வலைச்சரம்: பாரதியின் பாதையில்...

வலைச்சரத்தில் வெளியிடப்படும் இடுகைகள் வலைச்சரக் குழுவினரால் தணிக்கைக்கு உட்படாது. ஆனால், வலைச்சர விதிக்கு உட்படாத இடுகைகளை முன்னறிவிப்பின்றி நீக்க வலைச்சரக் குழுவினருக்கு உரிமை உள்ளது

Thursday, August 6, 2015

பாரதியின் பாதையில்...

➦➠ by: கவிஞர் கி. பாரதிதாசன்

பாரதியின் பாதையில்........

காவடிச் சிந்து

புதுவைப் பூங்குயில் போன்று..நீ பாடு! - துள்ளி

யாடு - மகிழ்

வோடு - நம்

பொற்றமிழ் காத்திடப் போர்நடை போடு - நற்

புகழேபெறப் பொலிவேவுறப் புவியேயுனைப் பணிந்தேதொழப்

பொங்கும்த மிழ்போற்ற நீ..தினம் கூடு! - தெரு

வெங்கும்த மிழ்பூக்க நல்வழி தேடு!

பொதுமை பொன்னெறி பூத்தபூங் காடு - தமிழ்

நாடு - தேன்

கூடு - அதன்

பொய்யாமொ ழிக்குற ளுக்கிலை ஈடு - உயர்

பொன்னேயெனப் பூவேயெனப் பாவேதரப் பேரேயுறப்

போட்டியி டும்வல்ல பாவலர் பீடு - சிந்து

ஊட்டிவி டும்தமிழ்த் தாயுற்ற வீடு!

பாரதி பாடிய பைந்தமிழ்க் கோட்டை - தமிழ்

நாட்டைக் - கவிக்

காட்டை - நீ

பற்றுடன் ஓதிவ ளர்மனக் கூட்டை - நம்

பண்டைநலம் கொண்டுவரும் பண்புதரும் இன்பமுறும்

பாக்களைக் கற்றுளம் ஓங்கிட வேண்டும் - கொடும்

மாக்களை மாற்றிட நெஞ்சினைத் துாண்டும்!

கூருடை அம்பென நற்கவி பாயும்! - பகை

சாயும் - இருள்

மாயும் - பொய்

கொட்டும்சா திப்பேயின் ஆட்டங்கள் ஓயும் - உயர்

கூத்துக்கலை பூத்துப்படர் பாட்டுக்கலை சேர்த்துக்கமழ்

கோலம்மி கும்வண்ணம் கொண்டதெம் ஊரே! - வரும்

ஞாலம்பு கழ்வண்ணம் செந்தமிழ்த் தேரே!

மின்வலை மின்னிடும் பொன்வலை ஆக்கும் - நமை

ஈர்க்கும் - புகழ்

சேர்க்கும் - வாழ்வில்

வெற்றித ரும்அரும் பாக்களைப் பூக்கும் - அன்னார்

விந்தைமிகு சந்தநடை தந்தகொடை சிந்தையுற

வேண்டியே இன்றைய நற்பதி விட்டேன் - மண்

சீண்டியே சிந்துப்பா நல்விதை நட்டேன்!

இன்கவி வாணர்தம் ஆற்றலைச் சொல்லி - மனம்

துள்ளிச் - சுவை

அள்ளி - உண்டு

இங்குநான் வைத்தனன் நற்கவிப் பள்ளி - உலகில்

என்றுமுள தொன்மைமொழி எங்குமுள அன்பர்பெற

இங்கேஇ வர்தீட்டும் மாட்சியைக் கண்டேன் - குளிர்

நுங்கேஇ வர்என நான்எடுத் துண்டேன்!

-------------------------------------------------------------------------------------------------------

கவிஞர் இரமணி - மதுரை

வலைப்பூ: தீதும் நன்றும் பிறர் தர வாரா...

வல்லமை உள்ளவர் இரமணி - அறியும்

தரணி - படித்தால்

சரண்நீ - இவர்

வார்த்தபா போர்ப்படைப் பரணி - நாளும்

வண்ணத்தமிழ் சந்தச்தமிழ் சிந்துத்தமிழ் இன்பத்தமிழ்

மண்ணிடை ஓங்கிட நெய்தார்! - நம்

கண்ணிடை தேங்கிடச் செய்தார்!

நல்லவை யாவுமே கூறும் - தமிழ்

ஆறும் - உயர்

பேறும் - கொண்டு

நாட்டில்மின் னும்இவர் பேரும் - வாழ்வில்

நன்றும்வர என்றும்வர நன்மைநெறி எங்கும்வர

நாட்டிடும் பாக்களைப் பாரீர்! - மகிழ்

வூட்டிடும் தேனுண்டு வாரீர்!

http://yaathoramani.blogspot.fr/2015/08/blog-post_5.html

-------------------------------------------------------------------------------------------------------

புலவர் சா. இராமாநுசம்

வலைப்பூ: புலவர் கவிதைகள்

சிந்துப்பா பாடிடும் புலவர் - கவி

நிலவர் - தமிழ்

உழவர் - இவர்

சீரினைப் போற்றுவார் தமிழர் - வாழ்வின்

செம்மைதரும்! நன்மைதரும்! சிந்தையுறும் உண்மைதரும்

செந்தமிழ் நல்கிடும் நல்லார் - உயர்

சிந்தனை நல்கிடும் வல்லார்!

முந்தைப்பா பற்பல நெய்வார் - புகழ்

கொய்வார் - நலம்

செய்வார் - தினம்

முத்தமிழ் பாடியே உய்வார்! - நம்

முன்னைப்புகழ் தம்மைத்தொழ அன்னைத்தமிழ் அன்பைத்தர

முத்தாய் இவர்கவி கண்டேன் - மலர்க்

கொத்தாய் நறும்மது உண்டேன்!

http://www.pulavarkural.info/2015/08/blog-post.html

-------------------------------------------------------------------------------------------------------

கவிஞர் சிவகுமாரன் - ஆலங்குடி

வலைப்பூ: சிவகுமாரன் கவிதைகள்

வெண்பா படைக்கின்ற வீரன் - எழில்

மாரன் - கவி

சூரன் - தமிழ்

வேல்படை சேர்காவல் காரன்! - காதல்

மின்னும்விழி பின்னும்மொழி உண்ணும்மனம் பண்ணில்விழும்

மின்வலை கொண்டுள ஆக்கம் - நம்

துன்னிலை யாவையும் போக்கும்!

பண்பை விளைக்கின்ற நெஞ்சம் - தமிழ்

தஞ்சம் - புகழ்

விஞ்சும் - பாடும்

பாட்டில் அணிச்சுவை விஞ்சும் - என்றும்

பணிவேதரும் மனமேயொளிர் இனமேவளர் செயலேதரும்

பாங்குடன் தீட்டிய வலை..பார்! - அது

பூங்குயில் மீட்டிய மலை..பார்!

http://sivakumarankavithaikal.blogspot.com/2014/12/42.html

-------------------------------------------------------------------------------------------------------

திருமிகு அப்பாதுரை

வலைப்பூ: நசிகேச வெண்பா

ஒண்பாவில் ஓர்நுாலைப் படைத்துச் - சீர்

புடைத்துப் - புகழ்

தொடுத்து - நாளும்

வெண்பாவின் யாப்புத்தேன் குடித்துத் - தந்து

ஓங்கும்கவி தாங்கும்தமிழ் தேங்கும்சுவை நீங்கும்துயர்

ஒப்பில்அப் பாதுரை வாழ்க - கலை

செப்பும்அப் பாமரை சூழ்க!

தண்பாவின் நுட்பங்கள் கண்டு - பசி

கொண்டு - தமிழ்

உண்டு - இவர்

தந்திட்டார் நற்றமிழ்த் தொண்டு - நன்றே

தழைத்தேவளர் நிலத்தேநிகர் வளத்தேதரும் மனத்தேஇவர்

சாற்றிய மின்வலை செல்வீர் - மது

ஊற்றிய இன்சுவை கொள்வீர்!

http://nasivenba.blogspot.fr/2012/04/blog-post_05.html

-------------------------------------------------------------------------------------------------------

இனியா - கனடா

வலைப்பூ: காவியக்கவியின் கவிச்சாரல்

காவிய மங்கை..நம் இனியா - பழக்

கனியா - மின்

அணியா - தினம்

கட்டும்பா ஓங்கிடும் தனியா - வளர்

காட்டின்மணம் பாட்டில்தரும் நாட்டின்நலம் ஏட்டில்வரும்

கற்பனைக் கில்லையோர் அணையே! - கவி

ஒப்பனைக் கில்லையோர் இணையே!

ஓவியப் பாவை..நம் தோழி - நலம்

வாழி - கவி

யாழி - நீந்த

ஊக்கம் தரும்நற்சீ காழி - தன்

உயிரேதமிழ் உடலேகவி உணவேகலை உணர்வேவலை

ஒன்றியே வாழ்க்கைத்தேர் செல்லும் - செய்ந்

நன்றியே நெஞ்சின்வேர் சொல்லும்!

http://www.kaviyakavi.blogspot.fr/2015/06/blog-post_24.html

-------------------------------------------------------------------------------------------------------

51 comments:

அம்பாளடியாள் Thu Aug 06, 04:56:00 AM
வணக்கம் ஐயா !

எண்ணத்தில் தேன்சிந்தும் இன்கவிதைச் சோலைகளின்
வண்ணத்தைக் காட்டினீர் வாழ்த்துகின்றேன் !-கண்முன்
வலம்வந்த என்குருவின் வல்லமையும் கண்டேன் !
உலகத்தில் ஒங்கப் புகழ் !

சொல்வதற்கு வார்த்தைகளே இல்லை ஐயா தங்களின் புலமையைக்
கண்ட பின்னர் நான் ஒன்றைச் சொல்லிக் கொள்ள விரும்புகின்றேன்
நான் இன்னும் கற்றுக்கொள்ள ஏராளம் இருக்கின்றது! மிக்க மகிழ்ச்சி
ஐயா தங்களின் மாணவி என்ற அந்த ஒரு பெருமையே போதும் எனக்கு !
சிறப்பான அறிமுகங்கள் இவர்களை வாழ்த்தும் அளவிற்கு எனக்கு வயது
போதாது ஆதலால் அனைவரையும் பாராட்டி வணங்குகின்றேன் .
ReplyDelete
Replies
http://bharathidasanfrance.blogspot.com/Thu Aug 06, 06:33:00 AM
This comment has been removed by the author.
ReplyDelete
Replies
Yaathoramani.blogspot.comThu Aug 06, 06:59:00 AM
பெரும் பாக்கியம் செய்துள்ளேன்
தங்கள் வாழ்த்தே எனக்குப்
கிடைத்தற்கரிய பெரும் பேறு
கரம் கூப்பி
சிரம் தாழ்த்தி வணங்குகிறேன்
வாழும் பாரதியே
நீ வாழிய வாழியவே
ReplyDelete
Replies
Dr B Jambulingam, Assistant Registrar (Retd), Tamil UniversityThu Aug 06, 07:17:00 AM
கவிதை நடையில் உங்களது எழுத்தில் பதிவுகளைப் படிக்கும்போது சற்றே வித்தியாசமாகவும், நிறைவாகவும் உள்ளது. பதிவர்கள் அறிமுகத்திற்கு நன்றி. நாளை சந்திப்போம்.
ReplyDelete
Replies
ஊமைக்கனவுகள்Thu Aug 06, 07:34:00 AM
ஐயா வணக்கம்.

வண்ணத்தி னைக்கொஞ்ச மள்ளியே – கவி
வார்க்குமுங் கைத்திற னுள்ளியே – தினம்
வேண்டுத மிழ்மகள் பள்ளியே – சொலின்
வனமேயுனில் தினமேமனம் வருமேமது பெறுமேயது
வாக்கில டக்கிடத் துள்ளுமே – மட
வானுனுக் கேனென எள்ளுமே!

தங்களின் சிந்துக்கள் அருமை.

நான் பெரிதும் மதிக்கின்றவர்களின் இன்றைய அறிமும்,

தங்களுக்கு நன்றி.
ReplyDelete
Replies
வே.நடனசபாபதிThu Aug 06, 07:47:00 AM
ஐயா! நாள் தோறும் எங்களை கவிதை மழையில் நனைய வைத்து திக்குமுக்காட செய்கிறீர்கள். இந்த வார வலைச்சரம் எங்களுக்கு ஒரு புதுமை அனுபவமே. அதற்கு நன்றிகள் பல. இன்றைய அறிமுக கவிஞர்களுக்கு வாழ்த்துக்கள்!
ReplyDelete
Replies
சசிகலாThu Aug 06, 10:13:00 AM
வணக்கம் ஐயா!
இன்று எழுத வழியில்லாமல் செய்து விட்டீர்கள். காரணம் சிந்துப்பாடல்களை இன்னும் எனக்கு கற்பிக்கவில்லை ஆதலால்..
இன்றைய அறிமுகப் பதிவர்கள் நான் வணங்க வேண்டியவர்கள்.
தங்களின் கவிதை மிகவும் ஈர்த்தது இன்றும் நன்றிங்க ஐயா.
ReplyDelete
Replies
balaamagiThu Aug 06, 10:31:00 AM
அய்யா வணக்கம்,
தங்கள் சிந்துப்பா விற்கு எம் வணக்கம்,
இன்றைய அறிமுக தளங்கள் நான் விரும்பி வாசிப்பவை, அன்பின் இனியாவின் இனிய கவிதைகள் பல சுவைத்ததுண்டு,,,,
அனைவருக்கும் வாழ்த்துக்கள்,
தங்களுக்கு நன்றிகள்,
ReplyDelete
Replies
கவிஞர்.த.ரூபன்Thu Aug 06, 12:21:00 PM
வணக்கம்
ஐயா
இன்றைய அறிமுகத்தில் உள்ள பதிவர்களின் பதிவுகள் எனக்கு ஒரு வழிகாட்டி.. அவர்களைப்பற்றிய அறிமுகம் கண்டு மகிழ்ந்தேன் பகிர்வுக்கு நன்றி ஐயா.

-நன்றி-
-அன்புடன்-
-ரூபன்-
ReplyDelete
Replies
yathavan64@gmail.comThu Aug 06, 01:07:00 PM
பாரதியின் பாதையில்...

மதுரை மாடத்து மணி விளக்கு
மங்காத கவிகூடத்து ஒளியாய் வாழ்க!
கற்றணை சிறக்க கவிபாடும்
ரெட்டணைப் புலவர் வாழியவே!
கண்ணில் மின்னும் காவியக் கவி
மண்ணில் மான்புற வாழியவே!
அறிமுக அறிஞர்கள் அனைவருக்கும் அன்பு நல்வாழ்த்துகள்.
நன்றி!*
நட்புடன்,
புதுவை வேலு
ReplyDelete
Replies
இளமதிThu Aug 06, 04:34:00 PM
வணக்கம் ஐயா!

காவடி சிந்தொன்று பாடி - மலர்
　　　　　　　　　　　　　சூடிச் - சுவை
　　　　　　　　　　　　　கோடி - வலை
காட்டிலே நற்கவி தேடி - தந்த
கவிஞர்அவர் கலைஞர்அவர் வலைஞர்அவர் மகிழ்வேதரும்
நற்பணிக் கேஎல்லை இல்லை - உன்
சொற்சுவைக் கேஈடும் இல்லை!

பாவடி யைப்பாடிக் காட்டும் - உணர்
　　　　　　　　　　　　　வூட்டும் - உரம்
　　　　　　　　　　　　　கூட்டும் - நல்ல
பாவலர் சேர்ந்திட மீட்டும் - நற்
சுவையேதரும் இனிதாமிதும் இதைபோலொரு நிகழ்வேஇலை!
பார்கொள்ளு மேமிக்க பெருமை! - உடன்
சேர்ந்திடு மேஉன்றன் அருமை!

அற்புதமான காவடிச் சிந்து இன்று!
நீங்கள் பதிவர்களை அறிமுகப்படுத்தும் அழகே அழகு!..
தினமும் எப்படியான கவிதை இன்று வரப்போகிறது
என்று ஏங்க வைக்கிறீர்கள் வலைச்சரத்தில்!
மிக மிக அருமை! நன்றியுடன் வாழ்த்துக்கள் ஐயா!

நானும் கற்கவில்லையாயினும்
நீங்கள் எழுதியதைப் பார்த்து முயன்றுள்ளேன்!
திருத்தம் தந்துதவுங்கள்! நன்றி!

தேர்ந்(து)இட்ட ஐம்பதிவர் தேனேதான் உம்படைப்பும்
சேர்த்திட்டேன் இங்கென்வாழ்த் தே!

இன்றைய அறிமுகப் பதிவர்கள் அனைவருக்கும்
இனிய நல் வாழ்த்துக்கள்!
ReplyDelete
Replies
தனிமரம்Thu Aug 06, 04:44:00 PM
அருமையான அறிமுகங்கள்
அன்பின் பாரதியின் பாதைகள்
அறிந்த உறவுகள்
அனைவருக்கும் வாழ்த்துக்கள்.
ReplyDelete
Replies
துரை செல்வராஜூThu Aug 06, 05:22:00 PM
தேன் மழையில் தித்திக்கும் பலா என - சிறப்பான அறிமுகங்கள்!..
இன்றைய தளங்கள் அனைத்திற்கும் - தங்களுக்கும் நல்வாழ்த்துகள்!..
ReplyDelete
Replies
KILLERGEE DevakottaiThu Aug 06, 06:14:00 PM
கவிதை வடிவிலேயே புதுமையான வலைச்சரப்பூ கண்டு வருகிறோம் அருமை இன்றைய அறிமுகங்களுக்கு வாழ்த்துகள்.
ReplyDelete
Replies
UnknownThu Aug 06, 06:34:00 PM
புதுவை பூங்குயிலே- ஓயாத
பொங்கு தமிழியலே
முதுமை வயப்பட்டேன்-பலநாள்
முடியாத துயர்பட்டேன்

வெண்பா வேந்தேநான்-பதில்
விரைவாக அளிக்கத்தான்
பண்பார்தாச பாரதியே-என்றும்
பணிவன்பாம் நேசருக்கே

ReplyDelete
Replies
IniyaThu Aug 06, 06:49:00 PM
This comment has been removed by the author.
ReplyDelete
Replies
அ. முஹம்மது நிஜாமுத்தீன்Thu Aug 06, 09:17:00 PM
சீரிய காவடி சிந்தில்
சிறப்பான பதிவர் அறிமுகம்,
கண்டு, மனம் உவந்தேன் நன்று!
ReplyDelete
Replies
Thulasidharan V ThillaiakathuFri Aug 07, 01:08:00 PM
கவிமழை தொடர்கின்றது....நாங்களும் நனைந்து களிக்கின்றோம்...அருமை அருமை...

அனைத்துக் கவிஞர்களுக்கும் வாழ்த்துகள்!
ReplyDelete
Replies
சசிகலாSat Aug 08, 05:05:00 PM
வாழ்த்துப்பா மாலையைக் கண்டு-பூச்
செண்டு-தனைக்
கொண்டு-நானும்
வந்தேன் மகிழ்வினை உண்டு - சோலை
மலர்சூடும் மணமோடும் மதுவோடும் தமிழுாளும்
மாமன்னன் என்றுன்னைப் பாடும் - மனம்
பாமன்னன் என்றுன்னை ஆடும்!

தஞ்சம் இனித்தமிழ் என்று -மனம்
சென்று-புவி
வென்று - கவிச்
சங்கம் அமைத்ததும் நன்று - நாளும்
தமிழ்பாடி நலம்சூடி விளையாடி வருங்கோடி
எண்ணங்கள் தந்திடும் செம்மை - உன்
வண்ணங்கள் காத்திடும் எம்மை!

நன்றிங்க ஐயா.
ReplyDelete
Replies
அப்பாதுரைSat Aug 08, 10:34:00 PM
பூவோடிணைந்த நாராக என்னையும் மணக்க வைத்தமைக்கு மனமார்ந்த நன்றி!
ReplyDelete
Replies
சீராளன் Mon Aug 10, 02:06:00 PM
வணக்கம் கவிஞர் அண்ணா !

தாயுள்ளே தந்திட்டால் தாகம் - தமிழ்த்
தாரகை சூடுமே தேகம் - உயிர்க்
கூட்டுக்குள் பூச்சர யாகம் - என்
இளம்பாபிலும் சுரம்கூடுமே இனியாவையும் இதமாக்குமே
என்னென்று சொல்லித்தான் பார்ப்பேன் உயிர்
மண்ணுக்குள் சேர்ந்தாலும் காப்பேன்

அழகிய சிந்துப் பாடல்கள் அத்தனையும் அருமை அறிமுகப் பதிவர்களுக்கும் இனிய வாழ்த்துக்கள் வாழ்க வளமுடன்
ReplyDelete
Replies