சூப்பர் ஜெய்லானி - வாங்க கலக்க வாங்க சரவண குமரன்

அன்பின் சக பதிவர்களே

இன்றுடன் முடியும் வாரத்திற்கு ஆசிரியராகப் பொறுப்பேற்ற அருமை நண்பர் ஜெய்லானி, ஏற்ற பொறுப்பினை மன நிறைவுடன் நிறைவேற்றி நம்மிடமிருந்து விடை பெறுகிறார். இவர் வித்தியாசமான முறையில் - தினம் ஒரு தலைப்பாக - பதிவர்களை அறிமுகப்படுத்தி உள்ளார். முன்னுரை அறிமுகம் முடிவுரை என மூன்று பகுதிகளாகப் பிரித்து அழகாக சரத்தினைத் தொகுத்திருக்கிறார்.

சென்ற வாரத்தில் ஏழு இடுகைகள் இட்டு, ஐநூற்று எண்பது மறு மொழிகள் பெற்று, நூற்றி இருபது இடுகைகளை அறிமுகப் படுத்தி உள்ளார். சாதாரணமாக - ஆசிரியர்கள் இவ்வளவு பதிவர்களை அறிமுகப் படுத்துவது கிடையாது. இவ்வளவு அறிமுகங்கள் செய்ய வேண்டுமென்றால் - அத்தனையையும் படித்திருக்க வேண்டும். சுட்டிகள் - இடுகைகளின் தொடர்பு அறிமுகத்தில் அளிக்க வேண்டும். அது அவர்களின் கடும் உழைப்பினை வெளிப்படுத்துகிறது. வழக்கமான, அவரது சொந்த வலைப்பூவில் எளிதாக இடும் இடுகைக்கு உழைப்பதை விட இங்கு அதிகம் உழைத்திருக்கிறார்.

நண்பர் ஜெய்லானியினை பாராட்டி, நல்வாழ்த்துகளுடன் விடை அளிப்பதில் பெருமை அடைகிறேன்.

அடுத்து நாளை செப்டம்பர் 27ம் நாள் துவங்கும் வாரத்திற்கு ஆசிரியப் பொறுப்பேற்க வருகிறார் நண்பர் சரவணமுமரன். இவர் குமரன் குடில் என்னும் பதிவினில் எழுதி வருகிறார். இவர் ஒரு சாதாரண தமிழனாக வாழ விரும்புபவர் - வாழ்பவர். இவர் பெங்களூரில் மென்பொருட்துறையில் பணி புரியும் ஒரு தென் தமிழக இளைஞர். பெரும்பாலும் எழுதுவதை விட வாசிப்பதில் அதிக ஆர்வமுடையவர். வாசிப்பின் தாக்கம் எழுதத் தூண்டி எழுதவும் செய்கிறார்.

நண்பர் சரவண குமரனை வருக ! வருக ! ஆசிரியப் பொறுப்பேற்க வருக ! என வாழ்த்தி வரவேற்பதில் மகிழ்ச்சி அடைகிறேன்.

நல்வாழ்த்துகள் சரவனா குமரன்
நட்புடன் சீனா