வரலாறே.. தன் வரலாறு கூறுகிறதே.. ஆச்சிரியக்குறி!

அனைவருக்கும் வணக்கம்., மதிப்பிற்குரிய சீனா ஐயா அவர்கள் நேற்றைய வலைச்சர இடுகையில் என்னை இந்த வார வலைச்சர ஆசிரியராய் அறிமுகப்படுத்தியதும்... இந்த மகிழ்ச்சிகரமான தருணத்தை... உலகமெங்கும் பரவியிருக்கும் என் கோடானுகோடி ரசிகர்கள்... மிக விமர்சியாக கொண்டாட ஆரம்பித்து விட்டனர்... பல நாடுகளில்... சாலைகள் விழாக்கோலம் பூண்டன.... நான் வாழும் தேசமான பஹ்ரைன்... ஸ்தம்பித்தது... பலர் என்னை தொலைபேசி வாயிலாக தொடர்பு கொண்டு தங்களது மகிழ்ச்சியை பகிர்ந்த வண்ணம் இருந்தனர்.... நேற்று மட்டும் எனக்கு வந்த வாழ்த்து தொலைபேசி அழைப்புக்கு பதிலளித்து.. பதிலளித்தே.. என் வாய் ஒரு ஓரமாய் ஓரங்கட்டிவிட்டது என்றால் பார்த்துக்கொள்ளுங்களேன்... (இங்கே பவர் ஸ்டார் உங்கள் ஞாபகத்திற்க்கு வந்தால் அதற்க்கு நிர்வாகம் பொறுப்பல்ல).!

ஒரு வழியாய் எல்லாவற்றையும் சரி கட்டி... முதல் பதிவை எழுதலாம் என்று உட்கார்ந்தால்.... முதல் பதிவு நம்மை பற்றிய அறிமுக பதிவாக இருக்க வேண்டுமாமே.... நான் தான் பிரபலபதிவர் (ஹி ஹி ஹி இதுக்கு என்னா அர்த்தம்னு டிக்ஸ்னரியில தேட வேண்டாம்) ஆயிற்றே! நமக்கு எதுக்கு அறிமுகம் என்று நினைத்து கொண்டிருக்கையில் தீடீரென்று என் சிந்தனையில் ஒரு அபிரிமிதமான சிந்தனை தோன்றியது.! அதாகப்பட்டது... பிரபலமடையாமல் இருக்கும் எனது சில இடுகைகளையும் இங்கு அறிமுகப்படுத்தி பிரபலப்படுத்தி விடலாம் என்ற குரூர சிந்தனை தான் அது....

எனக்கு எப்போது நேரம் போகவில்லை என்றாலும் உடனே விக்கிபீடியாவின் ஆங்கில கட்டுரைகளுக்குள் புகுந்து விடுவதுண்டு.... அட ஆங்கிலத்தில் இவன் பெரிய அப்பர்டக்கராக இருப்பான் போலிருக்கிறதே என்று... என்னை பற்றி யாரும் உயர்வாக நினைத்துக்கொள்ள வேண்டாம்... ஏ.பி.சி.டி – யை... எப்படி ஒழுங்காய் எழுதுவது... என்று கற்றுக்கொள்த்தான்... அவ்வப்போது அங்கே.. ஒரு விசிட்டை போடுவதுண்டு.. பஹ்ரைனுக்கு வந்த புதிதில் நேரப்போக்கிற்க்காக... ஒரு நாள் விக்கியின் ஆங்கில கட்டுரைகளை எழுத்துக்கூட்டி படித்துக்கொண்டிருந்த போதுதான் தற்செயலாக அஸிஷீல் ஹீக் (Azizul Haque) பற்றி படிக்க நேர்ந்தது. யார்.. இவர் என்கிறீர்களா.... இன்று தடயவியல் துறை (Forensic Department) இத்தனை அபிரிமிதமான வளர்ச்சியை எட்டியிருக்கிறது என்றால் அதற்க்கு இவர் தான் முக்கிய காரணம்.!

ஒரு இடத்தில்... குற்றம் நிகழ்ந்தால்... குற்றவாளிகளுக்கு எதிரான ஆதாரங்களை சேகரிப்பதற்காக.. முதலில் அந்த இடத்திற்குள் நுழைந்து ஆய்வு செய்வது... தடயவியல் துறை நிபுணர்களாகத்தான் இருக்கும்... அதிமுக்கியத்துவம் கொண்ட அந்த தடயவியல் துறையில்... கைரேகை நிபுணர்களின் (Fingerprint Experts) பங்கு அலாதியானது... இன்றளவும்.. குற்றம் நிகழ்ந்த இடத்தில்... கைப்பற்றப்படும்.. குற்றவாளிகளின் கைரேகை தான்... குற்றவாளிக்கு எதிரான வலுவான ஆதாரமாக கருதப்படுகிறது என்பது குறிப்பிடத்தக்கது... ஒரு மனிதனின் கைரேகையை இன்னொரு மனிதனின் கைரேகையுடன் ஒப்பிடும்... அந்த ஒப்பீட்டு முறையை உருவாக்கியவர்கள் இந்தியர்கள் என்பது நம்மில் எத்தனை பேருக்கு தெரியும் நண்பர்களே... அந்த கைரேகை ஒப்பீட்டு முறையை உருவாக்கியவர் தான்... நான் மேற்சொன்ன அஸிஷீல் ஹீக்! இதைத்தான் எனது மறைக்கப்பட்ட மாமேதைகள் என்ற இடுகையில் குறிப்பிட்டு இருப்பேன்.! எழுத வந்த புதிதில் எழுதப்பட்ட இடுகை அது... தொடர்ச்சியற்று ஒரு மாதிரியாகத்தான் இருக்கும் (ம்ம்க்கும்... இப்போ மட்டும் என்ன வாழுதாம்.. இப்பையும் அப்பிடித்தாண்டா எழுதுறே...) இருப்பினும் நீங்கள தவறாமல் வாசிக்க வேண்டிய இடுகைகளில் ஒன்றாகும்.. இன்றளவும் அந்த இடுகை அதிக அளவில் வாசிக்கபடவில்லை என்பதில்... எனக்கு எப்போதும் ஒரு வருத்தம் இருந்ததுண்டு...

நான் ரசித்து.. ரசித்து எழுதிய முதல் இடுகை சைக்கிள் உருவான வரலாறு, எழுதி முடித்து பார்த்த போது.. பதிவு இருபது பக்கங்களையும் (MS Word-ல்)  தாண்டியிருந்தது.. அப்போது பாகம் ஒன்று... பாகம் இரண்டு... என்று பதிவை... பிரித்து... பதிவிடலாம் என்ற சிந்தனை தோன்றாததால்... இயன்ற அளவு பதிவை சுருக்கி பிரசுரித்தேன்... இதன் காரணமாக பதிவு... தொடர்ச்சியற்று ஆங்காங்கே... துண்டு துண்டாய் தொங்கியது... இருந்தாலும் இதுவும் நீங்கள் தவறவிடாமல் வாசிக்க வேண்டிய இடுகைகளில் ஒன்றுதான்.!

இந்த உலகில் எனக்கு அறவே பிடிக்காத விஷயங்களுள் ஒன்று உணவுப்பொருட்களை வீணடிப்பது... அதை பற்றிய எனது கருத்தை உணவுப் பொருட்களை வீணாக்காதீர் என்ற இடுகையில் தெரிவித்திருப்பேன்.. வெற்றியை தேடி தோல்வியில் துவண்டு வாடி நிற்கும் நெஞ்சங்களுக்காக எழுதிய தோல்வியால் துவண்டு போயிருக்கிறீர்களா என்ற இடுகையும் நீங்க வாசிக்க வேண்டிய இடுகைகளில் ஒன்றுதான்.!

பொதுவாக ஒரு குரலை கேட்டதும்... அந்த குரலுக்கு சொந்தக்காரர் ஆணா.. அல்லது பெண்ணா... என்று நம்மால் கூறி விட முடிகிறது தானே.... காரணம் இரண்டு குரலுக்கும் இருக்கும் வித்தியாசம் தான்... இதற்க்குரிய காரணத்தை பற்றி அலசும் பதிவுதான் ஆண் குரலுக்கும் பெண் குரலுக்கும் வித்தியாசம் இருப்பது ஏன்? ..... இதே பதிவில் மனிதர்கள் எப்படி பேசுகிறார்கள்.... விலங்குகளால் ஏன் மனிதனை போல் பேச முடிவதில்லை என்ற காரணத்தை பற்றியும் அலச முயன்றிருப்பேன்..!

இதுவரை எழுதிய இடுகைகளில்… எழுத வந்ததிற்க்கான... மனநிறைவை ஏற்படுத்திய இடுகைகளாக.. உங்களுக்கு தெரியுமா அறுவை சிகிச்சையின் தந்தை என்று அழைக்கப்படுபவர் ஒரு இந்தியர் என்று, மற்றும் திப்பு சுல்தான் உலகின் முதல் உலோகத்தாலான ராக்கெட்டை வடிவமைத்த விஞ்ஞானி, ஆகிய இடுகைகளை குறிப்பிடலாம்.. இந்த இரண்டு இடுகைகளுமே... சகபதிவர்களால் வெகுவாக அங்கீகரிக்கப்பட்டது.. என்னுள் ஒரு புது உத்வேகத்தை ஏற்படுத்தியது என்றால் மிகையில்லை.!

எனது முப்பத்தி ஒன்று (சத்தியமா... அம்புட்டுதான் எழுதியிருக்கேன்.!) இடுகைகளையும் இங்கே அறிமுகப்படுத்திட... எனக்கு ஆசைதான்... ஒருவேளை... நான் அப்படிச்செய்தால்... நீங்கள்.. பின்னூட்டத்தில் என்னை துவம்சம் செய்யும் வாய்ப்பிருப்பதால்... எனக்கான இந்த அறிமுகத்தில் வெறும் ஏழே ஏழு.. இடுகைகளுடன்... ஒருவித ஏமாற்றத்தோடு நிறைவு செய்கிறேன்.! (ஹி ஹி ஹி... இதுவே அதிகம் தான்னு நீங்க முணுமுணுப்பது எனக்கு கேக்குது.!)

ஒரு ஜாம்பவானுக்கு பிறகு... இங்கே நான் பொறுப்பேற்ப்பதால்... இப்போது என் நெஞ்சில் ஒருவித பதட்டம் குடிகொண்டுள்ளது... உங்கள் பின்னூட்டங்கள் அந்த பதட்டத்தை தணிக்க உதவலாம்... எல்லாம் வல்ல அந்த விநாயக பெருமானின் ஆசியிருந்தால் நாளை முதல்... தினமும் ஒரு புது தகவலுடன்.... வலையுலகில் நான் ரசித்து வாசிக்கும்.. சில பதிவர்களின் பதிவுகளோடு... மீண்டும் வருவேன்... நன்றி.. வணக்கம்.!