இரண்டாம் அத்தியாயம்!

அன்பு நட்புகளே! அனைவருக்கும் மனமார்ந்த ஆங்கில புத்தாண்டு நல்வாழ்த்துகளை தெரிவித்துக் கொள்கிறேன். புதிதாக பிறந்திருக்கும் இந்த ஆண்டில் உங்க எல்லாருடைய ஆசைகளும், கனவுகளும், விருப்பங்களும் நிறைவேற எல்லாம் வல்ல ஆண்டவன் அருள் புரியட்டும்.

புதிதாக பிறந்திருக்கும் இந்த 2014-ஆம் வருடத்தின் முதல் வலைச்சர ஆசிரியராக என்னை அமர்த்திய சீனா ஐயாவுக்கும், என்னை பரிந்துரை செய்த வை.கோபாலகிருஷ்ணன் சார் அவர்களுக்கும் இவ்விடத்தில் நன்றி சொல்லிக் கொள்கிறேன்.

வலைச்சரத்தில் இது எனது இரண்டாவது அத்தியாயம். 2011 அக்டோபர் மாதத்தில் தான் முதன்முதலில் வலைச்சர ஆசிரியப் பணியை செய்தேன். மீண்டும் இந்த வாய்ப்பு கிடைத்துள்ளது எனக்கு மகிழ்ச்சி தந்தது – வாரத்தின் முடிவில் உங்களுக்கும் அறிமுகங்களைக் கண்டு மகிழ்ச்சி கிடைக்கும் என நம்புகிறேன்!

நான் பிறந்தது சிவகங்கைச் சீமையில். படித்தது வளர்ந்தது எல்லாம் கொங்கு நாடாம் கோவையில். திருமணமாகி பத்து வருடங்கள் தலைநகர் தில்லியில் வாழ்க்கை. தற்சமயம் பூலோக வைகுண்டமாம் திருவரங்கத்தில் புகுந்த வீட்டினருடன் வாசம்.....

கோவை அரசினர் பாலிடெக்னிக்கில் இயந்திரவியலில் மூன்றாண்டுகள் பட்டயப்படிப்பும், திருமணத்திற்கு முன்பு வரை ஒரு சில இடங்களில் பணி செய்த அனுபவமும் உண்டு. இப்போது முழு நேர இல்லத்தரசி!

எனது வலைப்பூவின் பெயர் ”கோவை2தில்லி” வலைப்பூ உலகில் முதலடி எடுத்து வைத்தது 2010 ஆகஸ்டு மாதத்தில். ”வெங்கட் நாகராஜ்” என்ற பெயரில் வலைத்தளம் வைத்திருக்கும் என் கணவரின் பதிவுகளை படித்து கருத்திட்டு கொண்டிருந்த எனக்கும் ஒரு வலைப்பூ துவங்கி கொடுத்து ஊக்கப்படுத்தியதால் இதுவரை 208 பதிவுகள் எழுதியுள்ளேன். தற்சமயம் மூன்று ஆண்டுகள் நிறைவடைந்து நான்காம் ஆண்டுக்குள் அடியெடுத்து வைத்துள்ளேன்.

ரசித்த பாடல் என்ற வலைப்பூவில் நானும் என் கணவரும் எங்களுக்கு பிடித்த பாடல்களை வரிகளுடன் பகிர்ந்து கொண்டு வருகிறோம். நான்கைந்து உறுப்பினர்களைக் கொண்ட சாப்பிட வாங்க வலைப்பூவில் நானும் ஒரு உறுப்பினர்…

என்னுடைய கோவை2தில்லி வலைப்பூவில் சமையல், அனுபவங்கள், கல்லூரி, நினைவுகள், படித்ததில் பிடித்தது, பயணம், பண்டிகைகள், தில்லி போன்ற பிரிவுகளில் இதுவரை எனக்கு தோன்றிய விஷயங்களை அவ்வப்போது பகிர்ந்து வந்துள்ளேன்..

சமையலில் ”புளியில்லா சாம்பார்”, கொத்தமல்லி சாதம், குடமிளகாய் சாதம், கறிவேப்பிலைக் குழம்பு, வட இந்திய உணவான சோலே அல்லது சன்னா மசாலா, பாலக் பனீர், ஆகியவற்றை நீங்கள் சுவைக்கலாம்!

கதம்பம் என்ற பெயரில் நான் தொகுக்க ஆரம்பித்த குட்டி குட்டி விஷயங்களின் பகிர்வின் முதல் பகுதி.  இந்த தொகுப்பில் இதுவரை பத்தொன்பது பதிவுகள் வந்து விட்டன!

அனுபவங்களில் வண்ட்டூ மாமாவை பற்றி நீங்கள் அவசியம் தெரிந்து கொள்ள வேண்டும். அவர் ஒரு அலாதியான மனுஷர்.

யாரோ காணாமல் போயிருக்க வேண்டியதாக சொல்லியிருந்த அனுபவம் இங்கே!

முஜே பச்சாவ் நீங்களும் படிக்க வேண்டிய அனுபவம் தான்.

தில்லியில் வருடா வருடம் நடைபெறும் INDIA INTERNATIONAL TRADE FAIR பற்றி போவோமா கண்காட்சிக்கு எனும் பதிவும், ஃபிப்ரவரி மாதத்தில் பூக்கும் மலர்களைக் காண ”ஜனாபதியின் மாளிகைக்கு போகலாமா?” என்பதின் மூன்று பகுதிகளில் முதலாம் பகுதி, தில்லியின் ஹோலிப் பண்டிகை நினைவுகள் ஆகியவற்றையும் இதுவரை படிக்கவில்லை எனில் இப்போது படித்துவிடலாம்!  

பயணக் கட்டுரைகள் எழுதுவதில் எனக்கும் ஆர்வம் வந்துவிடவே, 2012 டிசம்பரில் சென்ற கோவை – கேரளா சுற்றுலா பற்றிய எழுதியதின் முதல் பகுதி இதோ.  அப்படியே நூல் பிடிச்சிட்டு போனா, தொடரின் எல்லா பகுதிகளையும் படிக்க முடியும்.

சென்ற ஆகஸ்டில் கிழக்குக் கடற்கரைச் சாலையில் செய்த ஒருநாள் பயணம் இங்கே!

இரண்டாம் பதிவர் திருவிழாவுக்கு சென்று வந்த அனுபவங்கள் இங்கே!

படித்த புத்தகங்களை பற்றிய எனது அனுபவங்களை அவ்வப்போது பகிர்ந்து கொண்டிருக்கிறேன். அவற்றில் சில - சுஜாதா அவர்களின் எப்போதும் பெண், துளசி டீச்சரின் ஃபிஜித் தீவு கரும்பு தோட்டத்திலே, கி.வா.ஜ அவர்களின் குமரியின் மூக்குத்தி, ஜோதிர்லதா கிரிஜா அவர்களின் அலைகளும் ஆழங்களும்.

திருவரங்க அனுபவங்களில் சென்ற வருட வைகுண்ட ஏகாதசியின் போது எழுதிய பதிவு - ரங்கனைக் கண்டேன்.

என் அம்மாவை நினைவில் வைத்து நான் எழுதிய ஒரே சிறுகதை!

இங்கே கொடுத்துள்ள என்னோட பதிவுகளில் நீங்க படிக்காதவற்றை, பொறுமையாக படித்து விட்டு வாங்க. நாளை வரை உங்களுக்கு நேரம் இருக்கே! நாளை முதல் மற்ற பதிவர்களின் அறிமுகங்களை இங்கே காணலாம். எதைப்பற்றியெல்லாம் பார்க்கப் போகிறோம் என்று யோசனை இருந்தால், அதையும் யோசித்துக் கொண்டிருங்களேன்! :)

மீண்டும் சந்திப்போம்......

ஆதி வெங்கட்

திருவரங்கம்.