26-01-2015 முதல் ஆசிரியர் பொறுப்பேற்பவர்:

கலையரசி

ஊஞ்சல்

முந்தைய ஆசிரியர்கள்


சீனா ... (Cheena) - அசைபோடுவது

சிந்தாநதி

நன்றி!

திரட்டிகளின் தொகுப்பு

:: தமிழ் திரட்டுகளின் சங்கமம்<br/>:: Tamil blogs, news, ezines

வலைப்பதிவர் உதவிப்பக்கம்

தமிழில் எழுத மென்பொருள்

ஞானாலயா = புதுக்கோட்டை

www.gnanalaya-tamil.com
வலைச்சரத்தில் வெளியிடப்படும் இடுகைகள் வலைச்சரக் குழுவினரால் தணிக்கைக்கு உட்படாது. ஆனால், வலைச்சர விதிக்கு உட்படாத இடுகைகளை முன்னறிவிப்பின்றி நீக்க வலைச்சரக் குழுவினருக்கு உரிமை உள்ளது

Monday, January 26, 2015

வலைச்சரத்தில் முதல் நாள் - மலர்ந்தும் மலராத

எல்லோருக்கும் வணக்கம்!

மலர்ந்தும் மலராத பாதி மலர் போல வலையுலகுக்குத்
தெரிந்தும் தெரியாத பதிவர் நான்….

இருந்தும் வலைச்சரத்தின் ஆசிரியப் பொறுப்புக்கு என்னைப் பரிந்துரை செய்த திரு.கோபு சாருக்கும், அதையேற்று நியமனம் செய்த திரு. சீனா சாருக்கும், திரு.தமிழ்வாசி பிரகாஷ் அவர்களுக்கும் என் மனமார்ந்த நன்றி.

வலைப்பூ துவங்கிய புதிதில்,  விருதுகள் கொடுத்து ஊக்கப்படுத்திய கீத மஞ்சரிக்கும், யுவராணி தமிழரசனுக்கும் இச்சமயத்தில் நன்றி சொல்லக் கடமைப்பட்டிருக்கிறேன்.

என் சாதனை என்று பெருமையாகச் சொல்லக்கூடிய செய்தி எதுவுமில்லை.  அரசு வங்கியொன்றில் சீனியர் எழுத்தராகப் பணியாற்றும் எனக்குப் பிடித்த விஷயங்கள், வாசிப்பும் எழுத்தும். 

வாசிப்புப் பழக்கத்துக்கு ஆசான் அப்பா.  சிறுவயதிலிருந்தே எழுத வேண்டும் என்ற ஆர்வம் இருந்ததால், பிரபலமான வார இதழ்களுக்குக் கதைகள் எழுதியனுப்புவேன்.  ஆனால் அவை எல்லாமே ‘பிரசுரிக்க இயலாமைக்கு வருந்துகிறோம்,’ என்ற முத்திரையுடன், போன வேகத்தில் திரும்பி வந்தன.

என் தம்பி ‘முத்துச்சிப்பி’ என்ற பெயரில், சில மாதங்கள் கையெழுத்து இதழ் நடத்தினான்.  அதில் கதை, கவிதை, நகைச்சுவை துணுக்கு என எல்லாமும் எழுதி, அதற்கேற்ற படங்களையும் அவனே வரைவான். நானும் அதில் எழுதினேன்.  எங்களது படைப்புக்களைப் பற்றி, ‘ஆகா பிரமாதம்!’ என்று நாங்களே வாசகர் கடிதமும் எழுதிக் கொள்வோம்!

பெரியவர்களானதும், அப்பாவை ஆசிரியராகப் போட்டு வார இதழ் துவங்கி நடத்த வேண்டும் என்பது எங்கள் கனவாக இருந்தது.  அப்போது தானே நம் எழுத்து முழுவதையும் பிரசுரிக்க முடியும்?  அக்கனவு காலங்கடந்து  தற்காலத்தில் இணையம் மூலம் மெய்ப்பட்டிருக்கிறது!

அடுத்தடுத்துக் கதைகள் திரும்பி வந்தாலும், விடாது நானும் எழுதியனுப்பியதன்  பயனாக, ஒன்று குங்குமத்திலும், நான்கு தினமணிக்கதிரிலும், இரண்டு சிறுவர் மணியிலும்  வெளியாயின.  இணைய இதழான நிலாச்சாரலில், முப்பது வாரங்கள் தொடர்ந்து ‘நிலவினில் என் நினைவோடை,’ என்ற தலைப்பில் மலரும் நினைவுகளை எழுதினேன்.  அது மின் புத்தகமாக வெளிவந்தது.  அதன் பின் தமிழ் மன்றத்தில் சில மாதங்கள் வாசம்.

2011 ல் ஊஞ்சல் என்ற வலைப்பூ துவங்கினேனேயொழிய, தொடர்ந்து எழுதுவதிலும், மற்ற பதிவுகளை வாசித்துக் கருத்து சொல்வதிலும் இடையிடையே நீ…..ண்…….ட இடைவெளி!

கோபு சார் வலைச்சரத்துக்குப் பரிந்துரைத்த பிறகே, பெரும்பாலான பதிவுகளைப் படிக்கத் துவங்கினேன்.
   
அலுவலகம்+ வீட்டுப்பணி முடித்து கிடைத்த நேரத்தில், அடிக்கடி  காலை வாரும் இணைய இணைப்புடன் போராடிக்கொண்டு,  வலைச்சரத்தில் புதிய வலைப்பூக்கள் சிலவற்றை அறிமுகப்படுத்தலாம் என்ற ஆசையுடன்  வலைப்பூவொன்றை அரிதின் முயன்று தேடிக்கண்டுபிடித்து,  அதன் உறுப்பினர்ப் பட்டியலைப் பார்த்தால், அங்கு ஏற்கெனவே திருமதி இராஜராஜேஸ்வரி அவர்களின் தாமரை நடுநாயகமாக வீற்றிருக்கிறது!  அடுத்ததாக திண்டுக்கல் தனபாலன் சாரோ, நல்லா ஏமாந்தீங்களா? இது ஏற்கெனவே எங்களுக்குத் தெரிஞ்ச வலைப்பூவாக்கும்! என்று சிரிக்கிறார்!

இவர்களால் மட்டும் எப்படி இத்தனை வலைப்பூக்களுக்குப் போய்ப் பதிவிடமுடிகிறது என்று வியப்பாக இருக்கிறது!  நான் சொல்லப்போகும்    பதிவுகளைப் பெரும்பாலோர் ஏற்கெனவே வாசித்திருப்பார்கள் என்றாலும், எனக்குப் பிடித்த பதிவுகள் என்ற வகையில் அவற்றை நாளை முதல் குறிப்பிட விரும்புகின்றேன்.

கீதமஞ்சரியின் கீதா மதிவாணன் எனக்குச் சில சுட்டிகளின் இணைப்புக்களைக் கொடுத்து உதவினார்.  அவருக்கு என் நெஞ்சார்ந்த நன்றி. 

இனி நான் அறிமுகப்படுத்த விரும்பும் என் படைப்புக்கள்:-
1. கவிதை
திருமணமான புதிதில் மனைவியைத் திருப்திப்படுத்த விழையும் கணவனின் சங்கடங்கள் நகைச்சுவையாக.  (ஆறு மாதங்களுக்குப் பிறகு நிலைமை தலைகீழாகும், அது வேறு விஷயம்!)

2.  அனுபவம்+கற்பனை+நகைச்சுவை கலந்த சிறுகதைகள்:-


3.  சிறுகதைகள் எனக்குப் பிடித்தவை:-


ii)  அம்மாவின் ஆசை (தமிழ் மன்றபோட்டியில் முதற்பரிசு பெற்றது)

iii)  திருப்புமுனை (தினமணிக்கதிரில் வெளிவந்தது)

4.  பயணக்கட்டுரை  
மும்பை பயண அனுபவங்கள் (நகைச்சுவையுடன்)

5.  விழிப்புணர்வு கட்டுரைகள்:-

ஒரு நாள் முதல்வன் கதையாக, ஒரு வார ஆசிரியர் பதவி வலைச்சரத்தில் எனக்குக் கிட்டியிருப்பது மகிழ்ச்சியைத் தருகிறது.  கூடவே  இப்பொறுப்பை நல்லவிதமாக நிறைவேற்ற வேண்டுமே என்ற கவலையும் இருக்கிறது.

முதன்முதல் ஆசிரியர் பொறுப்பேற்றிருக்கும் என்னை, வலைச்சரத்தின் வாசகர்களாகிய நீங்கள் அனைவரும், வாரமுழுதும் தொடர்ந்து வந்து பின்னூட்டமிட்டு, ஊக்கமும் உற்சாகமும் அளித்து நல்லாதரவு நல்கிட  வேண்டுமாய் வேண்டிக் கேட்டுக் கொள்கிறேன்.  

நாளை எனக்குப் பிடித்த பதிவுகளுடன் சந்திப்போம், 

நன்றியுடன்,
ஞா.கலையரசி


மேலும் வாசிக்க...

Sunday, January 25, 2015

செல் விருந்தோம்பி வருவிருந்து காத்திருத்தல்

அன்பின் சக பதிவர்களெ ! 

இன்றுடன் முடியும் வாரத்திற்கு (25.01.2015 ) ஆசிரியப் பொறுப்பேற்று பதிவுகள் இட்ட சக  பதிவர் சகோதரி மனோ சாமிநாதன்   தான் ஏற்ற பொறுப்பினை சரி வர முழு மனதுடன் நிறைவேற்றி - நம்மிடமிருந்து விடை பெறுகிறார்.

இவர் இட்ட பதிவுகள் : 007
அறிமுகப் படுத்திய பதிவர்கள் : 078
அறிமுகப் படுத்திய பதிவுகள் : 084 ( சுய அறிமுகம் உள்ளிட்ட ) 
பெற்ற மறுமொழிகள் : 300
பெற்ற தமிழ் மண வாக்குகள் : 040
வந்து பார்வையிட்ட சக பதிவர்கள்  : 1296

நாளை முதல் துவங்கும் வாரத்திற்கு   ஆசிரியப் பொறுப்பினை ஏற்க அன்புடனும் ஆர்வத்துடனும்  சகோதரி கலையரசி  இணக்கம் தெரிவித்துள்ளார்.  

காரைக்கால் இவர் பிறந்த ஊர்.  இப்போது இருப்பது புதுவையில்.தேசிய வங்கியொன்றில் சீனியர் எழுத்தராகப் பணியாற்றுகிறார். இவரது கணவரும் வங்கியில் வேலை செய்கிறார்.  இவருக்கு ஒரு மகனும் ஒரு மகளூம் உண்டு.   இருவருக்கும் திருமணமாகிவிட்டது. 

இவருக்குப் பிடித்த விஷயங்கள்.  உள்ளத்தனையது உயர்வு என்பதில் மிகுந்த நம்பிக்கை உண்டு.  இயற்கையில் மனமொன்றி ரசிப்பது தோட்ட வேலை இவை பிடித்த பொழுதுபோக்குகள். 

2011 ல் ஊஞ்சல் வலைப்பூ துவங்கி இதுவரை 94 பதிவுகள் மட்டுமே எழுதியிருக்கிறார்,

சாரல்,  உயிரோசை, பதிவுகள் போன்ற இணைய இதழ்களில் இவரது படைப்புகள் வெளி வந்துள்ளன.

சகோதரி மனோ சாமிநாதனை வாழ்த்தி வழி அனுப்புவதில் பெரு மகிழ்ச்சி அடைகிறேன்.

சகோதரி கலையரசியினை வாழ்த்தி வரவேற்று மகிழ்கிறேன்

நாளை 26.01.2015 முதல் வலைச்சர ஆசிரியப் பொறுப்பினை ஏற்று திறம்பட ஒரு வாரத்திற்கு ( 01.02.2015 வரை ) பல சிறந்த பதிவர்களை அறிமுகப் படுத்துவார் என எதிர் பார்க்கிறேன்.

சகோதரி கலையரசியினை  வலைச்சர ஆசிரியப் பொறுப்பில் அமர்த்துவதில் பெரு மகிழ்ச்சி அடைகிறேன்.

நல்வாழ்த்துகள் மனோ சாமிநாதன்

நல்வாழ்த்துகள் கலையரசி 

நட்புடன் சீனா

மேலும் வாசிக்க...

வலைச்சரத்தில் ராகங்கள்-6!

ஒரு வாரம் உங்கள் அனைவரின் துணையுடனும் வாழ்த்துக்களுடனும் பாராட்டுக்களுடனும் இசையோடு பயணம் செய்தது மனதிற்கு நிறைவளிக்கிறது. இன்றைய இயந்திர வாழ்க்கையின் ஒவ்வொரு நொடியும் அவசர கதியில் ஓடுவதால் நின்று நிதானிக்கக்கூட நேரமிருப்பதில்லை.  இதில் சங்கீதத்தில் முழுமையாகக் கரைய நேரமிருந்ததேயில்லை எனக்கு!

ஆனால் தினமும் சமையல் செய்யும்போது மட்டும் இசையின் துணை அவசியம் வேண்டும் எனக்கு! பொதுவாய் எல்லா பாடல்களும் ஐந்து காப்பிகள் என்னிடம் இருக்கும். ஷார்ஜாவில் காரில் ஒன்று, கடையில் ஒன்று, வீட்டில் ஒன்று, தஞ்சையில் வீட்டில் ஒன்று, கார்ப்பயணத்தின் போது ஒன்று, என்று வைத்திருப்பேன். புதிய பாடல்களின் காப்பி ஒன்றை நெருங்கிய நண்பர்களுக்கு கொடுத்து விடுவேன். தெரிந்த டாக்ஸியில் போகும்போது அவர்களே என்னிடம் ரிமோட் ப்ளேயரைக்கொடுத்து விடுவார்கள். அவ்வப்போது சிடி யைக் கொடுப்பது மட்டும் தான் என் வேலை! சமையலறை அருகே ஒரு குட்டி சிடி ப்ளேயர் இருப்பதால் காலை காப்பி போடும்போதே நாதஸ்வ‌ர இசையுடன் தான் பொழுது ஆரம்பிக்கும்.

நாதஸ்வரம் என்றதும் ஒரு பாடல் நினைவுக்கு வருகிறது.
என்னிடம்  ' வேதனை எவரிடம்' என்று தொடங்கும் நாதஸ்வ‌ர இசை  [ஜெயசங்கரின் நாதஸ்வ‌ரமும் வலையப்பட்டி தவிலும் இணைந்தது] இருக்கிறது. இந்த இசை மனதை அப்படியே பிசையும். வேதனையும் தவிப்புமாய் நாதஸ்வர‌ இசை  கமகங்கள் நிறைந்த தேன்குரல் போல இழையும். இதை முதன் முதலாகக் கேட்டபோது ஜெயசங்கரின் மீது ஒரு தனி மரியாதையே தோன்றி விட்டது. இதன் ராகம் பற்றி கூகிளில் தேடியபோது 'பார்வதி' என்று போட்டிருந்தது. பார்வதி என்றொரு ராகம் பற்றி நான் அறிந்ததில்லை. யாரேனும் அதைப்பற்றிச் சொல்ல முடியுமா?

ஒரு வாரம் முழுவதும் வலைச்சரத்தில் இசை உலகில் சஞ்சரிக்க முடிந்ததற்கு நான் இங்கே சகோதரர் சீனா அய்யா அவர்களுக்கு அன்பு வந்தனங்களைத் தெரிவித்துக்கொள்கிறேன். இங்கும் முத்துச்சிதறலிலும் எனக்கு அருமையான பின்னூட்டங்கள் கொடுத்த/கொடுத்துக்கொண்டிருக்கிற அன்புள்ள‌ங்களுக்கு என் இதயப்பூர்வமான நன்றியைத் தெரிவித்துக்கொள்கிறேன்.

இனி இன்றைய ராகம் பற்றிப்பேசலாம்!

ஷண்முகப்ரியா

ஷண்முகப்ரியா ராகம் மனிதனுக்கு உடலுக்கு சக்தியையும் மனதிற்கு தைரியத்தையும் கொடுக்க வல்லது. ஒரு பாடகனின் இசைத்திறனை கூர்மையாக்கும் வல்லமை கொண்டது. இந்த ராகம் சிவபெருமானின் நெற்றிக்கண்ணிலிருந்து பிறந்த ராகமாகச் சொல்லப்படுகிறது.  முருகனுக்கு உகந்த ராகம் இது!! நகைச்சுவைப்பாடல்களிலும் பக்திப்பாடல்க‌ளிலும் ஷண்முகப்ரியா உபயோகப்படுத்துவது வழக்கம். . பக்தி ரசத்தை பொழியும் ராகம். விருத்தம் பாட ஏற்ற ராகம். தியாகராஜர் இந்த ராகத்தில் ஒரே ஒரு கீர்த்தனையே புனைந்துள்ளார்.

இனி பாடல்கள்!

பார்வதி நாயகனே என்ற பாடல். தன் வளமான, இனிமையான குரலில் சுதா ரகுநாதன்  இங்கே பாடுவதைக்கேளுங்கள்!




மறுபடியும் சிவாஜி பத்மினியுடன்! யாரும் மறக்க முடியாத பாடல்! பத்மினி ஷண்மிகப்ரியா ராகப்பாடலின் பின்னணியில் தில்லானா மோகனாம்பாளாய் எத்தனை அழகாய் நடனமடுகிறார்!





ஷண்முகப்ரியா ராகத்தில் இளையராஜாவின் மற்றுமொரு முத்து! காட்சியமைப்பும் மயக்கும் பாடலும் எஸ்.பி.பாலசுப்ரமணியத்தின் கம்பீரமும் சித்ராவின் தேன் குரலும் நம்மைக் கட்டிப்போடுகிறது இங்கே!





இனி பதிவர்கள் அறிமுகம்:

1. அடை செய்வது எப்படி என்று தேடினால் அதற்கான‌ குறிப்பு இன்று புத்தகங்களிலும் இணைய தளங்கிலும் 1000 கிடைக்கின்றது. அடை செய்வதில் பல திறமை வாய்ந்த பெண்மணிகள் இருக்கிறார்கள். நானும் பலவிதமாக அடை செய்பவள் தான். ஆனாலும் சகோதரர் வை.கோபாலகிருஷ்ணன்  அவர்களின் அடை செய்யும் குறிப்பை அடித்துக்கொள்ள‌ யாரும் கிடையாது. இத்தனை விள‌க்கமாக, சுவையாக, சுவாரசியமாக அடை செய்யும் குறிப்பை யாருமே எழுதியதில்லை என்று அடித்துச் சொல்வேன். அடையின் ருசி அதையும் விட பிரமாதம்! நேற்று கூட என் வீட்டில் இவரின் குறிப்பு தான் அடையாகியது!

2. பொன்னியின் செல்வன் ராஜராஜ சோழன் காலத்துக் கோவில்களுக்கும் அவர் சமாதி அடைந்த உடையாளூருக்கும் சென்று வந்த அனுபவத்தை இங்கே நம்மிடம் பகிர்ந்து கொள்கிறார் கரந்தை ஜெயக்குமார்! கணித ஆசிரியராக இருந்தாலும் இவரின் சிந்தனையிலும் எழுத்திலும் எப்போதும் செந்தமிழ் கொஞ்சி விளையாடுகிறது.  நற்சிந்தனைகள் தான் இவரது பதிவுகளின் உள்ள‌டக்கம் எப்போதும்!  அவசியம் இந்தப்பதிவை மட்டுமல்ல, இவரது அனைத்துப்பதிவுகளையும் தொடர்ந்து படித்து வாருங்கள்.

3. கீதா குட்டிக்கவிதைகளால் தன் வலைத்தளமான தென்றலை அழகாக்கி வருகிறார். இந்தக் கவிதையும் அப்படித்தான். மழையின் சாரல் நம் மீது தெறிக்கிறது!

4. இயற்கை மருத்துவம் இந்த வலைத்தளத்தை மிகவும் சிறப்புடையதாக ஆக்குகிறது. இயற்கை உணவு உலகம் என்ற இந்த வலைத்தளத்தில் இந்தப்பதிவைப் படித்துப்பாருங்கள். சிறு நீரக கல் பிரச்சினைக்கு மருத்துவம் சொல்லியிருக்கிறார்கள். மிக மிக உபயோகமான வலைத்தளம் இது!

5. அகம் புறம் என்ற இந்த வலைத்தளத்தில் தம்பி பிரபு தன் தந்தையைப்பற்றி அவரின் நினைவு தினத்தில் எழுதியிருக்கும் கவிதை மனதை கனமாக்குகிறது! ஒவ்வொரு வரியும் அருமை! படித்துப்பாருங்கள்!

6. RDK தன் வலைத்தளமான அக்கினி குஞ்சுவில் தஞ்சை பெரிய கோவிலைப்பற்றிய பல தகவல்களை இங்கு குவித்து வைத்திருக்கிறார். அருமையான எழுத்து.

7. சிவாவின் தோட்டத்தில் எண்ற‌ற்ற‌ செடிகள்! அவற்றை வளர்க்கும் தெளிவான வழி முறைகள். செடிகள் வளர்ப்பதில் ஆர்வம் இல்லாதவர்களுக்குக்கூட ஒரு பெரிய தோட்டம் போடும் ஆசை வந்து விடும்! ' காய்கறிக்கழிவுகளை உரமாக்கலாம்' என்ற இந்தப்பதிவைப் படித்துப்பாருங்கள்!

8. சகோதரர் பழனி கந்தசாமி அவர்கள் பலதரப்பட்ட சிறந்த பதிவுகள் எழுதுவதில் நீண்ட நாட்கள் அனுபவமுடையவர்கள். இங்கே தன் 'மன அலைகளில்' எலும்பு முறிவு வைத்தியத்திற்கு சிறந்ததொரு நாட்டு மருந்தளித்து குணமாக்கும் வைத்தியசாலை பற்றி எழுதியுள்ள‌ பதிவு அனைவருக்கும் மிகுந்த பயன் அளிக்கும் என்பது உறுதி.

9. திருமதியின் பக்கங்கள் முழுவதும் ஆன்மீகப்பதிவுகள் நிறைய இருக்கும். அழகழகாய் புகைப்படங்கள் வெளியிட்டிருப்பார். எப்போதாவது சில சமையல் குறிப்புகளும் இடம் பெறும்.இறைவன் படைப்பில் அதிசயங்கள் என்று எறும்புகள் கூடு கட்டும் அழகை கவிதை போல சொல்லுகிறார் கோமதி அரசு இங்கே!

10. தஞ்சை பெரிய கோவிலின் உள்ளே உள்ள சோழர் கால ஓவியங்களை சாதாரணமாக யாரும் பார்த்திட இயலாது. போலீஸ் அதிகாரியாக இருந்த என் தந்தையுடன் மிகச் சிறு வயதில் பார்த்த ஞாபகம் இருக்கிற‌து. முனைவர் ஜம்புலிங்கம் அவர்கள் தான் பார்த்த அந்த ஓவியங்கள் பற்றி மிக அழகாக எழுதியிருக்கிறார் இங்கு!

12. பிரியசகியும் அவர் வீட்டுத்தோட்டத்தில் அழகழகாய் புதினாவும் மிளகாயும்  மலர்ச்செடிகளையும் வளர்த்து வருவதை இங்கு பார்த்து ரசியுங்கள். பார்க்கவே அத்தனை அழகாய் இருக்கிறது!

13. பருப்பு முனுக்கி சாம்பார் பற்றி கேள்விப்பட்டிருக்கிறீர்களா? உமையாள் காயத்ரியின் கைப்பக்குவம் இது! பெரும்பாலும் தினமும் ஒரு பதிவு போடும் இவரின் சுறுசுறுப்பு என்னை ஆச்சரியகக்டலில் ஆழ்த்துகிறது! செட்டி நாட்டு சமையல் குறிப்புகள், சிறு கவிதைகள் என இவர் பதிவுகள் அமர்க்களமாக இருக்கின்றன!

14. இயக்கப்படாத வங்கிக்கணக்குகளை எப்படியெல்லாம் கையாளலாம் என்பதற்கு தெளிவான, நல்லதொரு விளக்கம் கொடுக்கிறார் எனது எண்ண‌ங்கள் என்ற வலைத்தளத்தில் பதிவுகள் எழுதி வரும் சகோதரர் தமிழ் இள‌ங்கோ!

15. மிகச் சிறந்த புகைப்பட கலைஞர் ராமலக்ஷ்மி! அவரின் முத்துச்சரம் பல அழகிய புகைப்படங்களையும் அசத்துகின்ற ஓவியங்களையும் தன்னகத்தே கொண்டது! இந்த ஓவியங்கள் எத்தனை அழகு என்று பாருங்கள்!

16. சகோதரர் தின்டுக்கல் தனபாலன் பற்றி வலையுலகில் அறியாதவர் யார் இருக்கிறார்கள்!நற்சிந்தனைகளின் தொகுப்பே இவரின் வலைத்தளம்! ஒவ்வொரு பதிவையும் திற‌ந்தால் ஆயிரம் நல்முத்துக்கள் ஒளிரும். இந்தப் பதிவும் அப்படித்தான்! எண்ணத்தை மேம்படுத்தும் பாடல்கள் இவை!! படித்து ரசியுங்கள்!

17.  ராஜ ராஜ சோழனைப்பற்றியும் அவர் பிறந்த நாளான ஐப்பசி சதயத்திருநாளில் தஞ்சை பெரிய கோவிலில் நடந்த சிறப்புக்கொண்டாட்டங்கள், வழிபாடுகள் பற்றியும் மிக சிறப்பாக தன் வலைத்தளமான தஞ்சையம்பதியில் சகோதரர் துரை செல்வராஜ் அவர்கள் பதிவிட்டிருப்பதைப் படித்துப்பாருங்கள்!

18. /ஒவ்வொரு முறையும் சென்னை சர்வதேச விமான நிலையத்தில் நான் பயணம் செய்த விமானம் தரையிறங்கும் போதே ஒரு விதமான ஆழ்ந்த நிம்மதி மனதில் பரவும் ! உலகின் மிக பாதுகாப்பான இடமாக தோன்றும் ! விமானத்திலிருந்து வெளியேறும் முதல் தருணத்தில் முகத்தில் வீசும், அனைவரும் அலுத்துக்கொள்ளும் சென்னையின் வெப்பம் எனக்கு மட்டும் கருவறை சூடாகப் படும் !//
இது சாமானியனின் உண‌ர்வுகள் மட்டுமல்ல! வெளிநாட்டில் வாழும் அத்தனை தமிழர்களின் [ என்னையும் சேர்த்துத்தான்] உணர்வுகளையும் சேர்த்தே தன் எழுத்தில் பிரதிபலிக்கிறார்!!! ' தாய் மண்ணே வணக்கம் ' என்று அவருடன் நானும் சேர்ந்து பாடுகிறேன்! அவரின் மன உணர்வுகளை முழுவதுமாகப் படியுங்கள்!

தாய் மண்ணே வணக்கம்!

 
மேலும் வாசிக்க...

Saturday, January 24, 2015

வலைச்சரத்தில் ராகங்கள் -5!!!

'சுந்தரி கண்ணால் ஒரு சேதி' – என்ற இந்தப்பாடல் 'தளபதி' என்ற திரைப்படத்தில் ஜானகி, எஸ்.பி.பாலசுப்ரமண்யம் இவர்களால் பாடப்படுவது. மிகவும் புகழ்பெற்ற‌ பாடல் இது. இதன் பின்னணி இசைக்குழுவினர் பிரபல ஹிந்தி இசையமைப்பாளர் ஆர்.டி.பர்மனின் இசைக்குழுவில் இடம் பெற்றவர்கள்.  இவர்கள் ஒவ்வொரு பகுதி இசைத் துணுக்கையும் வாசித்த பின் கைதட்டி பாராட்டியதாக பின்னணிப்பாடகர் எஸ்.பி.பாலசுப்ரமண்யம் பல சந்தர்ப்பங்களில் பேசியிருப்பதோடு, இந்த மாதிரி இசையை யாரும் கொடுத்ததில்லை என்று வியந்து கூறியதுண்டு!

அது என்ன ராகம்? கல்யாணி!

கல்யாணி

கல்யாணி என்றால் மங்களம் எனபது பொருள். நம் மனதில் தோன்றும் பயம் என்னும் இருளை நீக்கி ஒளி தரும் ராகம். இதற்கு மேச கல்யாணி, சாந்த கல்யாணி என்ற பெயர்களும் உண்டு.  ஹிந்துஸ்தானி பாரம்பரியத்திலும் இது முக்கியமான இராகம். இதை அவர்கள் யமன் என்று அழைப்பார்கள். ஒவ்வொரு ஸ்வரத்திலும் கமங்களைக் குழைத்து மிக நீண்ட நேரம் இராக ஆலாபனை செய்ய வசதியானது. எல்லா இசை வடிவங்களும் இந்த ராகத்தில் உள்ளன. இசை நாட்டிய வடிவங்களில் அதிகம் கையாளப்படுகிற ராகம். இந்த ராகம் ஆர்ப்பாட்டமாகவும் இசைந்து கொடுக்கும், அதே சமயத்தில் அமைதியாகவும் ஸ்வரம் பாடும்.

இனி பாடல்களைப்பார்ப்போம்!

முதலாவது கல்யாணியில் ஒரு கீர்த்தனை. தியாகையர் தஞ்சை அரசன் புகழ் பாட மறுத்து கடவுளை நினைத்து பாடிய பாடல் இது. இந்த‌ ' நிதி சால சுகமா' என்ற பிரபல கீர்த்தனையை பிரியா சிஸ்டர்ஸ் அருமையான ஆலாபனையுடன் அற்புதமாய்ப் பாடுவதைக் கேட்டு ரசியுங்கள்!





'ஈரைந்து மாதங்கள் கருவோடு எனைத் தாங்கி நீ பட்ட பெரும்பாடு அறிவேனம்மா! ஈரேழு ஜன்மங்கள் எடுத்தாலும் உழைத்தாலும் உனக்கிங்கு நான் பட்ட கடன் தீருமா? ' ஒரு அருமையான மகன் தன் தாய்க்காக பாடும் அற்புதமான பாடல்! இப்படி ஒரு மகன் இருந்து விட்டால் ஒரு தாய்க்கு வேறென்ன வேண்டும்? வாலியின் அத்தனை வரிகளும் மிக அழகு! கல்யாணியில் இசைக்கும் ஜேசுதாஸின் கம்பீரம் அதை விட அழகு.





மறுபடியும் நடிகர் திலகம் சிவாஜி கணேசன், இந்த முறை பத்மினியுடன்! திருவருட்செல்வர் என்ற படத்தில் வரும்  ' மன்னவன் வந்தானடி' பாடலில் இழையும் கல்யாணியின் இனிமையுடன் சிவாஜியின் கம்பீரமும் பத்மினியின் அசத்தும் நடனமும் போட்டி போடும்! கண்டு களியுங்கள்!!





இனி பதிவர்கள் அறிமுகம்:


1.  வியாசன் யாரும் அறியாத தகவல் ஒன்றை இங்கே பகிர்ந்திருக்கிறார். ராஜராஜ சோழன் தன் மனைவி லோகமாதேவியுடன் தன் இறுதிக்காலத்தில் திருவிசை நல்லூரில் பிறவா வரம் தரும் யாகத்தைச் செய்தாராம்! ராஜராஜ சோழனின் சிலயும் அவரின் துணைவி சிலையும் அத்தனை அழகு! விபரங்களை இங்கே படித்துப்பாருங்கள்!

2. பொழுது போக்கு பக்கங்கள் என்று சித்ரா சுந்தர் எழுதியிருந்தாலும் கொத்துமல்லி, புதினா வளர்ப்பது என்று எத்தனை உபயோகமான விஷயங்கள்! ஆனால் எனக்கு முற்றிலும் புதியது வெங்காயத்தாள் வளர்ப்பது! சீக்கிரம் இதை முயற்சி செய்யப்போகிறேன்!

3. வாழ்க்கையில் திட்டமிடுதல் என்பது மிகவும் முக்கியமானது. அது எந்த அளவிற்கு முக்கியமானது, எப்படியெல்லாம் திட்டமிடுவது என்பது பற்றி கவிதா தன் பார்வைகள் வலைத்தளத்தில் அருமையாக எழுதியிருக்கிறார். அவசியம் படித்துப்பாருங்கள்! அனைவருக்கும் தினசரி வாழ்க்கையில் மிகவும் பயன்தரக்கூடியது.

4. மூதுரையில் ஒளவையார் நல்ல நட்பையும் தீய நட்பையும் இனம் பிரித்துப்பாடியதை சங்கப்பலகை அறிவன் தன் பதிவில் இங்கே வெளியிட்டு அருமையாக விளக்கத்தைத்தந்திருப்பதுடன் அதையொட்டிய தனது சிந்தனைகளையும் பகிர்ந்திருக்கிறார்!

5. அருண் பிரசாத் தனது சூரியனின் வலைவாசல் தளத்தில் வலைச்சர அனுபவம் பற்றி சுவாரசியமாக எழுதியிருக்கிறார். வலச்சர ஆசிரியர் பணியின் சாதகங்கள், பாதகங்கள், அதற்கான டிப்ஸ் என்று ஒரு கலக்கு கலக்கியிருக்கிறார்! வலைச்சர ஆசிரியர் பணி மேற்கொள்ளுபவர்களுக்கு இது மிகவும் உதவும்!!

6.  மதுரக்காரன் கான்ஸர் மருந்துக்களுக்கான விழிப்புணர்வுப் பதிவை இங்கே அருமையாக எழுதியிருக்கிறார்! அனைவரும் தெரிந்து கொள்ள‌ வேண்டிய தகவல்கள் இவை! படித்துப்பயன் பெறுங்கள்!

7. நிறைய பேருக்கு மிகவும், அவசியம் தேவைப்ப‌டும் பதிவு ஒன்றை செந்தில்வேல் தனது உனக்காக என்ற வலைத்தளத்தில் வெளியிட்டிருக்கிறார்! எத்தனையோ பேர் இதற்காக எந்த அளவு செலவு செய்கிறார்கள், எத்தனை முயற்சிகள் எடுக்கிறார்கள் என்பதை நானறிவேன். அத்தனை முக்கியமான தேவை இது. என்னவென்று சொல்ல மாட்டேன். நீங்களே படித்துப்பாருங்கள்!

8. வாழ்க்கை முறைக்கான கடிகாரம் ஒன்றை இங்கே நமக்காக காட்டிடிருக்கிறார் ஆனந்த். இந்த கடிகாரத்தின் முட்கள் ஒவ்வொரு மணியைக்காட்டும்போதெல்லாம் என்ன என்ன செய்ய வேண்டும், அப்போது நம் உடல் உறுப்புகள் எப்படியெல்லாம் இயங்கிகுன்றன, அதன் படி நம் உடம்பை எப்படி பாதுகாக்க வேண்டும் என்று இவரின் அனைத்து விபரங்களும் தெளிவானவை! அவற்றை பின்பற்றினால் நிச்சயம் கிடைக்கும் ஆனந்தம்!

9. நட்பு எத்தனை எத்தனை வகைகள்! நல்ல நட்பு கிடைக்க மாதவம் செய்திருக்க வேண்டும் என்று இங்கே சுபாஷிணி தன் வலைத்தளத்தில் நட்பைப்பற்றிய தன் எண்ணங்களை அழகாகப் பகிர்ந்திருக்கிரார்!

10. உஷா கெளதம் தன் வலைத்தளத்திற்கு அழகான பெயர் வைத்திருக்கிறார். மீள்கின்றதென் பாதை! அழகான ஒரு கேள்வியும் கேட்டிருக்கிறார். மனோ தைரியம் யாருக்கு அதிகம், ஆணுக்கா, பெண்ணுக்கா? என்று! அதற்கான அலசல்கள் சுவாரசியம் மிகுந்தவை. படித்துப்பாருங்கள்!

11. 'உங்களைச்சுற்றி ஒரு நூறு மலர்கள் பூத்திருக்க நடுவில் நின்றிருக்கிறீர்களா? நீங்கள் செய்த ஒரு சிறு உதவிக்கு உங்கள் பாட்டி வயதுள்ள ஒருவர் உங்கள் தலை மேல் கைவைத்து துளி கண்ணீருடன் வாழ்த்தும் வாழ்த்தைப் பெற்றிருக்கிறீர்களா? இதுபோல் ஒரு சந்தோஷத்தை தரக்கூடிய நிகழ்வொன்று நடந்தது எனக்கு.' அந்த நிகழ்வை நினைத்து  வண்ண நிழல் அர்ஜுன் புண்ணியம் என்று நெகிழ்கிறார்! படித்த எனக்கு அது உண்மையிலேயே புண்ணியம் என்று புரிந்தது! நீங்களும் படித்துப்பாருங்கள்!

12. செல்வா தன் வலைத்தளத்திற்கு கோமாளி என்று பெயர் வைத்திருப்பது ஏனென்று தெரியவில்லை. ஆனால் இவரின் பதிவுகள் ஆழமாகவும் அர்த்ததுடனும் விளங்குகின்றன. இந்தப்பதிவு கூட யாருக்கும் வராத கற்பனை! 70ம் வயதில் நான் என்று ஒரு பதிவிட்டிருக்கிரார்! படித்துப்பாருங்கள்! அருமையான கற்பனைத்திறனும் தேர்ந்த எழுத்தும் கொடி கட்டிப்பறக்கிறது இங்கு!

13. நாளுக்கு நாள் பெருகி வரும் செலவினங்கள் மூச்சை அடைக்கிற‌து. எந்த மாதிரியெல்லாம் நம் செலவினங்களைக்குறைக்கலாம், என்னென்ன தேவையில்லாத செலவுகளைத் தவிர்க்கலாம் என்ற கேள்விகளுக்கு  தன் மழைக்காகிதத்தில்  தவிர்க்க வேண்டிய வீண்செலவுகளைக்குறைக்க‌ கெளதமன் அருமையான யோசனைகளை எழுதியிருக்கிறார்!

14. இளம் வயதில் பூனைக்குட்டியைப்பார்க்கப் போய் கீழே விழுந்து காயங்கள் ஏற்பட்டதையும் காயத்தின் வலியை இன்னும் மற‌க்க இயலவில்லை என்றும் மிக அழகாய் எழுதியிருக்கிரார் சுஜாதா செல்வராஜ் தன் பிரியத்தின் இசை வலைத்தளத்தில்!

15. அற்புதங்கள் நிகழ்த்துபவன் என்ற இந்த கவிதை படித்துப்பாருங்கள்! விநாயக முருகனின் கற்பனை நம்மை ரசிக்க வைக்கின்ற‌ன!

16. கடல் நுரைகளும் என் கவிதையும் என்ற வலைத்தளத்தில் ஸ்ரீவிஜி விஜயலக்ஷ்மி சுவாரசியமான பல பதிவுகள் எழுதிக்கொன்டிருக்கிறார். இந்த வியட்நாம் பயணக்கட்டுரையும் படிக்கப் படிக்க சுவாரசியம் மேலிடுகிறது. படித்துப்பாருங்கள்!


 
மேலும் வாசிக்க...

Friday, January 23, 2015

வலைச்சர ராகங்கள்-4!

கண்ணில் தெரியும் கதைகள் என்ற திரைப்படத்தில் ஒரு பாடல் வரும். ' நானொரு பொன்னோவியம் கண்டேன்' என்று தொடங்கும் அந்தப்பாடலை எஸ்.பி.பாலசுப்ரமண்யமும் ஜானகியும் சுசீலாவும் போட்டி போட்டுக்கொன்டு அருமையாகப் பாடியிருப்பார்கள். 1980 களில் வந்த படம் இது.இந்தப் பாடல் வெளி வந்த சமயம், எங்கள் குடும்ப நண்பரொருவர் ஒரு ஆடியோ டேப் முழுவதுமாக இந்தப்பாடலைத்திரும்பத் திரும்ப பதிவு செய்து தரச்சொன்னார். ஒரு மணி நேரத்திற்கும் மேலாக அவர் கார்ப்பயணம் செய்து அவர் இருப்பிடத்திற்குச் செல்ல வேண்டும். இந்தப்பாடலை மட்டுமே அவர் திரும்பத் திரும்ப கேட்டுக்கொண்டே போவார்!

அந்த அளவிற்கு அவரை மயக்க வைத்த அந்தப் பாடலின் ராகம் எது தெரியுமா? மோகனம்!

மோகனம்

அழகும் அன்பும் நிறைந்த இடத்தில இருப்பது மோஹனம். காமம், குரோதம், மோகம் போன்ற தீய எண்ணங்களை நீக்கி நன்மை தரும் ராகம். மிக அழகாக இசைக்கும் ராகம். திரை இசையமைப்பாளர்களால் அதிகம் பயன் படுத்தப்பட்ட அழகான ராகங்களின் இதுவும் ஒன்று. பண்டைய காலத்தில் 'சிலப்பதிகாரத்தில்' 'முல்லைத்தீம்பாணி' என்று கூறப்பட்ட ராகம் மோகனம் தான் என்று இசை அறிஞர் ராமநாதன் தனது ஆராய்ச்சியில் கண்டுபிடித்துள்ளார். அந்த அளவிற்கு மிகத்தொன்மையான ராகனம் மோகனம். வட இந்தியாவில் இந்த ராகத்தை ” பூப் ” , என்றும் பூபாளி என்றும் அழைக்கின்றனர். கேட்பவர்களை உருக வைக்கும் இந்த ராகம் மென்மையான உணர்வுகளையும் வீர உணர்வுகளையும் வெளிப்படுத்தும் சிறந்த ராகம். சீனா, ஜப்பான் போன்ற நாடுகளில் மிகவும் புகழ் பெற்றது.

இனி பாடல்கள்!

லால்குடி ஜெயராமன் அவர்களது வயலின் எந்த ராகத்தைத் தொட்டாலும் மனதை உருக்கி எங்கோ சஞ்சரிக்க வைத்து விடும். இங்கே மோகனத்தில் கல்பனா ஸ்வரங்களை பொழிந்து எப்படியெல்லாம் நம் மனதை மயங்க வைக்கிறார்!கேட்டு ரசியுங்கள்!





அறுபதுகளில் வந்த ஒரு மோகன ராகப் பாடலை இங்கே உங்களுக்கு அறிமுகம் செய்கிறேன். பல பேர் இந்தப் பாடலைக்கேட்டிருக்க மாட்டார்கள். இந்தக் காட்சியையும் பார்த்திருக்க மாட்டார்கள். பாடல் அழகா, வரிகள் அழகா அல்லது நடிகர் திலகத்தின் சிருங்கார ரசம் மிக்க நடிப்பு அழகா என்று இனம் பிரிக்க முடியவில்லை. எல்லாம் சேர்ந்து மோகன ராகத்தின் இனிமை விஞ்சி நிற்கிறது இங்கே!





எண்பதுகளில் வந்த ' காதல் ஓவியத்தின் பாடல் இது! எஸ்.பி.பாலசுப்ரமணியத்தின் ஆலாபனைத்தொடக்கமும் கூடவே மோகனத்தில் இழையும் வயலின் இசையும் நம்மை பாடலைக்கேட்கும் முன்பே கட்டிப்போட்டு விடும்.




இனி பதிவர் அறிமுகங்கள்:

1. அன்பை எதிர்பார்த்து, அன்பின் வரவை எதிர்பார்த்து பல உறவுகள் வாழ்க்கை முழுவதும் எதிர்பார்ப்புகளுடனேயே வாழ்கிறார்கள்! இங்கே பள்ளி சென்ற பேரனை எதிர்பார்த்து காத்து நிற்கும் தாத்தாவைப்பற்றி காத்திருப்பதன் உன்னதம் என்று மிக அழகாய்ச் சொல்லியிருக்கிறார் செல்வகுமார்  SELVA SPEAKING என்ற தன் வலைத்தளத்தில்! 

2. அருமையான விழிப்புணர்வுப்பகிர்வை கயல் இங்கே தன் வலைத்தளம் THAMAASU வில்எழுதியிருக்கிறார்கள். இரத்த தானம் செய்வது பற்றி நாம் அறிந்திருக்கிறோம். ஆனால் உறை அணுக்கள் [பிளேட்லெட்ஸ்] தானம் செய்வதற்கான தேவை, அவசியம், அதைப்பற்றிய தெளிவான விளக்கம் என்று இவர் தெரிவித்திருக்கும் தகவல்கள் நாம் எல்லோரும் அறிந்திருக்க வேண்டிய அவசியமான தகவல் ஆகும்! அவசியம் படித்துப்பாருங்கள்!!

3. அடிசில் என்ற சுத்த தமிழில் இவர் தன் வலைத்தளத்திற்குப் பெயர் வைத்திருப்பது மிக அழகாக இருக்கிறது. பனை ஓலை கொழுக்கட்டை எப்படி செய்வது என்பதை இங்கே சுந்தரா விளக்கியிருக்கிறார். அபூர்வமான பலகாரம் இது! செய்து பாருங்கள்!

4. பனைமரக்காடே, பறவைகள் கூடே, மறுபடியும் ஒரு முறை பார்ப்போமா? 
இது ஒரு பாடலின் வரிகள் இல்லை!
புலம் பெயர்ந்த ஒரு மனிதனின் ஆழ்ந்த சோகத்தை, தன் நாட்டைப்பிரிந்து படும் மன வேதனையை ப்ரியா கதிரவன் மிகக் குறைந்த வரிகளிலேயே நம் மனதில் ஆழப்பதிக்கிறார் இங்கே!

5. THILLAIAKATHU CHRONICLES என்ற தன் வலைத்தளத்தில்இலக்கியம் கற்பித்தல் சுவைக்கும் கரும்புக்கு இணையானது என்று அனுபவித்துச் சொல்லியுள்ளார் துளசிதரன் ! கற்ற‌தையும் கற்பித்தலையும் மிக உயர்வாகச் சொன்ன விதம் மிக அழகானது. தனக்குக் கற்பித்த ஆசிரியருக்கு மகுடம் சூட்டியுள்ளார் இங்கே!

6. சரியான கழிப்பிடங்கள் இன்றி இன்றைய மனித சமூகம் படும் அவலங்களை மிக அருமையாக, மிகவும் பொறுப்புணர்வுடன் தளிர் சுரேஷ் இங்கே சொல்லியிருக்கும் விதம் மனதைப் பிசைகிறது. இந்த மாதிரியான விழிப்புணர்வு பதிவுகள் ஒரு சிலரையாவது மாற்றும் வல்லமையுடையது! இந்த மாதிரியான விழிப்புணர்வு பதிவுகள் வலைத்தளங்களில் அதிகம் வர வேண்டும்! சுரேஷ் அவர்களின் பணி தொடரட்டும்!

7. RUDYARD KIPLING எழுதிய கவிதகள் கல்லூரிப்பருவத்தில் நான் விழுந்து விழுந்து படித்தவை. ரசித்தவை. என் வண்ண‌ ஓவியங்களுக்கு அவரின் சில பொருத்தமான கவிதை வ‌ரிகளை தலைப்பாக எழுதும் பழக்கம் எனக்கிருந்தது. கால ஓட்டத்தில் அவரை நிறைய மறந்து போயிருந்த என்னை மாதவன் இளங்கோவின் இந்தப்பதிவு திரும்ப பழைய நினைவுகளுக்குக் கொண்டு சென்று விட்டது.  அவரின் மிக அழகான வரிகளை மாதவன் இளங்கோ தன் பதிவில் கையாண்டு ஏன் முதல் ஏடு வரை என்று அழகாய்ச் சொல்லியிருக்கிரார் அம்மாவின் தேன்குழல் என்ற தன் வலைத்தளத்தில்! . படித்துப்பாருங்கள்!

8. இதயச் சுவடுகள் ஸ்ரீசந்திரா இங்கு எழுதியிருப்பதுவும் ஒரு அருமையான விழிப்புணர்வுப்பதிவு தான்! தஞ்சை நெற்பயிர் நிலங்கள் மீத்தேன் வாயு எடுப்பதால் அடுத்த தலைமுறைகளுக்கு எப்படியெல்லாம் பாழ்பட்டுப்போகும் என்பதையும் மத்திய அரசின் இத்திட்டம்  மொட்டையடித்து விட்டு சீப்பு கொடுப்பது போல இருப்பதாகவும் சாடியிருக்கிறார். கை கொடுங்கள் ஸ்ரீசந்திரா! அருமையாக எழுதியிருக்கிறீர்கள்!!

9. சமூகத்தில் மாற்றத்தை விரும்பும் ஒரு சாதாரண ஊழியனின் குரலை தன் ஒவ்வொரு பதிவிலும் தீர்க்கமாக வெளிப்படுத்துகிறார் ராமன்! உதாரணத்திற்கு சுனாமியின் போது தங்கள் குழுவினர் செய்த களப்பணிகள், அன்றைக்கு மனம் பட்ட பாடு அனைத்தும் மூன்று பதிவுகளாய் நம் இதயம் தொடுகிறது. சுனாமி அலைகளை நான் என்றுமே மறப்பதற்கில்லை. காரணம், அன்றைக்குத்தான் என் பிறந்த நாள். காலையில் தொலைக்காட்சியை பார்க்க ஆரம்பித்தது மட்டும் தான் தெரியும். அன்று இரவு வரை ஒவ்வொரு கணமும் மனிதர்களின் அழிவுகளும் அதைத்தொடர்ந்த ஓலங்களும் தொலைக்காட்சி வாயிலாக மனதைப்புரட்டிப்போட்டதை என்றுமே மறக்க இயலாது.

10. அருமையான விழிப்புணர்வு பதிவு! குப்பைகள் அகற்றி தன் பள்ளியை, அதன் சுற்றுப்புறத்தை சுத்தமாக வைத்துக்கொள்ளுவதில் மாணவர்களுக்கு சொல்லிக்கொடுத்து வெற்றி பெற்ற‌ ஒரு ஆசிரியரின் தன்னம்பிக்கையும் மகிழ்ச்சியும் ஒருங்கே இணைந்த குரல் இது! சாதாரண சாதனை அல்ல இது! கல்லாதது உலகளவு என்று என்று தன் வலைத்தளத்திற்கு பெயர் வைத்திருக்கிரார். கற்பிப்பது ஒரு ஆசிரியரின் பணி என்றால் அங்கே கல்வி கற்பிப்பது மட்டும் அல்ல, நல்ல பழக்கங்களையும் நல்லொழுக்கத்தையும் கற்பிப்பதும்தான் ஆசிரியரின் கடமையாகிறது! அதை மிக அழகாய் செய்திருக்கும் இந்த நல்லாசிரியருக்கு ஒரு சல்யூட்!

11. உங்கள் அலைபேசியிலிருந்து எந்த செலவும் இல்லாமல் இந்தியாவில் யாருக்கும் அழைக்கலாம் என்று ரஞ்சித் சொல்கிறார். ஸ்மார்ட் ஃபோனில் கொசுவை விரட்டக்கூட புதிய அப்ளிகேஷன் இருக்கிறதாம்! நிறைய இது போன்ற புதிய தகவல்களை இவரின் வலைத்தளத்தில் பார்க்கலாம்!!

12. தன் வலைத்தளமான பிச்சைப்பாத்திரத்தில், நிச்சலனமாக உறங்கும் பச்சிளங்குழந்தையைப் பார்க்கையில் மனதில் அலகளாய்ப்புரண்டு வரும் சிந்தனைகளை உற‌ங்கும் துயரம் என்று தலைப்பிட்டு மிக அழகாய் இங்கு எழுதியிருக்கிரார் சுரேஷ் கண்ணன்!!!
மேலும் வாசிக்க...

தமிழ் மணத்தில் - தற்பொழுது