புஷ்பராகங்கள்!!

கன்னிப்பொங்கல்.

திருமணமாகாத பெண்கள் பொங்கல் பொங்குவதால் இது கன்னிப்பொங்கல் என்றும் உறவினர்கள் ஒருத்தருக்கொருத்தர் கண்டு களிப்பது என்பதால் காணும் பொங்கல் என்று பெயர் பெற்றதாகவும் சிறு பிள்ளைகள் கூட்டாஞ்சோறு ஆக்கி கொண்டாடும் நாள் என்பதால் சிறு வீட்டுப்பொங்கல் என்றும் அழைக்கப்படுகிறது. பல வகைக் கட்டு சாதங்களை மாலையில் செய்து எடுத்துக்கொண்டு பெண்கள் எல்லோரும் ஆற்றங்கரைக்குச் செல்வார்கள். கோலாட்டம், கும்மி அடிப்பது என்று விளையாடி விட்டு சாத வகைகளைச் சாப்பிட்டு வருவார்கள். இது ‘கணுப்பிடி’ என்றும் கூட அழைக்கப்படுகிறது. கோவை பக்கத்தில் ‘பூப்பறிக்கும் திருவிழா’ என்பது இந்த காணும் பொங்கலன்று தான் நடைபெறுகிறது.

மார்கழி மாதம் கோலங்களில் வைக்கும் சாணத்தை [ இதை சாணிப்பிள்ளையார் என்று கூறுவார்களாம்] அடுத்த நாள் வெய்யிலில் காய வைத்து, இது மாதிரி மாதம் முழுவதும் சேர்த்து வைத்திருக்கும் ‘சாணி பிள்ளையார்களை, எடுத்துச் சென்று ஆற்றில் கரைத்து விட்டு, கோவிலில் பொங்கல் படையல் போட்டு கொண்டாடுகிறார்கள். இன்னொரு சமூகத்தில் ‘கணுப்பிடி’ சகோதர, சகோதரிகளுக்காக கொண்டாடப்படுகிறது. முதல் நாளே, சிறிது சாதத்தில் மஞ்சள் கலந்து மஞ்சள் சாதம், அவற்றில் சுண்ணாம்பு கலந்து சிகப்பு சாதம், வெள்ளை சாதம், சர்க்கரைப் பொங்கல் என்று ஒவ்வொன்றிலும் உருண்டை பிடித்து வெளியிலிருக்கும் துளசி மாடத்திற்கருகே இஞ்சி இலைகள், மஞ்சள் இலைகள் பரப்பி அவற்றில் வைத்து, கரும்பு, பழங்கள் வைத்து பூஜை செய்து, வீட்டில் பெரியவர்கள் மற்றவர்களுக்கு ஆசி கூறி, மஞ்சளும் குங்குமமும் தந்து வீட்டினுள்ளே அனுப்புகிறார்கள். சில ஊர்களில் துளசி மாடத்திற்குப்பதிலாக ஆற்றங்கரைகளிலும் குளக்கரைகளிலும் இந்த ‘ கணுப்பிடி’ நடக்கும்.

புஷ்பராகம்

இந்தக் கல் நிறமற்றதாகவும், மஞ்சள் நிறத்திலும் காணப்படும். மஞ்சள் நிற புஷ்பராகம் கனக புஷ்பராகம் ஆகும் இதுவே சிறந்தது. ஆங்கிலத்தில் TOPAZ என்று அழைக்கப்படுகிறது!

புஷ்பராகங்களாய் நம்மை அசத்தும் இன்றைய பதிவர்கள்.....

திருமதி.ஏஞ்சலின் கைவினைப்பொருள்களும் சமையலும் செய்வதில் வல்லவர். அவற்றை அழகுற பதிவுகளாகி வருபவர். அவர் செய்த இந்த வாழ்த்து அட்டையைப் பாருங்களேன்!!

74 வயது இளைஞரான GNB பாலியல் வன்முறைக்காளாகும் பெண்களின் அவல நிலைமையை நினைத்துக் குமுறி எழுதியிருக்கிறார் இங்கே! அவரின் எழுத்தில் இருக்கும் உண்மை நெஞ்சை சுடுகிறது!

பொங்கலென்றாலே கூடவே அதன் இனையாக கரும்பும் வரும். கரும்பின் மகிமையை இங்கே சிறப்பாகச் சொல்லியிருக்கிறார் பவி!!

ஆயிரம் தான் வசதிகள் வந்து விட்டாலும் வாழ்க்கை தொடர்ந்த விமானப்பயணங்கள் என்று ஆகி விட்டாலும் சின்ன வயதில் ஜன்னலோரப் பேருந்து பயணம் தந்த சுகத்தை எதுவுமே தந்ததில்லை. அதுவும் விடிந்தும் விடியாத பொழுதில் ஜன்னலோர இருக்கையில் அமர்ந்து பனிக்காற்று முகத்தில் சில்லென்று மோத, பறவைகளின் ராகங்கள் பின்னணியில் ஆதவன் உதயமாவதை ரசித்தவாறே சென்ற அந்தப் பயணங்கள்..ம்.. பெருமூச்சு தான் எழுகிறது! அதே மாதிரியான பேருந்து பயணத்தை இங்கே தாரணி ப்ரியா ரசனையுடன் எழுதியிருக்கிறார்!

பெரும்பாலான பெண் குழந்தைகளுக்கு அப்பா தான் ஆதர்ச ஹீரோ. தான் சந்திக்கும் ஆண்களிடம், முக்கியமாக தன் கரம் பிடித்த கணவரிடம் தன் தந்தையின் பண்புகளைத்தேடும் குணம் மிகுந்து இருக்கும். இங்கே கவிதாவும் தன் தந்தையை ‘ அற்புதமான  அருட்பெருஞ்சோதியே!’ என்று பாசத்துடன் விளித்து, அவரின் நல்லியல்புகள் பற்றி சுவைபட எழுதியுக்கிறார்!

வாழைப்பூவை இப்படிக்கூட ரசித்து உவமானமெல்லாம் கொடுத்து அழகாய் எழுத முடியுமா? மொறு மொறுவென்ற வாழைப்பூ வடை கூட அதன் பிறகு தான் வருகிறது! வாழைப்பூவின் அடுக்குகளை குழந்தையின் பிஞ்சு விரல்களாய் நினைத்து ரசிக்கிறார் துளசி இங்கே!!

குறைந்து போன சிறுநீரக செயல்பாட்டை இஞ்சி ஒத்தடத்தின் மூலம் எப்படி அதிகரிக்கலாம் என்ற மருத்துவ முறையை திரு.வின்செண்ட் இங்கே விரிவாக எழுதியிருக்கிறார். வலைப்பூ முழுவதும் இது போன்ற மிக உபயோகமான குறிப்புகள் இருக்கின்ற‌ன. படித்துப் பயனடையுங்கள்.

தவிப்பு என்பது வாழ்க்கையின் பல்வேறு நிலைகளில் பல வித உணர்வுகளில் வருவது! ஆனால் தாய்மைப்பாசத்தின் தவிப்பிற்கு முன்னால் மற்ற தவிப்புகளெல்லாம் எம்மாத்திரம்! ஒரு குழந்தையைப்பெற ஒரு தாய் எத்தனை தவமிருக்கிறாள், குழந்தை உருவாகாதபோது எத்தனை விஷ நாக்குகளிடையே அரைபட்டு தினம் தினம் மரணிக்கிறாள், குழந்தை பெற்ற பிறகு எப்படியெல்லாம் தன் இரத்தத்தையே சிந்தி அதை வளர்க்கிறாள், அந்தக் குழந்தை வளர்ந்து அவளையே நோகடிக்கும்போது கூட எப்படியெல்லாம் அந்தக் குழந்தையின் நலனுக்காக உருகிறாள் என்பதை இதை விட எப்படி அழகாகப் பிரதிபலிக்க முடியும் எழுத்தில்? அத்தனை நெகிழ்ச்சியாக அருமையான உவமானங்களுடன் இங்கே நிலாமகள் எழுதியிருந்த சிறுகதையைப் படித்து முடித்த போது நெஞ்சில் கனம் ஏறி நின்றது சில நிமிடங்களுக்கு! அவரின் பதிவுகளில் இது ஒரு மகுடம் என்று கூறி வாழ்த்துகிறேன்!!

ரெய்கியா, அப்படின்னா என்ன என்று கேட்பவர்களுக்கும் அதைப்பற்றி விபரங்கள் அறியாதவர்களுக்கும் அது ஒரு வெளிநாட்டு தியான முறை என்று கூறி, அதைப்பற்றி இங்கே விரிவாக எடுத்துரைக்கிறார் சாதாரணமானவள்!

அந்தக் கால விளம்பரங்களையும் இந்தக் கால விளம்பரங்களையும் படங்களுடன் போட்டு அன்றும் இன்றும் எத்தனை வித்தியாசங்கள் என்பதை அழகு பட விவரிக்கிறார் சகோதரர் வெங்கட் நாகராஜ்!

நம்ம ஏரியாவில் அழகான மயில் வரையக்கூடச் சொல்லிக்கொடுக்கிறார்கள்! கோட்டில் படம் வரையச் சொல்வது, கேள்விகள் கேட்டு திணறடிப்பது என்று வாசககனின் மூளைக்கு வேலைகளை நிறையவே தந்து பதிவுகளை சுவாரசியமாகக் கொண்டு சென்று அசத்துகிறார்கள்!!