எல்லோருக்கும் பிடித்த ஹீரோ...!!!

அப்பா… 

என் நினைவலைகள் பின்னோக்கி….

பயணம் செய்கிறது. 

வருடங்கள் ஏற…ஏற..

பயணத்தின் தூரமும் கூடுகிறது

அடிக்கடி பயணம் செய்து 

களைப்படைய விரும்பவில்லை

நிறைய களைப்படைந்ததால்..

ஆனால் - 

அது தான் பசுமையாய் 

நினைவில் நிற்கிறது. 

அன்பில் நனைந்த நினைவுகள் 

ஆழமாய் இறங்கி விட்டன 

கவலை என்றால் என்ன..? 

அறியாத வயது….

ஆனந்தம் ஆனந்தம் தான். 

எனக்கு மிகவும் பிடித்த மனிதர் 

அவரிடம் இருந்து தான் 

உண்மை, நேர்மை, நாணயம், 

எளிமையின் கம்பீரம்….

உள்ளது உள்ளபடி இருத்தல்..

என கற்றதை

சொல்லிக் கொண்டே போகலாம்..

அந்த அஸ்திவாரம் தான் 

எங்களின் வாழ்க்கையை 

எளிமையாக கடக்க உதவிய துடுப்பு. 

ஆனால்  அவர் போன பின் 

வாழ்க்கையின் நிதர்சனம்,வலிகள், 

ஆனந்தம் அப்படின்னா..? 

என எல்லாம் விட்டு போயின…

காலியான வெறுமை…

தங்கிவிட்டது. 

ஐயப்பனுக்கு பிரியமான பக்தர்…  

அவரே அழைத்துக் கொண்டார்

இன்றும் அவரின் மகள் என 

மற்றவர் சொல்லும் போது 

பெருமையாக இருக்கிறது. 

அவரின் நற்குணங்கள் 

வாழ்ந்து கொண்டிருக்கிறது.

அப்பா…

எத்தனையோ குழந்தைகளின் 

முதல் நாயகன் அவர் தான். 

தந்தைக்குள்ளும் ஒரு தாய்மை உணர்வுண்டு. அது மேல் எழுந்தாற் போல் தெரியாது. நம்மை மனதில் சுமந்து பெற்றவர் அவர். ஆகையால் தானோ தாயுணர்வை மறைத்தே வைத்திருக்கிறார்...? நம்மை ஏற்றி விடும் ஏணி அவர். மெளனமாய் இருந்திடுவார். நம்முடன் நிறைய நேரங்கள் செலவிடாவிட்டாலும் நம்மை நன்கு அறிந்து வைத்திருப்பார். நமக்கெது பிடிக்கும் என நமக்கு தெரிவதை விட நம் அம்மா, அப்பாவிற்கு நன்கு தெரியும் என நான் நினைக்கிறேன். நமக்கு எது வரும் வராது என அவர்கள் துள்ளியமாக உரைப்பார்கள். 

நம்முடைய திறமைகளை கண்டுபிடித்து ஊக்கு விப்பார்கள். சிறுவயதில் ( 3, 4 வது படிக்கும் சமயம்) இருந்து எனக்கு கோலம் போடுவது, வரைவது என்பது மிகவும் பிடித்த ஒன்று. தெருக்களில் யாராவது அழகாய் கோலம் போட்டு இருந்தார்கள் என்றால் பார்த்து வந்த மறுநாளே எங்களில் வீட்டு வாசலில் போட்டு விடுவேன். அந்த பெரியவர்கள் அடுத்த நாள் பார்த்து விட்டு உங்க பொண்ணு சின்ன வயதுலயே எங்களை மாதிரி நல்லா போடுறா என்பார்கள். கண்ணு பார்த்தா கை வேலை செய்யும். இதை எங்க அப்பா நல்ல தெரிந்து வைத்திருந்தார். உனக்கு படிப்பை விட ஓவியம் நல்லா வருது ஆகையால் 6 வதில் ஓவியப்பள்ளியில சேர்க்கவா அப்படின்னார்...? அவர் கேலி பண்ணுகிறார்ன்னு தப்பா நினைத்து விட்டேன். (நீங்க வேற ரொம்ப மோசமா படிப்பேன்னு நினைக்காதீங்க ஒரளவு நல்லா படிப்பேன்.) இப்போ தோணுது சே...நாம தப்பு பண்ணிட்டோம் ஒழுங்கா ஓவியம் வரைய கத்துட்டு இருக்கலாம்ணு...

இப்போது வரை கத்துக்காம வரைந்திட்டு இருக்கேன். முறையா ஓவியம் வரைய கத்துக்கணும்னு ஆசை பார்க்கலாம்...இன்னும் காலம் இருக்கே.

அப்பாவை பற்றிய நினைவுகள் ஒவ்வொருவருக்கும் ஒவ்வொரு விதமாக இருக்கும் இல்லையா.....புதைந்த நினைவுகள் அழகாய் ஓரமாய் சிம்மாசனமிட்டு வீற்றிருக்கும். அவரவரின் அப்பாக்கள் குறித்து அவர்களின் பதிவுகளை காணலாமா...

மகளைப் பெற்ற அப்பா..என்கிற கதையை மருத்துவர் மயிலன் அவர்கள்  தன் 

வலைத்தளம் மயிலிறகுவில் பதிவிட்டு இருக்கிறார். மெல்லிய உணர்வலைகள்....பயணிக்கிறது கதையின் தொடக்கம் முதல் முடிவு வரை. முடிவில் கண்களில் நீர் பூக்கிறது. ஒரு இளம் தந்தையின் அவஸ்தையை அழகாய் சொல்லிச் செல்கிறார். இளம் பெண்ணின்
தந்தை மார்கள் அவசியம் படிக்க வேண்டிய கதை இது. 

நவீன் பிரகாஷ் அருமையிலும் அருமையாய் அப்பாகவிதையை
எழுதி இருக்கிறார். இக்கவிதையை பலபேர் தன் வளைத்தளத்தில் பகிர்ந்து
இருக்கிறார்கள். சிலர் தன் படைப்பாய் பதிவிட்டு இருக்கிறார்கள். ஆதலினால் என்னும் வலைத்தளத்தில் இக்கவிதையை ருசித்து வாருங்கள் நண்பர்களே.

வலியவனிடம் காட்ட முடியாத கோபத்தை... எளியவனிடம் காட்டுகிறோம்.

அதுவும் பொற்றவர்கள் என்றால் எதையும் யோசிக்காமல் காட்டி விடுகிறோம்.அவர்களும் நம் பிள்ளைக்கு ஏதோ பிரச்சனை அதனால் மனக்கஷ்டம்   எனவேதான் இப்படி பேசுகிறான் என புரிந்து நமக்கு வடிகாலாய் இருக்கிறார்கள். நாம் அவர்களை புண்படுத்துகிறோம் என புரிந்து கொள்ள சில நேரங்களில் தவறி 

விடுகிறோம். ஆனால் அவர்கள் தாம் நம் ஆன்மபலம். 

தவறுகள் உணரும் தருணம்  என்னும் கதையின் வாயிலாக தம்பி கூர்மதியன் அழகாய் 

சொல்லிச் செல்கிறார் அவரின் வலைத்தளம் - ம்...!!! 

 Romeo Benet -  வைப்பூவில் நான் தொலைத்த என் அப்பா...  (கவிதை சாரல்கள்) வில்  அப்பா இல்லாத இருப்பு எப்படி
இருக்கும் 

அதன் வெறுமையை சிந்தியிருக்கிறார். எத்தனை பேர் இருந்தாலும் நீ 

இல்லாத நம் வீடு மூலவர் இல்லாத கர்பக்கிரகமாகவே இருக்கிறது என என்னமாய் .....கவிதை எழுதி இருக்கிறார்.

சுஜா கவிதைகள் என்கிற வலைத்தளத்தில் தான் கவிதைகளையும், பயணங்களையும் நேசிக்கும் ஜீவன் என தன்னைப்பற்றி சொல்கிறார். உண்மைதான். 

அவரின் வலைத்தளம் கவிதை பூக்களை மணம் பரப்பிக் கொண்டும், பயணங்களின் பதிவளில்அவர் கண்ட இடங்களை பதிவிட்டு இருப்பதில் இருந்தே தெரிகிறது அப்பா...!!! நச்சுன்னு ஒரு கவிதை.

பயணங்களின் பதிவுகள் என இவர் சென்ற பயணக்குறிப்பு பயனுள்ளதாக
இருக்கிறது.
அந்தமான் -1 ஒரு விசிட் போகலாமா நாமளும்....அடடே அந்தமானுக்கு இல்லங்க அவர் வலைக்குத்தாங்க...

விஜய் தன் பெயரிலேயே விஜய் கவிதைகள் என வலைத்தளம் வைத்திருக்கிரார். தந்தையின் பாசம் அவர் நடந்து கொள்ளும் விதத்திலேயே இழையோடி இருக்கிறது என்பதையும், ஆகையால் தான் அம்மாக்கள் முதலிடம் பாசத்தில் எப்போதும் என அன்புள்ள அப்பாவிற்கு... என்னும் பதிவில் அழகாய் உரைக்கிறார். 

 குறலும் குத்து மதிப்பும் என்கிற தளத்தில் நெல்லை பழனி ராஜா அப்பா மகன் உறவில் மகன் அப்பாவாகும் போது, தன் அப்பாவை அதிகம் நினைக்கிறான் என்பதை அப்பா கவிதையில் அருமையாக வடித்திருக்கிறார். 

நம்மில் எத்தனை பேருக்கு அப்பாவுக்கு பிடித்தவை, அப்பாவின் ரசனைகள் பற்றிதெரிந்திருக்கும்...? அப்பாக்களை புரிந்து கொள்ள, அவர்களிடம் கற்றுக் கொள்ள ஏராளம் இருக்கிறது. அது எப்படி வாழ வேண்டும் என்று மட்டும் இருக்க வேண்டிய அவசியமில்லை! சில சமயங்களில் எப்படி வாழக்கூடாது என்பதாகக் கூட இருக்கலாம். இப்போதும் எனக்கு அப்பாவைப் பிடிக்கும் என்பது அப்பாவுக்கு தெரிந்திருக்குமா? என வானம்தாண்டிய சிறகுகள் வலைத்தளத்தி...அப்பா!வைப்பற்றி உமா ஜி விரிவாக எழுதி இருக்கிறார். சென்று பாருங்கள் நண்பர்களே.

 Cheers with jana வில் ஜனா ஒரு மகளின் பார்வையில் அவளது அப்பா...அவளது கண்களுக்கும், மனத்திற்கும் எப்படி எல்லாம் காட்சியளிக்கின்றார் உணர்வுடன் பாருங்கள்...என்கிறார் தன்னுடைய  அப்பா.......   பதிவில். என் அப்பாவைப் போல இந்த உலகத்தில் வேறு எதுவும் கிடையாது. இறைவனின் மறு உருவம் தான் அப்பா என முடிக்கிறார்.

தீபிகா கவிதைகளில்   தீபிகா ஒரு குழந்தையின் நடத்தை,பழக்கவழக்கம்,பண்பு எல்லாவற்றுக்கும் முன்னுதாரணமான வழிகாட்டி தந்தையே என்கிறார் அவர் சொல்வது சரி தானே. தந்தை என்கிற சூரியனின் வெளிச்சம் நன்றாக கிடைத்து விட்டால் பிள்ளைத் தாவரங்கள் இயல்பாகவே செழித்து வளர்ந்து விடும். வாழ்வின் அனுபவப் பாடங்கள் அனைத்தினதும் மிகச் சிறந்த ஆசானாக ஒவ்வொரு இளைஞனுக்கும், யுவதிக்கும் அவரவர் அப்பாக்களே இருக்கிறார்கள் என தன் அப்பா...உரைநடையில் அசத்தலாய் இன்னும் நிறைய சொல்கிறார் திபீகா.

நான் வாழும் உலகம் வலைப்பூவில் ரியாஸ்Le Grand Voyage ஒரு மகத்தான பயணம்!!!  என்னும் பிரெஞ்சு படத்தை பற்றி ராமகிருஷ்ணனின் விமர்சனத்தை பகிர்ந்து இருக்கிறார். மேலும் அவர் மொழியில் நீங்கள் படிக்க  நன்றாக இருக்கும் என நினைக்கிறேன்.

இந்தப் படம் பார்த்த தருணத்திலிருந்து இதைப்பற்றி எழுதியே ஆகவேண்டும் என்ற ஆர்வத்தோடு பலமுறை முயன்றாலும் ஏனோ என்னால் முடியவில்லை.. காரணம் அப்படத்தின் உள்ளடக்கத்தையும், பாத்திரங்களின் முற்று முழுதான உணர்வுகளையும் எழுத்தில் கொண்டு வர முடியவில்லை..

இஸ்லாமிய ஐம்பெரும் கடமைகளிள் ஒன்றான ஹஜ் பயணத்தையும், தலைமுறை இடைவெளிகளால் தந்தை மகனுக்கிடையில் இடம்பெறும் புரிந்துணர்வின்மையையும் அவற்றினால் ஏற்படும் உணர்வுப்போராட்டங்களையும் மிக அற்புதமாக சொல்லி செல்கிறது இப்படம்.. இதை ஒரு படம் என்று சொல்வதை விட ஒரு மகத்தான பயணம் என சொல்வதே ஏற்புடையது படம் பார்க்கும் போது அந்த உணர்வு நமக்கு தொற்றிக்கொள்ளும்..  இந்தப்படத்தை பற்றிய எழுத்தாளர் எஸ் ராமகிருஷ்ணன் அவர்களின் கட்டுரையொன்றிருக்கிறது..அதில் இப்படத்தைப்பற்றி அற்புதமாக விபரித்திருக்கிறார்.. அதைவிட அழகாக வேறு யாராலும் சொல்லிவிட முடியாது என நினைக்கிறேன்..  ஆகையால் அதை இங்கே பகிர்கிறேன்!!

இனி எஸ் ராமகிருஷ்ணன் எழுத்துக்களில் தொடர்கிறது...முழுப்பயணம்/படம்

தமிழ் வலைத்தளைத்தில் ராஜா MVS பெண் பிள்ளைகளின் தந்தைகளே! கவனியுங்கள்..,  என்கிற பதிவை கட்டாயம் படியுங்கள். மிக அற்புதமாக விவரித்து இருக்கிறார். பெண்குழந்தைகளின் அப்பாக்கள் கண்டிப்பாக பார்க்க வேண்டிய பதிவு



இந்திரா பிரியதர்ஷினிக்கு நேரு எழுதிய உலக வரலாறு  இதை டாக்டர் ஜம்புலிங்கம் ஐயா அவர்கள் நேரடியாக ஆங்கிலத்தில் படித்து உணர்ந்து முடிந்தவரை தமிழில் 
மொழிபெயர்க்க வேண்டும் என்ற எனது ஆசையே இப்பதிவிற்குக் காரணம் என்கிறார்கள்.

இந்திரா பிரியதர்ஷினிக்கு அவருடைய தந்தை ஜவஹர்லால் நேரு எழுதியுள்ள கடிதத் தொகுப்பைக் கொண்ட  "உலக வரலாறு' (Glimpses of World History) என்ற நூலில் தந்தைக்கும் மகளுக்கும் இடையே ஆன ஒரு பிணைப்பினையும், பாசத்தையும் உணரமுடியும். பல்வேறு காலகட்டங்களில் தன் மகளுக்கு எழுதிய கடிதங்களில் உலக நாடுகளின் தோற்றம், பல நாடுகளில் சமய, சமூக, பண்பாட்டு நிலை, புரட்சிகள், உலகப்போர்கள் போன்றவை உள்ளிட்ட பல செய்திகளைப் பற்றி விவாதிக்கிறார்.  தன் மகளுக்கு அவர் சொற்களாலும் சொற்றொடர்களாலும் அவர் கொண்டுள்ள அத்தகைய பிணைப்பைக் காண்போம்

அவர் தளம் சென்று கடிதங்களைக் கண்டு வாருங்கள்.அற்புதமாக இருக்கிறது.

                                             தஞ்சாவூர் ஓவியம்


தந்தையை போற்றுவோம்
தந்தைக்கு நன்றி.


இன்று என் வலைத்தளத்தில் சாய் பாமாலை
வாழ்க வாழ்க சாயின் நாமம்