வலைச்சரம் நாள் 3-- விருந்துக்குப் பின் மருந்து!

 
ஒரு  இளம் மருத்துவர் ஒரு சிறிய கிராமத்து மருத்துவ மனையின் பொறுப்பேற்கச் சென்றார்.அங்கு அது வரை பணி புரிந்து வந்த வயதான மருத்துவர்,தான் அன்று சில நோயாளிகளைப் பார்க்கப் போகும்போது,புதிய மருத்துவரும் உடன் வந்தால் அறிமுக மாகிவிடும் என்று கூறி அவரையும் உடன் அழைத்துச் சென்றார்.

முதல் வீட்டில் இருந்த பெண், தனக்குக் காலை முதல் வயிற்றை வலிக்கிறது என்று கூற, பழைய மருத்துவர்,அவள் பழம் அளவுக்கு மீறிச் சாப்பிட்டதால் இருக்கும், எனவே பழைத்தைக் குறைத்துக் கொள்ள வேண்டும் எனவும் கூறினார்.

அவரது நோய் அறுதியீட்டைக் கண்டு வியந்த புதியவர் வீட்டை விட்டு வெளியே வந்ததும் அப்பெண்ணைப் பரிசோதிக்காமலே எவ்வாறு முடிவு செய்தார் என வினவினார்.

பழையவர் சொன்னார்”அவசியமேயில்லை.நான் அங்கு என் இதயத்துடிப்பு மானியைக் கீழே போட்டேன் அல்லவா.அதை எடுக்கக் குனிந்தபோது கட்டிலுக்கடியில் ஏழெட்டு வாழைப்பழத் தோல்களைக் கண்டேன். எனவே அந்த முடிவுக்கு வந்தேன்.”

எப்படி டயக்னோசிஸ்!

(இது பாதிக்கதை மட்டுமே!மீதிக்கதை தெரிய   இங்கு போக வேண்டும்!)

ஆக மருத்துவம் கால்,மதி முக்கால் என்பது தெளிவாகிறது!

இப்போது இந்தக் கதை எதற்கு?

இன்று மருத்துவம்,மருத்துவம் சார்ந்த பதிவுகளைப் பார்க்கப்  போகிறோம்.

நேற்று சாப்பாட்டில் ,சுவை காரணமாக அதிகம் சாப்பிட்டதால், அஜீரணம் ஏற்படும், அதற்குப் பாட்டி வைத்தியம் சொல்லுங்கள் என்று கேட்டிருந்தார் நண்பர் வாசு.இதோ அவர் கேட்ட பாட்டி வைத்தியம்! இங்கு நமது நோய்களுக்கான பாட்டி வைத்திய முறைகள் கொட்டிக் கிடக்கின்றன!


சமையலறை மருத்துவம் பாருங்கள், இந்தப் பெட்டகத்தில்.பல நாட்டு வைத்திய முறைகளும் இங்கு தெரிந்து கொள்ளலாம்.

இன்று இரத்தக் கொதிப்பு என்பது ஒரு தேசீய நோயாகி விட்டது. மாறி வரும் வாழ்க்கை முறைகளே அதற்கான பெருங்காரணமாக இருக்கின்றன. இதைக் கட்டுப்பாட்டில் வைக்க எளிய முறைகள் என்னவென்று சொல்கிறார் Dr.G.சிவராமன்.

நமது நாட்டில் 5 கோடிக்கும்  மேற்பட்ட மக்கள் நீரிழிவு நோயினால் பாதிக்கப்பட்டிருக்கிறார்கள் என்று ஒரு புள்ளி விவரம் சொல்கிறது. 2030 இல்  இது 8.7 கோடியாக உயரும் என்றும் சொல்லப் படுகிறது. அநேகர்  இன்சுலின் ஊசி போட்டுக்கொள்கிறார்கள்.நமக்கெல்லாம் இன்சுலின் ஊசி தெரியும்; இன்சுலின் செடி தெரியுமா? அதை நமக்கு அறிமுகம் செய்விக்கிறார் திரு.குப்புசாமி.

நமது பல நோய்களுக்கு/குறைபாடுகளுக்கு எளிய சித்த மருத்துவக் குறிப்புகள் தருகிறார் கை.க.சோழன்.எல்லாமே சின்னச் சின்ன குறிப்புகள். தேவைப்படுவர்கள் முயன்று பார்க்கலாம்.

தைலங்களில்தான் எத்தனை வகை?வாத நோய்க்கு ,உடல் குளிர்ச்சிக்கு,வலிபோக,முடி வளர என்று எத்தனை தைலங்கள்? அவற்றின் செய்முறை பற்றியும்,பயன்கள் பற்றியும் விளக்கமாகச் சொல்கிறார்  curesure4u.தைலங்களைச் செய்ய இயலாவிடினும், அவற்றின் பலன் தெரிந்து  அவற்றை வாங்கிப் பயன் படுத்தலாமே!பாருங்கள் ஆயுர்வேத மருத்துவம்

இவரது உலகம் அன்பு மயமானது.ஆம்,அன்பு உலகம் ரமேஷ் பற்றித்தான் சொல்கிறேன்.நாம் அன்றாடம் பயன்படுத்தும் உணவுப் பொருள்களின் மருத்துவ குணங்கள் பற்றித் தொடர்ந்து எழுதி வருகிறார்;எளிய உடற்பயிற்சி முறைகள் பற்றியும் எழுதுகிறார்.  உடல் நலம் பேணப் பாருங்கள்.

மற்றொரு தளம்.நாம் பயன்படுத்தும் காய்,கனிகளின் இயற்கை மருத்துவ குணங்கள் பற்றிக் கூறும் தளம் ,இதோ!

சிறுநீரகத்தின் செயல்பாடுகள்,அது சரியாகச் செயல் படவில்லை யெனில்  ஏற்படும் விளைவுகள்,அதற்கான அறிகுறிகள், யாருக் கெல்லாம் சிறுநீரகம் பாதிப்படையும்,சிறு நீரகத்தைக் காப்பதற்கான வழிமுறைகள் என்று விளக்கமாகச் சொல்லியிருக்கிறார் கனடா பதிவர் தென்றல்,கீரன் தகவல் பலகையில்.

வெங்காயத்துக்குப் பல மருத்துவ குணங்கள் உண்டு என்பது அனைவரும் அறிந்ததே.ஆனால் வெங்காயத்தை எப்படிப் பயன் படுத்தினால்,என்ன பலன்கள் கிடைக்கும் என்று விளக்கமாக 50 குறிப்புகளில் சொல்கிறார் சிவகுமாரின் சித்த வைத்தியத்தில்

 காய்ச்சல் வராத மனிதர்கள் இருக்கலாம்.வயிற்றுப்போக்கு வராதவர்களும் இருக்கலாம்.ஆனால்    ஜலதோசம் எனப்படும் சளித்தொல்லை வராதவர்கள் இருக்க முடியுமா?சளி பிடித்ததோ, சனி பிடித்ததோ என்பார்கள்.ஆங்கில மருத்துவத்தில்,மருந்து சாப்பிட்டால் ஒரு வாரத்திலும் சாப்பிடாவிட்டால் 7 நாட்களிலும் சரியாகி விடும் என்று சொல்வார்கள்.  அந்தச் சளிக்குச்,சித்த மருத்துவ முறைகள் சொல்கிறார்  சாந்தன் 

           போதுமா?