பயணங்கள் முடிவதில்லை - விடை பெறுகிறேன்

வாழ்க்கைச் சக்கரம் சுற்றிக் கொண்டே இருக்கும். நாமும் ஓடிக்கொண்டே இருப்போம், அது தான் வாழ்க்கை. பயணங்கள் முடிவதில்லை. ஒவ்வொரு பயணத்திலும் ஒரு தேடலுடன் செல்கிறோம். அந்தப் பயணத்தின் தேடல் நமக்குப் பயன் தரவேண்டும் என்பது எனது விருப்பம்.

தொடர்ந்து ஒரு வார காலமாக உங்களையெல்லாம் சோதித்திருக்கிறேன் இந்த சோதிபாரதி. எத்தனை சோதனைகளை நான் கொடுத்தாலும் அதனையெல்லாம், பொறுத்துக்கொண்டு எனது பதிவுகளையும் படித்து நல்ல பல கருத்துக்களை எடுத்தியம்பிய நல்ல உள்ளங்களை நினைத்துப் பார்க்கிறேன். ஒவ்வொருவருக்கும் தனித்தனியாக நன்றி சொல்லி பிரிக்க விரும்பவில்லை. அனைவருக்கும் நன்றி சொல்லி அன்னியப்படவும் வேண்டியதில்லை என்று நினைக்கிறேன். நாமெல்லாம் வலையாகப் பின்னப்பட்ட வலை உறவுகள்! நமக்குள் இணைப்பு என்பது எப்போதும் இருந்துகொண்டிருக்க வேண்டும் என்று விரும்புகிறேன்.

இந்த ஒரு வார கால வலைச்சர ஆசிரியப் பணியில் இடுகைகள் எழுத வாய்ப்பு ஏற்படுத்திக் கொடுத்த சீனா ஐயா மற்றும் எனது குடும்பத்தாரின் புரிந்துணர்வு நினைவு கூறத்தக்கது. நான் பயணப்படும் நேரம் வந்துவிட்டது , அதனால் பயண அனுபவங்களை உள்ளடக்கிய சில இடுகைகளைக் கொண்ட வலைபூக்களையும் இன்றைய வலைச்சரத்தில் தொடுக்கலாம் என்றிருக்கிறேன்.

அறிமுகம்

ஏ.ஜீவன், வட அமெரிக்கப் பயணம் மேற்கொண்டவர், பயண அனுபவங்களை தன் மனதுக்குள் பூட்டி வைக்கவில்லை. தனது அமெரிக்க, கனடா பயணத்தின் போது ஏற்பட்ட அனுபவங்களை அவரது வலைப்பூவில் சுவை பட பகிர்ந்திருக்கிறார். நாமும் படித்து அறிந்து கொள்ளலாமே. புதிதாகச் செல்பவர்களுக்கு உறுதுணையாக இருக்கும்.

கால்கரி சிவா, கனடாவின் நயாகரா-டொராண்டோ பயணத்தின் போது ஏற்பட்ட அனுபவங்களை படங்களுடன் அழகாக விளக்குகிறார். நாமும் அங்கெல்லாம் சென்று வந்த அனுபவத்தைக் கொடுக்கிறது. நிறைய பயனுள்ள பதிவுகள் செய்திருக்கிறார். அவரின் மற்ற பதிவுகளையும் படித்துப் பயன் பெறுவோமே!

ஒரு புகை வண்டிப் பயணத்தைக் கூட ரம்மியமாக்கி ரசித்திருக்கிறார் திருசெல்வராஜ் அவர்கள். ஈரோட்டுப் பயணத்தை இலகுவாக எடுத்தியம்பியிருக்கிறார். அழகாகச் செல்கிறது இவரது கட்டுரை. அவரது விரிவெளித் தடங்கள் கூட பயணங்கள் முடிவதில்லை என்று சொல்கின்றன. நாமும் பயணிப்போம் பயன் பெற!

நீண்ட இடைவெளிக்குப் பிறகு, பொங்கல் விழாவிற்காக தனது பாட்டி வீட்டிற்கு பயணித்து அங்கு ஏற்பட்ட அனுபவங்களை அழகாகப் பகிர்ந்து கொள்கிறார் ஸ்ரீமதி தனது கரையோர கனவுகள் வலைப்பூவில். நானே நானா?? யாரோ தானா?? என்கிற வகையில் அவருக்கு ஆச்சர்யமூட்டிய அனுபவங்களுடன் அளவளாவுகிறார். அழகான வலைப் பக்கத்தில் பயணிக்கிறார்!

ஒரு பதிவர் சந்திப்பையே கவித்துவத்துடன் சொல்லி, அங்கு பார்த்த இயற்கை காட்சிகளையும் அதில் உள்ளிருத்தி, பதிவர் சந்திப்பு அனுபவங்களை, பயணக் கட்டுரையாக்காமல் கவிதையாக்கி வைத்திருக்கிறார் ஒற்றை மானாக வெயிலான். அழகாக வந்திருக்கிறது அந்த பதிவர் சந்திப்பு மற்றும் அவரது இடுகைகளும்.

மலையாள நாடு, கேரளாவுக்குப் போக விருப்பாதவர்கள் யாரும் இருப்பார்களா? அப்படித்தான் திரு விழியன் அவர்கள் தனது கேரள பயண அனுபவங்களை அழகாக சுவை பட கட்டுரையாக வடித்திருக்கிறார், விழியன் பக்கம் என்னும் வலைப்பூவில். நீங்களும் அந்த பயண அனுபவத்தைப் பெறலாமே! சிறுகதைகள், கவிதைகள் கூட எழுதி இருக்கிறார்.

இந்தியாவில் ஒரு பெண் நள்ளிரவில் என்று தனித்து வெளியே சென்றுவிட்டு பாதுகாப்பாக வீடு திரும்ப முடிகிறதோ அன்று தான் இந்தியா சுதந்திரம்(விடுதலை) அடையும் நாள் என்று சொன்னார்கள். ஒரு பெண் தனித்து பயணிக்கும் போது அவளுக்கு ஏற்படும் அனுபவங்கள், ஒரு ஆணுக்கு ஏற்படுவதில்லை என்பதை மறுக்காமல் ஏற்றுக் கொள்கிற அவல நிலையில் தான் இன்னும் இருக்கிறோம். அதை அழகாகப் படம்பிடித்துக் காட்டுகிறார் நிவேதா தனது ரேகுப்தி வலைப்பூவில்! உடலியல், பாலினம் மற்றும் உளவியல் ரீதியான அலசலான கட்டுரையைக் கொடுத்திருக்கிறார், பெண்ணும்பயணியுமாயிருத்தல்!


இத்துடன் எனது சத்திய சோதனைகளை(சத்தியமா சோதனைதான் என்று பொருள்) முடித்துக்கொண்டு, பயணம் செய்யத் தயாராகிவிட்டேன். உங்களை எனது அத்திவெட்டி அலசலில் சந்திக்கிறேன்.

அன்பன்,
ஜோதிபாரதி.

ஜோதிபாரதி - வலைச்சர ஆசிரியப்பணி! இடுகைகள் அனைத்தும்!

வலைச்சரத்தில் நான் மற்றும் எண்ணங்கள் - முதல் நாள்

விருந்துக்கு வாங்க! -வலைச்சரத்தில் இரண்டாம் நாள்

விருந்தும், மருந்தும் - வலைச்சரத்தில் மூன்றாம் நாள்

சரியா? தவறா?-வலைச்சரத்தில் நான்காம் நாள்

பழமொழி, முதுமொழி -பண்பாடு -வலைச்சரத்தில் ஐந்தாம் நாள்

கட்டுப்பாடும்,கள்ளுக்கடையும் -வலைச்சரத்தில் ஆறாம் நாள்

பயணங்கள் முடிவதில்லை - விடை பெறுகிறேன்