கைவினைப் பொருட்களும் பதிவர்களும்.....

வலைச்சரம் – 2 மலர் – 4

கைவினைப் பொருட்கள் செய்வது அந்த காலந்தொட்டு பெண்களின் பொழுதுபோக்காக இருந்து வருகிறது. இதில் பல ஆண்களுக்கும் ஆர்வம் உண்டு. தையல், எம்பிராய்டரி, கூடை பின்னுவது, தேவையற்ற பொருட்களை வைத்து அலங்காரப் பொருட்கள் செய்வது என்று அவர்களின் கற்பனைக்கு வானமே எல்லை. எனக்கும் என் மகளுக்கும் இந்த வேலைகளில் ஆர்வம் உண்டு. அது போல் கைவினைப் பொருட்கள் செய்வது பற்றி பகிர்ந்து கொண்டிருக்கும் சில வலைப்பதிவர்களின் பதிவுகளை இன்று பார்க்கலாம்!

விஜிஸ் க்ரியேஷன்ஸ் விஜி அவர்கள் தன் மகள் செய்ததாக மெழுகினால் செய்த சில கேண்டிக்களும், முத்துக் குதிரையும், பிளேட் பெயிண்ட்டிங்கும் பகிர்ந்துள்ளார். நீங்களும் போய் பாருங்களேன்.

கலைக்கழகம் கைவேலை என்ற தளத்தில் பூக்கள், பழங்களை வைத்து கார்விங் செய்வது, பேன்சி நகைகள் தயாரிப்பு, வாழ்த்து அட்டைகள் தயாரிப்பு, போன்றவற்றை எப்படிச் செய்வது என்று காணொளி வடிவில் தொகுத்து அளித்து வருகிறார்.

என் இனிய இல்லம் தளத்தில் ஃபாயிஜா காதர் அவர்கள் பல அழகான விஷயங்கள் செய்து காண்பித்து இருக்கிறார். ப்ரெட் தூள் மற்றும் பெவிகால் வைத்து அழகான பழங்களை செய்து காண்பித்திருக்கிறார் பாருங்களேன் இங்கே!

நான்கு பெண்கள் தளத்தில் பகிர்ந்துள்ள 70 வயதை கடந்த கர்நாடகாவைச் சேர்ந்த இந்திரா என்பவரின் எம்பிராய்டரி கற்கலாம் வாங்க? என்ற பதிவைப் பாருங்களேன். ஒவ்வொன்றும் அவ்வளவு அழகாக இருக்கிறது.

காகிதப்பூக்கள் தளம் வைத்திருக்கும் ஏஞ்சலின் அவர்களின் க்வில்லிங் வேலை எனக்கு மிகவும் பிடிக்கும். ஒவ்வொரு முறையும் க்வில்லிங்கால் விதவிதமான வாழ்த்து அட்டைகள் செய்வார். 

குப்பவண்டி என்ற தளம் வைத்திருக்கும் நபர் நிறைய கைவினைப் பொருட்கள் செய்வது எப்படி என பதிந்து வைத்திருக்கிறார். பழைய டி-சர்ட்களை வைத்து குஷன் கவர்கள் செய்திருக்கிறார். இன்னும் பலவும் இருக்கிறது. தேவையற்ற பொருட்களை வைத்து செய்வதால் குப்பவண்டி என்று வைத்திருக்கிறாரோ என்னவோ!

காகிதத்தில் கிறுக்கியவை எனும் தளத்தில் தனது பதிவுகளை பகிர்ந்து கொண்டு வரும் தேவி என்பவர் OHP ஷீட்-ல் ஓவியங்கள் வரைவது பற்றி மிக அழகாய் இங்கே செய்து காண்பித்து இருக்கிறார்.  அதை வைத்து படம் காட்ட மட்டும் தானா முடியும் படமும் வரையலாம் என்பதை பார்க்க இங்கே செல்லலாமே!

அரும்புகள் எனும் தளத்தில் குழந்தைகளின் பொழுதுபோக்கிற்காக பலவிதமான கைவினைப் பொருட்கள் எப்படி செய்வது என்று விளக்கமாக கொடுத்திருக்கிறார் கண்மணி.  சுருள் படங்கள் செய்வது எப்படி என்று கேட்டிருக்கும் இப்பகிர்வினை பாருங்களேன்!

பயணிக்கும் பாதை எனும் தளத்தில் தொடர்ந்து எழுதி வரும் சகோதரி அஸ்மா, தனது தளத்தில் ”ஹேர்பின் பூ செய்வது எப்படி?” என்று ஒரு பகிர்வு எழுதி இருக்கிறார் பாருங்கள். செய்து முடித்த அந்த ஹேர்பின் தலையில் அணிந்துகொண்டு காட்சி தரும் அந்தக் குட்டிப் பெண்ணும் அழகு!

பூங்குடில் எனும் தளத்தில் எழுதி வரும் கவிமலர் ஐஸ் ஸ்டிக் உபயோகப் படுத்தி ஃபோட்டோ ஃப்ரேம் செய்வது எப்படி என்று அழகாய் சொல்லித் தந்திருக்கிறார் இங்கே!

ப்ரியா ராம் அவர்களின் ரசிக்க ருசிக்க வலைப்பூவில் ஆர்கண்டி துணி மூலம் அழகான பூக்கள் செய்ய படிப்படியான செய்முறை விளக்க படங்களுடன் பகிந்திருக்காங்க பாருங்க.

அறுசுவை சமையல் களஞ்சியம் என்ற தளத்தில் தையற்கலை, கைவினைப் பொருட்கள், அலங்காரப் பொருட்கள் செய்தல், உணவு அலங்காரம், மெஹந்தி டிசைன்கள் என பலத் தகவல்கள் காணப்படுகின்றன.

பல்சுவைக் கதம்பம் என்ற தளத்தில் கரடி பொம்மை செய்தல், மெழுகுவர்த்தி செய்தல், கிறிஸ்துமஸ் மரம் செய்தல் என பல தகவல்கள் உள்ளன.

என்ன நண்பர்களே இன்று அறிமுகம் செய்த பதிவுகளைப் படித்தீர்களா?  மீண்டும் நாளை வேறு சில வலைப்பூக்களின் அறிமுகம்.....  நாளை சந்திப்போம்..... 

அதுவரை....

நட்புடன்

ஆதி வெங்கட்.

திருவரங்கம்.