காந்தள் மலர் – விழிப்புணர்வுச் சரம்

[பட உதவி: www.tamilpookkal.blogspot.com]

”தனித்திரு.... விழித்திரு.... பசித்திரு.... இது விவேகானந்தரின் முழக்கம்.

ஞானிகள், அறிஞர்கள், சித்தர்கள், முன்னோர்கள் அறிவித்த அந்த விழிப்புணர்வுதான் என்ன?”

இப்படி கேட்பது நானில்லை…. ”விழிப்புணர்வு என்பது என்ன ஒரு மந்திரச் சொல்லா?” என்று கேட்பது வேலு. ஜி.

[பட உதவி: கூகிள்]

வலைப்பூக்களில் விழிப்புணர்வு பதிவுகள் எழுதுபவர்களைப் பற்றி இன்று பார்க்கலாம்.

”பொன்வேண்டேன், பொருள் வேண்டேன், மண் வேண்டேன், மனை வேண்டேன், நோயற்ற வாழ்வே நான் வாழ வேண்டும்” என்ற வேண்டுதல் இல்லாத நாளும் ஏது. புது வருடத்தில் சில நண்பர்கள் இணைந்து உருவாக்கிய அமைப்பு ”நேசம்”, முழுக்க முழுக்க புற்றுநோய் குறித்த விழிப்புணர்வும் அதுகுறித்த நிகழ்வுகளுமாக இணையத்தில் உங்களின் ஆதரவுடன் ஆரம்பித்தது பற்றி இங்கே எழுதியிருக்கிறார் விஜி.

”புற்று நோய்க்கு தீர்வு மரணம் தானா? இதனை ஆரம்பத்திலேயே கவனிக்காது விட்டது தன் தவறோ என்ற வேதனை அவரை ஆட்டி படைத்தது. நம்ம ஊரிலாவது, நாற்பது வயதை தாண்டியவர்கள் முழு உடல் பரிசோதனை செய்ய வேண்டியதின் அவசியத்தை வலியுறுத்தும் வகையில், மகனிடம் சொல்லி புற்றுநோய் விழிப்புணர்வைப் பற்றிய துண்டு பிரசுரம் ஒன்றை ஏற்பாடு செய்து, ஊர் முழுவதும் எல்லா ஜமாத்திற்கும் விநியோகிக்க வேண்டும் என்று உறுதி கொண்டார்” என்று தனது “வலி” என்ற முதல் பரிசுபெற்ற சிறுகதை மூலம் விழிப்புணர்வைச் சொல்லியிருக்கிறார் சகோ ஆசியா உமர்.

ஒரு சிறு வலி என்றாலும் மருத்துவரை நாடி ஓடச் சொல்வதல்ல கட்டுரையின் நோக்கம். வலி என்பது ஒரு பாதிப்பின் அடையாளம் என்பதால், அந்தப் பாதிப்பைக் கண்டறிந்து அதை நீக்கி முழு குணமடைய வேண்டுமேயல்லாது, தற்காலிக வலி நிவாரணிகளை அளவில்லாமல் எடுத்துக்கொண்டு, அதனால் வரும் பாதிப்புகளையும் இலவச இணைப்பாக வாங்கி வைத்துக் கொண்டுச் சிரமப் பட வேண்டாமே” என்று சொல்கிறார் ஹுசைனம்மா.

சாலையைக் கடக்கும்போது கூட விழிப்புணர்வு தேவையாக இருக்கிறது. அந்த விழிப்புணர்வினை அழகிய ஆத்திச்சூடியில் சேலம் மாவட்ட சாலை பாதுகாப்பு சங்கம் சொன்னதை தனது பகிர்வில் நமக்குத் தந்திருக்கிறார் முனைவர் இரா குணசீலன்.

”இந்த உலகத்தில் மிகவும் புனிதமான இடம் என்று ஒன்று இருக்கிறதென்றால் அது தாயின் கருவரை என்று தான் சொல்லுவேன்” என்று சொல்லும் பனித்துளி சங்கர், அந்தப் புனிதத் தளத்திலும் இயற்கைக்கு மாறாக பல கலவரங்கள் நடந்து கொண்டு இருக்கிறது என சிசேரியன் பிரவசத்தினால் சீரழியும் பெண்கள் என்ற பதிவினில் பகிர்ந்திருக்கிறார்.

”இயற்கையைக் காப்போம்! எதிர்காலச் சமுதாயத்தை ஏற்றமுறச் செய்வோம்!” என்று சொல்லும் செல்வி ஷங்கர் அவர்களின் டெரர் கும்மி பரிசு பெற்ற கட்டுரையை இங்கே காணுங்கள்.

வலைப்பூ வைத்திருக்கும் நம்மில் பலருக்கு சைபர் கிரைம் என்றால் என்ன என்று தெரியுமா? எந்தெந்த குற்றங்களுக்குப் புகார் கொடுக்கலாம், தமிழகத்தில் எங்கே புகார் கொடுக்க வேண்டும் என்ற விழிப்புணர்வினை நமக்குத் தரும் பகிர்வு தான் பிளாக்கர் நண்பனின் ”சைபர் கிரைம் - ஒரு பார்வை”.

”ஏன் ஹெல்மெட் அணிய வேண்டும்?” சாலை விபத்துகள் அதிகமாக நடப்பது இருசக்கர வாகனத்தால் என்கின்றனர். எனவே ஹெல்மெட் அணிவது நிச்சயம் உயிரிழப்பைத் தடுக்கும் எனச் சொல்கிறார் கௌசல்யா அவரது “நாங்க மாறிட்டோம்…. அப்ப நீங்க?” என்ற பகிர்வில்.

[பட உதவி: கூகிள்]

”புகைத்தல் உடல் நலத்துக்கு கேடு என்று நம் எல்லோருக்கும் தெரியும். அப்படித் தெரிந்தும் புகைப்பிடிப்பவர்களை நாம் என்னவென்று சொல்வது. புகை எமக்குப் பகை என்றாலும் விடுகிறார்களா? புகை பிடிப்பதால் பல நோய்கள் மற்றும் சுவாசக் குழாயில் பிரச்சனைகள் வருகின்றது” என்றெல்லாம் சொல்கிறார் பவி.

நாளை வேறு சில பதிவர்கள் பற்றிய அறிமுகங்களுடன் சந்திப்போம்.

நட்புடன்

வெங்கட்

புது தில்லி.

டிஸ்கி: இன்று எனது வலைப்பூவில் காந்தள்மலர் விரலுக்குச் சொந்தக்காரி!