கவிதை சொல்லிகள்

காலம் என்னும் பாதையில் கவிதை என்னும் ஊர்தி பன்னெடுங்காலமாகவே ஊர்ந்து வந்துகொண்டிருக்கிறது.

மரபுக்கவிதை என்னும் பெயர் கடந்து புதுக்கவிதை என்னும் பெயர் பெற்று நாளை ஏதோ ஒரு பெயர் தாங்கி ஊர்ந்துகொண்டுதான் இருக்கும்.

பழந்தமிழன் வெண்பா, ஆசிரியம், வஞ்சி, கலி, பரி என பல வடிவங்களைக் கையாண்டான்.

• பத்துப்பாட்டும், எட்டுத்தொகையும் பெரும்பாலும் ஆசிரியப்பாவால் பாடப்பட்டவையாகும்.
• சிலப்பதிகாரம் நிலைமண்டில ஆசிரியத்தால் ஆனது.
• நீதி நூல்கள் வெண்பா யாப்பால் அமைந்தவை.
• சீவக சிந்தாமணி, கம்பராமாணயம் விருத்தப்பாவால் ஆனவை.
• தேவார, திவ்ய பிரபந்தங்கள் இசை விருத்தத்தால் ஆனவை.
• பிள்ளைத் தமிழ் கழிநெடிலடிச் சந்தவிருத்தத்தால் ஆனது.
• உலாவும்,தூதும் கலிவெண்பாவால் ஆனவை.
• பரணி தாழிசையால் ஆனது.
• கோவை நூல்கள் கட்டளைக் கலித்துறையால் ஆனவை.
• பிற்கால நாடகங்கள் கீர்த்தனையால் ஆனவை.

மரபுக் கவிதைகளில் பெயர் பெற்ற சான்றோர்கள்.

“வெண்பாவில் புகழேந்தி, பரணிக்கோர் செயங்கொண்டார்
ஒண்பாவிற்கு உயர்கம்பன், கோவை உலா அந்தாதிக்கு ஒட்டக்கூத்தன்
கண்பாய கலம்பகத்திற்கு இரட்டையர்கள் வசைபாடக் காளமேகம்
பண்பாகப் பகர்சந்தம் படிக்காசால் ஒருவர் பகரொணாதே“
தனிப்பாடல்.

வெண்பா – புகழேந்தி (நளவெண்பா)
விருத்தம் – கம்பர் (கம்பராமாணம்)
சந்தம் – படிக்காசுப்புலவர் (சந்தப் பாடல்கள்)
கோவை, உலா, அந்தாதி – ஒட்டக்கூத்தன் (மூவருலா)
கலம்பகம் – இரட்டையர்கள்.

கருத்து – ஓட்டுநர்
கவிதை வடிவம் – ஊர்தி

ஊர்தி எந்த அளவுக்கு காலத்துக்கு ஏற்றதாய் இருக்கவேண்டுமோ அதுபோல 
கருத்தும் இயைபுடையதாகவே இருத்தல் வேண்டும்.

இன்று...
பலரிடம் ஊர்தி இருக்கிறது
ஓட்டத் தெரியவில்லை!

ஓட்டத் தெரிந்தவர்களிடம் 
ஊர்தியில்லை!

ஓட்டத்தெரிந்தவர்களிடம் உள்ள ஊர்தியே இன்றைய காலப் பாதையில் தொடர்ந்து ஊர்ந்து சென்று கொண்டிருக்கிறது.

பழந்தமிழ்க் கவிஞர்கள் இதனை நன்கு உணர்ந்தவர்களாக இருந்திருக்கிறார்கள்.

தன் கருத்துக்கு ஏற்ற வடிவத்தைத் தேர்ந்தெடுத்திருக்கிறார்கள்.

ஒரு கவிதை காலம் கடந்தும் போற்றப்பட கருத்துடன் இயைபுடைய வடிவம் அடிப்படைத் தேவையாகும்.

ஓசை நயமிக்க கவிதைகள் காலவெள்ளத்தில் புறந்தள்ளப்பட்டுவிடும்!
கருத்தாழமிக்க கவிதைகளே கரைசேரும் என்பதையும் இளங்கவிஞர்கள் கருத்தில் கொள்ளவேண்டும்!

இன்று இணையத்தில் தமிழால் கவிதை சொல்லும் கவிதை சொல்லிகளைக் காணஇருக்கிறோம்..

முதல்முறை வலைச்சரப்பணியாற்றும்போது கவித்தமிழ் என்ற தலைப்பில் சில கவிஞர்களை அறிமுகம்செய்தேன். அவர்களையே மீண்டும் அறிமுகம்செய்யாமல் புதிய கவிஞர்களை இன்றைய கவிதைசொல்லிகள் என்னும் தலைப்பில் அறிமுகம் செய்ய இருக்கிறேன்.

21.அருமை நண்பர் முரளிதரன் அவர்களின் எதுகவிதை என்ற கவிதையில், விற்பனை செய்ய விரைவாய் எழுதுவது அல்ல கவிதை! கற்பனை செடியில் பூக்கும் கவின்மிகு கருத்து கவிதை! என்று நயம்பட உரைக்கிறார்.

22.அன்பு நண்பர் மகேந்திரன் அவர்களின் வசந்தமண்டபம் என்னும் வலைப்பதிவை தமிழுலகம் நன்கறியும். தம் கவிதைகளால் தமிழரின் மரபுகளை அழகுபட மொழியும் இவர் தம் கவிதைகளில் அழகிய தமிழ்ச்சொற்களையும் இனம்காட்டிச் செல்கிறார். இவரின் கிழக்கும் மேற்கும் என்ற கவிதை அதற்குத்தக்க சான்றாக்கும்.

23.வே.சுப்பிரமணியன் அவர்களின் தண்ணீர்ப்பந்தல் என்னும் வலைப்பதிவில் சிறைவாசி என்னும் கவிதை சாட்டையால் அடித்ததுபோல உண்மையை சத்தமாகச்சொல்கிறது.

24.நண்பர் சீனி அவர்களின்கவிதை என்ற வலைப்பதிவில் யார்வகுத்தது என்ற கவிதை நம் மனதைத் தொட்டுப்பார்க்கவைப்பதாக அமைகிறது.

25.கவிஞர் செய்தாலி அவர்களின் கிளைகளின் துக்கம் என்னும் கவிதை நம் மனதிலும் துக்கத்தை விதைத்துச்செல்கிறது.

26.அன்பர் இரமணி அவர்களின் தீதும் நன்றும் பிறர்தரவாரா என்ற வலைப்பதிவை பலரும் அறிந்திருப்பீர்கள். அவரின் விளங்குவதும் விளங்காததும் என்ற கவிதையில் சுடும் உண்மையைப் பதிவுசெய்துள்ளார்.

27.நண்பர் ரியாஸ்அகமது அவர்களின் நுனிப்புல்லில் ஒரு பனித்துளி என்ற வலையின் பெயரே கவிதைபோல உள்ளது. அவருடைய பெருமை கொள்ளாதே கொல்லும் என்ற கவிதையில் வெற்றி வேண்டவே வேண்டாம் என்கிறார் ஏன் என்று கேளுங்களேன்.

28.வலையுலகம் நன்கறிந்த பெண்கவிஞர் தேனம்மை இலக்சுமணன் ஆவார். இவரது டைரி கிறுக்கல்கள் என்ற வலைப்பதிவில் மீன் என்ற கவிதை வெளியிட்டிருக்கிறார். அந்தக்கவிதையில் மீனோடு சேர்ந்து நம் மனமும் நீந்திச்செல்கிறது.

29.சசிகலா அவர்களின் தென்றல் என்ற வலைப்பதிவில் அரிதினும் அரிதான பெண்பிறவி குறித்த கவிதை போற்றத்தக்கதாகவுள்ளது.

30.நண்பர் ரிஷான் அவர்களின் வீழ்தலின் நிழல் என்னும் கவிதை நம்மை  சிந்தனையில் ஆழ்த்துவதாக உள்ளது.

என்ற கருத்தை இன்றைய சிந்தனையாகத் தங்கள் முன்வைக்கிறேன்.