செண்பகப்பூ – சுற்றுலாச் சரம்

மேலே இருக்கும் காணொளியில் நம்ம டவுசர் பாண்டி அண்ணன் “ஊரு விட்டு ஊரு வந்து” படத்தில் ”சொர்க்கமே என்றாலும் அது நம்ம ஊரைப் போல வருமா?” அப்படின்னு பாடுவாரு. அது உண்மைதான் என்றாலும், பயணம் எல்லா மனிதர்களும் எதிர்பார்க்கும் ஒரு விஷயம்.

வாழ்க்கையில் நிகழும் இனிய அனுபவங்களில் ஒன்று பயணம். பள்ளிக் காலத்தில் சிலருக்கு சுற்றுலா செல்ல வாய்ப்பு அமைந்திருந்தாலும் நிறைய பேரால் பயணம் சென்றிருக்க முடியாது. ஆனால் வாய்ப்பு கிடைத்து சுற்றுலா சென்று திரும்பியபின் நிச்சயம் அதைப் பற்றி கட்டுரை எழுதிவரச் சொல்வார் ஆசிரியர். அந்த நாளிலிருந்தே எனக்கு பயணம் மிகவும் பிடித்தமான விஷயம். ஆனால் பள்ளியில் படித்த போது ஒரு முறை கூட நான் சுற்றுலா சென்றதில்லை. கல்லூரியில் படிக்கும் சமயத்தில் இரண்டு பயணங்கள் சென்றது மிகவும் இனிய அனுபவம். பயணம் சென்று வந்த பின் அதைப் பகிர்ந்து கொள்ளும் பதிவர்கள் நிறைய பேர் என்னையும் சேர்த்து. நான் படித்து ரசித்த சில பகிர்வுகள் உங்களுக்காக!

லிபாக்ஷி-உயிர்த்தெழும் கற்சிலைகள்: ஆந்திரப் பிரதேசத்தின் அனந்தபூர் மாவட்டத்தில் உள்ள கிராமம் லிபாக்ஷி. இங்குள்ள வீரபத்திரர் கோவில் மிக அழகு. ராவணன் சீதையைத் தூக்கிச் செல்கையில் அவரை ஜடாயு எதிர்த்து இந்த இடத்தில்தான் சண்டையிட்டதாகச் சொல்கிறார்கள். இந்தக் கோவில் பற்றி படங்களுடன் எழுதி இருக்கிறார் பயணம் என்ற வலைப்பூ வைத்திருக்கும் திரு பிரகாஷ்.

பாரதீயின் பதிவுச் சுடர்கள் – "ஆங்கிலத்தில் CULTURAL SHOCK (கலாச்சார அதிர்ச்சி) என்றொரு சொல்லாடல் இருக்கிறதே, அது போல இது கலாச்சார வியப்புகள் (CULTURAL SURPRISES).கலாச்சார வியப்புகள் என்பது என் பயணக் கட்டுரைகள் மற்றும் வேறுபட்ட கலாச்சாரத்தவருடனான பழக்கக் கட்டுரைகள். புதிதாக நான் போய் இறங்கும் ஊர்களைப் பற்றியும் இதில் நிறைய வரும்.” என்ற முன்னுரையுடன் லண்டன் மற்றும் சிங்கபுரம் [சிங்கப்பூர்] பற்றி இவர் எழுதிய பதிவுகள் அருமை. லண்டன் பற்றிய பகுதி – 1 இங்கே.

ஜு ஹச்சி கிப்பு…. அட இது என்ன விநோதமான மொழியில் எதோ எழுதி இருக்கேன்னு பார்க்கறீங்களா?  11500 யென் கொடுத்து ஜப்பான் முழுவதும் புல்லட் ட்ரையினில் சுற்றிப் பார்க்க இருக்கும் வசதி பற்றி எழுதி இருக்கிறார் பத்மஹரி.

பயணம் செல்வதே சுகமான அனுபவம். நமக்குப் பிடித்தவர்களும் நம்முடன் வந்தால்? அலாதி இன்பம் அல்லவா அது? வலைப்பூ எழுதும் நண்பர்களில் பலருக்கு சக வலைப்பதிவாளர்கள் நல்ல நண்பர்களாக மாறியிருப்பது விந்தையல்ல. இப்படி சக வலைப்பதிவர்களுடன் கோவையிலிருந்து 70 கிமீ தொலைவில் அழகானதொரு சுற்றுலாத் தலமான பரளிக்காடு சென்று வந்தது பற்றி எழுதியிருக்கிறார் சஞ்சய் காந்தி.

நீங்கள் எதையாவது வாங்க வேண்டுமெனில் மார்க்கெட் செல்வீர்கள். ஆனால் அந்த மார்க்கெட்டே உங்களுடன் பயணம் செய்கிறதை பார்த்த அனுபவம் உண்டா உங்களுக்கு? தாய்லாந்தில் Damnoen Saduak என்ற வாய்க்காலை இருமருங்கும் பெட்டிக்கடைகள் நிறைக்க, நடுவில் ஓடும் நீரோடையில் வியாபாரம் களை கட்டுகிற மிதக்கும் சந்தை பற்றி படிக்க நீங்கள் செல்லவேண்டியது கானா பிரபா அவர்களின் உலாத்தல் வலைப்பூவிற்கு.

நயாக்ரா நீர்வீழ்ச்சி நேரடியாக பார்க்க எல்லோருக்கும் ஆசைதான். அப்படி இந்தியாவினை விட்டு வெளியே போகாத மக்கள் அது பற்றி படித்துத்தானே மனதைத் தேற்றிக்கொள்ள வேண்டும்? நயாக்ரா – டொரோண்டோ சென்று தாம் ரசித்த விஷயங்களையும், பெற்ற அனுபவத்தினையும் அழகாய்ப் பகிர்ந்து இருக்கிறார் கால்கரி சிவா. பார்த்து ரசியுங்க.

குடும்பத்துடன் ஹைதை சென்று பல இடங்களைச் சுற்றிப் பார்த்து வந்த அனுபவத்தினை அழகாய்த் தொகுத்துக் கொடுத்திருக்கிறார் நண்பர் மோகன் குமார். மிகவும் தேவையான விவரங்களுடன் அருமையான ஒரு தொடரின் முதல் பகுதி இங்கே!

பழனி மலை முருகன் தரிசனம் எனக்கு மிகவும் பிடித்த ஒன்று. ஒவ்வொரு முறையும் செல்ல நினைப்பேன் - ஆனால் முடிவதில்லை. அந்தக் குறையைத் தீர்த்தது புதுகைத் தென்றல் அவர்களின் பழனி மலை முருகா!

பயணத் தொடர் பற்றிய தொகுப்பு என்று சொல்லிவிட்டு பயணத் தொடர் எழுதுவதில் நிபுணர் பற்றி சொல்லாமல் விட்டால் எப்படி! யார் அந்த நிபுணர் என்று பதிவுலகமே அறியும்! நம்ம துளசி கோபால் [துளசி டீச்சர்] தான் அந்த நிபுணர். விவரங்கள் சொல்லிப்போவதில் வல்லவர். ஆங்காங்கே அவரது முத்திரைகள் தந்து அசத்துவார். அவர் பதிவுகளில் எதைச் சுட்டுவது எதை விடுவது என்ற குழப்பமே மிஞ்சுகிறது. ராஜஸ்தான் பயணத் தொடரில் இருந்து ஒரு பகுதி இங்கே.

”மிகத் தொன்மையான நகரமான ரோமின் உலகளாவிய பேரழகை ஓரிரு வரிகளில் சொல்லிவிட்டுப் போனால் பதினாறாம் நூற்றாண்டு ரோமாபுரி பேரரசர்களின் ஆவிகள் என்னை மன்னிக்காது” என்று தொடங்கி ரோம் பற்றிய பயணக் கட்டுரை எழுதியிருக்கிறார் திரு சித்ரன். விவரங்களைப் படித்து ரசித்துக் கொண்டே வாருங்கள் – கடைசியில் பயணக் கட்டுரையை இப்படியும் எழுதலாமென நமக்குச் சொல்லி இருக்கிறார்!

நாளை வேறு ஒரு சுவையான தொகுப்புடன் சந்திக்கிறேன்.

மீண்டும் சந்திப்போம்…

நட்புடன்

வெங்கட்

புது தில்லி.

டிஸ்கி-1: படங்கள் உதவி - கூகிள்....
டிஸ்கி-2: இன்று எனது பக்கத்தில் - செண்பகப் பூ.... எழுத்தாளர் யார்?