உள்ளத்து உள்ளது கவிதை

கவிதைகள் என்பவை சோர்ந்த கணங்களில் ஒரு தாயைப் போல பரிவுடன் நம்மைத் தூக்கி நிறுத்துபவை. வேதனையுற்ற வேளைகளில் ஒரு தகப்பனைப் போல தாங்கிக் கொள்பவை, ஆவேசங்கொண்ட பொழுதில் இசையைப் போல ஆசுவாசப்படுத்துபவை. ஆசானைப் போல குழப்பங்களைத் தெளிவிப்பவை. உடன்பிறந்தானைப் போல பீதியகற்றிப் பெருந்துணிவை வளர்ப்பவை. நெஞ்சம் நிறைத்து காதலுணர்வு பெருக்குபவை. கோமாளியைப் போல வேடிக்கை காட்டி நம்மைக் குதூகலிக்கச் செய்பவை, ஒரு குழந்தையைப் போல மடியேகி மகிழச் செய்பவை, தோழனைப் போல தோள் சாய்த்து தேறுதல் தருபவை. ஒரு செல்லப்பிராணி போல நம்மோடு எப்போதும் எந்தத் தருணத்திலும் அகலாது தொடர்பவை. பகைவனைப் போல அறைகூவல் விடும், ஒரு காட்டு மிருகத்தைப் போல வசப்படாமல் நம்மை மிரளச் செய்யும் கவிதைகளும் உண்டு. மொத்தத்தில் கவிதை என்பது சற்றே மிகைப்படுத்தப்பட்ட நம் வாழ்வியல் யதார்த்தம். 

கவிஞனின் கண்களுக்கு காணும் பொருளெல்லாம் கவிப்பொருளே. அற்பமென்று எதுவும் இல்லை. யாவும் அற்புதமே. கவிதை பற்றிய கவிமணியின் வரிகள்.

வண்டி அற்புதப் பொருளாம் - வண்டி

     மாடும் அற்புதப் பொருளாம்;

வண்டி பூட்டும் கயிறும் - என்றன்

     மனத்துக் கற்புதப் பொருளாம்.

ஈயும் எனக்குத் தோழன் - ஊரும்

     எறும்பும் எனக்கு நேசன்;

நாயும் எனக்குத் தோழன் - குள்ள

     நரியும் எனக்கு நண்பன்.

அலகில் சோதி யான - ஈசன்

     அருளி னாலே அமையும்

உலகில் எந்தப் பொருளும் - கவிக்கு

     உரிய பொருளாம், ஐயா!

உள்ளத் துள்ளது கவிதை - இன்பம்

     உருவெ டுப்பது கவிதை;

தெள்ளத் தெளிந்த தமிழில் - உண்மை

     தெரிந்து ரைப்பது கவிதை!

சொல்நிலை அர்த்தம், உணர்வுக் கூறுகள்,. உள்நிலை அர்த்தங்கள் என்று இம்மூன்றும் இருக்க வேண்டியது கவிதையின் அவசியமாகும். இதுகளில் உள்நிலை அர்த்தங்கள் இல்லாவிட்டாலும் குற்றமில்லை. முன்னிரண்டு கூறுகளும் தவறாமல் இருந்தாக வேண்டும். இதையெல்லாம் கவனம் கொள்ளாமல் கவிதை பண்ண முற்படுகிற பலரும் தோற்றுத்தான் போகிறார்கள். புலம்பல், கொக்கரிப்பு முதலிய மெய்ப்பாட்டுக் கழிவுகளாகவும் வாரிக் கொட்டிய தத்துவக் கக்கல்களாகவும் நேர்ந்து விடுகிறது அவர்களுடைய எழுத்து வெளிப்பாடுகள். – ராஜ சுந்தரராஜன்.

சிறுகதைகள், நாவல்கள் ஆகியவை செயல்படும் தளங்களுக்கு அப்பால் சில மேல்நிலைத் தளங்கள் இருக்கின்றன. இந்தத் தளங்களில் கவிதை செயல்படுகிறது. இது மிகவும் சூட்சுமமான தளம். அதிக அதிர்வுகள் கொண்ட தளம். படைப்பின் அளவிற்குச் சம்பந்தமில்லாத விரிவை மனதில் உருவாக்கும் தளம். – சுந்தர ராமசாமி

புதுக்கவிதை என்ற பெயர் தற்காலிகமானது. கவிதையின் பெயர் கவிதையே. கவிதை எல்லா வகையான சொற்களையும் உதறுகிறது. நிதர்சனத்தில் திளைக்கிறது. - பிரமிள்

சுவை புதிது, பொருள் புதிது, வளம் புதிது,

சொற்புதிது, சோதிமிக்க நவகவிதை 

என்கிறார் பாரதி தம் கவிதைகள் குறித்து.

கவிமையமோ, சொற்கட்டோ, உணர்வுக்குவியமோ ஏதோ ஒன்றின் மூலம் என் மனம் ஈர்த்த கவிதைகளை இன்றைய பதிவில் காணவிருக்கிறோம். ஒரு பானை சோற்றுக்கு ஒரு சோறு பதமாக… இங்கே படையலாகின்றன கவிஞர்களின் படைப்பாக்கத்துக்கு சான்றாய் ஒரு சில கவிப்பருக்கைகள்!

1. பார்ப்பதற்கு ஒன்றுபோன்றிருந்தாலும் காட்டுயானையின் சுதந்திரத்தைப் பெற்றிருக்கிறதா ஒரு வளர்ப்பு யானை? தன்னை காட்டுயானையுடன் ஒப்பிடும் சக்திஜோதியின் வரிகளில் தெரிகிறது கட்டுப்பாடற்ற மனவெளியின் சுதந்திரம். 

2. அந்தரத் தோட்டம்– தீபப்பிரியாவின் வலைத்தளப் பெயரே கவித்துவமாய் வசீகரிக்கிறது. அப்பாவையும் தன்னையும் ஒப்பிடுவதான பயணக் கவிதைகளின் தாக்கம் வாசித்து முடித்த பின்னும் நெஞ்சம் உராய்ந்துகொண்டிருக்கிறது.

3. மரங்களுக்கும் கிளைகளுக்குமான பந்தத்தை அழகிய கவிதையாக்கியுள்ளார் இரவுப்பறவை. 

4. பேரக்குழந்தைக்குத்தொட்டில் கட்டக் கொடுத்தனுப்பிய அம்மாவின் புடவையில் படுத்துறங்குவது யார்? அறிய வாருங்கள் எழிலாய்ப் பழமைபேசும் பழமைபேசியின் தளத்துக்கு. 

5. குழந்தைக்கு தாய்கதை சொல்லல் போன்று எளிதன்று குழந்தை தாய்க்கு கதை சொல்லும் செயலானது. குறைந்த வரிகளில் மனம் நிறைக்கின்றன திரு. ராஜா சந்திரசேகர் அவர்களின் கவிதைகள். 

6. மழைநீரில் நட்சத்திரங்களைத் துழாவித் தேடியவளைப் பார்த்திருக்கிறீர்களா? அன்புடன் அருணாவின் கவிதையில் பாருங்கள்.

7. சும்மா இருந்ததாகச் சொல்லப்பட்ட அம்மாவின் உழைப்பு எவ்வெவற்றில் ஒட்டிக்கிடந்து உறுத்துகிறது? தீபிகாவின் கவிதையை வாசித்தறியுங்கள்.

8. கிணற்று உப்புத்தண்ணியின் ஈரம் உறிஞ்சப்பட்டது பற்றிய சிவம் அவர்களின் கவிதை நம் கண்களில் உப்புத்தண்ணியின் ஈரம்காட்டும்.

9. என் காலத்தைப் பறிக்காதே நானொரு சகாப்தம் என்ற எச்சரிப்போடு தனக்கொரு முகவரி தேவையில்லைஎன்பதைப் பறைசாற்றும் கவின்மலரின் வீறுகொண்ட வரிகள்.

10. தொய்யத் தொடங்கும் வாழ்வை இழுத்துக்கட்ட சன்ன மழைக்கம்பிகளின் மதுர ஒலி போதுமா? தோழி மிருணாவின் கவிதை வாழ்வியலோடு இயற்கையைப் பின்னி ரசிக்கவைக்கிறது.

11. குழந்தைகளற்ற தேசத்தைப் பற்றிய குமுறல்களை,நாளைய சுதந்திரம் பற்றிய நம்பிக்கையோடு குழந்தை நிலாவிடம் பகிர்கிறார் தோழி ஹேமா. வாசிக்கும்நமக்கு மனம் பிசைகிறது.

12. கொழுகொம்பு தேடித்தவிக்கும் மனத்துக்கு வாழ்வாதாரத்தின் பிடிப்பொன்று அவசியமாகிறது. ரேவாவின் வரிகளில் பற்றிப்படரும் அந்த ஆதங்கம்.

13. எனக்கு ஒரு கவிதையின் இறுதி வாக்கியம் போதும் முழுக் கவிதையின் நுனி  அகப்பட என்று அழகிய கவிதை வரிகளால் அசத்துகிறார் சுந்தர்ஜி. கைகள் அள்ளிய நீரில் கணக்கிலா கவித்துளிகள். 

சில கவிதைகள் எளிய வரிகளால் எளிதில் மனந்தொட்டு ரசிக்கவைக்கும். சில கவிதைகள் வாசித்து முடித்து பல மணி நேரங்கள் மனத்துக்குள் வட்டமிட்டுக்கொண்டே இருக்கும். சில சிம்மாசனம் போட்டே அமர்ந்துவிடும். சில கவிதைகளோ ஒருமுறைக்கு பலமுறை வாசித்தறிய வேண்டிய உட்பொருளுடன் கண்ணாமூச்சி விளையாட்டு காட்டும். வாசிக்கும் ஒவ்வொரு முறையும் ஒரு புதிய வாசிப்பனுபவத்தைத் தந்து வசப்படுத்தும் கவிதைகள் உள்ளன. புதுமையாகவும், அழகியல் தன்மையுடனும் எளிய வரிகளாலும் கோக்கப்பட்டிருக்கும் கவிதைகள் எளிதில் மனம் நுழைந்துவிடும். 

இப்படியான சிறப்பம்சம் கொண்ட மரபுக்கவிதைகளும் புதுக்கவிதைகளும் ஏராளமாய் வாசிக்கக் கிடைத்தாலும் பதிவின் நீளம் கருதி சிலவற்றை மட்டுமே இங்கு குறிப்பிட்டுள்ளேன். கவிதைகளை ரசிக்கும் நட்புள்ளங்கள் அனைவருக்கும் அன்பான நன்றி.