பின்னுவது கவிதை !

இதுவரை வந்த அநேக வலைச்சர ஆசிரியர்களும், கவிதை பற்றி குறிப்பிடாமல் சென்றதில்லை. கவிதைகள் இல்லாமல் ஒரு உலகை சிந்தித்தும் பார்க்க இயலவில்லை. அதனால் முதலில் கவிதை பின்னுவோம்.

அசத்தும் சில வரிகளில் நம்மைக் திளைக்க வைக்க வருகிறார்கள் (இளம்) கவிஞர்கள் சிலர்.

---

சில மாதங்கள் முன்பு, மகேஷ் எனும் இவ்விளம் கவிஞரின் வலைப்பூ சுட்டி அனுப்பி, வாசிக்குமாறு கூறியிருந்தார் நண்பர் நாகு. "சுருக்கல்" எனும் தலைப்பில் 'மகேஷ்' எழுதியிருக்கும் முப்பதைத் தொடும் கவிதைகள் அனைத்தும் அருமை. உதாரணத்திற்கு :

"பெண்ணே!
நீ அழகிய மழை மேகம்!
மண்ணாக இருந்து அன்னார்ந்து பார்க்கிறேன்!
மழையாக வந்து வாசம் சேர்ப்பாயா ?"

அடுத்து, அம்மாவின் கரிசனம் என்று

அம்மா அழுதாள்..
நானும் அழுதேன்!

என ஆரம்பித்து, அடுத்த சில வரிகளிலேயே அற்புதமாய் முடித்திருக்கிறார், இப்படி

விட்டு விட்டு..
காதில் விழுந்தது..
'பாவம்டி மாப்ள'!!

இவரது சுருக்கல்களைப் படித்து சில சுட்டிகள் இங்கு தரலாம் என்று பார்த்தால், எல்லாமே சுருக், சுருக் ரகம் தான்.

---

"நான் ஒரு பக்கம்
உன் உடைந்த கண்ணாடி
வளையல் துண்டுகள் ஒரு பக்கம்!
சமனாகி விடுகிறது
காதல் துலாபாரம்!"

எனக் கலக்குகிறார் கவிஞர் "ப்ரியன்". கவிதைகள் பல இயற்றிய இவரின் வலைப்பூவில், 'காதல்' லேபிள் எண்ணிக்கைகள் 133 !!!! பல கவிதைகளில், அசாத்திய வீச்சு பொதிந்திருக்கிறது இவரின் வரிகளில். உதாரணத்திற்கு :

"ஒரு நாள் மழையோடு;
மற்றொருநாள் மலரோடு;
இன்னொரு நாள் இசையோடு
என்று ஒவ்வொரு சந்திப்பின் பிறகும்
ஒவ்வொன்றோடு திரும்புகின்றேன்;
பொத்தி வைக்க இடமில்லாமல் போகும் நாளில்
மொத்தமாக கடத்திச் செல்வேன் உன்னை!"

ஒரு கதாநாயகனாய் நம்மை உணரச் செய்யும் இவ்வரிகள் என்பது உண்மை. இவரின் மற்ற கவிதைகளையும் பொருமையாக வாசித்து அனுபவியுங்கள்.

---

"இன்றும் நீ ஞானியாய்
தானிருக்கிறாய்
நானும் குழந்தையாய்
தானிருக்கிறேன்"

என வியக்க வைக்கும் கவிஞர் / எழுத்தாளர் பாஷா அவர்கள்.

"நீ சொல்லி விட்டுவிட
சில கெட்டபழக்கங்களை
உடன்வைத்திருக்கிறேன்
ஆனால் நீயோ
என் நெற்றி மோதி
என் சிகரெட் சுவாசம் சுகமென்கிறாய்"

நிறைய பெண்கள் இம்மனவோட்டத்தில் தான் இருக்கிறார்கள் என எண்ணுகிறேன் (தமிழ் சினிமா பார்க்கும் எஃபெக்டா எனத் தெரியவில்லை !). ஒரு எதார்த்தத்தை இவ்வரிகளில் கொண்டுவந்தது வியக்க வைக்கிறது.

---

"எவ்வளவு ஏற்றினாலும்
சுமக்கிறேன்
நல்ல பெயர் மட்டும்
கிடைத்ததே இல்லை
சுமந்து கொண்டேஇருக்கிறேன்
என்னைப் பிடிக்காதவர்களின்
அழுக்குகளையும் தான்."

எனக் கழுதையையும் மதித்துக் கவி பாடி, மேலும் பல கவிதைகள் இயற்றி வ(ள)ரும் கவிஞர் அத்திவெட்டி ஜோதிபாரதி அவர்கள்.

---

"இல்லம் என்றதும்
இதயம்
இரண்டாகிறது
இருமனங்கள்
இணையும்
திருமணத்திற்கு பிறகு
தாய் என்றும்
தாரம் என்றும்
தவிக்கும்
தவிப்பைக் கண்டு,"

என அசத்தல் வரிகளுக்குச் சொந்தக்காரர் கவிஞர் 'திகழ்மிளிர்'

---

"காதலித்துப் பார்
கையெழுத்து அழகாகும்
என்றான் ஒரு கவிஞன்...
நானும் காதலித்தேன்...
தலையெழுத்தே
மாறிப் போனது!!!"

என்று காதலை வித்தியாசமாகச் சொல்லும் கவிஞர் 'இனியவள் புனிதா'

---

நீந்த தெரியாமல்
கிணற்றை
ரசிப்பது தவறென்று
ஒவ்வொரு முறை கால் தவறி
உள்விழும் பொழுதும்
நினைத்துக் கொள்கிறேன்

என்று படிக்கும்போது சற்று ஒரு நொடி சிந்திக்க வைத்தது கவிஞர் இலக்குவணின் வரிகள். அனுபவச் சிந்தனை. இவரது பல கவிதைகள் அர்த்தம் புரிய உட்கார்ந்து யோசிக்கணும். மாடன் ஆர்ட் போல என்று சொல்லலாம்.

---

அழகே ஆயினும் ஒரு தூரத்தில் இருக்கும் வரை தான் அழகு என்று எழுதியிருக்கிறார் மின்னல், இவரது 'எல்லை' எனும் இரு வரிக் கவிதையில்.

அழகான கோலம் கூட
வாசல் தாண்டி உள் வருவதில்லை

---

இப்பதிவைப் படிக்கும் தாங்கள் கவிஞராய் இருந்து, "நம்ம பதிவு வரலையே என்று நினைத்தால்", ஒன்று நீங்கள் நன்கு அறியப்பட்டவராக‌ இருக்கலாம். இரண்டாவது, தவறு எனதாக இருக்கலாம். உங்களின் பதிவை கவனிக்கத் தவறியிருக்கலாம். அதற்காக உங்களின் படைப்புத் திறன் ஒரு விதத்திலும் குறைச்சலில்லை.

நேரம் இருப்பின் இவர்கள் அனைவரின் மற்ற கவிதைகளையும் வாசித்து மகிழுங்கள்.

இயன்றவரை வாசித்து உங்கள் கருத்துக்களை கவிஞர்களுடன் பகிர்ந்து கொள்ளுங்கள். நான்அடுத்த பதிவ பத்தி யோசிக்கறேன் .....