செல்விருந்தோம்பி வருவிருந்து காத்திருத்தல்

அன்பின் சக பதிவர்களே

இன்றுடன் முடியும் வாரத்திற்கு ஆசிரியப் பொறுப்பேற்று பதிவுகள் இட்ட அருமை நண்பர் மகேந்திரன் பன்னீர் செல்வம்  தான் ஏற்ற பொறுப்பினை சரி வர முழு மனதுடன் நிறைவேற்றி - நம்மிடமிருந்து விடை பெறுகிறார்.

இவர் இட்ட பதிவுகள் : 007
அறிமுகப் படுத்திய பதிவர்கள் : 039
அறிமுக படுத்திய பதிவுகள் : 048
பெற்ற மறுமொழிகள் : 077
வருகை புரிந்தவர்கள் :

பெற்ற தமிழ் மண வாக்குகள் : 37 

நாளை முதல் துவங்கும் வாரத்திற்கு   ஆசிரியப் பொறுப்பினை ஏற்க அன்புடனும் ஆர்வத்துடனும்  சே.குமார்   இணக்கம் தெரிவித்துள்ளார்.  

தேவகோட்டைக்கு அருகில் இருக்கும் பரியன்வயல் என்ற கிராமத்தில் சேதுராமன்-சிவகாமியின் ஆறாவது மகனாகப் பிறந்தவர்.  படித்தது எம்.சி.ஏ., தற்போது அபுதாபியில் பணி புரிகிறார்.. அன்பான மனைவி (நித்யா) அறிவான பிள்ளைகள் (ஸ்ருதி, விஷால்) என் வாழ்க்கையின் சந்தோஷங்கள். மனசு என்ற வலைத்தளத்தில் தொடர்ந்து எழுதி வருகிறார்..

இவரை எழுத்தாளனாக்கிப் பார்த்தவர் இவரது கல்வித் தந்தை பேராசிரியர். முனைவர். மு.பழனி இராகுலதாசன், இவரின் முயற்சியால்தான் குமார் எழுத ஆரம்பித்தார்.  எழுத்து இவருக்குப் பிடிக்கும்... ஆனால் எழுத ஆரம்பித்ததில் இருந்து இரண்டு முறை நீண் ட விடுமுறை விட்டு பின் தொடர ஆரம்பித்தார். குறிப்பாக வலைப்பூ ஆரம்பித்த பின்னர்தான் தொடர்ந்து எழுத ஆரம்பித்தார்.

இவருக்கு சிறுகதைகள் எழுதுவது ரொம்பப் பிடிக்கும். அதுவும் இவரது  தேவகோட்டைப் பேச்சு வழக்கில்தான் இவரது சிறுகதைகள் இருக்கும். இவரது  முதல் கவிதையான 'ஒரு கட்-அவுட் நிழலுக்கு கீழே'  கல்லூரியில் படிக்கும் போது தாமரையில் வெளிவந்து திரு.பொன்னீலன் அவர்க்ளின் பாராட்டைப் பெற்றது.

தினபூமி-கதைபூமி, உதயம், பாக்யா, சுபமங்களா, தினமணிக் கதிர், தினத்தந்தி குடும்பமலர், மங்கையர் சிகரம் என பல பத்திரிக்கைகளில் கதை, கவிதைகள் வெளிவந்திருக்கின்றன. வெளிநாட்டு வாழ்க்கை என்று ஆனபோது பத்திரிக்கைகளுக்கு அனுப்புவது குறைந்து விட்டது. இருப்பினும் தற்போது அதீதம், சிங்கப்பூர் கிளிஷே என்ற மின்னிதழ்களில் கதைகள் வெளியாகியிருக்கின்றன. வம்சி நடத்திய சிறுகதைப் போட்டியில் கருத்தப்பசு என்ற சிறுகதை தொகுப்பிற்கு தேர்வாகி 'காக்கைகள் துரத்திக் கொத்தும் தலைக்குரியவன்' என்ற சிறுகதைத் தொகுப்பில் இடம்பெற்றுள்ளது. வெட்டி பிளாக்கர்ஸ் சிறுகதைப் போட்டியில் 'நினைவின் ஆணிவேர்' முதல் பரிசைப் பெற்றது. பரிசுத் தொகை கிடைக்கவில்லை என்றாலும் அனைவரின் பாராட்டையும் பெற்றது.

மனசில் 'கலையாத கனவுகள்' என்ற முதல் தொடர்கதையை எழுதி ஓரளவுக்கு வெற்றி பெற்றார். தற்போது இரண்டாவது தொடராக 'வேரும் விழுதுகளும்' என இவரது  வட்டார வழக்கில் பேச்சு வழக்கில் ஆரம்பித்து சிறப்பான வரவேற்பை பெற்றிருக்கிறார்.. இவருக்கு இந்த வருடத்திலாவது சிறுகதைத் தொகுப்பு கொண்டு வர எண்ணம் இருக்கிறது. அதேபோல் குறும்பட எண்ணமும் இருக்கிறது. இறைவன் நினைத்தால் எல்லாம் நடக்கும்.

வலை கொடுத்த நட்புக்களும்  உறவுகளும் வாழ்வில் தொடர்ந்து வரவேண்டும் என்று இறைவனைப் பிரார்த்திக்கிறார்..

நாளைய வலைச்சர ஆசிரியப் பொறுப்பினை ஏற்கும்  சே.குமாரினை வருக வருக - ஆசிரியப் பொறுப்பேற்று ஒரு வார காலத்திற்கு சிறந்த பதிவர்களையும் அவர்களது சிறந்த பதிவுகளையும்  அறிமுகம் செய்யும் பதிவுகளைத்  தருக எனக் கூறி வாழ்த்துவதில்  பெரு மகிழ்ச்சி அடைகிறேன்.

நல்வாழ்த்துகள் மகேந்திரன்

நல்வாழ்த்துகள் குமார் 

நட்புடன் சீனா