புத்தம் புது காலை பொன்னிற வேளை..!

வணக்கம்.

நேற்றைய பதிவில் காதல் கவிதைகளைப் படித்து ரசித்து ருசிக்கச் சொன்னது ஒரு குற்றமா? பின்னே என்னங்க, இன்னும் லவ் & ரொமான்ஸ் மூடிலயே மூழ்கி இருந்தால் என்ன அர்த்தம்? அப்படியே இருந்து விட்டால் என் பணிக்கு வேட்டு வைத்தது போல் ஆகிவிடும் இல்லையா? அதனால்...

அரிய சுவை உதயம் - புதிய ”சன்ரைஸ்”  - காஃபி -யை சுடச்சுட சுவைத்துக் கொண்டே என் பின்னோடு வாருங்கள். இன்று நான் அறிமுகம் செய்யவிருக்கும் சில “ஃப்ரெஷ்” பதிவர்களின் வலைப்பக்கம்  சென்று அவர்களின் படைப்புகளைப் படித்து , பிடித்திருந்தால் (பிடிக்கும்) உங்களின் பொன்னான கருத்துக்களாலும், ஓட்டுக்களாலும் புதிய பதிவர்களை உற்சாக படுத்துங்கள். அவர்களை, தொடர்ந்து எழுதத் தூண்டுவது நம்முடைய தலையாய கடமை அல்லவா?

குறிப்பு:- அறிமுகப் பதிவர்களின் பதிவுகளைப் படிக்க,கீழே சிவப்பு              வண்ணத்தில் உள்ள சொற்களைச் சொடுக்கவும்.

1) மதுரைக்குச் சொந்தக்காரர். மீன்கொடியான் என்னும் வலைதளத்தின் உரிமையாளர். மதுரை என்பதாலோ என்னவோ தமிழ் இவர் சிந்தனைகளிலும், விரல்களிலும் நவ தாண்டவம் ஆடுகிறது. சிறந்த கவிஞர். பட்டிமன்ற பேச்சாளர். பலகுரல் மன்னர்... இப்படியாக நீண்டுக்கொண்டே செல்லும் பன்முகத் திறன்களுக்குச் சொந்தக்காரர்.

பெயர்: கி.கோவிந்தராசு. இவரது சிந்தனைக்குச் சான்றாக “களவாணி” கவிதையை உங்கள் அரங்கில் சமர்ப்பிக்கிறேன், யுவர் ஆணர்.

*

2) முன் திட்டமிடல் எதுவும் இல்லாமல் திட்டக்குடி இவரைப் பெற்றெடுத்திருக்கிறது. கருப்பு உருவமும், வெளுத்தச் சிரிப்பும் இவரது சிறப்பு அடையாளங்கள். களத்துமேடு என்னும் இவரது வலையில் சிக்கிக்கொள்ளும் எவரும் விடுபட விரும்பமாட்டார்கள். “ஒரு கிராமத்தான்”  என தன்னை பறைசாற்றிக் கொள்வதில் பேருவகைக் கொள்ளும் இவரது கிராமியச் சிந்தனைகளில் உங்களையும் சிக்க வைக்கப் போகிறேன்.

பெயர்: பா.திருமுருகன். கிராமத்தில் பிறந்து, கல்வியறிவு இல்லாமல் ஆடு மேய்க்கும் ஒரு முதிர்க்கன்னியாய் இவன் உருமாறி, ”ஆடும் அவளும்” என்ற தலைப்பூ சூட்டி படைத்திருக்கும் கிராமியக் கவிதையைப் படித்துவிட்டு மீண்டு வந்து விடுவீர்களா? பார்ப்போம்!

**

3) தஞ்சை மாவட்டம் முத்துப்பேட்டையில் உதித்த முத்து. வில்லுக்கு விஜயன், சொல்லுக்கு பாரதி என்பார்கள். அவர்கள் இருவரின் புகழும் இவர் ஒருவருக்கே வாய்த்து விட்டிருக்கிறதைக் கண்டால் எனக்கு சற்று வயிற்றெரிச்சலாகவே இருக்கிறது.வெண்பா, புதுக்கவிதை என எல்லா தளங்களிலும் விளாசித்தள்ளும் சொல்வளச் சொந்தக்காரர்.”நட்புடன் நான்” என்னும் வலைதளம் மூலம் நம்மை வசியப்படுத்துபவர்.

பெயர் : விஜயபாரதி. ”வாயில்லா ஜீவன்”  என்னும் இவரது கவிதையைப் படியுங்கள். அவரது கவிதைகளே சொல்லும், அவருடைய தன்மையை!

***

4)மதுரை மைந்தன். தொலைதொடர்பு துறையில் பணியாற்றுகிறார் என நினைக்கிறேன். எதார்த்தமான எழுத்துக்களிலும்,  தன்னைச்சுற்றி நிகழும் எல்லாவற்றையும் உற்றுநோக்கி பதிவு செய்யும் உத்தியிலும் நம்மைக் கவர்பவர்.  நட்புடன் , சோலை அழகுபுரம் என்னும் வலைப்பூக்களுக்குச் சொந்தக்காரர்.

பெயர்: வி.பாலகுமார். இவரின் படைப்பான ”போயின பத்தாண்டுகள் இன்றோடு” என்ற கவிதையைப் படித்துப் பாருங்கள். நீங்களும் நினைவுகளால் பின்னோக்கி போய் விட்டிருப்பதை தாமதமாக உணர்வீர்கள். மறவாமல் மீண்டு வந்து விடுங்கள்.

****

5) சென்னை செந்தமிழர். உங்களைப் பற்றி கொஞ்சம் சொல்லுங்களேன் என்றால், தமிழ்மொழி - தமிழர் - தமிழ்மண் பற்றி மட்டுமே அறிந்தவன் என்கிறார். மணவழகன் கவிதைகள் , அனிச்சம் ஆகிய வலைப்பூக்கடை நடத்தி வருபவர். என்னவொரு குறை என்றால், இவரது கடையைப் பற்றிய அருமை சரிவர இன்னும் வாடிக்கையாளர்களைச் சென்றடையவில்லை. அந்தக் குறைய வலைச்சரம் இன்று நிவர்த்தி செய்து விடும்.

பெயர் : மணவழகன். இவரின் ஏக்கத்தை “இக்கரைக்கு அக்கரை” என்னும் கவிதையில் கேளுங்கள். 

*****

எனது கண்ணுக்கு எட்டிய வரையில் இன்று நான் குறிப்பிட்டிருக்கும் அனைத்து பதிவர்களுமே உங்களுக்கும், எனக்கும் வலைச்சர தமிழ் விரும்பிகளுக்கும் புதியவர்களாக இருப்பார்கள் என திடமாக நம்புகிறேன்.

இதனால் சகலமானவர்களுக்கும் தெரிவிப்பது என்னவென்றால், மேற் குறிப்பிட்டிருக்கும் அனைத்து பதிவர்கள் பக்கத்திற்கும் சென்று படித்து, பின்னூட்டமிட்டு அவர்களை உற்சாகப் படுத்த மறந்து விடாதீர்கள். 

*** *** ***

பூரண ஆயுளோட வாழனும்னு நம்ம எல்லோருக்குமே ஒரு நப்பாசை இருக்குதானே? சரி, ஆயுளை நீட்டிக்க என்ன வழி? தெரிஞ்சிக்க ரொம்ம்ம்ம்ம்ம்ப ஆவலா இருக்கு தானே! நான் நாளைக்கு வந்து சொல்றேன்.

*இப்போ என்னை சாரலின்பா கூப்பிடறாங்க. இது அவங்களோட நேரம். 

...இதோ வந்துட்டேண்டா சாரல்...!*