02 - வலைச்சரம் - இசையால் உருகாத இதயமெது?

இசை கேட்டால் புவியே அசைந்தாடுமாம். இசையால் உருகாத இதயமே இல்லையாம். அது உண்மை தானுங்களே!

சின்ன வயசுல ரேடியோவில " மிலே சுரு" ஆரம்பிக்கும் மதியம் 12 ன்னு நினைக்கிறேன். அதைக் கேட்டுக்கிட்டே பின்னாடி கிழிஞ்ச டவுசரை ( லக்கி கிழிச்சது இல்லைங்க - நிஜம்மாவே கிழிஞ்ச ) பெரிய சட்டைய இழுத்து விட்டு மறைச்சுக்கிட்டு சுடும் தார் சாலையில வெறும் காலால பள்ளிக் கூடத்துக்கு ஓடிய சுகம் இன்னைக்கு எத்தனைப் பேருக்கு கிடைக்கும் சொல்லுங்க.

திருச்சி வானொலி, இலங்கை வானொலி, விவித பாரதி, சென்னை வானொலி அப்படின்னு வளந்தவங்களுக்குத் தான் தெரியும் அதோட அருமை.
எனக்கு ரொம்ப பிடிச்சது "நேயர் விருப்பம் " மற்றும் தேன் கிண்ணம்.

" இந்தப் பாடலை விரும்பிக் கேட்டவர் ****, படம் **** பாடல் " **** " அப்படின்னு வரும். ( நம்ம பேரு ரேடியோவில சொல்லிட்டாங்கடோய்னு சவுண்டு விட்டவங்க எல்லாம் ஒரு பின்னூட்டம் போட்டுடுங்க இங்க )
கண்ணதாசனையே ஒருத்தர் " நீங்க பாடல் கண்ணதாசன் " தானே அப்படின்னு கேக்க, அட இது கவிஞர் கண்ணதாசனை விட நல்லாருக்கேன்னு சொன்னாராம். அவ்வளவு தாக்கம் இருந்தது மக்களிடையே.

இன்னைக்கு என்னதான் நம்ம கிட்ட பல பாடல்கள் கணினியிலோ அல்லது மற்ற பாட்டு கேட்கும் உபகரணத்தில் இருந்தாலும், நாம் கேட்டு அந்தப் பாடல் ஒலிபரப்பப் படும் போது கிடைக்கும் சுகமே தனி தாங்க.


அந்த வகையில நமக்கு வலைப்பதிவுல மத்தவங்க கேக்கற பாட்டு போடுற கானா பிரபாவோட றேடியோஸ்பதியும் கூட்டு வலைப்பதிவான தேன்கிண்ணமும் ரொம்ப பிடித்தமான ஒண்ணு.

றேடியோஸ்பதி பத்திச் சொல்லனும்னா ரொம்பவும் அழகான, அபூர்வமானப் பாடல்களைத் தேர்ந்தெடுத்து போடுவதாகட்டும், பாடல்கள் பற்றி எந்தக் கேள்வி இருந்தாலும் அதுக்கு சரியான பதில் தருவதாகட்டும், கானா பிரபா இசையிலே வாழுகிறார். தற்போது வாரம் ஒரு சிறப்பு நேயர் பகுதியை ஆரம்பித்து வைத்த போது என்னுடைய சிறப்பு விருப்பம் கேட்டு போட்ட பாடல்கள் இங்கே.

பாடல்கள் பற்றிப் பேசும் போது அபூர்வ வகைப் பாடல்கள் மற்றும் மறக்கப் பட்ட பாடகர்களின் பாடல்கள் என பொறாமைப் படும் அளவிற்கு தன்னுடைய பட்டியலை வைத்திருக்கும் புது மாப்பிள்ளை மரவண்டு ( ஹைக்கூ கணேஷ்) கணினியை அப்படியே அபேஸ் செய்ய ஆசை எனக்கு. பாடல்களோடு நிறைய விஷயங்களை அள்ளித் தருவதில் பெரிய கில்லாடி. மரவண்டு கணேஷ். கிருஷ்ணசந்தர் பாடல்கள் சிலது மட்டும் கேட்டிருக்கேன்.அதேப் போல யேசுதாஸ் பாடல்களின் பட்டியலை பாருங்க. இதுல எத்தனைப் பாடல்கள் நீங்க கேட்டிருக்கீங்க ?. மரவண்டு தன் பதிவில் கேட்டிருக்கும் கேள்வியை நானும் இளையராஜாவைப் பார்த்தால் கேட்க ஆசை. ஏன் தீபன் சக்கரவர்த்திக்கு அவ்வளவு முக்கியத்துவம் தரப்படவில்லை. ஜெயச்சந்திரன் பாடல்கள் மட்டும் முன்னூறுக்கும் மேலாம். இப்ப சொல்லுங்க... அந்த கணினியை அப்படியே லவட்டிடலாம் தானே ?

ஆனாலும் சந்திரவதனா அளவுக்கு இல்லைன்னு சொல்லனும். பாட்டு போடறது மட்டும் இல்லாம ஒவ்வொரு பாட்டையும் வரிகளோட போடறதுக்காக அவங்களுக்கு ஒரு ஓ போட்டுடலாம் இங்க. அப்படியே உங்களுக்கு இசையரசி பி.சுசீலாவிடம் ஏதேனும் கேள்வி இருக்குங்களா .. இங்க வாங்க. ஒரு குழுவே உங்களுடைய கேள்விகளை அவங்களுக்கு அனுப்பி பதில் பெற்றுத் தரக் காத்திருக்கு.

உங்களுக்கு என்னப் பாட்டு எந்த ராகம்னு ஒரு பட்டியல் போட்டு புத்தகம் போட்டார் சிமுலேஷன். மோகன ராகத்துல எத்தனைப் பாட்டுனு இங்க வந்து பாருங்க. இவரோடப் பதிவு பெரும்பாலும் இசையைப் பற்றியே இருப்பது சிறப்பு.

சினிமா இசையைப் பற்றி சொல்லிட்டு பக்தியை விட்டுடலமா ? இதோ கண்ணன் பாடல்கள், முருகன் பாடல்கள் மற்றும் அம்மன் பாடல்கள் போற்றும் பதிவுகள்.



சரி இப்பச் சொல்லுங்க. இசையால் உருகாத இதயமெது?


தொடுக்க மறந்த இரு பூக்கள். சுட்டிகள் தந்துதவிய கானாபிரபா மற்றும் குமரனுக்கு என் நன்றி.

இசையின்பம் - ரொம்பவே ஆழமா அலசி ஆராய்ஞ்சு தொவச்சு காயப் போட்டு வச்சிருப்பாங்க. நம் ஆண்மீகப் பதிவரு இருக்கிற குழுமப் பதிவு.
சிவமுருகனோடது கீதம் சங்கீதம். இப்ப என்ன செய்யறார் இவர்? மறுபடி வாங்க சிவமுருகன்!