என்னிலை முதலில் (வலைச்சரம்)

நான் என்பது க. பாலாசி. என்னிந்த உடலுக்கும், உயிருக்கும் இக்குறுகிய ஆயுளில் எனை ஈன்றோர் கொடுத்திட்ட ஒரு புனைவு.

மஞ்சள் நகருக்கும் (ஈரோடு), மயிலாடுதுறைக்குமிடையே (செம்பொன்னார்கோவில்) அமைக்கப்பெற்றதொரு சிறிய பாலம் எனது வாழ்க்கை. இருட்டறையில் எழுதப்பட்ட என்கதையில் மெல்லியதொரு ஒளியாய் இந்த வலைப்பூ. இலக்கில்லா திசையினை எட்டிப்பிடிக்க ஏதுவாக இந்த பரிணாமம். இருளில் நின்று கருமையை உமிழ்ந்து, வெண்மை வெளிப்பட்டதாய் மனதிற்குள் ஓர் மகிழ் மாயைப்பொருந்திய மனிதனாக நானும்.

எங்கோ அல்லது என்றோ மனதில் புதைப்படவிருந்த ஒருவித ஏக்கம், இயலாமை மற்றும் தனிமையினை இன்றையநாளில் எழுத்தின்வடிவில் இழைத்துக்கொட்டவெண்ணும் ஒரு சீவன். கடல்கொண்ட உலகில் அலைகளின் ஆட்டுதலுக்கு அசைவுற்று விரையும் கப்பல்களுக்கு நடுவே நானும் ஒரு சிறிய கட்டுமரத்துடன் காத்திருக்கிறேன்.

என்செடியில் பூத்த மலர்களுக்கு வாசமளித்துகொண்டிருக்கும் அன்பர்கள், நண்பர்கள் (ஆண், பெண்) யாவருக்கும் நன்றியை நவிலும் தருணமும் வாய்ப்பும் இதுவன்றி வேறெப்படியமையும் என்பதில் இன்றுவரை ஐயமே மிகைகிறது. என்னெழுத்துடன் துணையெழுத்தாய் என்றுமிருக்கும் வலையுலக படைப்பாளிகளுக்கும், வாசகர்களுக்கும் என்னென்றும் நன்றியியம்புவது என்கடமை.

வலைச்சரம். பெரும் மதிப்பிற்கும், பிரமிப்பிற்குமுரிய இடம். இப்பெயர்தான் இத்தளத்திற்கு எவ்வளவு பொருத்தம். எத்தனைச்சரங்கள் இங்கே மகுடமாக வீற்றிருக்கின்றன. இத்துடன் நானும் எனது உதிரிப்பூக்களை தூவிவிடுகிறேன் என்பதே எனக்கு பெருமைதான்.

ஆசிரிய வாய்ப்பினை ஒரு மாணவனுக்கு வழங்கி ஒதுங்கிநின்று, என் ஒப்பனையின் வீரியம் காணுமொரு குருவாய் அய்யா சீனா அவர்கள். மீண்டும் நன்றியினை அவருக்கு உரித்தாக்குவது என் சிரம்தாழ்ந்த பணி.

மாணவனாய் படைப்பாளிகளை சுட்டிக்காட்டுவது என்போன்ற புதிவர்களான பதிவர்களுக்கும் மிகையுதவும் என்ற நன்நன்பிக்கையின் நோக்கில் இந்தவாரம் என்னுடையதாக இத்தளத்தில் அடையாளப்படுத்தப்படுகிறது.

நேற்றென்னுள் விரிந்த மலர்களை, இன்று வெறுக்கும் ஒரு மனநிலை எனக்குள் எப்பொழுதும் இருப்பதுண்டு. காரணம் இன்னும் சிறப்பாக எழுதியிருக்கவேண்டும் என்ற எண்ணம். சரியோ தவறோ புதிதாயொரு இடுகையை ஈனும்போதும் நேற்றென்னது இறந்துவிடுகிறது. சிலரின் பார்வையில் சிறப்பாக தெரியலாம். எனினும் எனக்குப்பிடித்த என் சில இடுகைகள் கீழே...

அக்கம் பக்கம்
(ஒரு ஏக்கத்தின் வெளிப்பாடு)

கௌரவம்
(என்னால் நம்பமுடியாத, என் நல்ல கவிதை)

என்றும் தங்களின் ஆதரவை நாடும்,
பாசமுடன்,