வைரை சதீஷிடமிருந்து கணேஷ் பொறுப்பில் வலைச்சரம்

அன்பிற்கினிய வலைப்பூ நண்பர்களுக்கு,

இன்றுடன் முடிகின்ற வாரத்திற்கு வலைச்சரத்திற்கு பொறுப்பேற்றிருந்த தம்பி வைரை சதீஷ் அவர்கள் தனது வலைச்சர ஆசிரியர் பொறுப்பினை மிகச் சிறப்பாக நிறைவேற்றி மனநிறைவுடன் நம்மிடமிருந்து விடைபெறுகிறார்.

இவர் வலைச்சரத்தில் ஒவ்வொரு நாளும்  "பிடித்த பதிவுகள் சில" என்ற தலைப்பின் கீழ் தனது பார்வையில் கவர்ந்த இடுகைகளை அழகாக குறிப்பிட்டு நிறைய மறுமொழிகளையும் பெற்றுள்ளார்.

தனது வலைச்சர ஆசிரியர் பொறுப்பினை ஏற்று மிகச்சிறப்பாக முடித்த தம்பி வைரை சதீஷ் அவர்களை "சென்று வருக!" என வாழ்த்தி வழியனுப்புவதில் பெரும் மகிழ்ச்சி அடைகிறேன்.

நாளை  முதல் ஆரம்பிக்கும் வாரத்திற்கு வலைச்சர ஆசிரியராக மின்னல் வரிகள் வலைப்பூ கணேஷ் அவர்கள் பொறுப்பேற்க உள்ளார். மதுரையை பூர்வீகமாக கொண்ட இவர் கடந்த சில வருடங்களாக புத்தக வடிவமைப்பாளராக சென்னையில் வசித்து வருகிறார். தினமலர், க்ரைம் நாவல், கிழக்குப் பதிப்பகம் ஆகியவற்றில் வடிவமைப்பாளராகவும், ‘ஊஞ்சல்’ என்ற மாத இதழுக்கு வடிவமைப்பாளர் மற்றும் உதவி ஆசிரியராகவும் இருந்த இவர் தற்சமயம் ‘தாம்ப்ராஸ்’ மாத இதழின் வடிவமைப்பாளனாக இருக்கிறார்.

மெல்லிசை  கேட்பதிலும், நகைச்சுவை உணர்வும் மிக்க இவர் தனது வலைப்பூவில்  சிறுகதைகள், அவர் படித்து ரசித்த படைப்புகள், பொக்கிஷமான பழைய விஷயங்கள் என ஒரு பத்திரிகையை படித்த அனுபவம் ஏற்படுமாறு எழுதி வருகிறார்.

கணேஷ் அவர்களை "வருக...வருக..." என வாழ்த்தி வரவேற்று ஆசிரியர் பொறுப்பில் அமர்த்துவதில் பெரும் மகிழ்ச்சி அடைகிறேன்.

நல்வாழ்த்துக்கள் வைரை சதீஷ்...
நல்வாழ்த்துக்கள் கணேஷ்...

வாழ்க வளமுடன்,
நட்புடன்,
தமிழ்வாசி பிரகாஷ்.