செல்விருந்தோம்பி வருவிருந்து காத்திருத்தல்

அன்பின் சக பதிவர்களே !

இன்றுடன் முடியும் வாரத்திற்கு ஆசிரியப் பொறுப்பேற்ற நண்பர் அருண் பிரசாத், ஏற்ற பொறுப்பினை நல்ல முறையில் நிறைவேற்றி, மன நிறைவுடன் நம்மிடமிருந்து விடை பெறுகிறார். இவர் அறிமுகப்படுத்திய பதிவர்கள் அனைவருமே புதிய பதிவர்கள் தான். நாளுக்கு ஒன்றாக, ஏழு இடுகைகள் இட்டு ஏறத்தாழ 770 மறுமொழிகள் பெற்றிருக்கிறார். மறுமொழிகளின் எண்ணிக்கையினைப் பார்க்கும் போது, இவரது நட்பு வட்டம் மிகப் பெரியதாகத் தோன்றுகிறது.

இவர் புதுமையான முறையில் பல்வேறு துறைகளை -ஒவ்வொரு பூவின் பெயரிட்டு, அத்துறையில் சிறந்த இடுகைகளை நாளுக்கு ஒன்றாக, ஆறு நாட்களிலும் அறிமுகப் படுத்தி இருக்கிறார். இவரது உழைப்பு கடும் உழைப்பு. தேடித்தேடி இடுகைகளைக் கண்டறிந்து அறிமுகப் படுத்தி இருக்கிறார்.

நண்பர் அருண் பிரசாத்தினை, வாழ்த்தி வழி அனுப்புவதில் பெருமை அடைகிறேன்.

நாளை டிசம்பர்த் திங்கள் ஆறாம் நாள் துவங்கும் வாரத்திற்கு ஆசிரியப் பொறுப்பேற்க அன்புடன் இணக்கம் தெரிவித்து, மிகக் குறுகிய காலத்தில், ஏற்ற பொறுப்பினை அருமையாக நிறைவேற்றுவதற்கு வருகிறார் நண்பர் பன்னிக்குட்டி ராமசாமி. இவர், சூரியன் படத்தில் கவுண்டமணி ஏற்ற பாத்திரத்தின் பெயரான பன்னிக்குட்டி ராமசாமி என்ற பெயரினையே புனைப்பெயராக வைத்துக் கொண்டு பதிவில் எழுதி வருகிறார். இடுகை இடும் போதும், மறுமொழிகள் போடும் போதும், படிப்பவர்க்கு ஒரு நகைச்சுவை உணர்வினைத் தூண்டும் வண்ணம், புனைப்பெயர் இருப்பதனால், அதனை பலர் மாற்றச் சொல்லியும் - மாற்றாது தொடர்ந்து வருகிறார்.

இவர் பதிவில் எழுத ஆரம்பித்து , ஆறே மாதங்களில் ஏறத்தாழ ஐம்பது இடுகைகளுக்கு மேல், பல்வேறு தலைப்புகளில் எழுதி இருக்கிறார். இவரை, ரசிக்கும் வண்ணம், ஏறத்தாழ 250 பதிவர்கள் - நண்பர்கள் பின் தொடர்கின்றனர். பெரும்பாலும் நகைச்சுவையாகவே எழுதி வருகிறார்.

இராமநாதபுரத்தைச் சேர்ந்த இவர் தற்போது மத்தியக் கிழக்காசிய நாடான சவுதியில், ஒரு பல்கலைக் கழக ஆராய்ச்சி மையத்தில் பணி புரிந்து வருகிறார்.

நண்பர் பன்னிக்குட்டி ராமசாமியை வருக ! வருக ! என நல்வாழ்த்துகளுடன் வரவேற்பதில் மகிழ்ச்சி அடைகிறேன்.

நல்வாழ்த்துகள் அருண் பிரசாத்

நல்வாழ்த்துகள் பன்னிக்குட்டி ராமசாமி

நட்புடன் சீனா