நான் ரசிப்பவை

            

வணக்கம். எனக்குப் பிடித்த வலைத்தளங்களை இன்று உங்களுக்கும் அறிமுகம் செய்யலாம் என்று இருக்கிறேன். இவை ஏற்கனவே உங்களுக்குத் தெரிந்தவையாக இருந்தால் அத்தளங்களைப் பற்றிய உங்களுடைய கருத்துகளையும் பின்னூட்டங்களில் தெரிவியுங்களேன்.

1.    Warrior: ப்ளாக் உலகுக்கு வந்ததிலிருந்து தேவாவின் இந்தத் தளத்தை வாசித்துக்கொண்டிருக்கிறேன். தளத்தில் எனக்கு மிகவும் பிடித்தவை காதல் மற்றும் ஆன்மீகப் பதிவுகள். பொதுவாக வலைப்பதிவுகள் வெளிவந்தவுடன் நமக்குப் படிக்கும் ஆர்வம் ஏற்படும். ஆனால் இவரது பதிவுகளை ஒதுக்கிவைத்து ஒரு குறிப்பிட்ட நேரம் பார்த்துப் படிக்காமல்விட்ட பதிவுகளையெல்லாம் ஒரே மூச்சில் படிப்பது என் வழக்கம். இவரது ஆன்மீகப் பதிவுகளை அப்புறமாகப் பார்க்கலாம். இப்போது என் மனதைக் கவர்ந்த வேறுசில பதிவுகள் உங்களுக்காக:

இவரது ‘சுவாசமே காதலாக’ தொகுப்பைப் படித்துப் பாருங்கள். மென்மையான அழகான காதல் எல்லாக் கதைகளிலும் படிந்திருக்கும்.  

‘முன் ஜென்மத் தேடல் நீ’ சின்ன கவிதைகளோடு சொல்லப்பட்டிருக்கும் ஒரு அழகான புனைவு.

‘அன்புள்ள அப்பாவிற்கு’ பதிவைப் படிப்பதற்குமுன் மனதைக் கொஞ்சம் திடப்படுத்திக்கொள்ளத்தான் வேண்டும்.

இவருடைய சினிமா விமர்சனம் ‘மதயானைக் கூட்டம்’ கொஞ்சம் வித்யாசமான கோணத்தில் இருக்கும்.

2.    Ganesh: இது ஒரு அறிவியல் புனைவுக் கதைகள்(sci-fi) நிறைந்த வலைத்தளம். சுஜாதாவை விரும்பிப் படிக்கும் இவர் இலக்கியப் பரிச்சயம் உள்ளவர்.

‘கரையாத வார்த்தைகள்’ கதையில் மறுபிறவி கருத்தை வைத்து ஒரு புனைவைக் கொடுத்துள்ளார்.

‘நிஜமாகும் நிழல்கள்’ ஒரு அழகான அறிவியல் புனைவு. சுஜாதாவின் கதைகளில் வரும் கணேஷ், வசந்த், ரூபாவைப் போல இவரது கதைகளில் புனிதா என்றவொரு கதாப்பாத்திரம் வரும். இக்கதை ஓர் உதாரணம்.

இந்த ‘ஐன்ஸ்டீன்’ பற்றிய தொகுப்புகளைப் பாருங்களேன். அவர் சொல்லிய சில விஷயங்களை மிக எளிதாக நமக்குப் புரியவைத்திருக்கிறார்.

3.    ப்ரியா கதிரவன்: நான் இவரோட பரம ரசிகை. இவரோட பதிவுகளைப் படித்தபிறகு இவரை மாதிரியே எழுத வேண்டும் என்ற ஆசை வருவதைப் பார்க்கலாம். அவ்ளோ ஜாலியான எழுத்து.

இவரோட ‘விசாம்ரூபம்’ பதிவைப் பாருங்களேன்.  கமல் ரசிகையான இவர் படத்தை விமர்சித்திருக்கும் விதமே தனிதான்.

தன்னோட புகுந்த வீடான நாகர்கோவிலைப் பற்றி ஒரு சின்ன பதிவு, ‘நாலு வரியில் (என்) நாஞ்சில் நாடு’.

‘நீ தானே என் பொன்வசந்தம்’ படத்தைப் பற்றிய ஒரு பதிவு இது. படித்துப் பாருங்களேன்!

4.    அணிலாடு முன்றில்: சித்தார்த் வெங்கடேசன் மற்றும் அவரது மனைவி காயத்ரி சித்தார்த் இருவரும் சேர்ந்து எழுதும் ‘சங்க இலக்கியம்’ பற்றிய வலைத்தளம் இது. தமிழர் பண்பாட்டையும் நாகரிகத்தையும் பற்றிக் கூறும் சங்கப்பாடல்கள் தமிழர்களின் இலக்கியப் பொக்கிஷம். அந்த அகநானூறு, குறுந்தொகைப் பாடல்களுக்கு எவ்வளவு அழகான கோணங்களில் விளக்கம் கொடுத்திருக்கிறார்கள் படித்துப் பாருங்களேன்!

‘பூத்தலைச் சிறுகோல்’ பதிவில் ஒரு சங்கப்பாடல். மகள் காதலனோடு செல்ல, அவளின் தாய் பாடுவதுபோல் அமைந்தது.

‘கூடுடையும் தருணம்’ அகம் பற்றிய மற்றுமொரு பதிவு.

‘உறக்கமற்ற காத்திருப்பு’ என்ற தலைப்பில் மூன்று பதிவுகள் இருக்கின்றன. சங்கப்பாடல்களிலிருந்து உதாரணங்கள் எடுத்து ரசனையாக எழுதப்பட்டிருக்கும் பதிவுகள் இவை.

5.    ChocolatePages from Sainthavi: பதிவுலகில் நான் ரசித்துப் படித்த மற்றுமொரு வலைத்தளம் இது. அறிமுகமான முதல்நாளே முக்கால்வாசி பதிவுகளைப் படித்துவிட்டேன். நகைச்சுவை கலந்த மெல்லிய காதல் கதைகள். அவற்றில் சிபி-சைந்தவி கதாப்பாத்திரங்கள். புதிய பதிவு வந்து நாளாகிவிட்டது. இருந்தாலும் இதை நீங்கள் நிச்சயம் படிக்க வேண்டும்.

‘இந்தப் பதிவில்’ எல்லாப் பதிவுகளுக்குமான சுட்டிகளும் இருக்கின்றன, பாருங்கள்.

‘உச்சிமாங்காளி’ பதிவைப் படித்துவிட்டு விழுந்து விழுந்து சிரிக்கப் போகிறீர்கள்.

‘வ்வேவேவேவே’வும் அப்படியொரு பதிவு தான். ‘மிஸ்’ பண்ணிவிடாதீர்கள்!

6.    மாதவிப் பந்தல்: திருப்பாவையிலிருந்து எடுக்கப்பட்ட அழகான தலைப்போடு இயங்கும் வலைத்தளம். பெரிய விஷயங்களைப் பற்றி மிகவும் சாதாரணமாக ஆராய்ச்சியில் இறங்கியமாதிரி எழுதியிருக்கிறார் ஆசிரியர் KRS :-)

‘சங்க இலக்கியத்தில் தமிழ்க் கடவுள்’, ‘ஆண்டாள் கல்யாணப் போட்டியில் வென்ற ஆண்மகன் யார்’, ‘மதுரை மீனாட்சி & simple pendulum’ எல்லாம் வெறும் எடுத்துக்காட்டுகள் தான்.

நேரம் கிடைக்கும்போது இந்தத் தளத்தின் மற்ற பதிவுகளையும் படித்துப் பாருங்களேன்!

7.    மைத்துளிகள்: தளத்தின் பெயரே ஒரு nostalgic உணர்வை ஏற்படுத்துகிறதல்லவா? அவருக்கே உரிய பாஷையில் ரசிக்கும்படியான பதிவுகளை எழுதுபவர்.

இவருடய ‘சாரல்’, ‘ப்ளாஸ்திரி’, ‘அரக்கி’ மற்றும் ‘திரை’ பதிவுகள் நான் மிகவும் ரசித்தவை.

பதிவுகள் எப்போதாவது வந்தாலும் கூட பதிந்ததும் படித்துவிடும் ஆவலைத் தூண்டுவன..

8.    கி.மு பக்கங்கள்: கிருஷ்ணமூர்த்தி என்பவரது வலைத்தளம். இவர் இதுவரை இரண்டு நாவல்கள் வெளியிட்டிருக்கும் ஓர் இலக்கியவாதி. வலைத்தளமும் நடத்திவருகிறார்.

எஸ்.ரா.வின் ‘உறுபசி’ நாவலைப் பற்றி எழுதியிருக்கும் பதிவைப் படித்துப் பாருங்கள்.

‘தொலைய நினைப்பவனின் கதை’ பல பகுதிகளாக எழுதப்பட்டிருக்கிறது. இதில் வாசிப்பின் இன்பத்தை மிகவும் ரசனையாக எழுதியுள்ளார்.

‘முதல் இலக்கிய பயணம்’ பதிவில் அவரது வாழ்வில் நடந்த ஒரு மறக்கமுடியாத சம்பவத்தை நம்மிடம் பகிர்ந்துள்ளார்.

இவர் கல்லூரியில் பயின்று கொண்டிருக்கும் மாணவர் (Aeronautical Engineer) என்பது குறிப்பிடத்தக்கது.

நண்பர்களே, மீண்டும் நாளை சந்திக்கலாம். முன்னர் குறிப்பிட்டதுபோல் நான் சொல்லியிருக்கும் பதிவுகளை மட்டுமல்லாது இந்தத் தளங்களின் மற்ற பதிவுகளையும் படிக்க உங்களை வேண்டுகிறேன்.