அறிமுகப் பதிவர்கள் அறிமுகம் செய்யும் ஆறாம் நாள்

அறிமுகப் பதிவர்கள் அறிமுகம் செய்யும் ஆறாம் நாள்

வலைச்சர மக்களுக்கு இனிய வணக்கம்..

இன்றைய நாளை ஒரூ கவிதையாய் ஆரம்பிப்போமா??!!

இன்று நம் வலைச்சரத்துக்கு அறிமுகம் ஆகும் வலைப்பூ உலகிற்கு வெளியில் இருக்கும் பதிவர் இளசு.

இவர் பெயரளவில் மட்டுமே இளசு. எழுத்துகளில் பல மூத்த எழுத்தாளர்களை விஞ்சி நிற்பார். நறுக்குத் தெறித்தார் போன்ற இவர் சுருக்கி எழுதி விரிவாக சிந்திக்க வைப்பதில் வல்லவர். இவருக்கு அறிமுகம் சொல்லுமளவு நான் வளரவில்லை என்றே நம்புகிறேன். ஆகவே, அவர் கவிதை ஒன்றை இங்கு கொடுத்து மகிழ்கிறேன்.

முடிவதை மட்டும் நினை


1993

ஆர்வம் தெறிக்கும் கண்கள்
அவசரம், கற்க ஆத்திரம்
என்னையே பார்த்தேன் உன்னிடம்
என் நிறம் கறுப்பு, உதிரமோ ஒரே நிறம்

வேற்றுமை இல்லை நம்மிடம்
நான் கற்பிப்பவன் -தான்
உன்னிடமும் கற்றுக்கொண்டேன்
என்னிடம் நீ அறிவியலை
உன்னிடம் நான் இந்நாட்டு வாழ்வியலை

கையால் சோறுண்ண நீ தடுமாற- முள்
கரண்டியோடு நான் சடுகுடு ஆட
இளையராஜாவை நான் தர
எல்விஸ் பிரஸ்லி நீ தர

பண்டம் மட்டும் அல்ல
பண்பாடும் கைமாறியது
காலவெள்ளத்தில் வாழ்க்கை
திசைமாறியது
ஒரு U திருப்பம் வந்து உன் தேசத்துக்கே
மீண்டும் என் வழி மாறியது

2003

வந்த சேதி கேட்டு ஓடி வந்தாய்
இல்லை இல்லை சக்கர வண்டியில் வந்தாய்
"என்னாச்சு டெர்மாட்?"
கண்கள் ஊற்றெடுக்கக் கேட்டேன்

புன்னகை பூத்தபடி உன் வெள்ளை முகம்
கண்ணீர் உன் ஊரில் தட்டுப்பாடு
தண்ணீருக்கு மட்டுமே என்னூரில் கட்டுப்பாடு

சொன்னாய், கோரக்கதை சொன்னாய்
சைப்ரஸ் பயணம் சைத்தானாய் அமைந்த கதை
கார் கவிழ்ந்து கழுத்தெலும்பு முறிந்த நிலை
இடைவிடா பயிற்சி இரு வருடம்

எத்தனை எத்தனை தடைக்கற்கள்
எப்படி தாண்டினாய் இளைஞனே

சக்கர நாற்காலிதான் இனி கால்கள்
மாற்றி அமைத்த கார்தான் உன் சிறகுகள்
புரிந்தும் சேர்ந்த தோழி உன் மன மருந்து
புதிதாய் கற்ற கணினிதான் பொழுதுபோக்கு

புன்னகை பூத்தபடி உன் வெள்ளை முகம்

"எப்படி சாதித்தாய் டெர்மாட்?"
" உயிரோடிருக்கும் ஒவ்வொரு நாளும்
பரிசு நாள், பயன்படுத்த வேண்டிய நாள்.
காலையில் கண்ணாடிக்கு சொல்வேன்:

Think What You Can Do-
Not What You Can't Do "

முடியாததை அல்ல
முடிவதை மட்டும் நினை

                          --இளசு.

சரி. இன்றைய அறிமுகங்களைப் பார்ப்போமா??!!

1.       பயணம் – கோவை ஆனந்த ராஜா விஜயராகவன்

இவர் வலைப்பூ முழுக்கத் திரை விமர்சனங்களாலும், கவிதைகளாலும் நிரம்பியிருக்கின்றன. தலைநகரம் என்றொரு கவிதையில் சமுதாயத்தின் இருண்ட பக்கத்தை வேகுவாகச் சாடுகிறார். பெண், ஆணுக்கு சரிநிகரல்ல..! என்றொரு கவிதையில் பெண்களின் மாட்சிமையை திறம்பட விளக்குகிறார்.

2.       கரையோரக் கனவுகள் – ஸ்ரீமதி

இவர், தன் பெருமை தானரியாதவள் என்ற சுய அறிமுகத்தோடு எழுதிவருகிறார். இவரது வலைப்பூவில் பல கவிதைகள் நம்மைக் கவர்கின்றன. குறிப்பாக, முடிவிலி என்ற கவிதையில் காதல் பேசி சின்னச் சின்னதாய் சிலிர்க்க வைக்கிறார் தம் கவிதைகளால்..! வண்ணங்கள் குழைத்த வானவில் என்ற கவிதையில் மூர்க்கமான கோபத்தை வண்ணக் கலவையாக எண்ணி வடித்திருக்கிறார். அருமையான, தகுந்த படங்கள் மனதைக் கொள்ளை கொள்கின்றன.

3.       வானம் உன் வசப்படும் – புதியவன்

தினம் தினம் புதுப்பிக்கப்படுகிறேன், நேற்றைய நிகழ்வுகளால் என்ற அறிமுகத்தோடு எழுதத் துவங்கிய இவர், காதல் கவிதைகளால் வலைப்பூவை அலங்கரிக்கிறார். எனக்கானதொரு தேவதை என்ற கவிதை, நம்மை உலகம் தாண்டி பால்வெளியில் பறக்கச் செய்கிறது. ஒரு மழைத்துளியின் போராட்டம் என்ற கவிதையோ, மழையோடு துளித் துளியாய் நாமும் பெய்த அனுபவத்தைக் கொடுக்கிறது.

4.       ப்ரியமுடன் வசந்த்

பிரியமானவன் என்று தன்னை அறிமுகப்படுத்தும் இவர், 2008 ஆம் ஆண்டு முதல் எழுதி வருகிறார். கவிதை, கட்டுரை, உரைநடை, சுயபுராணம் என பல பிரிவுகளாக எழுதியிருக்கிறார். இவறின் கவிதையில், மன்மத மாதம் 5 மற்றும் மன்மத மாதம் 6 ஆகிய கவிதைகள் காதல் ரசம் கொட்டுகிறது. மெகு..மெகு..லகி..மகி..மா என்ற இவரின் கவிதை எதைப்பற்றிச் சொல்கிறதென்று புரிகிறதல்லவா??!!

5.       தமிழும், நானும் – சலீகா  
     “விருப்பத்துடனே விவரங்கள் தவிர்க்கிறேன். தொட்டிலுக்குள் தலைமறைக்கும் குழந்தை... இலைகளுக்குள் இதழ் மறைக்கும் பூக்கள்... மேகத்தில் தனை மறைக்கும் பிறை ... முக்காட்டில் முகம் மறைக்கும் பெண்... இவை வழி நானும் எழுத்தின் பின் எனை மறைக்கிறேன்.” என்ற சுய விவரத்துடன் எழுதி வரும் இவர் வலைப்பூவில் பரண் பொழுதுகள் என்ற கவிதை, நம் வீட்டு பரண் பற்றி யோசிக்க வைத்துவிட்டது. ஆகுதீ என்ற கவிதையோ, அவதியில் பணிக்குச் செல்லும் பெண்கள் பற்றி நன்கு எடுத்தியம்புகிறது. இவர் கதைகளிலும் தன் அற்புதமான எழுத்தால் கவர்கிறார். குறிப்பாக, செண்பகமரம் சிறுகதை கவிதையாய் மனதில் வாசம் செய்தால், கதை கதையாம் காரணமாம் என்ற சிறுகதையோ, எதார்த்தமான நடையில் நகைச்சுவை ததும்ப மகிழ வைக்கிறது.

இன்றைய அறிமுகங்களின் தொகுப்பு உங்களுக்கு பயனுள்ளதாக இருந்திருக்குமென நம்புகிறேன். மிண்டும் நாளை என் இறுதிப் பதிவுடன் சிந்திப்போம்.

நட்புடன்,

பூமகள்.

மேலும் வாசிக்க...

அசத்தும் பதிவர்கள் அறிமுகப்படுத்தும் ஐந்தாம் நாள்

அன்பு நட்புகளே..!

இந்த வலைச்சர தேடலில் பலப்பல எண்ணங்களின் கவித்துவ வடிவத்தைக் கண்டேன்.. இத்தனை இத்தனை திறமைசாலிகள் இருக்கும் தமிழ் வலைப்பூக்கள் கண்டு மனம் நெகிழ்கிறேன்.

இன்று வலைப்பூ பதிவில்லாத நல்ல பதிவர் சுகந்தப்ரீதன். இவரது எழுத்துக்கள் மிக எதார்த்தமான, அதே சமயம், மனதில் ஆழமான அதிர்வை ஏற்படுத்தக் கூடுபவை.

தவிப்பு

தடாகத்தில் தாவிக்குதிக்கும்
தவளையாய் தவிக்கிறேன்
தன்னிலை மறந்து
தாமரைநீ நீராடுகையில்..!!

%%%%%%%%%%%% 

இறுதி கணக்கு

உயிர்போகும் தருவாயில்
உயிர்பெற்ற கணக்கிது..!

என் வாழ்வின்
இன்பங்களை கூட்டி
துன்பங்களால் கழித்து
வந்த விடையை என்
வாழ்நாட்களால் பெருக்கி
வாழ்ந்த நாட்களால்
வகுத்துப் பார்க்கையில்
எல்லோருக்கும் போலவே
சமவிகிதமாய் என் வாழ்வின்
சதவிகிதம்-எதிர்மறை குறியில்!

                             --சுகந்தப்ரீதன்

சரி அன்பர்களே.. இன்றைய அறிமுக வலைப்பூக்களின் தொகுப்புக்கு செல்வோமா??!!

1.       சைக்கிள்

     மழை பற்றிய இவரின் பின் கவிதையில், மழை உணர்த்திய சோகத்தை வடித்திருக்கிறார். இப்படியான சோகமான பேருந்து பயணத்தை நாமும் பல தடவைகள் கடந்திருப்போம் எனில் இக்கவிதை நம் மனதுக்கு நெருக்கமாகும். இலைமொழி என்ற கவிதை, இலை சொல்லும் கவிதையாக விழுகிறது நம்மில்.. அனுபவப்பகிர்வில், பயணம் பற்றிய இவரின் பதிவுகள் அசர வைக்கின்றன. பயணம் 4: நாங்கள் சென்றோம் என்ற பதிவு பெண்களுக்கு புது நம்மிக்கையையும் மகிழ்வையும் தருவதாக இருக்கிறது.  

2.       காகித ஓடம் – பத்மா

     கவிழாத காகித ஓடம் என்ற துணைத் தலைப்புடன் இருக்கும் இவ்வலைப்பூவில் வன்புணர்ந்த வீடுகள் வடிக்கும் கண்ணீர் என்ற கவிதை, ஒரு வீட்டின் வலி சொல்லி நிற்கிறது. மிக நேர்த்தியான கவிதை மனத்தைக் கவர்கிறது. அசையுமாசை என்ற கவிதையில் அழுத்தமான கருத்தொன்றை விட்டுச் செல்கிறார். 
 

3.       அடர் கருப்பு – எஸ்.காமராஜ்

     இருள் என்பது குறைந்த வெளிச்சம் என்று வெளிச்சமிக்க கருத்தோடு ஆரம்பிக்கும் வலைப்பூ, உலக சினிமாக்களின் விமர்சனங்களையும் பல செய்திகளையும் கொண்டதாக இருக்கிறது. குறிப்பாக, மூன்று பேருந்து பயணங்கள் என்ற பதிவில் இவர் சொல்லும் இறுதிப் பயணம் மனதை வெகு நேரம் கட்டிப் போடுகிறது. எதிர்பார்ப்புகள் அற்று கொடுப்பதை மட்டுமே நினைத்திருக்கும் அற்புதமான தாவரம் உங்களுக்கு தெரியுமா? அது பற்றி இவர் படைத்த கவிதை செடிக்குள் கிடக்கும் பனம்பழம் கவிதையின் மனம் நாசி வழி நெஞ்சம் நிறைக்கிறது.

4.       பெரிய எழுத்து – தஞ்சாவூர் கவிராயர்

     இவர் மிக அசத்தலான வலைப்பூ வடிவமைப்பைக் கொண்டிருக்கிறார். புகைப்படங்களைச் சொடிக்கினால் கவிதை முளைக்கிறது. உப்பூ என்றொரு கவிதை, அது தரும் வலி.. கண்கள் பணிக்கச் செய்கிறது. உப்பு மூட்டை சுமப்பவர் மட்டுமல்ல.. மனக்கண்ணில் பொதி மூட்டையாக அரிசி, கோதுமை என சுமக்கும் தொழிலாளிகளும் நினைவில் வந்து போகிறார்கள்.. நான் திண்ணையில் உட்கார்ந்து கொண்டிருக்கிறேன் கவிதையோ நிராகரிக்கப்படும் வயோதிக மனிதரின் துயர் சொல்லி நிற்கிறது.

5.       தக்ஸின் சிறுகதைகள் 
     ஒரு கத்துக்குட்டியின் சிறு முயற்சி என்று தலைப்பில் ஆரம்பிக்கும் இவர் வலைப்பூ. சிறுகதைகள் வெகு சிலவற்றையே கொண்டிருக்கின்றன. இவர் தன்னைப் பற்றி சொல்கையில், ஒரு சாதாரண வாழ்க்கை வாழ்ந்து கொண்டு, அசாதாரண வாழ்க்கையைக் கனவில் வாழ்பவன் என்று சொல்கிறார். குறிப்பிடும்படியான பதிவுகள் எனில், வழித்துணை என்ற சிறுகதை, இறப்பின் பின் வாழும் மனிதர்கள் பற்றி சொல்கிறது. மனிதாபிமானம் என்ற சிறுகதையோ, மனம் வலிக்க வைக்கிறது. தடாலடியான முடிவுகள் இவரின் கை வந்த கலை. ஏனோ வலைப்பூவில் நிறைய பதியவில்லை. பதிவுலகம் தாண்டி, இவரின் படைப்புகள் பல படித்தவரையில் நல்ல எழுத்தாளரை இவருள் வைத்திருக்கிறார் என்று திட்டவட்டமாகச் சொல்வேன்.

     இன்றைய அறிமுகங்கள் உங்களின் மனம் கவர்ந்திருக்குமென நம்புகிறேன். மிண்டும் நாளை சிந்திப்போம்.

அன்புடன்,
பூமகள்.

மேலும் வாசிக்க...