ஞாழல் பூ – அனுபவச் சரம்

[பட உதவி: கூகிள்]

சிறு வயது அனுபவங்கள் என்றுமே ரசிக்கத் தகுந்த விஷயங்கள் தான்.  எல்லாரிடமும், நண்பர்களுடன் பகிர்ந்து கொள்ள, சுவையான சிறு வயது அனுபவங்கள்/விஷயங்கள் இருக்கும். அப்படிப்பட்ட சில சுவையான அனுபவங்களை இன்றைய வலைச்சரத்தில் ஞாழல் பூவாகத் தொடுத்திருக்கிறேன். அது என்ன ஞாழல் பூ? குங்குமப்பூவிற்கு ஞாழல் பூ என்ற பெயரும் உண்டு. இனி பதிவர்கள்/பதிவுகள் அறிமுகங்களைத் தொடரலாமா...

”மதுரையில் மார்கழி மாத அதிகாலையில் பஜனைக் கோஷ்டியினர் பல தெருக்களிலும் பாடியபடி வந்து எங்கள் தெருவைக் கடந்து அடுத்த தெருவில் இருந்த கோதண்டராமர் கோயிலில் முடிப்பார்கள். பனி பெய்யும் அந்த அதிகாலையில் எழுந்திருப்பதே அந்தச் சிறுவயதில் பெரிய விஷயம். அதிலும் குளித்துவிட்டு பஜனை கோஷ்டியுடன் செல்வது... நடக்கிற காரியமா? ஆனால் பஜனை கோஷ்டியுடன் சேர்ந்து பாடியபடி போனால் கோதண்டராமர் கோயிலில் சர்க்கரைப் பொங்கல் கிடைக்கும். அதை விட்டுவிடவும் மனம் வராது” என்று சர்க்கரைப் பொங்கலாய் இனிக்கும் அனுவத்தினைப் பகிர்ந்தவர் மின்னல் வரிகள் கணேஷ்.

”ஊருக்கு அழைத்துச் செல்லும் போது, பஸ் ஸ்டேண்டில் பத்துப் பைசாவுக்கு பட்டாணி பொட்டலமும், அன்னாசிப் பழ கீற்றும், மாம்பழமும், பன்னும் வாங்கி பையில் வைத்துக்கொள்ளும். கடைக்காரர்களிடம் பேரம் நடத்தும் திறமையை இன்று நினைத்தாலும் பொறாமையாக இருக்கிறது” என்று தனது ஆயா [பாட்டி] பற்றிய நினைவுகளை அழகாய்த் தந்திருக்கிறார் ஈரோடு கதிர்.

குழந்தைப் பருவத்தில் அத்தை, சித்தப்பா, பெரியப்பா, குழந்தைகள் என்று பெரிய கூட்டுக் குடும்பமாக வாழ்ந்து திருமணத்திற்குப் பின் கண்ட மாற்றத்தினை மலரும் நினைவுகள் என்ற தொடராக எழுதி இருக்கிறார் லக்ஷ்மி அம்மா. பதிவின் முதல் பகுதி இங்கே கொடுத்திருக்கிறேன் ஒரு சுட்டியாக. அதை அப்படியே பிடித்துக் கொண்டு அடுத்த பகுதிகளையும் படித்து ரசியுங்கள்.

"யே! இப்ப படந் தெரியுதா?”
“இல்ல”
"இப்ப”
“உஹும்.கொஞ்சம் கிழக்கால சர்ச் பக்கம் திருப்பு”
“இப்ப”
“லேசா வருது. இன்னும் ஒரு ஜான் அந்தப் பக்கமே திருப்பு”
“என்னடா ஜான்... முழம்.. இப்ப”
“ஒரு நாலு விரக்கடை திருப்பு”
“ஆ...ஆங்.. நிப்பாட்டு.. போதும்...போதும்”

மேலே உள்ள உரையாடலை யார் எப்போது எங்கே பேசினார்கள் என்று கேட்கிறீர்களா?  எண்பதுகளில் டீ.வி பார்க்க வேண்டுமென்றால் என்னென்ன செய்ய வேண்டும் என்பதை தனது மன்னார்குடி டேஸ் தொடரின் ஒரு பகுதியாக ”மன்னார்குடி டேஸ் – தொலைக்காட்சிகள்” என்ற பகுதியில் எழுதி இருக்கிறார் மன்னை மைனர் ஆர்.வி.எஸ்.

”பதினொரு வருடத்துக்கு முந்தைய நினைவுகளை உங்களுடன் பகிர்ந்து கொள்வதில் மகிழ்ச்சி அடைகின்றேன். அந்த நினைவுகளை இந்த ஒரு பதிவின் மூலம் மட்டும் விவரிக்கமுடியாது. அதற்கு பல பதிவுகள் தேவைப்படும். அதனால் தான் இந்த வலை பதிவில் அதற்கென தனி வகை தொடங்கி உள்ளேன்” என்று சொல்லும் தி.ஜா. சோமசுந்தரம் சில காலமாக மங்களூரில் தங்கி இருக்கும் திருச்சிக்காரர்.

“எங்கள் நண்பர் குழாத்தில் கட்லையுடன், நாங்கள் ஜாஸ்தி வைத்துக் கொள்ள மாட்டோம். அவனுக்கு  எங்களை விட பலம் ஜாஸ்தி! பழயது ப்ளஸ் எருமைத் தயிரில் வளர்ந்த உடம்பு. அடித்தால், ’ங்கோய்’ என்று காது இரண்டு நாளுக்கு கேட்கும். யானை எப்படி எரும்பை விட்டு விடுமோ, அப்படி எங்களை மன்னித்து விடுவான், கட்லை” என தனது சிறுவயது நினைவுகளை “ஆங்கரை டேஸ்” பதிவில் எழுதி இருக்கிறார் ஆரண்யநிவாஸ் ஆர். ராமமூர்த்தி”.

”சார் சார் ஒண்ணுக்கு…..

சட்டாம்பிள்ளை ரெண்டுக்கு

நான் போறேன் வீட்டுக்கு

நாளைக்கு வந்தா கேட்டுக்கோ!”

அட, இது என்ன பாட்டு? நல்லா இருக்கே! இந்த பாட்டுடன் ஆரம்பிக்கும் பகிர்வு விசேஷமான பகிர்வு. சிறு வயதில் தான் கல்யாணியைக் கடித்த கதையை எழுதி இருக்கிறார் மோகன்ஜி! சண்டை போட்டு கடிக்கும் பழக்கமும், அதனால் ஏற்பட்ட வலி பல வருடங்களுக்குப் பிறகு மீண்டும் கிடைத்தபோது ஏற்பட்ட அதிர்ச்சி பற்றி படியுங்களேன். இது போலவே இவர் அம்மாவிடம் விசிறிக்கட்டையால் அடி வாங்கி ”வீட்டைத் துறந்தேன்” என்று சொன்னதையும் படியுங்கள்.

”கடைசி அண்ணாவோ அவ பாடினது கேட்டு ட்யூப் லைட் "நீ பாடறது எனக்கே பொறுக்கமுடியலை. அப்பறம் அந்த நிலவு, அதுவும் ஒரு நிலவில்லை ரெண்டு நிலவில்லை ஆயிரம் நிலவும் எப்படி பொறுத்துக்கும்னு சொல்றாப்புல நெஞ்சுபொறுக்குதில்லையேன்னு டமார்னு வெடிச்சிடுத்து"ன்னான்” என்று தான் ட்யூப் லைட் உடைத்த கதையைச் சொல்லி இருக்கிறார் கற்றலும் கேட்டலும் ராஜி.  கூடவே தேளை அவர் கடித்த…. இல்லை இல்லை தேள் அவரைக் கொட்டியது பற்றிய பகிர்வு “நான் என்ன சாதுவா? சாதா தான?” என்ற பகிர்வும் சுவையானது.

தனது சிறு வயது நினைவுகளை நகைச்சுவையாகச் சொல்லுவதில் சமர்த்தர் தக்குடு. அவரது கல்லிடை நினைவுகள் சுகமானவை. கல்லிடையில் இருக்கும் பல பாத்திரங்களை அறிமுகம் செய்து வைக்கும் அவரது பதிவுகள் நகைச்சுவை ததும்பும். பிளவுஸ் சங்கரன் என்ற நபர் பற்றி இரண்டு பதிவுகள் எழுதி இருக்கிறார். பகுதி ஒன்று மற்றும் பகுதி இரண்டு படித்து மகிழுங்கள்.

என்ன நண்பர்களே இந்த வார வலைச்சரத்தில் தொடுத்த எல்லாப் பூக்களுமே உங்களுக்கும் பிடித்திருக்கும் என நம்புகிறேன். என்னையும் ஆசிரியர் ஆக்கிய இந்த வலைச்சர வாரத்தில் எனக்குப் பிடித்த சில பதிவர்களை அறிமுகம் செய்திருக்கிறேன். இன்னும் பல நண்பர்களின் பக்கங்களை அறிமுகம் செய்திருக்கலாம் தான். ஆனால் ஒரு வாரத்தில் இத்தனை தான் செய்ய முடிந்தது. இந்த நல்வாய்ப்பினை எனக்குத் தந்த வலைச்சர பொறுப்பாசிரியர் சீனா ஐயா அவர்களுக்கும் மற்ற நண்பர்களுக்கும் எனது சிரம் தாழ்ந்த வணக்கங்கள்.

தொடர்ந்து எனது பக்கத்தில் சந்திப்போம்.

நட்புடன்

வெங்கட்

புது தில்லி.

டிஸ்கி: இன்று எனது பக்கத்தில் காதலியுடன் நீண்ட பயணம்.