வகுப்பு- முதல் நாள்

வகுப்பு:  மாணவி அறிமுகம்:

அனைவருக்கும் இனிய காலை வணக்கம்!

மூத்த பதிவர்களும், பிரபல பதிவர்களும் ஆசிரியர்களாக இருந்த வலைச்சரத்தில் நானும் ஒரு ஆசிரியரா? இது எனக்கே அதிகமாகதான் தெரிகிறது. பேனாவை மட்டும் பிடித்து பத்திரிக்கைகளில் எட்டி பார்த்து கொண்டிருந்த நான் வலைப்பூவிற்கான விதையை போட்டு அது இப்போதுதான் துளிர்த்து 10 மாதமாகியிருக்கிறது.  

 வகுப்பில் ஆசிரியர் வர தாமதமானால்,  ஒரு மாணவரை அவர் வரும் வரை பார்த்து கொள்ள சொல்லியிருப்பார். அது போல் தான் நான் இன்று ஒரு மாணவியாக வலைச்சரத்தில் ஒரு வாரம் வரை ஆசிரியர் பொறுப்பை பார்த்து கொள்ள போகிறேன்.

இந்த மாணவியிடம் பொறுப்பை ஒப்படைக்க  தேர்வு செய்து பரிந்துரைத்த திரு.வை.கோபாலகிருஷ்ணன் ஐயா அவர்களுக்கும், நம்பி என்னிடம் ஒப்படைத்த அன்பின்.சீனா ஐயா அவர்களுக்கும் மிக்க நன்றி!

வலைப்பூவிற்கான  விதையை இட்டு துளிர்த்த போது அது வளர ஆலோசனைகளை சொல்லி நீர் ஊற்றிய சகோதரர் டி.என்.முரளிதரன் அவர்களுக்கும் இந்த நேரத்தில் நன்றி சொல்ல ஆசைப்படுகிறேன்.

இத்துடன் என்னை பற்றி முடித்து கொள்ளலாம் என்றுதான் நினைத்தேன். நான் வலைச்சர ஆசிரியராக பொறுப்பேற்க போகிறேன் என்றதும் என் தோழி விஜயலட்சுமி எனக்கு வாழ்த்துக்கள் சொல்லி அடுத்த நிமிடமே என்னை பற்றி சில வார்த்தைகள் சொல்லி கடிதம் அனுப்பியிருந்தார். கடிதம் எனக்கு கிடைக்காமல் போய்விட்டது. விஷயம் அறிந்ததும் அவசரமாக ஒரு கடிதம் மின்னஞ்சலில் அனுப்பினார். இந்த சமயத்தில் நான் சொல்லியே ஆக வேண்டும் இதை  நிச்சயம் நீங்கள் போட வேண்டும் என்றார். அவர் அன்பிற்காக அக்கடிதத்தை இணைக்கிறேன். அறிமுகத்தில் மிகைப்படுத்திக் கொள்வதாக நினைக்க வேண்டாம். அவர்கள் மீதுள்ள மரியாதை காரணமாகவே இக்கடிதங்களை பகிர்கிறேன்.

விடியல் ஓர் அறிமுகம்

       உஷா , பெயருக்கு  ஏற்றார்  போல  பல   இதயங்களின்  விடியலாய்  இருப்பவர் . சுறுசுறுப்பு  பேச்சில்  மட்டுமல்ல , செயலிலும்  கூட .  ஆரம்ப  காலத்தில்  பல சிற்றிதழ்களில்  எழுத  ஆரம்பித்தவரின்  பேனா  பெண்கள்  மலர் , வாரமலர் , கல்கி , பாக்யா  போன்ற  வார  இதழ்களிலும்  தன்  முத்திரையை  பதித்துள்ளது . itamil  போன்ற  இணைய இதழ்களிலும் தன் கதை மற்றும் கவிதைகளால் அறியப்பட்டவர் தோழி உஷா  அன்பரசு . எதற்காகவும் தன் கொள்கைகளை விட்டுக்கொடுக்காத கொள்கைவாதியாகவும் , அன்பிற்கினியவர்களை அரவணைத்து வழிநடத்தும் இனிய தோழியாகவும் உலா வருபவர் . சமூக அக்கறையை வார்த்தைகளிலும் , பேனா  முனையிலும் மட்டும் காட்டாமல் 

     " பிரார்த்திக்கும் உதடுகளை விட 

       உதவிக்கு நீளும் கரங்களே உயர்ந்தவை "

எனும் வரிகளுக்கு உதாரணமாய் வாழ்பவர் .

       ஆசிரியப் பொறுப்பு ஏற்றிருக்கும் தோழியின் பணிசிறக்க வாழ்த்துக்கள் !

                                       என்றும் அன்புடன் ,

                                         D. விஜயலட்சுமி .(ஆங்கில ஆசிரியை, வேலூர்)

உஷா அன்பரசு , தன் எழுத்தில் எவர் சாயலும் குளிர்காயக் கூடாது என்று நினைப்பவர்.பிறரிடம் தன்னை எப்பொழுதும் புத்திசாலியாய் காட்டிக் கொள்ள மாட்டார். ஏன் தெரியுமா? அப்போது தான் மற்றவர்களிடமிருந்து சில விஷயங்களை நம் மனதில் ஏற்றிக்கொள்ள முடியும் என்று சொல்வார்.பெரியாரை ரொம்ப பிடிக்கும். இருந்தாலும்  அவருக்கு கடவுள் நம்பிக்கை உண்டு.அவர்  ஒரு தனிமை விரும்பி, அதே சமயம்,  நல்ல நட்பாக பேசுபவர்.எப்பொழுதும் நடுநிலைமையாக தான் பேசுவார். சந்தர்ப்பத்தில் கொஞ்சம் கடுமையாகவும் பேசுவதுமுண்டு.அலுவலகப் பணிகளுக்கிடையையேயும் குடும்பப்  பொறுப்புகளுக்கிடையேயும் கவிதை, கதை, கட்டுரை போன்றவற்றில் எழுதும் ஆர்வம் அதிகம். 
பாக்யா, தினமலர்-பெண்கள் மலர், தேவதை, ராணி வார இதழ், கல்கி, தினத்தந்தி- குடும்பமலர்
இவைகளில் இவரது படைப்புகள் வெளிவந்திருக்கிறது. ஆசிரியப் பொறுப்பு ஏற்றிருக்கும்  உஷா அன்பரசு விற்கு  என்  வாழ்த்துக்கள் !

- கண்ணன்( பாக்யா வார இதழ்)

************************


இந்த நாள்:

எம்.ஜி.ராமசந்திரன் ( இன்று நினைவு நாள்)

எம்.ஜி.ராமசந்திரன் : தமிழ் நாட்டில் பலர் இவரைக் கடவுள் போலவே போற்றினார்கள்.இவர் இறந்து 22 ஆண்டுகளுக்கு மேலாகியும், இன்றும் இவருக்காகவே அனைத்திந்திய அண்ணா திராவிட முன்னேற்றக் கழகத்துக்கு வாக்களிப்பவர்கள் தமிழ்நாட்டில் உள்ளனர்.இது அவருக்கு மக்கள் மத்தியிலிருந்த பெரும் செல்வாக்கைக் காட்டுகிறது. 

ஈ. வெ. இராமசாமி:( இன்று நினைவு நாள்)

 சமூக சீர்திருத்ததிற்காகவும், சாதி வேற்றுமையினை அகற்றுவதற்காகவும், மூடநம்பிக்கைகளை மக்களிடமிருந்து களைவதற்காகவும், பெண் விடுதலைக்காகவும் போராடியவர்.

இனி  என் விழிகள் எழுத்தாக்கியவைகளில் சில:

சொந்த வீடு ஒவ்வொருக்கும் கனவு.  அப்படி கஷ்டபட்டு கட்டின வீட்டை பெற்ற பிள்ளையால்  விற்கும் சூழ் நிலைக்கு வந்த  வயது முதிர்ந்த தம்பதிகளின் உணர்ச்சிக் குவியலை எழுதும் போது எனக்கே மனம் கனத்து போனது.
வீடு

 காதல் இல்லாத மனிதர்களே கிடையாது. மனிதரா பிறந்த எல்லாருடைய வாழ்க்கையிலும் மனசுக்குள்ள எங்காவது மூலையில் காதல் அடையாளம் பதிச்சிட்டு போயிருக்கும்.  . காதலோடு பேசியதும், பழகியதும் கிடையாது என்று  யாரும் சொல்ல முடியாது. இவங்க என் வாழ்க்கையில்  இருந்தா நல்லாயிருக்குமே ன்னு  யாரோ ஒருத்தராவது உங்க மனசில ஒரு சில வினாடிகளாவது இடம் பிடிச்சிருப்பாங்க.. அது கூட நேசம்தான்.
சொல்லாம போச்சு

படிச்சிட்டு வேலைக்கு  அலையறதை விட மாடாவது  மேய்ச்சிருக்கலாம் என்று நினைக்கிற அளவுக்கு போய்ட்டாங்க, நம்ம இன்ஞினியரிங் ஸ்டூண்ட்ஸ்.. அதை ஒரு நகைச்சுவையா சொல்ல ஆசைப்பட்டேன்.
வேலை 

 சின்ன குழந்தையா இருந்து கால போக்கில நாமே ஒரு  தந்தையா, தாயா மாறினாலும் நம்ம அம்மா, அப்பா நமக்கு எப்பவும் அப்படியே இருக்கனும்னு  நினைப்போம்.  என் அப்பாவின் வயதான தோற்றத்தை  பார்த்து தனிமையில் உட்கார்ந்து கண் கலங்கியது.
"அப்ப போல அப்பா .."  


வேலைக்காக  வெளி நாடு போய், தாய் நாட்டையே மறந்து ஆடம்பர வாழ்க்கைக்கு ஆசைப்படும் பிள்ளையால்  தாயும், தந்தையும் கனா காலங்கள் ஆகிவிடுகிறார்கள்.
 அது ஒரு கனா காலம் 

 காதல் மொழி பேசியவள் பிரிந்து போனாலும் மனதில் இருந்து கொண்டிருப்பதால்  ஏற்படும் வலியின்  குரல்.
 வலி ..!

 வயதான் தாயை பாரமாகவும், தந்தையை ஆதாரமாகவும் பார்த்த பிள்ளைகளுக்கு , தந்தையின் பதிலில் கிடைத்த தலைக்குனிவு.
தலைக்குனிவு


திருமணத்திற்கு முன்  காதல் மாயையில் விழுந்து வாழ்க்கையில் நல்ல கணவனை பெறும் பெண்ணின் மனசாட்சி. 
" நிழல் அது... நிஜம் இது..." 

அரசு பள்ளிகளின் நிலமை.
ஏழைகளின் கல்வி கூடங்கள் 

 குழந்தைகளுக்கு  நன்மை, தீமை தெரியாது. நாம்தான் எதிலும் கவனமாக இருந்து வழி நடத்த வேண்டும்.
தவறு யாருடையது..?

நாளை முதல் மற்ற பதிவர்களின்  சுவாரஸ்யமான பதிவுகளை பார்ப்போம்!

மீண்டும் நாளைய வகுப்பில்.