இது... இமாவின் உலகம்

வலைச்சர வாசகர்களுக்கு இமாவின் அன்பான வணக்கங்கள். _()_

என் உலகம்... அழகான குட்டி உலகம்.  குடும்பம், வீடு, பாடசாலை, நட்பு, பொழுது போக்குகள், அறுசுவை இணையத்தளம், 'இது இமாவின் உலகம்'.... இன்று இங்கு வந்திருகிறேன். சந்தர்ப்பம் கொடுத்த வலைச்சரத்தினர்க்கு என் நன்றிகள்.

சுருண்டது போல் வெளியே வரும் பன்னக்குருத்து ஒவ்வொரு இலையாய் விரிந்து முழுவதாய் இலை அமைப்புப் பெறுமுன் அடுத்த குருத்து தலை காட்டுவது போல்தான் என் ரசனைகளும், நிலை இல்லாதவை. தினம் ஒரு ரசனை.

முயற்சித்துப் பார்க்க வேண்டும் என்னும் ஆவல்தான் இமாவின் உலகிற்கு அடிக்கல். எழுத ஆரம்பித்துவிட்டு... வலைப்பூ அமைப்பை, குழந்தையொன்று 'லெகோ செட்' வைத்து விளையாடுவது போல பிரித்துப் பிரித்து அடுக்கினேன். ஒரு நாள் பாதி வேலையோடு ஏதோவொரு தடங்கல். அப்படியே விட்டுவிட்டேன். பிறகு இதற்கென நேரம் ஒதுக்க இயலவேயில்லை. நாயும் கல்லும் போல நான் தட்டிச் சேமித்துள்ள என் இடுகைகளும் எங்கோ சேமிப்பிலுள்ள நானெடுத்த புகைபடங்களும். ஒன்றைக் கண்டால் மற்றது கண்ணில் படாது. :-) அப்படியே இடுகைகளும் குறைந்து போயிற்று. எப்பொதாவது மீண்டும் புதுப்பிக்க வேண்டும்.

இமாவின் உலகில் எனக்கு அதிகம் பிடித்தவை... என் ஆரம்பகால இடுகைகள். ரசித்துப் பதிவிட்டவை அவை. பெரிதாக ஏதாவது விடயம் இருக்கும் என்று நினைத்து வந்தால் ஏமாறுவீர்கள்.

உங்களுக்கும் தெரிந்திருக்கும்... உயிர்ச்சத்து சீ உடம்புக்கு நல்லது என்று. அது பழங்களில் கிடைக்கும். பழங்களை வாயால் மட்டும் சாப்பிடாமல் கண்ணாலும் சாப்பிடவேண்டும். விருந்தினர் வந்தால்தால் மேசை அலங்காரமா! உங்களுக்காகவும் ஒருமுறை அலங்கரிக்கலாம். :-) அலங்கரித்துத்தான் பாருங்களேன்.

ஒருவேளை... திராட்சைப் பழம் கிடைக்காவிட்டால்!!
கிடைக்காத பழம் புளிக்காதா!
இந்தப் படமும் புளித்தது எனக்கு, பப்பியும் திராட்சைக் குலையும் வரும் முன்னால்.  எழுத்து... சிதம்பரசக்கரத்தைப் பார்த்தது போல இருக்கிறதா!! சுஜாதா அவர்களின் 'என் இனிய இயந்திரா' படித்தவர்களுக்கு இந்த மொழி புரியும்.
இமா இப்படித்தான். யாருக்கும் புரியாத விதமாக எழுதி குழப்பி வைப்பேன். :-)

வேறு என்ன சொல்லலாம்!!!
ம்!!! நான் தினம் தினம் ரசிக்கும் வலி ஒன்று இருக்கிறது வீட்டில். இங்கே... என் வலி, அது தனி... வலி.

போதும் உலகம் சுற்றியது. படிப்பவர்கள் மேல் என் ரசனையை!! திணிக்க விரும்பவில்லை. நீங்களே நேரம் கிடைக்கும் பொழுது பிடித்ததைப் படித்துக்கொள்ளுங்கள். முடிந்தால் இங்குள்ளதை மட்டும் கண்டுபிடியுங்கள் பார்க்கலாம்.

இப்போது... என் பேனாவுக்கு மை தீர்ந்து விட்டது. :-) கிளம்புகிறேன் என் தாயாரைப் பார்க்க. நீங்களும் விரும்பினால் வரலாம்.

மீண்டும் நாளைய இடுகையில் சந்திப்போம்.
இன்றைய நாள் அனைவர்க்கும் இனியதாக அமையட்டும்.

_()_