தாழம்பூ – இயற்கைச் சரம்

இயற்கை அன்னை எத்தனையோ வியப்பான விஷயங்களை நமக்குத் தந்திருக்கிறாள். மரங்கள், செடி-கொடிகள், விலங்குகள், பறவைகள், நீர் நிலைகள் என அள்ளி அள்ளித் தந்திருக்கிறாள். நெய்வேலி நகரில் மா, பலா, புளி, முழு நெல்லிக்காய், அறி நெல்லிக்காய், வேம்பு, கல்யாண முருங்கை, முருங்கை, எலுமிச்சை, வாழை என வித விதமாய் மரங்கள் சூழ வாழ்ந்து மரங்களின் அருமையை உணர்ந்தவன் நான்.  அப்படி இருந்த நெய்வேலியின் ஒரு புகைப்படம் கீழே…

சமீபத்தில் அடித்த ”தானே” புயலில் எப்படியெல்லாம் உருக்குலைந்து போய் விட்டது எனது நெய்வேலி… :(

எத்தனை பேரழிவு! விழுந்த மரங்கள் எத்தனை எத்தனை? அவைகள் எடை போடப்பட்டு ஐம்பதாயிரம் டன் விறகுகள் செங்கல் சூளைகளில் எரிப்பதற்காக ஏலமிடப்பட்டு எடுத்துச் செல்லப்பட்டது எனப் படித்தபோது மனதில் உதிரம்! பக்கத்து ஊரான பண்ருட்டி பலாவுக்கும், முந்திரிக்கும் பேர் போனது. இப்போது அங்கே முந்திரிக் காடுகளே இல்லா நிலை. இனி அவைகளைப் பெற இன்னும் பல வருடங்கள் காத்திருக்க வேண்டும்!

இயற்கையைப் போற்றும் பதிவுகளை தமிழில் எழுதுபவர்கள் மிகக் குறைவுதானோ! அப்படி எழுதுபவர்களும் அவ்வப்போது தான் எழுதுகிறார்கள். அப்படிப் பட்ட சிலரது பதிவுகளைப் பற்றி இன்று பார்க்கலாம்.

ஆங்கிலத்தில் Ornithology என்று சொல்லப்படும் பறவைகளைப் பற்றிய இயல் மிகவும் ரம்யமான ஒன்று. ஒரு பறவையைப் பார்ப்பதற்கென்றே பல நாட்கள் காத்திருப்பது சிலருக்கு பிடித்த விஷயம். செண்பகப் பறவை - செம்போத்து பறவையை இரண்டரை கிலோமீட்டருக்கு மேல் தொடர்ந்து சென்று பார்த்ததையும் Bird Watching பற்றியும் அழகாய் எழுதி இருக்கிறார் இயற்கை நேசி.

”ஒவ்வொரு ஞாயிற்றுக்கிழமையும் 2 மரக்கன்னு நட்டாக்கூட, வருசத்துக்கு நூத்திநாலு மரம் நடலாம். என்னா ஒரு அரைமணி நேரம் செலவாவுமா? ஆனா நாம நடறது இல்ல. நம்ம குழந்தைகளுக்கு மரம் நட்டு விளையாடறது எவ்ளோ சந்தோசம் தெரியுமா? உங்க குழந்தைய கூட்டிப் போயி மரம் நடுங்க. அதுங்க எவ்ளோ குசியா அத பாக்குங்க தெரியுங்களா?” எனச் சொல்லி மரம் நடுவோம் வாருங்கள் என அழைக்கிறது மரம் வளர்ப்போம் வலைப்பூ.

வெட்டி வேர் பற்றி நம்மில் பலர் அறிந்திருப்போம். முதல் மரியாதை படத்தில் வந்த “வெட்டி வேரு வாசம்” பாடலை எத்தனை தரம் முணுமுணுத்திருப்போம். கோடை காலங்களில் வெட்டி வேர் சர்பத்தை எவ்வளவோ முறை குடித்திருப்போம். அந்த வெட்டி வேரை சரிவுகளில் வளர்ப்பதன் மூலம் மழை நீரை  சேகரிக்க முடியும் என்று தனது  வலைப்பூவில் எழுதியிருக்கிறார் நண்பர் வின்செண்ட். இது பற்றிய அவரது காணொளி கீழே.

”நமது வனங்களில் எண்ணிலடங்கா மூலிகைகள் கொட்டிக் கிடக்கின்றன. அது பற்றி தெரிந்தவர்கள் குறைந்து கொண்டே வருகிறார்கள். ஒவ்வொரு மூலிகைக்கும் என்னென்ன பண்புகள், அவற்றின் பயன் என்ன, அவைகள் என்ன நோய்களைக் குணப்படுத்தும் என்பது நமக்குத் தெரிந்தால் எவ்வளவு நன்றாயிருக்கும்” என யோசிப்பவரா நீங்கள்? அற்புத மூலிகளைப் பற்றித் தெரிந்து கொள்ள நீங்கள் செல்ல வேண்டிய தளம் திரு குப்புசாமி அவர்களுடைய மூலிகை வளம்.

“காடுகளையும், மரங்களையும், மலை, மழைத்துளிகளையும் காதலிப்போம். ஓங்கி உயர்ந்த மலைகளுக்கு செல்வோம். மலை அழகை பாதுகாப்போம்” என தனது பக்கத்தில் அறிமுகமாக சொல்லியிருக்கும் “பசுமை இந்தியா” ”மரம் வளர்த்து மனிதம் வளர்ப்போம்” எனச் சொல்லி இருக்கிறார்.

பறவைகள் இயற்கை நமக்குத் தந்த வரம். முட்டையிலிருந்து பெரிய பறவையாகும் வரை பார்க்கக் கிடைத்தால்?.... ஒரு காகம் இப்படி உருவாவதை படம் பிடித்து அதை தினத்தந்தியில் வெளியிட்டதை இங்கே பகிர்ந்திருக்கிறார் நண்பர் செந்தில்.

“மாதா பிதா குரு தெய்வம் என்னும் வரிசையில் இயற்கையும் இருந்திருக்கலாமோ அப்படி இருந்திருந்தால் இயற்கையை பூஜை செய்தாவது காப்பாற்றவேண்டிய + மதிக்கவேண்டிய சிந்தனை மனிதனுக்கு வந்திருக்குமோ?” – எனவும் “சிட்டுக்குருவி சிட்டுக்குருவி சேதி தெரியுமா?” எனவும் சர்வதேச குருவிகள் தினமான மார்ச் இருபதில் கேட்டிருக்கிறார் ஷைலஜா.  

என்ன நண்பர்களே, இயற்கையைப் பற்றிய சில பகிர்வுகளைப் படித்தீர்களா?  நாளை வேறு ஒரு பூச்சரத்துடன் சந்திக்கிறேன். அதுவரை பார்த்து ரசிக்க கீழே ஒரு அருமையான பாடல் காணொளி….

நட்புடன்

வெங்கட்.

புது தில்லி.

இன்று எனது வலைப்பூவில் - தாழம்பூவே வாசம் வீசு!