அரட்டைக் கச்சேரி -- நிறைவு.

இன்று  உங்களிடமிருந்து விடை பெறுகிறேன்.என் கடமையை சரி வரச்செய்தேனா...... நான் குறிப்பிட வேண்டிய பதிவர்கள்  எல்லோரையும் பற்றி சொல்லமுடிந்ததா என்றால் இல்லை என்று தான் சொல்வேன். மிகச் சிலரை மட்டுமே என்னால்  சொல்ல முடிந்தது.

இவரைப் பற்றி எழுதவில்லையே 
அவருடைய பதிவுகள் பற்றி சொல்லவில்லையே ! என்கிற பதட்டத்துடன் தான், நான் இன்று உங்களிடமிருந்து பிரியா விடை பெறுகிறேன்.

சரி............இருக்கும் நேரத்தில் மேலும் சில பதிவர்கள் பற்றி இங்கே குறிப்பிடுகிறேன்.

தளிர் என்னும்  தளத்தில்  எழுதி வரும் திரு. சுரேஷ்  பதிவுகள் அத்தனையும்
அருமை.
நீங்கள் பதம் பார்க்க   கிழிந்த நோட்டு.
அவர் கவிதைகள் படித்து  ரசிக்கலாம் இங்கே
சுரேஷின் சாமியாட்டம் பார்க்கலாம் வாருங்கள்.
இவர் சிறுகதையும் எழுதுகிறார்.
தன்  குற்றம் என்னும் இவர் சிறு கதையைப் படித்தால் உண்மைச் சம்பவம் போலவே இயல்பாக இருக்கும் .படித்து ரசியுங்கள்.
மின்மினி பூச்சிகளைப் பற்றியக் கதை மிகவும் சுவாரஸ்யம்.

பிரச்சினை என்று வந்தால் தீர்த்து வைப்பீர்களா? அப்படிஎன்றால் சுயம்பு  என்னும் தளத்தில்  எழுதிவரும் விக்னேஷ் அவர்களுக்கு பெரிய பிரச்சினையாம். தீர்த்து வைக்க சொல்கிறார். முடியுமா பாருங்கள்.
 இவர் பள்ளிக்குப் போய்  பாடம் கற்றுக்கொண்டாரோ இல்லையோ  பல்லியிடம் பாடம் கற்றுக் கொண்டிருக்கிறார். என்ன என்று பாருங்களேன். நல்ல நகைச்சுவை கலந்து எழுதியிருக்கிறார்.
ஜால்ரா மனிதர்கள் பற்றி சொல்வதை கேளுங்கள் இங்கே.


மனசு என்னும் தளத்தில் திரு. குமார்  மழை எத்தனை ரம்மியமானது என்று சொல்கிறார்  படியுங்கள்.
 நாம் எப்படியெல்லாம் ஏமாத்தப் படலாம் என்பதை இங்கே படிக்கலாம்.
திருமணத்தில் இருக்கும்  மூட நம்பிக்கைகள் பற்றி  சாடுகிறார்.. அவசியம் படிக்க வேண்டியப் பதிவு.
இவருடைய கிராமத்து நினைவுகளை  நம்முடன் இங்கே பகிர்கிறார் படியுங்கள்.

திருமதி ராஜியின் கற்றலும், கேட்டலும் படித்துப் பாருங்கள் .திரும்பாதோ அந்த தீபாவளி என்கிறார். ஏன் என்று அவரிடமே கேட்போம்.
தாய்மை உணர்வை எப்படி படம் பிடித்திருக்கிறார் பாருங்கள்.
தாய் தன்  பதினாறு வயது பெண்ணிற்கு சொல்லும் கதை  இங்கே  படிக்கக் கிடைக்கும்.
கடிகார முள்ளில் பூவாய் என்கிற பதிவில் அழகிய கவிதை ஒன்று காத்துக் கிடக்கிறது, படிப்போம்  வாருங்கள் .

பூப் பறிக்கக் கோடாலி எதற்கு? என்று கேட்கும் திரு. Killergee அவர்கள்
சுட்ட  பழம் பற்றி சொல்வதைக் கொஞ்சம் காது கொடுத்துக் கேட்போமா?
டிரைவிங் லைசென்ஸ் வேண்டுமா? அப்படிஎன்றால் முதலில் அவர் சொல்லும் வாகனம் ஓட்டியிருக்க வேண்டுமாம். அநேகமாக எல்லோருமே ஓட்டியிருப்போம். அதை விடுங்கள்......பதிவில் அவர் சொல்லியிருக்கும் வாகன ரகங்கள் படித்து முடிப்பதற்குள் மூச்சு முட்டும்.. படித்து விட்டு சொல்லுவீர்கள் பாருங்கள்.

தென்னாட்டுக் காந்தி, காமராஜர் என்ன படித்திருக்கிறார் ?
எவ்வளவு சாதனைப் படைத்திருக்கிறார் என்று நம் கில்லர்ஜீ பட்டியலிடுகிறார் பாருங்கள்.கூண்டுக்குள்  இருக்கும் விலங்குகளின்  வலியை  நாம் உணரலாம் இந்தப் பதிவைப் படித்தால் .
முதுகு வலி தீர வீட்டிலிருக்கும் பொருட்களை விற்க வேண்டுமாம்.
நான் சொல்வது புரியவில்லையா? கில்லர்ஜீயிடமே உங்கள் சந்தேகத்தை நிவர்த்தி செய்து கொள்ளுங்கள்.


கடமை முடிந்து விடை பெறுகிறேன். அரட்டைக் கச்சேரி ஓய்ந்தது ," ஸ்வீட் எடு, கொண்டாடு " என்று நீங்கள் சொல்வது கேட்கிறது.
இங்கே ஒன்று சொல்ல வேண்டும்.இங்கே தான் அரட்டைக் கச்சேரி ஓய்ந்திருக்கிறது. என் சொந்தக் கடையில் தொடர்கிறேன்.... அங்கு வாருங்கள்  உரையாடுவோம்.


என்னோடு தொடர்ந்து பயணித்து  ஊக்கமளித்த சைலண்ட் வாசகர்கள் மற்றும் பின்னூட்டமிட்டு  ஊக்கப்படுத்திய   நண்பர்கள் அனைவருக்கும் உளம் கனிந்த நன்றிகள்  பல.
வலைச்சரத்தில்  வாய்ப்பளித்த  திரு. சீனா ஐயா அவர்களுக்கும் இத்தருணத்தில் என் மனம் நிறைந்த நன்றிகள்.

                                                               

image courtesy--google.

மேலும் வாசிக்க...

அரட்டைக் கச்சேரி -- 5

கடந்த ஒரு வாரமாகவே சென்னையில் ' நச  நச '  என்று மழைத் தூரல். மழை பெய்தால்   நன்கு பெய்ய வேண்டும். ஆனால் இது என்ன இரண்டுங்கெட்டான் நிலையல்லவா எடுத்திருக்கிறது மழை என்று சலிப்பாக இருந்தது.

ஆனால் செடி கோடிகளுக்கு ஒரே கொண்டாட்டம். செடி கொள்ளாமல் செம்பருத்தி பூக்கள் . சந்தன முல்லையின் வாசனையோ  மாடி எங்கும் பரவிக் கிடந்தது. இந்த சிக்கனமான  பருவமழை இதை மட்டுமா கொண்டு வந்திருக்கிறது. இல்லை நாங்களும் தான் இந்தத் திடீர் மழை தந்த பரிசு என்று கட்டியங் கூறுவது போல், அங்கங்கே இருமல், ஜலதோஷம், ஜுரம்.....டாக்டர் கிளினிக்  வாசல் சொல்லியது.

டாக்டர் என்று சொல்லும் போது  எனக்கு உடனடியாக நினைவிற்கு வருவது திரு முருகானந்தம் அவர்கள்  எழுதும் ஹாய் நலமா? தளம் தான். டாக்டர் மருத்துவக் கட்டுரை எழுதுவதில்  என்ன அதிசயம் என்று உங்களுக்குத் தோன்றலாம். ஆனால், அதை பாமரருக்கும் புரியும் வகையில் எழுதுவதில்  திரு. முருகானந்தத்திற்கு இணை அவரே தான் என்று சொல்ல வேண்டும்.

சர்க்கரை நோய் வராமல் இருக்க வேண்டுமா? அப்படியானால் நீரிழிவு வராமல் தடுக்கும் உபாயங்கள்  படியுங்கள்.

ஒரு லட்சம் வருடங்களுக்குப் பிறகு நம் வழித் தோன்றல்கள்  எப்படி இருப்பார்கள் என்றுத் தெரிந்து கொள்ளுங்களேன்.


அளவோடு காப்பி அருந்த நமக்கு அறிவுறுத்துகிறார். ஏன் என்று  இங்கே பாருங்கள்.

உண்ட களைப்புத் தொண்டனுக்கும் உண்டு . அந்த பகல் தூக்கம் நல்லதா ? கெட்டதா ? என்ன சொல்கிறார் பார்ப்போம்.

குழந்தைகள்  சற்றே வித்தியாசமாக  நடந்து கொண்டால்  எல்லோருக்கும் காட்சிப் பொருளாகி விடுகிறார்கள். ஆட்டிசம் குறைபாடு இருக்கும் குழந்தைகளும் இதற்கு விதிவிலக்கல்ல.ஆட்டிசம் பற்றிய விழிப்புணர்வு  நம் நாட்டில் ஆரம்ப நிலையில் தான் இருக்கிறது.

ஆட்டிசம் பற்றி தெரிந்து கொள்ள திரு.  எஸ்  பால பாரதி அவர்களின் தளத்திற்கு செல்லுங்கள் . உதாரணத்திற்கு இரண்டு சுட்டிகள் தருகிறேன். அந்தத் தளம் முழுதுமே ஆட்டிசத்திற்கு  அர்ப்பணிக்கப் பட்டிருக்கிறது என்றே சொல்லலாம்.
உங்களுக்குத் தெரிந்த  ஆட்டிசக் குழந்தைகளின் பெற்றோர்களுக்கும் தெரியப்  படுத்துங்கள் . அவர்கள் இழந்த நம்பிக்கையை மீட்டெடுக்க உதவியாயிருக்கும்.
ஆட்டிசம்- விரைவாக அறிந்து கொள்ள
ஆட்டிசம் - வரலாறு.

குழந்தைகள்  என்றவுடன் என் சிறு  வயதுப்பருவம் வந்து நினைவில் மோதுகிறது. டிவி, கணினி  எதுவும்  இல்லாத  அந்த நாட்களில்  தாத்தாவிடம் கதைகள் கேட்டது பசுமையாய் இருக்கிறது. இந்தக்காலக் குழந்தைகளுக்கு  நாம் அதை செய்கிறோமா? எங்களுக்கே எங்கே நேரம் என்று சொல்பவர்கள்,

குழந்தைகளுக்கு  கதை சொல்வதால் என்ன நன்மைகள் விளையும் என்று திரு.பாபு நடேசன் அவருடைய  தமிழ் அறிவுக் கதைகள் தளத்தில் சொல்கிறார் .

 செவிடாய் இருந்தால்  வாழ்க்கையின் உச்சிக்கு போய் விடலாமாம். ஆச்சர்யமாய் இருக்கிறதா? படியுங்கள் உங்களுக்கே புரியும்.

கடவுளையே குழப்பிய மன்னார்சாமி  தெரியுமா? தெரியாதா ......அப்படிஎன்றால் அவசியம் இதைப் படித்து உங்கள் வீட்டு வாண்டுகளுக்கும் சொல்லுங்கள்.


கணினி மென்பொருள்  வல்லுனரான இவருடைய தளத்தில் மலை  போல் கதைகள் கொட்டிக் கிடக்கின்றன. வேண்டியதை நாம் படித்துக் கொள்ளலாம்.

இவைகளையும் படித்து சொல்லுங்கள் உங்கள் குழந்தைகளுக்கு
யார் உண்மையான பக்தன்.?
குழந்தைகள்  என்றும் குழந்தைகளே

குழந்தைகளுக்கான கதைகளை  திரு நந்தகுமார் என்பவரும்  சிறுகதைகள்  என்கிற தளத்தில் எழுதி வருகிறார்.
 பொறுமையும், பொறுப்பும் எவ்வளவு முக்கியம் என்பதை இந்தக் கதை மூலம்
தெரிந்து கொள்ளலாம்.
குழந்தைகளுக்கான கதைகளை எப்படி தேர்வு செய்ய வேண்டும் என்றும்  தெரிந்து கொள்ளலாம் வாருங்கள் .

காக்கா நரி கதை தெரியும் உங்களுக்கு. வாங்க கழுகு நரி கதை படிப்போம் .

கொழுகொழு கன்றே  உன் பெயர் என்ன? கதை மீண்டும் படித்து ரசிக்கலாமே !

பதிவை ஆரம்பிக்கும் போது மழைத் தோட்டம் என்று ஆரம்பித்து
குழந்தைகளிடம்  வந்து விட்டேன்.இப்ப தோட்டத்திற்குப்  போவோமா?
தோட்டம் பற்றித் தெரிந்து கொள்ள திரு. சிவாவினுடைய பதிவிற்கு சென்று வீட்டுத் தோட்டம்  போடக் கற்றுக் கொள்வோம் வாருங்கள்.

 ஜுன் மாதத்தில் தோட்டத்தில் என்ன செய்யலாம்? தெரிந்து கொள்ளலாமா.?

தோட்ட உலாவிற்கு சென்றால்  புகைப்படங்களுடன் களை  கட்டும் தளம் இவருடையது என்பதை உணர்வீர்கள் .

உங்கள் வீட்டில் மாடி இருக்கிறதா? மாடியில் தோட்டம் போட்டு , ....செடி வளர்த்து ....... முள்ளங்கி அறுவடை செய்யலாமாம்,சொல்கிறார்.

செடி, தோட்டம் என்றதும் பழங்கள் நினைவிற்கு வந்து விட்டது .பழங்களைவைத்து என்ன செய்யலாம். அட.....
ஃப்ரூட்  சால்ட்  செய்யலாம் என்கிறார் நம் டெல்லிப் பதிவர் திரு. வெங்கட்நாகராஜ். வெள்ளிக்கிழமைத் தவறினாலும், தவறும், இவருடைய ஃபரூட் சாலட் தவறாது.

இவருடைய பயணக் கட்டுரைகளும் வெகு சுவாரஸ்யம்.இவர் மனைவியும் பிரபல பதிவரே.

தம்பதி சமேதராய் பதிவுலகத்தைக் கலக்கி வருகின்றனர் ஆதி- வெங்கட் தம்பதியினர்.திருமதி ஆதியின் கோவை 2தில்லியில்,
மகிழ்ச்சி மேம்பட என்ன செய்ய வேண்டும் என்று  சொல்கிறார்.செய்து தான் பார்ப்போமே.
சுயம்வரத்தில் நானும், பதிவைப் படித்தால், திருமணத்திற்குப்  பெண் கிடைப்பது எத்தனை கஷ்டம் என்று புரியும்.

எல்லோர் பதிவுகளையும்  படித்து விட்டு வாங்க.
நாளை நம் அரட்டைக்  கச்சேரியைத் தொடர்வோம்.


image courtesy--google.

மேலும் வாசிக்க...

அரட்டைக் கச்சேரி -- 2

வலைச்சர வாசகர்களுக்கு ஒரு அறிவிப்பு.

நானே அறிமுக நிலையில் இருப்பதால்  நான் அறிமுகம் செய்ய வேண்டிய பதிவர்கள்  நிறைய பேர் இனி தான் பதிவுகள் எழுத ஆரம்பிக்க வேண்டும். அதனால் நான் படித்து, ரசித்த வியந்த பதிவர்கள்  சிலரைப் பற்றி  இன்றிலிருந்து உங்களுடன் பகிர்ந்து கொள்கிறேன்.


நான் வலைப்பதிவிற்கு வந்த புதிதில் ஒவ்வொரு வலைப்பூவாக சென்று மணிகணக்கில் சிலருடைய  தளங்களில்  ஆழ்ந்து விடுவது வழக்கம்.
பூஜைகளும், திருவிழாக்களும்  நிறைந்தது தானே நம்  கலாசாரம். அதைப்பற்றி ஏதாவது  தளங்கள் கிடைக்காதா என்று தேடிப் பிடித்து படிக்க ஆரம்பித்தேன். அதில் பலரை நான் தொடரவும், தவறாது படிக்கவும் செய்கிறேன். அவர்களில் சிலரைப் பற்றி இன்று பேசுவோம்.

திருக்கயிலாய பேரானந்த காட்சி கிடைக்காதா என்று தவமிருப்பவர்கள் நம்மில் பலர். அப்பர் பெருமான் கண்ட திருக்கயிலாய காட்சி நமக்காக இங்கே காத்திருக்கிறது.தற்போது குவைத்தில் இருக்கும் துரை செலவராஜ்  அவர்களின்  தஞ்சையம்பதி "  தளத்திற்குள் நுழையும் போதே  பக்தி மணம் கமழ்கிறது.

வேலுண்டு வினையில்லை, மயிலுண்டு பயமில்லை என்று ஆடிக்கிருத்திகை பற்றி நீங்கள் இங்கே படிக்கலாம்

தஞ்சையம்பதிக்கு சென்றால் தேவி தரிசனம் பெறலாம்.அது மட்டுமா? மாங்கனித்திருவிழாவிற்கு  சென்றால் காரைக்காலம்மையார் பற்றிய கதையை மீண்டும் படித்து இன்புறலாம்.

கோவிலுக்கு சென்றால் பிரசாதம் இல்லாமல் திரும்பலாமா?

ராமா என்னும் பாயசத்தை ருசித்துப் பாருங்கள் என்கிறார்  திருமதி ராஜராஜேஸ்வரி " மணிராஜ் "என்கிற தன் வலைத் தளத்தில்.
 இவர் தளத்திற்கு சென்றால்,உங்களையே  மறந்து  நீங்கள்   சுலோகம் சொல்ல ஆரம்பித்து விட்டால் ஆச்சரியப்படுவதற்கில்லை.

குரு பார்க்க கோடி நன்மை.குருவின்  கடைக்கண் பார்வை கிடைக்காதா என்று தவிக்கும் நமக்கு குரு தரிசனம் கிடைத்தால்  எவ்வளவு மகிழ்ச்சியாக இருக்கும்.

திருமதி ராஜராஜேஸ்வரி ஒவ்வொரு நாளைக்கும் ஏற்றார் போல் ஆன்மீகப் பதிவுகள் இடுவதில் கெட்டிக்காரர்.ஆடி மாதத்திற்காகவே  ராஜ மாதங்கி பற்றி எழுதியிருக்கிறார். அஷ்டலக்ஷ்மி கடாக்ஷம்  வேண்டுமா  வாருங்கள் இங்கே
வரம் பெற்று செல்லலாம்.

திருவாடிப்பூரம் ஆண்டாளைத் தரிசனம் செய்ய வாருங்கள்.ஆண்டாளின் அழகை கண் குளிரக்கண்டு ஆனந்திக்கலாம்.


வலைப்பதிவர் திருமதி கீதாசாம்பசிவம் அவர்களுடைய வலைதளத்திற்குப் போன எனக்குப் பிரமிப்பு நீங்க நேரமானது.  ஆன்மிகம்,  சமையல் என்று பல தளங்கள் வைத்திருக்கிறார். " கண்ணனுக்காக "வே ஒரு தளம்.திரௌபதி  ஐந்து பேரை ஏன் மணக்கிறாள் என்கிற காரணத்தை இங்கே சொல்கிறார்..இன்னொரு தளமான "ஆன்மீகப் பயணம் " என்னும் தளத்தில் காமதேனுவின் சரித்திரம்  படிக்கத் தவறாதீர்கள். அதே தளத்தில்  துலுக்க நாச்சியார் யார் என்றும் தெரிந்து கொள்ளலாம்.
இங்கே மதுரையை தேடிக் கொண்டிருக்கிறார் .முடிந்தால் கண்டுபிடிக்க  உதவுங்களேன்.


திருவாசகத்திற்கு உருகாதார் ஒரு வாசகத்திற்கும் உருகார்என்ற பழமொழியை நினைவிற்கு கொண்டு வருகிறது திரு விஸ்வநாத் அவர்களின் பதிவு. இவர்  திருவாசகத்திற்குப் பொருள் சொல்வது சற்றே வித்தியாசமாய், அதே சமயம் ஆர்வத்துடன் படிக்க வைக்கிறது.
 கடவுளின் பாதச் சுவடுகளைப் பார்த்து என்னவெல்லாம் கேட்கிறார் பாருங்கள். வில்வம் பற்றிய அரிய செய்திகள் இங்கே கிடைக்கும்.
மேலும் இக்காலத்தில் என்ன செய்து கொண்டிருக்கிறார் என்று பாருங்கள்.

மகாபாரதம் படித்திருக்கிறீர்களா? " முழு மகாபாரத "த்தையும் திரு. அருள்செல்வன்பேரரசன் என்பவர்  ஆங்கிலத்திலிருந்து மொழி பெயர்த்துக் கொடுக்கிறார். உங்களுக்குப் படிக்க நேரமில்லையா? கவலை விடுங்கள். ஆடியோ கோப்பாகவும் அந்தப் பதிவை வெளியிட்டு விடுகிறார்.
வஞ்சகன் கண்ணனா? கர்ணனா?  என்பதைத்  தெரிந்து கொள்ளுங்களேன். இவருடைய ஒரு பதிவிற்குப் போனால் , அடுத்தடுத்த  பதிவிற்கு நீங்களே சென்று விடுவீர்கள்.

திரு ஜெயராமன் அவர்கள் வைத்திருக்கும் தளங்களை நான் இங்கே பட்டியலிட்டால் இந்த ஒரு பதிவு போதாது.இவருடைய Santhipriya's Pages தளத்தில் ஐஸ் லிங்கம் பார்த்துப் பக்தி பரவசமாகலாம்.

மார்க்க  சகாய இறைவனைக் காண நீங்கள் மாயவரம் செல்ல வேண்டிய அவசியமில்லை.. அங்கே போய் வந்த திருப்தி தருகிறது இந்தப் பதிவு.
வள்ளி மணாளனுக்காகவே  "முருகனுக்காக " என்கிற தளத்தில் எழுதி வருகிறார்.திருப்பரங்குன்ற வரலாறு படங்களுடன்  வெகு அழகு.வெவ்வேறு ஆன்மீக சொற்பொழிவாளர்களின் சொற்பொழிவுகளும் , உபன்யாசங்களும் கூட இங்கே கேட்கக்  கிடைக்கும். 

சித்தர்கள் பற்றித் தெரிந்து கொள்ள ஆவலா?நம் தோழி  "சித்தர்கள் இராச்சியம் " என்கிறத் தளத்தில் எழுதி வருகிறார்.  நூலையும்  கண்ணாடியையும்   வைத்துக் கொண்டு நம் சித்தர்கள்  செய்து காட்டிய ஜாலம் என்னவென்று தான் பாருங்களேன். சித்தர் போகர் பற்றிய செய்திகள் இங்கே கிடைக்கும்.

பதிவு நீளம் அதிகமாகி விட்டதோ? சரி........சரி............

இன்றைய அரட்டை கச்சேரியை   இதோடு நிறுத்திக் கொள்கிறேன் . நாளை  மீண்டும் தொடர்கிறேன்..........


பட உதவி--google.

மேலும் வாசிக்க...