைக் கொண்டது நம் தமிழ் மொழி. இந்தியாவில் கிடைத்துள்ள ஏறத்தாழ 100,000 கல்வெட்டு, தொல்லெழுத்துப் பதிவுகளில் 60,000-த்திற்கும் அதிகமானவை தமிழகத்தில் கிடைத்திருக்கின்றனவாம். இவற்றில் ஏறத்தாழ 95 விழுக்காடு தமிழில் உள்ளன என்பது வியப்பும் பெருமையும் தரவல்ல செய்தியல்லவா!

கனியிடை ஏறிய சுளையும் முற்றல்

கழையிடை ஏறிய சாறும்

பனிமலர் ஏறிய தேனும் காய்ச்சுப்

பாகிடை ஏறிய சுவையும்

நனிபசு பொழியும் பாலும் தென்னை

நல்கிய குளிரிள நீரும்

இனிய என்பேன் எனினும் தமிழை

என்னுயிர் என்பேன் கண்டீர்

-    -- பாரதிதாசன்

இந்திய நாட்டுப்புறக் கலைகளில் தமிழக நாட்டுப்புறக் கலைகள் பல்வேறு வகைகளில் சிறப்பும் தனித்தன்மையும் கொண்டவை. இவற்றை நிகழ்த்து கலைகள், நிகழ்த்தாக் கலைகள், பொருட்கலைகள் என நாட்டுப்புறவியல் வல்லுனர்கள் வகைப்படுத்தியுள்ளனர் என்று  தமிழக நாட்டுப்புற கலைகள் பற்றி முனைவர் எஸ். உமயபார்வதி எடுத்துரைக்கிறார். தமிழக நாட்டுப்புறக் கலைகளென அவர் குறிப்பிடுபவை…

1.ஒயிலாட்டம்	2.ஆலியாட்டம்	3. கோலாட்டம்	4. கரகாட்டம்
5. காவடி ஆட்டம்	6. கும்மி	7. வில்லுப்பாட்டு	8. தெருக் கூத்து
9. பாவைக் கூத்து	10. கனியான் ஆட்டம்	11. வர்மம்	12. சிலம்பாட்டம்
13. களரி	14. தேவராட்டம்	15. சக்கையாட்டம்	16. பொய்க்கால் குதிரை ஆட்டம்
17. மயிலாட்டம்	18. உறியடி விளையாட்டு	19. தப்பாட்டம்	20. உக்கடிப்பாட்டு
21. இலாவணி	22. கைச்சிலம்பாட்டம்	23. குறவன் குறத்தியாட்டம்	24. துடும்பாட்டம்
25. புலி ஆட்டம்	26. பொம்மைக் கலைகள்	27. மண்பாண்டக் கலை	28. கோலக் கலை

இதுபோன்று தமிழகத்தின் ஒவ்வொரு பகுதியிலும் ஒவ்வொரு விதமான கலைகள் வளர்ந்துள்ளன. மேலும் நாடகம், வீதி நாடகம், இசை நாடகம், நாட்டிய நாடகம், பரதநாட்டியம், இசைச் சிற்பம் போன்ற பல கலை நிகழ்ச்சிகளும் இடம்பெற்றுள்ளன.

தமிழரின் மொழி, வாழ்க்கை, கலாச்சாரம், பாரம்பரியம், பண்பாடு போன்ற நிகழ்வுகளின் அடிப்படையிலான சில பதிவுகளை இன்று காண்போம்.

1. மண்ணின் குரல் என்ற தளத்தில் பண்டைத் தமிழர் வாழ்க்கை, பாரம்பரியம் தொடர்பான ஏராளத் தகவல்கள் ஒலி வடிவில் சேகரிக்கப்பட்டுள்ளன. தமிழ் நாடு தொல்லியல் துறையில் ஆய்வாளராகப் பணிபுரிந்து ஓய்வு பெற்ற முனைவர் பத்மாவதி அவர்களுடனான பேட்டியை இங்கு ஒலிவடிவில் கேட்டு மகிழலாம்.

2.  வரலாற்றுப் புதையல் என்னும் தலைப்புக்கு ஏற்ப பண்டைத்தமிழர் வரலாற்றுத் தகவல்களைத் திரட்டியளிக்கும் இத்தளத்தில் சோழ மன்னர்களான இராஜராஜ சோழனும் இராஜேந்திர சோழனும் கடல் கடந்து சென்று ஆட்சியைக் கைப்பற்றியதற்குக் காரணமான கடற்படை பற்றியும் கட்டுமானக் கப்பல் பற்றியும்அறியத் தருகிறார். 

3. போர் என்பது வீரத்தின் அடையாளம் என்று பழந்தமிழ் இலக்கியங்கள் பெருமை பாடினாலும் பழந்தமிழரின்போர்முறைகள் காட்டுமிராண்டித்தனமானவை என்ற மாற்றுச்சிந்தனையை முன்வைத்து காரணங்களோடு நமக்கு விளக்குகிறார் எனது எண்ணங்கள் வலைப்பூவில் திரு. தமிழ் இளங்கோ ஐயா அவர்கள்.

4. முனைவர் ஜம்புலிங்கம் பக்கங்கள் என்ற வலைத்தளத்தோடு சோழநாட்டில் பௌத்தம் என்னும் வலையை அது தொடர்பான  ஆராய்ச்சித் தகவல்களுக்கென்றே நிர்வகிக்கிறார் முனைவர் பா.ஜம்புலிங்கம் ஐயா அவர்கள். மன்னார்குடி அருகே உள்ள உள்ளிக்கோட்டையில் புத்தர் சிலை கிடைத்த விவரத்தை அறிந்துகொள்ள ஆர்வமா? இங்கு வாருங்கள்.

5. அழிந்துவரும் கலைகளுள் ஒன்றான தோல்பாவைக் கூத்துக்கலை பற்றி இங்கு விளக்குகிறார் சித்திரவீதிக்காரன். பொம்மைகள் ஆட்டுத்தோலால் செய்யப்படுவதால் தோல்பாவைகள் எனப்படுகின்றனவாம். தோல் பாவைக் கூத்துக் கலைஞர்கள் வறுமை நிலையில் வாடுவதை அவர்கள் வாய்மொழிக் கேட்கையில் கல் நெஞ்சமும் கலங்கிவிடும்.  

6. அழிந்து கொண்டிருக்கும் மற்றொரு கலையான தெருக்கூத்து பற்றி வசந்த மண்டபத்தில் அன்னைத் தமிழை வணங்கி அழகான தமிழால் இயற்றி அவர்தம் குரலால் பாடியும் பதிவிட்டுள்ளார். கட்டியங்காரனைக் கோமாளி என்று மட்டுமே நினைத்திருக்கும் பலருக்கும் கூத்தில் அவருடைய முக்கியப் பங்கு வியப்பளிக்கும். 

7.  மாறிவரும் வாழ்க்கை முறை காரணமாக நம் தலைமுறையிலேயே காணும் பல மாற்றங்களை நினைவிடைத் தோய்த்தெடுத்துப் பதிவிடுகிறார் தோழி மணிமேகலா. அட்சயப் பாத்திரத்திலிருந்து கிடைக்கின்றன பசி தீர்க்கும் அநேக பருக்கைகள். பானை சோற்றின் பதங்காட்டும் பருக்கையாய் ஒரு நாடோடியின் கண்ணூடே படலைகளையும்புகைபோக்கிகளையும் காண வாருங்கள்.

8.      பாரம்பரியம் பேசும் பல அற்புதப் படைப்புகளை அநாயாசமாக எழுத்தில் வடிக்கும் சக்தியின் குரலும் புள்ளிக்கோலமும் என் மனங்கவர்ந்தவை. கடையில் அரிசியும் வெல்லமும் வாங்கி குக்கரில் வைத்து கடமைக்குக் கொண்டாடுகிறோம். ஊரும் உறவும் உற்சாகமாய்க் கூவும் பொங்கலோ பொங்கல் என்னும் மந்திரக்கூவலின் மகத்துவத்தை அறியாது போனால் அழியநேரிடும் என்பதை அழுத்தமான வரிகளால் அகம்தொடும் வண்ணம் இங்கு எடுத்துரைக்கிறார்.

9. தமிழ்நாட்டில் தொன்றுதொட்டு பாமரமக்களின் வாய்மொழியாய்ப் பல பழமொழிகள் வழங்கப்பட்டு வருகின்றன என்பதை அறிவோம். அவற்றுள் பலவற்றை பொருளறியாமலேயே புழங்கிக்கொண்டிருக்கிறோம். பழமொழிகளை அவற்றுக்கான சரியான விளக்கத்துடன் நாமறியத் தருகிறார் திரு.சொ.ஞானசம்பந்தன் ஐயா அவர்கள். காலத்துக்கு ஒவ்வாதவற்றைச் சுட்டி, ஆணாதிக்கம் கொண்டவற்றை விலக்கி, அறியாதவற்றை விளக்கி அவர் நமக்களிக்கும் பதிவை அறிந்துகொள்வோம்.வாருங்கள்.  

10. இன்றைக்கு நூறு வருடங்களுக்கு முந்தைய மதராசப்பட்டணத்தைக் காண ஆவலாக உள்ளீர்களா? கிராமத்துக் காக்கையின் வலைத்தளம் வழியே நமக்கு சுற்றிக்காட்டுகிறார். மெரீனா கடற்கரையையும், அண்ணா சாலையையும் நேப்பியர் பாலத்தையும் பாரிமுனையையும் படத்தில் உள்ளது போல் நினைத்துப் பார்க்க முடிகிறதா உங்களால்?

11. தமிழர் தமிழர் என்று மூச்சுக்கு மூச்சு பெருமை பேசும் நாம் நம் இல்லத்து நூலகத்தில் எத்தனை தமிழ் நூல்களைக் கொண்டிருக்கிறோம்? ஒவ்வொரு தமிழரின் இல்லத்திலும் அவசியம் இருக்கவேண்டிய நூல்களின் பட்டியலை இங்கு வெளியிட்டுள்ளார் தென்றல் தளத்தில் தோழி கீதா. அவருடைய முயற்சிக்கு நம் பாராட்டுகளைத் தெரிவிப்போம். 

12.    'நீராருங் கடலுடுத்த' என்று துவங்கும் தமிழ்த்தாய் வாழ்த்துப் பாடலை பள்ளிக்காலத்திலிருந்தே பாடியும் கேட்டும் வருகிறோம். அதை இயற்றியவர் மனோன்மணீயம் சுந்தரம்பிள்ளை என்பது வரை மட்டுமே அறிந்துள்ள நமக்கு, அப்பாடலின் மகத்துவத்தையும் அது தமிழ்த்தாய் வாழ்த்தாக அங்கீகரிக்கப்பட்டதன் பின்னணியையும் தெளிவாக எடுத்துரைத்திருப்பதோடு, ஐந்தாம் தமிழ்ச்சங்கம் என்று பெருமைக்குரிய, நூற்றாண்டு வரலாற்றைத் தன்னகத்தே கொண்ட கரந்தைத் தமிழ்ச்சங்கம் பற்றியும் நாம் அறியாத பல அற்புதத் தகவல்களையும் இங்கு வழங்குகிறார் திரு. கரந்தை ஜெயக்குமார் அவர்கள்.

வாழிய செந்தமிழ்! வாழ்க நற்றமிழர்!

வாழிய பாரத மணித்திரு நாடு!

இன்றெமை வருத்தும் இன்னல்கள் மாய்க!

நன்மை வந்தெய்துக! தீதெலாம் நலிக!

அறம் வளர்ந்திடுக! மறம் மடிவுறுக! 

– பாரதியார்

நன்றி. மீண்டும் நாளை சந்திப்போம் உறவுகளே.

(தகவல் உதவி: விக்கிபீடியா, படங்கள் உதவி: இணையம்)