ஐந்தாம்நிலை மாடம்!!

நம்மைச் சுத்தி நடந்து வரும்
நல்ல பொல்ல சேதிகள
நாசூக்கா சாடிப்புட்டோம்!!
தொண்டக்குழி வத்திப்போச்சு
உடம்புச்சூடு ஏறிடுச்சு!!

கோபத்துல பேசிப்பேசி
நாக்கெல்லாம் வறண்டுபோச்சு!
கொழுந்துவெத்தல கொண்டுவந்து
வேறபேச்சு பேசிடுவோம்
தங்கமக்கா ஓடியாங்க!!

நாக்கு நீண்ட காளி போல அவதாரம் எடுத்த பதிவர்களின் காத்திரமான பதிவுகளை படிச்சு கொஞ்சம் இரத்தம் சூடேறி இருக்கும் நமக்கெல்லாம். அப்புறம் இப்படியா... சொல்லச் சொன்னா நாக்கைப் பிடுங்குற மாதிரில்ல கேட்குறாங்க. அவங்களின் அவதாரம் பார்த்து கொஞ்ச பேர் பயந்துபோயி அவங்களுக்கு வேப்பிலை அடித்து மந்திரிச்சாங்கலாம்.... சொன்னாங்க..

அதனால கொஞ்சம் ரூட்ட மாத்தி போவோம்.. மனிதனை மற்ற விலங்கினங்களிடமிருந்து வித்தியாசப்படுத்தி காட்டும் குணம் நகைச்சுவை. வாய்விட்டு சிரித்தால் நோய்விட்டுப் போகும் னு பெரியவங்க சொல்லியிருக்காங்க. சிரிப்பில் அத்தனை மருத்துவங்கள் உள்ளது என அனுபவித்தவர்கள் சொல்கிறார்கள்.
ஒரு வகுப்பறையில் ஆசிரியர் பாடம் நடத்தும்போது கொஞ்சம் சீரியஸா நடத்தினா மாணவர்கள் தளர்ந்துபோவது உண்மைதானே, நாமெல்லாம் அந்த பருவத்தை கடந்துதானே வந்தோம். ஆனால் அறிவியல் பாடத்தைக்கூட சிறு நகைச்சுவை உணர்வுடன் நடத்தும் ஆசிரியர்களும் இருக்கிறார்கள். அப்படி நடத்தினால் மனமும் குணமும் தெளிவாக பாடம் தலையில் ஏறும்.

திரைப் படங்களில் நகைச்சுவைக்கென பலர் இருந்தாலும் அங்கே அரியாசனம் ஏறியவர்கள் சிலர் மட்டுமே. அந்த சிலரில் எனக்கு பிடித்த முக்கியமான நகைச்சுவை நடிகர் தனால்.தங்கவேலு. இவரின் சிரிப்புச் சரங்கள் சத்தம் குறைவாகத்தான் வெடிக்கும் ஆனால் நீண்ட காலம் மனதில் நிற்கும். அறிவாளி என்ற திரைப்படத்தில் அவரும் நடிகை முத்துலெட்சுமியும் சேர்ந்து சப்பாத்தி போட்ட சரவெடி இன்னும் வெடித்துக்கொண்டுதான் இருக்கிறது.
அடுத்து நடிகர் நாகேஷ், சிலரை பார்த்ததும் சிரிப்பு வரும் அப்படி பார்த்த அரிய சிலரில் ஒருவர் நடிகர் நாகேஷ். தருமி எனும் குணச்சித்திர திருவிளையாடற் புராண கதாபாத்திரத்தை நகைச்சுவைப் பாத்திரமாக்கி இன்றும் மனதில் நீங்கா இடம் பெற்றவர்.

சூரியனும் உதிச்சிருச்சி
சுண்டக் கஞ்சி வந்துருச்சி
சுளுவா எந்திருச்சி
சுத்தமாக குளிச்சிபுட்டு
சோளிபாக்க போ மாமா!!

எனக்குன்னு போரந்தவளே
என்னக்கரை சேர்த்தவளே!
இன்னைக்கு வலைச்சரத்தில்
நகைச்சுவையின் அறிமுகமாம்
பார்த்துபுட்டு போறேண்டி!!

நானும் பார்க்க வாரேன்
யாரெல்லாம் வாராகன்னு!
செத்தநேரம் சிரிச்சிபுட்டு
சோளிபாக்க போயிடுவோம்!!

...............................................................................................................................

தங்கள் பதிவுகளில் பலசுவைகளை கொடுக்கும் பதிவர்கள் பலர் நகைச்சுவை பதிவுகளில் சற்று அதிக உற்ச்சாகத்துடன் தான் போட்டிருக்கிறார்கள். அவைகளை படிக்கையில் நமக்கும் உற்சாகம் தொற்றிக்கொள்கிறது. வாங்க நாமும் போயி கல கலன்னு சிரிச்சிட்டு வருவோம்.
............................................................................................................................

வலைகளை சுற்றி வருகையில் மதுரைத் தமிழ்க்காரன் ஒருவர் கண்ணில் பட்டார். அவர்கள் உண்மைகள் என்ற வலைப்பூவில் பல்சுவை பதிவுகளை அழகுறக் கோர்த்திருக்கிறார். அங்கே தெரிந்த நகைச்சுவைகளில் என்னைக்கவர்ந்தது இப்ப டியும் ஒரு மாமியார்&மருமகள் என்னடா உலகமிது? என அவர் அங்களைக்கும் இந்த பதிவு. வாங்க நாமும் போய் யார் அவங்க னு பார்த்து வருவோம்.

இதோ அவர்க்காக...

சுவையில ஆறுசுவை
இன்னதின்னு தெரியுமய்யா!
உனக்கு தெரியாதுன்னு
ஒருசுவைய சொல்லிபுட்ட!
அந்தசுவை என்னான்னு கேட்டதற்கு
அதுதான்யா நகைச்சுவைன்னு
அழுத்தமாக சொல்லிப்புட்ட!!
...............................................................................................................................

யாதும் ஊரே யாவரும் கேளிர் எனப் பாட்டு பாடிக்கொண்டே அழகு வண்ணங்களால் ஒரு இனிய வானவில்லை நெய்திருக்கிறார் நண்பர் ராஷி. இவரின் வலைப்பூவில் நிறைய நகைச்சுவை வண்ணங்கள் இருந்தாலும் எனக்குப் பிடித்த வண்ணம் ஜோரான ஜோக்ஸ்!! என்பதுவே.. வாங்க நாமும் சென்று சற்று படித்து சிரித்துவிட்டு வருவோம்.

இதோ அவருக்காக..

ஆனைமலை அழகர்மலை
தேனெடுக்கும் தென்மலை!
அத்தனை மலையெல்லாம்
அவதியா சுத்திவந்தேன் - ஐயா
எதுக்குன்னு நினைச்சிபுட்ட!!
உன் வலைத்தேன குடிச்சிடத்தான்!!
...............................................................................................................................

 இங்கே வலைச்சரத்திலும் சரி நம் நண்பர்கள் மத்தியிலும் சரி இவருக்கு முகவரி தேவையில்லை. இவரின் பின்னூட்டங்கள் மிகவும் அருமையானவை. சந்தித்ததும் சிந்தித்ததும் எனக்கூறி வரும் இவர்வலையில் சந்தித்த வேளையில் தந்துவிட்டேன் என்னை என்பதுபோல, அன்புநிறை நண்பர் வெங்கட் நாகராஜ் பதிவுகளை படிக்கையில் நம்மை நாமே சற்று மறந்துவிடுவோம். ஒரு ஆக்ரா பயணத்தைக் கூட எவ்வளவு நகைச்சுவையாய் கொடுக்கிறார் பாருங்க "மும்தாஜ் வந்துவிட்டால்...." என்ற பதிவில் தான் இப்படி நகையாடி இருக்கிறார். வாருங்கள் படிப்போம்.

இதோ அவருக்காக...

குட்டவண்டி குள்ளவண்டி
குமரன் ஓட்டும் கூட்ஸ் வண்டி!
சிங்கார சென்னைவிட்டு
டெல்லிக்கு போகையில
கூட்டிகிட்டு போய்விடு!
அழகாக பதிவிட்ட
கூட்டாளி வெங்கட்டு
நாகராசு அண்ணனுக்கு
மணமிக்க மலர்க்கொத்து
கொடுக்கத்தான் போய்வருவோம்!!
......................................................................................................................

காற்றை விட வேகமானது எண்ணம், எண்ணங்களின் போக்கில் நடக்கும் விளைவுகள் யாவையும் எதுவானாலும் நல்லதுக்குத்தான் என ஏற்றுக்கொள்ளும் பக்குவம் கொண்ட அன்புநிறை சகோதரி ராம்வி படிப்பவர் மனதை கட்டிப்போடும் வகையில் எழுதுவதில் வல்லவர். மதுரகவி பாடிவரும் அவர் வலைப்பூவில் அன்றாடம் நிகழும் சில சம்பவங்களை கூட நகையுணர்வுடன் ரங்கமணியும் ..தங்கமணியும்.. போல னு சொல்லியிருகாங்க பாருங்க.. வாங்க அவரின் நகைப்பதிவை பார்த்துவருவோம்.

இதோ அவருக்காக....

கடகடன்னு ஓடிவரும்
மச்சக்காளை வண்டிங்கோ!!
பாய்ந்துபாய்ந்து ஓடிவரும்
செவளக்காளை வண்டிங்கோ!!
பொழுது விடிஞ்ச பின்னால
பெங்களூரு போய்டுவேன்!
அழகாக பதிவிட்ட
அருமையான அக்காவுக்கு
பொங்கப்படி கொண்டுபோறேன்!!
...............................................................................................................................

தளிர் போன்ற மெல்லியவாம் போன்று பார்வையிலே தெரிந்தாலும். சமுதாயச் சாடல்களை ஆங்காரத்துடன் பதிவிடுபவர் இவர். ஆனாலும் தன்னைத்தானே ஆசுவாசப்படுத்திக்கொள்ளவும் படிப்பவர்களை அமைதியாக்கி சிரிக்க வைக்கவும் தெரிந்தவர். இடையிடையே நகைச்சுவைப் பதிவுகளை தருவதில் வல்லவர். ஃபால்ஸ் வாக்குறுதி! ஜோக்ஸ் என இவரிட்ட பதிவை போய் படித்து பார்ப்போமா!!

இதோ இவருக்காக!!!

சிந்திச்சு சிந்திச்சு
முடியெல்லாம் கொட்டிப் போச்சு
சிரிச்சி பழகிவந்தா
சிறப்பொடு வாழலாம்னு
பெரியவங்க சொன்னாங்க!!
சிரிப்பு துணுக்குகள
சீராக மாலைபோல
ஜோராக தொடுத்தவ்ரே!
மனசில் நிறைச்சவரே!!
...........................................................................................................................

பூக்கடைக்கு விளம்பரம் தேவையில்லை என்பதுபோல, தனது பதிவுகளின் மனத்தால் அன்பு உலகம் மூலம் அனைத்து வண்டுகளையும் கவர்பவர் எனதருமை நண்பர் எம்.ரமேஷ் (M .R ). பலசுவைகளில் பதிவுகளை கலந்துகட்டி அடிப்பதில் வல்லவர். இவரின் பல பதிகள் எனக்கு பிடித்திருந்தாலும். நகைச்சுவையாக எழுதிய நல்லா சிரிங்க ... கவலைய மறங்க.. னு எழுதிய இந்த பதிவு மனதை லேசாக்கியது. இந்தப் பதிவின் கடைசியில் அவர் ஏற்றியிருக்கும் காணொளியைக்  கண்டால் சிரிச்சுகிட்டே இருப்பீங்க...உடனே போய் பாருனக்..

இதோ அவருக்காக..

பூவென்ன மலரென்ன
காயென்ன பழமென்ன
கீரையில ஒழிந்ததென்ன
அத்தனையின் மருத்துவத்தை
அழகாக சொன்னவரே!
எம்மை சிரிக்க வகையிலே
நீரோ..சிந்தனைச் சிற்பியைய்யா!!
.............................................................................................................................

குலுங்கக் குலுங்க சிரிக்க வைக்கும் அத்தனை நகைச்சுவைப் பதிவர்களுக்கும் என் சிரம் தாழ்ந்த நன்றிகள்.


அன்பன்
மகேந்திரன்