வாங்க பழகலாம்...!!!

வலைச்சர அன்பர்களே நண்பர்களே...

எல்லோரும் நலமா இருங்கீங்களா...?

  

அன்பின் சீனா ஐயா இந்த ஒரு வாரத்திற்கு நீ ஆசிரியரா இரும்மான்னாங்க........நான் பாடு கூட்டத்துல உட்கார்ந்து வறுத்த கடலையை சாப்பிட்டுட்டு 

இருந்தேன். திருவிழாவுல காணாம போனவர்களை ஒலி பெருக்கியில் கூப்பிடுவது போல திடீர்ன்னு சீனா ஐயா என் பெயரை கூப்பிட்டுட்டாங்க...அப்போது எனக்கு கமல் படத்துல வருகிற  இந்த வசனம் தான் நினைவிற்கு வந்தது.

எனக்கு விளையாட்டில் ஜெயிக்கிறவனை பிடிக்கும், தோற்கிறவனை ரொம்ப ரொம்ப பிடிக்கும், ஆனா வெறுமன வேடிக்கை பார்க்கிறவனை சுத்தமா

பிடிக்கவே பிடிக்காது. அதனால சீனா ஐயாவுக்கு பிடித்தவனாகவே 

மாறிட்டேன். 

பார்வையாளனே பேச்சாளனாய் உங்கள் முன்...  

 எனக்கு ஷாக் ஆகிடுச்சுங்க....இல்லையா பின்னே,  ஒருவயதே ஆகி இருக்கிற என் கிட்ட இப்படி கேட்டா...? இங்க நாங்க 

பழைய  புதிய ப்ளாக்காரர்கள் எல்லோரும் இருக்கோம். நீயும் வந்து 

பழகிக்க...அப்படியே உனக்கு தெரிந்த புதிய,பழைய பதிவர்களின் பதிவுகளை அறிமுகம் செய்...அப்படின்னு வாய்ப்பு  கொடுத்தாங்க...! ஐயாவுக்கு நன்றி.

நிறைய பேருக்கு என்னை தெரியாது... சிலருக்கு என்னை தெரியும்...அதனால நான் வந்து...வந்து..வந்து...

சரிப்பா(சரிம்மா)....சொல்லு...

உங்க கூட எல்லாம் பழகலாம்னு வந்து இருக்கேன்.

இப்படி உர்ருன்னு பார்த்தா...? எப்படிப்பா...பழகுறது..?

என் மூஞ்சியே இப்படித்தாங்க என்ன செய்றது....சொல்லுங்க...

நமக்குள்ளாற ஒரு டீலு வச்சுக்கலாமா...டீலு

என் புள்ளைக்கு இந்த வாத்து பொம்மையை வாங்க விடுப்பா(ம்மா)

உன்னைய முன்ன பின்ன தெரியாது...நீ என்ன டான்னா...

பாத்தீங்களா  பாத்தீங்களா எம்புட்டு கரக்கிட்டா சொல்லிட்டீங்க..

அதனாலதாங்க

  

வடிவேலுக்கு சொந்தக்காரங்களா இருப்பாங்க போல...(மைண்ட் வாய்ஸ்)

இல்லைய்யா....இல்லை...உங்க எல்லோருக்கும் தான் நான் 

சொந்தமைய்யா..சொந்தம்...

மைண்ட் வாய்ஸ் வேற தெரியும் போல...ம்...

 நீங்க கவுண்டர்ல பணத்தை கட்டிப்புட்டு வாங்க...சொல்லுறேன்

சரி சரி சொல்லு....சீக்கிரம்

இப்படி கால்ல வெந்நித்தண்ணி ஊத்துனாப்ல பறந்தா எனக்கு மறந்து 

போகுமில்ல...

நாம எல்லாம் ப்ளாகர் வகைக்காரங்க இல்ல...அதான் சொந்தம்ன்னு

சொன்னேன்யா...

சரி இப்ப அதுக்கு என்ன...

என்ன இப்புடி கேட்டுப்புட்டீங்க...இந்த ஒரு வாரம் முழுவதும் உங்ககிட்ட 

எல்லாம்  பழகலாம்னு வர்றேன்...நீங்க எல்லோரும்  வந்தா அப்படியே நல்லா பழகிடலாம்னு..

சரி சரி...இந்த வாரம் முழுதும் தினமும் வந்திடுறேன், கருத்து போட்டுடுறேன்,தமிழ் மணவாக்கு குத்திடுறேன். சரியா தாயி நான் இப்பவாது போகலாமா...

அண்ணேன்னா அண்ணே...தான் லபக்குன்னு விஷயத்தை புடிச்சுட்டீங்களே...

வாருங்கள் வலைச்சர மழையில் நனைவோம்.

திருமணம் ஆனதில் இருந்து ஓசூர் வாசம். கணவரும், மகனும் காலையில்   சென்றால் சாயங்காலம் வருவார்கள். ( என்னம்மா..உங்க வீட்டில மட்டுமா..?எல்லோர் வீட்டிலேயும் அப்படித்தானே...என நீங்க நினைப்பது தெரியுது)
 இல்லத்தரசி  நான். என் அண்ணனின் திடீர் மரணத்தால் வீட்டில் தனியாக 
இருக்க முடியவில்லை. வேலைக்கு சென்றால் சற்று மாறுதல் கிடைக்கும். 
ஆனாஎன்ன செய்வது...? ஆகையால் சிறுசேமிப்பு முகவர் ஆனேன். நிறைய 
மக்களுக்கு சேமிப்பின் ருசியைக் காட்டினேன். அது அவர்களுக்கு தக்க 
சமயத்தில் உபயோகமாய் இருந்தது. நிறைய  நண்பர்கள் கிடைத்தார்கள். 
           செய்வதை திருந்தச் செய்யனும் எனக்கு.2 வருடங்கள் முகவர் பணியில் 
முதன்மையாக இருந்ததற்கு தருமபுரி கலக்டர் கையால் பரிசு வாங்கினேன்.( இப்போ தருமபுரி மாவட்டம் 2 பிரிந்து விட்டது)

இதனுடன்   எல்.ஐ.சி முகவராகவும் செயலாற்றினேன் 9 வருடங்கள்.

உண்மை, நேர்மை, நாணயமாய் இருக்கும் பண்பே என்னை 
வாழ்க்கையில் வெற்றியடையச் செய்தது, செய்கிறது,செய்யும்.

10 வருட ஓடலில் முழங்கால் வலி. மருத்துவர் கண்டிப்பாக 9 மாதங்கள் ஓய்வு எடுக்க வேண்டும் என்றார். ஆகையால் முழு நேர வீட்டரசியாக மாறி 

விட்டேன்.

பொழுது போக்கு - 

படம்  வரைவது, ஓவியம் தீட்டுவது,கவிதை,கதை,சாமி பாடல்கள் எழுதுவது,குரோஷா, ஸ்வெட்டர் பின்னுவது, புத்தகம் வாசிப்பது, ,கோலம் போடுவது.

ஆந்திரா வாசம் அங்கேயும் போய் சும்மா இருக்க முடியுமா..? நீங்க வேற எதையோ நினைக்காதீங்க...தெலுங்கு கற்றுக்க முயற்சி பண்ணி ( நாமாகத்தான்)
பேச மட்டும் கத்துக்கிட்டேன். பொருளெல்லாம் போய் கடையில வாங்கனுமே....அந்தப் பெயரை யெல்லாம் சொல்லிச் சொல்லி பார்த்து மனப்பாடமாக்கி 

 வைத்துக்கொண்டேன்( வாய்ப்பாடு தான் நினைவுக்கு வந்தது) முதல்ல 
அங்கே சரியா பேச பழக முடியலை போகப் போக நல்லா பேசுறீங்கன்னு 
அவர்களே ஆச்சரியப்பட்டார்கள். ஒரு முறை காய்கறி கடையில் தெலுங்கில் சண்டை போட்டதைப் பார்த்து விடுமுறைக்கு வந்திருந்த என் சகோதரியின் மருமகளுக்கு மிகவும் ஆச்சர்யமாகப் போய்விட்டது!!!!

இப்போ..அரபிக் தெரியுமா...? அப்படின்னு கேட்காதீங்க ப்ளீஸ்...ஏன்னா..? 
தெரியாது. கத்துக்கல, கஷ்டமா இருக்குங்க. அதான் சரி அப்படின்னு
விட்டுட்டேன்.

இப்போ...ஜாலியா..எனக்கு பிடித்ததை செய்துக்கிட்டு,என்னுள் என்னை எடை போடாமல் நோக்கிக்கிட்டு இருக்கிறேன், ( இதற்கு ஒரு அசாத்தியமான துணிச்சல் வேணும்னு தோணுது.. கொஞ்சம்  கொஞ்சமா பழகுகிறேன்..)

நான் முன்பு எழுதின கவிதை, கதை , சாமி பாட்டு  எல்லாம் எழுதின டைரியைபடிக்கக்கேட்டவரிடம் கொடுத்து காணாம போச்சு.ஆனா இப்போ கவலை 
இல்லை. அதான் ப்ளாக் இருக்கே. இது தான் இப்போ என்னோட டைரி. 

மற்றவர்களுக்கும்   அது உபயோகமாக இருக்கிறது.

எளிமையா, யதார்த்தமாக இருப்பது எனக்கு பிடிக்கும். அதனால தானோ 

என்னமோ ப்ளாகிற்கு  என்னை அறியாமல் எளிமையான யதார்த்தம் 
அப்படின்னு என்னோட பெயருடன் வைத்து இருக்கிறேன்.

எழுத வேண்டும் என்கிற ஆவலில் ப்ளாக் ஆரம்பித்த போது சிலர் உங்க 

சமையலையும் அதில் போடுங்க, அப்பப்போ கேட்கிறதுக்கு நாங்க பார்த்துக்
 கொள்ள ஏதுவாக இருக்கும் என கேட்க பயணம் போய்க் கொண்டு 
இருக்கிறது.

  

என்னுடைய சில பதிவுகள் உங்கள் பார்வைக்கு…!!!

என் முதல் பதிவு - சூயஸ் கால்வாய் - கவிதை

40 வயதுக்கு மேலே பெண்களுக்கு மென்சுவாசம் வேண்டும் அல்லவா…? அதை பற்றிய கவிதை - .மென்சுவாசம் விட

வயது ஏறஏற வருகிற நிதானம் உண்மை தானே…? - வயது தந்த தானம் - கவிதை

ஜீவாலைக்கரம் - கவிதை 

வியாழன் வியாழன்…பாமாலை பதிவிடுகிறேன். எழுதுவது நானல்ல..என்னுள் இருந்து அவர் தான் எழுதுகிறார் என நினைக்கிறேன். முதல் பாமாலை - சாய் பாமாலை  மற்றொன்று

பாலஜிக்கு பா இரண்டு

மரம் செடிகளோடு பேசி இருக்கிறீர்களா..? அதற்கு நன்கு புரியும். நம் நேசத்தை ஸ்வீகரிக்கும். என்னுடய அனுபவம் -  நேசம்

புதிதாக எதையாவது செய்யும் போது நம்முடைய மூளை புத்துணர்ச்சி அடைவதை நான் பல தருணங்களில் உணர்ந்திருக்கிறேன். அதுவே என் சமையலில் பல முறை பரீட்சிர்த்துப்பார்க்க தூண்டுதலாக இருக்கிறது. 

 சமையலில் புதிதாக எனக்கு தோன்றுவதை செய்கிறேன். விதவிதமாகவும், சுவையாகவும், புதிய முறையிலும் வருவது இதனால் தானோ என்னவோ!! .

காலி ஃப்ளவர் சூப் - செட்டி நாட்டு ஸ்டைல்   - செட்டி நாட்டு கல்யாணங்களில் இடம் பொரும் சூப் இது.

மாவடு - சுலபமா மாவடு போடலாம் பாருங்க.

நாம் எல்லோரும் சுற்றுப்பயணம் போவோம், உள்நாடு, வெளிநாடு சமதளம், மலைகள், பள்ளத்தாக்கு, கடல் மேல் மற்றும் நீர் மூழ்கிக் கப்பலிலும் கடலின் அற்புதங்களைக் காணவென.

கிணற்றுக்குள் போயிருக்கீங்களா...? என்னது இல்லையா...? வாங்க போகலாம். என்ன பயந்துட்டீங்களா...? இல்லங்க நிஜமாகத்தான். அதெல்லாம் மூச்சு முட்டாம... கூட்டிக்கிட்டு போறேன். என்ன மனசை திடப்படுத்திட்டு ரெடியாகிட்டீங்க போல..வா ஒருகை பார்க்கலாம் அப்படின்னு சொல்வது கேட்கிறது. ஓகே. 

பூமிக்குள் ஒரு சுற்றுப்பயணம் போவோமா..?

இது நான் வரைந்த ஆயில் பெயிண்ட். போஸ்ட் கார்டு அளவுள்ள படத்தை பெரிய அளவாக கான்வாஸ் போர்டில்  வரைந்த படம்.

பட்டத் திருவிழா - ஓவியம்

இன்று எங்களின் 28வது திருமணநாள் ஸ்வீட் எடுத்துக் கொள்ளுங்கள்.

                         வரட்டா...வரட்டா... வரட்டா..

  இன்று என் வலைப்பக்கம்  - பீன்ஸ் துவட்டல் பாருங்களேன்.