வீசிய வலையில் சிக்கிய வாசனைகள்.

நேற்று உணர்வுகளுக்கு விருந்து.

இன்று  உணவே விருந்து.

இன்று வலையில் சிக்கியது வளையோசைகளின் வாசனைகள்தான். அதென்ன! வளையோசையோடதான் வாசம் வருமா? வளையல்கள் இல்லாமலும் வரும், அப்படின்னு நீங்க கேட்கிறது புரிகிறது. என்ன இருந்தாலும் அதுக்கு ஒரு தனி ரசனைதான் இல்ல.

சரி சரி விசயத்துக்கு வருவோம். வலைவீச போனயிடத்தில் வசமாய் மாட்டினேன் வாசத்தில். பொய்தானே அதெப்படி படத்தில் வாசம் வரும் அப்படினெல்லாம் கேட்கக்கூடாது. 

அடுப்பு ஊதாமல், புகை வராமல்,

புது புது ரகங்களை கண்கள் ரசிப்பதற்க்கும் அதைபார்த்து வாய் புசிப்பதற்க்கு கற்றுதரும் வித்தைகள் வலைகளின் வழியே உலாவருகிறது. அதனைக்கண்ட நம்ம வலையோ, வகை வகையாய் வகையறிய எதார்த்தமாக எட்டிப்பார்த்தால் வண்ண வண்ண பதார்த்தங்கள்  வகைபடுத்தியிருக்க வலையை வகையாய் இழுத்து தன் வசமாக்கிக்கொண்டது.

ருசிகளிலும் விதங்களிலும் நிறங்களிலும் வெவ்வேறாக இருந்தபோதும்.வெவ்வேறாக செய்தபோதும் அனைத்தும் ஒரே இடத்துக்கு போவதுதானே! அதனால்  அவைகளே தங்களின் கைதிறன்களையும், வாசனைகளையும், ரசித்து ருசிப்பதையும் கண்முன்னே உங்களுக்கு காட்சிப்படுத்தியுள்ளார்கள் இனி உங்கள் விருப்பம்தான்.

வீசிய வலையில் வீசும் வாசனைகள் எப்படியிருக்குன்னு நீங்கதான் சொல்லனும். சொல்லாமல இருப்பீக, உயிர் உடல் இரண்டும் வாழ இது அவசியமல்லவா! அதனால் சொல்லுவீகன்னு நெனக்கிறேன்...

                                     ஆத்தாடி இப்பவே மூக்கு திறக்குதே!

வக வகயா கறியும் வச்சி

வாசமான குழம்பு வச்சி
வீட்டு ஆள வளச்சிபோட்டு ராசாத்தி-உன்
வளையல் கைத்திறன காட்டிவிடு ராசாத்தி

அஞ்சுவக காயெடுத்து

அலுக்காம வேலபாத்து
அருமையாக சமச்சிவைய்யி ராசாத்தி
அது ஆரோக்கியம் தந்திடுமே ராசாத்தி

அவிச்ச முட்டை பொரிச்சி வச்சி

அவியல்கறி கூட வச்சி
அக்கரையா கொடுத்துவிட்டு ராசாத்தி-வீட்டு
அதிகாரத்தில் பங்குபோடு ராசாத்தி

நெய்மீனு குழம்புவச்சி

நெத்திலிமீனு வறுத்துவச்சி
நித்த நித்தம் ஆக்கிப்போட்டு ராசாத்தி-நீ
நெனச்ச காரியத்த முடிச்சிவிடு ராசாத்தி

பச்ச காய்கறியில் கூட்டு வச்சி

பக்குவமா சமச்சி வச்சி
பண்போடு பரிமாறிவிட்டு ராசாத்தி-நல்ல
பேர வாங்கி குவிச்சுவிடு ராசாத்தி

வெள்ளாட்டுக்கறி எலும்பு வாங்கி

வெட வெடன்னு சூப்பு வச்சி
வாய்க்கு ருசியா கொடுத்துவிட்டு ராசாத்தி
வீட்டுச்சாவி கையில் கேளு ராசாத்தி

புது புதுசா பலகாரம் செஞ்சி

புதுவிதமா அலங்கரிச்சி
பிள்ளைகளுக்கு கொடுத்துவிட்டு ராசாத்தி
பாசத்திலும் பங்குபோடு ராசாத்தி

பசியோடு புசிக்கும்போது

பாவக்காயும் ருசிக்குமடி
பக்குவமா சமைச்சிபோட்டா
பலவயிறு குளிருமடி ராசாத்தி
பல பாராட்டையும் வாங்கிக்கலாம் ராசாத்தி..

இன்னக்கி வலையில் சிக்கியது அம்புட்டுத்தான்

இனி நாளைக்கி என்ன சிக்குதுன்னு பார்ப்போம்.

நல்லா பசிக்கிறது போய் சாப்பிட்டுவிட்டு வாரேன்ன்ன்