சமுதாய விழிப்புணர்வு

சமுதாய விழிப்புணர்வு என்பது நம் எல்லோரிடமும் இருக்க வேண்டிய ஒன்று. முதலில் விழிப்புணர்வு என்பது என்னவென்றால் ஒரு விஷயத்தை பற்றிய ஞானம் – அவ்விஷயத்தினைப் பற்றி நமக்கு தெரிந்ததும், தெரிய வேண்டியதும், என வைத்துக் கொள்ளலாம். நாம் வாழுகிற சமுதாயத்தில் நாம் தெரிந்து கொள்ள வேண்டியது, கடைபிடிக்க வேண்டியவைகளை பற்றிய பகிர்வுகளை வலைச்சரத்தில் இரண்டாம் நாளான இன்று பார்க்கலாம்.

சமூக விழிப்புணர்வு பக்கங்கள் என்ற தளத்தில் சிறப்பான பல விஷயங்கள் உள்ளன.  சில நண்பர்கள் சேர்ந்து நடத்தும் இந்த வலைப்பூவில் சிறப்பான பல விழிப்புணர்வு தகவல்கள் அடங்கியிருக்கிறது.  அவற்றில் சில -  குளங்களின் இன்றைய நிலை, வழி விடுங்க ஆம்புலன்ஸுக்கு, குடும்ப அட்டையை பெறுவது எப்படி?, கூகிள் பேராண்டிக்கு தாத்தா எழுதிய கடிதம்! நீங்களே சென்று பாருங்களேன்.

நான் தொடர்ந்து வாசித்து வரும் வலைத்தளங்களில் ஒன்று - நான்கு பெண்கள்  - இந்த தளத்தில் சமையல், சினிமா, கைவேலை, கோலங்கள், மருத்துவம் என பலதரப்பட்ட விஷயங்களை தொடர்ந்து தந்து கொண்டிருக்கிறார்கள். அதில் நோய் நாடி நோய் முதல் நாடி என்று ரஞ்சனிம்மா எழுதும் தொடரில் உறுப்பு தானம் பற்றி எழுதி இருக்கிறார். நாம் இறந்த பின்னோ, அல்லது இருக்கும் போதேவோ பிறருக்கு பயன் தரும் வகையில் இப்படி உடல் உறுப்பு தானம் செய்யலாமே.

”தங்கள் நிலையில் இருந்து மாற நினைக்கும் திருநங்கை சகோதரிகளுக்கு சமூகமும் நல்ல வரவேற்பை அளித்து, முடிந்த அளவு உதவிட நல்ல உள்ளங்கள் முன்வர வேண்டும் என்பது என் தாழ்மையான விண்ணப்பம். மனமுடைய பேசாமல், மனமுவந்து நீங்கள் வரவேற்க வேண்டும். ஏனென்றால் நாங்களும் வாழ பிறந்தவர்களே. திருநங்கைகளை பணிக்கு அமர்த்துங்கள், அப்போது தான் வாழ்வாதார சூழ்னிலை மாறும் தோழர் தோழிகளே!” என்று சொல்லும் – ஆயிஷா ஃப்ரூக், தன்னுடைய தளத்தில் திருநங்கைகளை பற்றி விழிப்புணர்வு தொடர் எழுதி வருகிறார். சாதனையாளர் திருநங்கைகளை பற்றியும், அவர்களும் நம்மைப் போல் தான், அவர்களுக்கும் வேலைவாய்ப்பு ஏற்படுத்தி கொடுத்தால் சமுதாயத்தின் நிலை மாறும் என்று சொல்கிறார்.  திருநங்கை – விழிப்புணர்வு தொடர் ஐந்து பதிவில் வெற்றி பெற்ற சில திருநங்கைகள் பற்றிச் சொல்லியிருக்கிறார்.

சமூக அக்கறை உள்ளவரா நீங்கள்? என்று கேட்டு, உணவு கலப்படம் குறித்த விழிப்புணர்வு அனைவருக்கும் இருக்க வேண்டியதன் அவசியத்தை குறிப்பிடுகிறார் மூங்கில் காற்று எனும் வலைப்பூவில் பதிவுகள் எழுதி வரும் திரு டி.என் முரளீதரன் அவர்கள்.

நீங்க பழங்கள்/காய்கறிகள் தொடர்ந்து வாங்குவதுண்டு. அதன் மேலே ஒரு வெள்ளைப் பூச்சு இருப்பதைப் பார்த்ததுண்டா? உணவு உலகம் என்ற தளத்தில் உணவு பாதுகாப்பு - நுகர்வோர் கவனத்திற்கு என்ற தொடர் எழுதி வருகிறார். அதில் காய்கனிகளில் உள்ள நச்சுத்தன்மையும், அதன் பின் விளைவுகளும் பற்றி தொடரின் மூன்றாம் பகுதியில் எழுதியிருப்பதை இங்கே பார்த்தால் நிச்சயம் இத்தனை நாள் இந்த விழிப்புணர்வு நமக்குள் இல்லையே என்ற எண்ணம் வந்துவிடும்....

தென்றல் என்ற தளத்தில் பார்த்தீனியம் ஒழிப்பு பற்றி எழுதியிருக்கிறார்கள். இச்செடிகளால் வருகின்ற ஆபத்துகளும், பின் விளைவுகளும் இங்கே உள்ளது. படித்து பார்த்து விழிப்புணர்வோடு இருங்கள்.

மரங்கள் எங்கும் சென்று கல்வி பயில்வதில்லை!

இருந்தாலும் இன்றும்

பறவைகளின் பல்கலைக்கழகமாக

மரங்களே திகழ்கின்றன!

கட்டிடக் கல்விச் சாலைக்குச் சென்றாலும்

எனக்கு அறிவு முதிர்ச்சியடைவில்லை!

இப்படி நமக்கு சொல்பவர் யார்? முனைவர் இரா.குணசீலன் அவர்களின் வேர்களைத் தேடி வலைப்பூவில் அதனால் மரங்களை வெட்டாதீர்கள் என்ற கவிதை வழியாக நம்மிடம் இப்படிச் சொல்கிறார். நீங்களும் பாருங்களேன்.

உலகெங்கும் மரங்களை வெட்டாதீர்கள், காடுகளை காப்பாற்றுங்கள் என்று கோஷம் ஒலித்துக் கொண்டிருக்க, இங்கு மரங்களை வெட்டுங்கள் என்று சொல்கிறார்கள்… என்னவென்று பார்க்கலாமா?

தடாகம் என்ற தளத்தில் அழிந்து வரும் சிட்டுக்குருவிகளை பற்றிய விழிப்புணர்வு எனும் ஒரு பதிவு படித்தேன்.  நம் எல்லோருக்கும் சிட்டுக் குருவிகள் பற்றிய விழிப்புணர்வு வர, அதன் பிறப்பு, அமைப்பு, உணவு, அழிந்து வருவதற்கான காரணங்கள், அதை தடுக்கும் வழிகள் என பல தகவல்கள் நமக்கு தரப்பட்டுள்ளன.  நீங்களும் படிக்கலாமே!

புவியின் சுற்றுச் சூழலுக்‍கு பேராபத்தை விளைவிப்பதில் பிளாஸ்டிக்‍கும் பெரும் பங்காற்றுகிறது. இன்றைய நவநாகரீக உலகில் பிளாஸ்டிக்‍ பொருட்களின் பயன்பாடு தவிர்க்‍க முடியாதது என்ற போதிலும் அதன் கழிவுகள் அணுகுண்டுக்‍கு நிகரான மோசமான பல விளைவுகளை பூமியில் ஏற்படுத்துகின்றன. அவற்றில் சில அதிர்ச்சி தரும் தகவல்களை பிளாஸ்டிக்கால் விளையும் கேடுகள் என்ற தலைப்பில் வெளியிட்டு இருக்கிறார்கள் புவி எனும் தலைப்புடைய வலைப்பக்கத்தில்.

என்ன நண்பர்களே, இந்த வார வலைச்சரத்தில் நான் தொடுத்த இரண்டாம் மலர்ச்சரம் இது. விழிப்புணர்வு பற்றிய சில தளங்களை உங்களுடன் பகிர்ந்து கொண்டதில் மகிழ்ச்சி.  நாளை வேறு சில தளங்களைப் பார்க்கலாம்!

நட்புடன்

ஆதி வெங்கட்.

திருவரங்கம்.