சென்று வருக சாகம்பரி - வருக வருக R கோபி

அன்பின் சக பதிவர்களே !

இன்றுடன் முடியும் வாரத்திற்கு ஆசிரியப் பொறுபேற்ற சகோதரி சாகம்பரி, தான் ஏற்ற பொறுப்பினை முழு ஈடுபாட்டுடன் நிறைவேற்றி, நம்மிடம் இருந்து மன நிறைவுடன் விடை பெறுகிறார்.

இவர் வித்தியாசமான முறையில் சிறு பொழுதுகளாகிய விடியல், காலை, முற்பகல், ஏற்பாடு, மாலை, இரவு என்ற தலைப்புகளில், பல பொருட்குறிப்புகளில், இடுகைகளைத் தேர்ந்தெடுத்து அறிமுகப் படுத்தி இருக்கிறார்.

இவர் ஏழு இடுகைகள் இட்டு ஏறத்தாழ முன்னூற்று இருபத்தைந்து மறுமொழிகள் பெற்றிருக்கிறார். அறிமுகப் படுத்திய பதிவர்களோ எழுபத்திரண்டு. அறிமுகப் படுத்திய இடுகைகளோ 82. ( சொந்த இடுகைகள் 10 உட்பட ) . இவரது கடும் உழைப்பு நன்கு பலனைத் தந்திருக்கிறது.

சகோதரி சாகம்பரியின் உழைப்பினைப் பாராட்டி, நல்வாழ்த்துகளுடன் வழி அனுப்புவதில் பெருமை அடைகிறோம்.

நாளை நவம்பர் 7ம் நாள் துவங்கும் வாரத்திற்கு ஆசிரியப் பொறுப்பேற்க அன்புடன் இசைந்துள்ளார் அருமை நண்பர் கோபி ராமமூர்த்தி அவர்கள்.

இவர் கடந்த ஒன்றரை வருடங்களாக R. கோபி என்ற வலைத்தளத்தில் எழுதி வருகிறார்.

இவர் பிறந்தது வளர்ந்தது கும்பகோணத்தில். படித்தது இளங்கலை வணிகவியல். மேற்படிப்பு Chartered Accountancy (CA). Financial Risk Manager (FRM).

இவருக்கு வாசிப்பின் மேல் மாறாத நேசமுண்டு. பக்கோடாத் தாளில் இருந்து டெலிஃபோன் டைரக்டரி வரை எது கையில் கிடைத்தாலும் வாசித்துவிடும் பழக்கமுண்டு!

ஆன்மீகத்தில் அதிக ஈடுபாடு உடைய இவர் கடந்த பத்தாண்டுகளில் பல திவ்ய தேசங்கள் (97), திருமுறைத்தலங்கள் (88), மேலும் பல்வேறு கோவில்கள் எனச் சென்று வந்துள்ளார்.

காதலியை ஆறாண்டுகளுக்கு முன் கைப்பிடித்து, செல்ல மகன் ஒருவனைப் பெற்று இருக்கிறார். தற்போது வசிப்பது பெங்களூரில். ஒரு பன்னாட்டு நிறுவனத்தில் உத்தியோகம். இதற்குமுன் வசித்தது சென்னையில் (ஒரு வருடம்), மும்பையில் மூன்று வருடங்கள்.

இவருக்குப் படிப்பது, பாட்டுக் கேட்பது, பயணம் செய்வது, திரைப்படங்கள் படங்கள் பார்ப்பது என்று மனதிற்குப் பிடித்த விஷயங்கள் நிறைய உண்டு .

நண்பர் கோபி ராமமூர்த்தியினை வருக வருக - அறிமுகங்களை அள்ளித் தருக என வாழ்த்தி வரவேற்பதில் மகிழ்ச்சி அடைகிறோம்.

நல்வாழ்த்துகள் சகோதரி சாகம்பரி

நல்வாழ்த்துகள் கோபி ராம்மூர்த்தி

நட்புடன் சீனா