கண்களின் வார்த்தைகள் புரியாதோ.....!

என்ன சம்பந்தமில்லாமல் எதோ ஒரு தலைப்பு என்று நினைக்கின்றீர்களா? இனி இப்படித்தான், என்ன சம்பந்தம் என்று நீங்கள்தான் கண்டுபிடித்துக் கொள்ளவேண்டும்!

சரி, விஷயத்துக்குப் போவோம், தினமும் ஒரு சுவை என்ற வகைப்படுத்தல் சற்று சுவராசியக் குறைவாக இருக்கும் என்று தோன்றியதால்,  இந்த வாரம் நாம் பார்க்க இருக்கும் பதிவுகளைக் கவிதை, அனுபவங்கள், சிறுகதை மற்றும் நகைச்சுவை என்று நான்கு பிரிவுகளாகப் பிரித்து வகைப்படுத்தியிருக்கிறேன். இனி தினமும் அவ்வாறே காண்போம்.

காதலுக்கு மரியாதை:

ஒரு மாதமாக தமிழகம் முழுதும் மழையில் நனைந்து கொண்டிருக்கிறது. ஒரு மாற்றத்திற்காக நீங்கள் இந்தக் காதல் பெருமழையில் கொஞ்சம் நனைந்து பாருங்களேன்!

மழைத்துளியின் பூக்கள் எது, மேகங்களின் பூக்கள் எது என்று அழகான உவமைகளால் காதல் வளர்க்கிறார் மோகனன்.

அனுபவம் பலவிதம்:

இசைஞானியின் ராஜாங்கத்தை எப்படி நுணுக்கமாக ரசிப்பது என்று வகை வகையாகச் சொல்லித்தருகிறார் இந்த இசைக் காதலர்.  தேவதைகளின் ஹம்மிங்கை வைத்து இசைராஜா என்னமாய் விளையாடியிருக்கிறார். வாருங்கள் நாமும் கொஞ்சம் இசையமுதம் பருகுவோம்!

மரணத்தின் பின்பு என்ன நடக்கும் என்று தெரிந்து கொள்ள யாருக்குத்தான் ஆசை இல்லை? அதை பற்றி வெகு சுவராசியமான தகவல்களைத் தருகிறார் மோகன். பயப்படாமல் படியுங்கள், இது பேய்க்கதை அல்ல.

இலங்கையின் வன்னிமண்ணை ஆண்ட மன்னான கயிலை வன்னியனைப் பற்றி விபரங்கள் தந்திருக்கிறார் சுசி.  தமிழர்கள் ஆண்ட மண் அது.

சவூதிக்கு முதல் தடவையாக வரும் தொழிலாளர்கள் ஒவ்வொருவரும் தெரிந்து கொள்ள வேண்டிய விஷயங்கள் நிறையவே உள்ளன. அவற்றைப் பற்றி விரிவாக விளக்குகிறார் ஸ்டீபன்.

அரசுப் பேருந்தில் தனக்கு நேர்ந்ததை ஆதங்கத்தோடு சொல்கிறார் வைகை. பூனைக்கு யார்தான் மணி கட்டுவது?

இன்றைய கதை சொல்லி:

கதை எழுதுவது என்பது ஒரு கலை. அது சிலருக்கு வெகு இயல்பாக வருகிறது. தீராக் கனவு என்ற இந்தக் கதை மூலம் ஒரு மாற்றுத் திறனாளியின் வித்தியாசமான உணர்வுகளை நுணுக்கமாக படம் பிடிக்கிறார் பாரதி தம்பி.

இன்றைய புன்னகைப்பூ:

டாகுடர் விஜய்ய நாந்தான் ஓவரா கலாய்ச்சுக்கிட்டு இருக்கேன்னு எல்லாரும் நெனச்சுக்கிட்டு இருக்காங்க. இங்க போயிப் பாத்துட்டு நானே கண்ணு கலங்கிட்டேனுங்ணா, படங்கள வெச்சிக்கிட்டு மனுசன் அதகளம் பண்ணியிருக்காரு, அதிலும் அந்த  ஹெலிகாப்டரத் தூக்கும் கடைசி சீன் இருக்கே……!

இன்றைய பிரபலம்:

எழுத்தாளர் மாலன், ஜன்னல் என்ற வலைப்பூ வைத்து எழுதி வருகிறார்.  உறவுகளைப் பிரிவதால் ஏற்படும் வலியைப் பற்றி சமீபத்தில் அவர் எழுதியிருக்கும் பதிவு ரொம்பவே சிந்திக்க வைக்கிறது.

ஓக்கே நண்பர்களே அறிமுகப்படுத்தப்பட்ட  பதிவுகள் மற்றும் அந்தந்த வலைப்பூக்களில் உள்ள வேறு நல்ல பதிவுகளையும் பொறுமையா படிச்சுட்டு வாங்க, நாளைக்கு மீண்டும் சில நல்ல பதிவுகளோட வந்து சந்திக்கிறேன்.

அப்புறம் தலைப்பின் பெயர்க்காரணத்தக் கண்டு புடிச்சிட்டீங்களா?