அனுபவம் பலவிதம் - வலைச்சரம் - 2ஆம் நாள்

ஒரு பதிவு எழுதும் முன், இதே செய்தியை வேறு எவராவது எழுதியிருக்கிறார்களா ? என்று இணையத்தில் தேடிப்பார்த்து, யாரும் எழுதவில்லை என்று உறுதியானதும் எழுதுவோம். ஆனால், நம் அனுபவங்களைப் பகிரும் பதிவுகளை எழுதும் போது, இந்தத் தேடல் அவசியமற்றது. நம் அனுபவங்களை வேறொருவர் கண்டிருக்கக் கூடுமா என்ன ?. பதிவு எழுதும் ஒவ்வொருவரும், ஒரு காலகட்டத்தில் தன் இளம்பிராய அனுபவங்களை எழுதாமல் இருக்க முடியாது. இன்று வலைச்சரத்தில், தன் அனுபவங்களை வித்தியாசமான முறையில், பலரும் ரசித்துப் படிக்கும் வகையில் எழுதப்பட்ட சில பதிவுகளைப் படிப்போம் வாருங்கள்.

குழந்தைகளுக்கு காய்ச்சல் வரும்போது கவலை கொள்வது பெற்றோர்கள் மட்டுமே. காய்ச்சல், சிறுவர்களுக்கு ஓரிரு நாட்கள் பள்ளி விடுமுறையைக் கொடுக்கும்; அந்த நாட்களில் படிக்க வேண்டாம்; ராஜ உபசாரம் கிடைக்கும்; முக்கியமாக திட்டு/அடி விழாது. பெய்யென பெய்யும் மழை பிரதீப் அவர்களுக்கு காய்ச்சல் வந்த ஒரு நாளைப் பற்றி எழுதியுள்ள இந்த அனுபவத்தை படியுங்கள். அந்த மதிய நேரத்து காய்ச்சலை அவர் வர்ணித்துள்ள விதம் – அற்புதம்.

காய்ச்சல்

உபரித்தகவல்: நான் தமிழில் படித்த முதல் ப்ளாக் இவருடையது தான்.

8ஆம் வகுப்பு படிக்கும் ஒரு பையன், வாரமிருமுறை, தன் அப்பாவின் வற்புறுத்தலுக்காக, வங்கிக்குச் செல்ல நேரிட்டது. அந்தப் பையனின் விழிவழியே வங்கியின் ஒரு நாள் நிகழ்வை எப்படி எழுதியிருக்கிறார் பாருங்கள். பலமுறை படித்து ரசித்தது.

வங்கியில் தொங்கிய நாட்கள்...

இன்னும் சில வருடங்களில், அருங்காட்சியகத்தில் வைக்கப்படும் பொருட்களில் கோலி குண்டு, கில்லி-தாண்டல் மற்றும் பம்பரமும் இடம் பெற்றிருக்கும். இந்தக் கால சிறுவர்களிடம் பம்பரம் என்று சொன்னால், என்ன அது ? என்று கேட்பார்கள். இவர், சிறுவயதில், பம்பரம் வாங்கி விளையாடிய கதையை எவ்வளவு நுணுக்கமாக விவரிக்கிறார் பாருங்கள்.

பம்பரக் கண்ணாலே !

சுண்டு விரல் நீளத்திலிருக்கும் செல்போனில், பேசலாம், கேட்கலாம், படம் எடுக்கலாம், இன்னும் நிறைய விஷயங்களைச் செய்யலாம். ஆனால் சற்றே ஏறக்குறைய 30 வருடங்களுக்கு முன், ரேடியோ என்பது எப்படி இருந்தது. இவர் வளரும் போது, தன்னுடன் வளர்ந்த ரேடியோவின் கதையையும் விவரிக்கிறார் இந்தப் பதிவில்.

அப்பாவின் ரேடியோ

நாளை சந்திப்போம் நண்பர்களே !!!