வலைச்சரத்தில் ஏழாம் நாள் _ ஞாயிறு மலர்

அனைவருக்கும் இனிய காலை வணக்கம், இன்றுடன் முடியும் ஒரு வாரத்திற்கான வலைச்சர ஆசிரியர் பொறுப்பை மனநிறைவுடன் முடித்து உங்களிடமிருந்து விடை பெற வந்துள்ளேன். ஹலோ, என்ன ! எல்லோரும் சோகமாயிட்டீங்க ! வாராவாரம் இப்படித்தான் ஒருவர் விடைபெறுவதும், வேறொருவர் பொறுப்பை ஏற்க வருவதுமாக இருக்கும். இதற்கெல்லாம் கவலைப்படலாமா !

எங்கோ ஒரு மூலையில் இருந்த என்னை சீனா ஐயா பொறுப்பை ஏற்க அழைத்தபோது நான் 'ஆடி'த்தான் போனேன். அதன்பிறகான 'ஆவணி, புரட்டாசி'யையெல்லாம் எப்படி சமாளித்தேன் என்பது வேறுவிஷயம். இதோ அதோ என பல மாதங்கள் ஓ(ட்)டியபிறகும், பொறுமையாக இருந்து எல்லா வசதிகளையும் செய்துகொடுத்ததற்கு ஐயாவுக்குத்தான் நன்றி சொல்ல வேண்டும்.

ஒரு சிறிய வட்டத்திற்குள்ளேயே பதிவுகளைப் படித்துவந்த நான் அதன் பிறகுதான் பல பதிவர்களையும் தேடிச்சென்று படிக்க ஆரம்பித்தேன். இந்த ஒரு வாரமும் வெற்றிகரமாக அமைய உறுதுணையாய் இருந்த காமாக்ஷிம்மா, சகோதரி திருமதி மகி, சகோதரி திருமதி.ரஞ்ஜனி அவர்கள், சகோதரி திருமதி.இராஜலக்ஷ்மி அவர்களுக்கும் என் நன்றியைச் சொல்ல கடமைப்பட்டுள்ளேன்.

அறிமுகப் பதிவர்களிடத்தில், அவர்கள் அறிமுகமான தகவலைக் கொண்டுசேர்த்த திரு. திண்டுக்கல் தன‌பாலன் அவர்களுக்கும், திரு.ரூபன் அவர்களுக்கும் நன்றி பல.

மேலும் தங்கள் பொன்னான நேரத்தை செலவிட்டு, பின்னூட்டங்கள் வாயிலாக உற்சாகத்தைக் கொடுத்த அனைத்து நல்ல உள்ளங்களுக்கும் நன்றி பல. இந்த வலைச்சரம் மூலமாக நிறைய பதிவுலக நண்பர்கள் கிடைத்துள்ளார்கள். இனிதான் அவர்களுடைய தளங்களுக்குச் செல்ல வேண்டும்.

இந்த நல்ல வாய்ப்பை நல்கிய‌ சீனா ஐயாவுக்கு மீண்டும் என் நன்றியைத் தெரிவித்துக்கொண்டு விடைபெறுகிறேன், நன்றி !

"""""""""""""""""""""""""""""""""""""""""""""""""""""""""""
 வழமைபோல் இன்றைய அறிமுகங்களைப் பார்த்துவிடுவோமே ! அவற்றைப் படித்துப் பார்த்துவிட்டு தங்களது கருத்துகளையும் பகிர்ந்துகொள்ளுங்களேன்!

"""""""""""""""""""""""""""""""""""""""""""""""""""""""""""

1) திருமதி இராஜராஜேஸ்வரி அவர்களின் வலைத்தளம் பக்தி மணம் கமழும்  மணிராஜ். தினமும் ஒரு பதிவென வருடம் முழுவதும் வந்துகொண்டே இருக்கிறது. தினமும் ஒருமுறை இந்த வலைப்பதிவுக்கு வந்து, வெளியாகியுள்ள கடவுளை வணங்கி மனமகிழ்ச்சியுடன் அன்றைய நாளைத் துவங்கலாம். அன்றன்று வரும் விசேஷங்களின் தன்மைக்கேற்ப‌ பதிவுகளாக வருவது இன்னும் சிறப்பு. இவர்களின் பணி மகத்தானது. வாழ்த்துகள்.

 """"""""""""""""""""""""""

2) ஆலயம் கண்டேன் என்ற‌  வலைப்பதிவை நிர்வகிப்பவர் திருமதி ப்ரியா பாஸ்கரன் அவர்கள். இவர் ஆங்கிலத்திலும், தமிழிலும் அவர் தரிசித்த ஆலயங்களைப் பற்றி அழகாக எழுதியிருக்கிறார். ஆங்கிலத்தில் நிறைய பதிவுகள் உள்ளன. தமிழில் சில பதிவுகளே எழுதியிருக்கிறார். ஆனாலும் அவையனைத்தும் முத்தானவை. என்னை நிறையவே கவர்ந்துவிட்டன. திருவண்ணாமலையைப் பற்றி எழுதியதும் அதற்கு ஒரு காரணம்.

கோயிலின் மூலை முடுக்கெல்லாம் சுற்றி வந்திருக்கிறேன். தீபம் சமயத்தில் மாடவீதி சுற்றி வருவதும், மலையைச் சுற்றுவதும், (பாதி)மலை ஏறி வந்ததும் உண்டு.

நினைத்தாலே முக்தி தரும் திருவண்ணாமலையைப் பற்றிய அரிய தகவல்களை  இங்கே நம்முடன் பகிர்ந்துகொள்கிறார். படித்துப் பார்த்து, நினைத்த மாத்திரத்திலேயே, முக்தி பெறுவோமே !!

""""''''''''''''''''''''''''''''''''''''''
3)  திருமதி காஞ்சனா ராதாகிருஷ்ணன் அவர்களின் வலைப்பூ சிறுவர் உலகம் . இங்கு ஏராளமான நீதிக்கதைகள் உள்ளன.  உதாரணத்திற்கு ஒன்றிரண்டு தலைப்புகளைப் பார்க்கலாம்.

புத்திக் கூர்மை என்ற நீதிக்கதையில் ஆடு தன் புத்திக்கூர்மையால் எப்படி  சிங்கத்திடமிருந்து தப்பியது என்பதை அறியலாம்.

மரம் வளர்ப்பதன் அவசியத்தை மரத்தின் அவசியம் என்ற நீதிக்கதையின் மூலம் குழந்தைகளுக்குச் சொல்ல‌லாம்.

வீட்டில் சிறுவர், சிறுமியர் இருந்தால் படிக்கச் சொல்லலாம், அல்லது நாம் படித்து அவர்களுக்குச் சொல்லலாம்.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

4)  இளையநிலா என்ற தளத்தின் ஆசிரியர் சகோதரி இளமதி அவர்கள். இவரது பதிவுகளில் இவரது கவிதையும், க்விலிங் வேலைப்பாடும் மிகப் பிரபலமானவை. அதனுடனேயே மேலும் ஒரு சிறு கவிதையும், பதிவோடு பகிரும் பதிவர் என்று, வலையுலகில் இருந்து, திறமையான பதிவர்களில் ஒருவரைத் தேர்வு செய்து அறிமுகமும் செய்து வைக்கிறார்.

இவரது பதிவுகள் முழுவதும் கவிதைகள் கொட்டிக் கிடக்கின்றன. பதிவுலகில் இரண்டாம் ஆண்டில் அடியெடுத்து வைத்திருக்கும் தோழி இளமதி, மேலும்மேலும்  இனிமையான கவிதைகளைப் படைத்து உலகப் புகழடைய வாழ்த்துவோம்! !

'"""""""""""""""""""""""""""""""""""
5) திரு.ரூபன் அவர்களின் வலைத்தளம்  ரூபனின் எழுத்துப்படைப்புக்கள். இவர் கவிதைப்போட்டி, கட்டுரைப்போட்டி என ஆரோக்கியமான முறையில் போட்டிகள் வைத்து, திறமையான நடுவர்களைக்கொண்டு, தேர்ந்தெடுத்து, வெற்றி பெற்றவர்களுக்கு பரிசுகளும், பதக்கங்களும், சான்றிதழ்களும் வழங்கிக்கொண்டிருக்கிறார்.

தற்போது தைப்பொங்கலை முன்னிட்டு மாபெரும் கட்டுரைப்போட்டியை அறிவித்திருக்கிறார். அவரது முயற்சியில் வெற்றிபெற வாழ்த்துவோம்.

"""""""""""""""""""""""""""""""""""""""""""
6) திருமதி ல‌க்ஷ்மி பாலகிருக்ஷ்ணன் அம்மா அவர்களின் வலைப்பூ மலர்வனம். இங்கு இலக்கியம், கதைகள், கட்டுரைகள், சமையல் குறிப்புகள் என ஏராளமாக உள்ளன.

கணவன்,மனைவி இரண்டு பேருமே வேலைக்குப் போனாலும், சுமை என்னவோ மனைவிக்குதான் என்பதை புரிதல் என்ற தலைப்பிலுள்ள இந்தக்கதை கூறுகிறது.

இவர் செய்த‌ திணை அடை/தோசையை வீட்டிலுள்ளவர்கள் வாயைத் திறக்காமலேயே சாப்பிட வைக்க இவர் செய்யும் தந்திரம்தான் என்ன ! அது என்ன என்பதை நாமும் தெரிந்துகொண்டு நம் வீட்டிலும் அதை செயல்படுத்திப் பார்ப்போமே !
,,,,,,,,,,,,,,,,,,,,,,,,,,,,,,,,,,,,,,,,,

7)    ஆசிரியர் மோகன்குமார் அவர்களின் வலைப்பதிவு  வீடுதிரும்பல். அனுபவங்கள், பயணக்கட்டுரைகள், சிறுகதைகள், சினிமா விமர்சனங்கள் போன்ற‌ எண்ணற்றவை பொதிந்துள்ளன இவரது பதிவுகளில்.

இணையமே கதியாகக் கிடப்பவர்களுக்கானது   இணையப் பித்து என்ற இந்தப்பதிவு. சிந்திக்க வேண்டிய விஷயம்தான்.

ஆட்டோவில் போவதென்றாலே ஒரு சுகம்தான். சமயங்களில் முகம் சுளிக்கும்படியான நிகழ்வுகளும் நடப்பதுண்டு. ஆனால் சென்னையை கலக்கும் நம்ம ஆட்டோ - நிறுவனர் அப்துல்லா அவர்களுடைய சேவை மனப்பான்மையைக் காண இங்கே போய்த்தான் வாருங்களேன்.

""""""""""""""""""""""""""""""""""""""""""""""""""""""""""
8) எழுத்தாளரின் பெயரிலேயே உள்ளது ஆறுமுகம் அய்யாசாமி   என்ற வலைப்பூ.

இவர் ஓர் அடிமையாம், இவரது பலவீனங்கள்தான் என்னென்ன? உறவுகளைப் பற்றிய அழகான கவிதை 'அடிமையின் பலம்!' என்ற தலைப்புடன். விருப்பத்தின்பேரில் தன் உறவுகளுக்கு எப்படியெல்லாம் தான் அடிமையாக இருக்கிறார் என்பதைக் காட்டுகிறது இந்த கவிதை.

விசேஷங்களுக்குப் போனால் மொய்யை எழுதி(அழுது)விட்டு வருவார்கள் என‌ கேள்விப்பட்டிருக்கிறோம். ஆனால் அந்த மொய்யை நோட்டுப் புத்தகத்தில் எழுதுபவர்களின் நிலையைப் பற்றிக் கவலைப்பட்டுள்ளோமா ? இங்கே  'மொய்யெனப்படுவது…!' என்ற தலைப்பில் நகைச்சுவையாகக் கூறி நம்மை சிரிக்க வைத்துவிடுகிறார்.

புதிதாக எழுத ஆரம்பித்திருக்கும் இவர் மேலும் சிறக்க வாழ்த்துகள்.

"""""""""""""""""""""""""""""""""""""""""""""""""""

மீண்டும் ஒருமுறை உங்கள் அனைவருக்கும் நன்றி கூறி விடை பெறுகிறேன், நன்றி !!

""""""""""""""""""""""""""""""""""""""""""""""""""""""""

மேலும் வாசிக்க...

வலைச்சரத்தில் ஆறாம் நாள் _ சனி மலர்

அனைவருக்கும் இனிய காலை வணக்கம். இன்றைய பதிவிலும் பிரபலமானவர்களே வந்துள்ளனர். இருப்பினும் அவர்களின் பதிவுகளில் எனக்குப் பிடித்த சிலவற்றை உங்களுடன் பகிர்ந்துகொள்ள விருப்பம். படித்துவிட்டு உங்களின் கருத்துகளையும் பகிர்ந்துகொள்ளுங்களேன் !! 
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,


 1) வலையுலகில்  இவரைத் தெரியாதவர் யாராவது இருக்க முடியுமா? இவரை நான் அறிமுகம் செய்வதா ? ஆனாலும் என் பார்வையில் நான் சொல்லியே ஆக‌வேண்டும். தன்னுடையை பெயரிலேயே திண்டுக்கல் தனபாலன் என்ற வலைதளத்தை எழுதுகிறார் இவர்.

தன் மனச்சாட்சியுடன் பேசுவதை கேள்விபதில் முறையில் பதிவாக வெளியிட்டு வருகிறார். ஒவ்வொரு பதிவின் முடிவிலும் வாசகர்களின் முன் ஒரு வினாவை எழுப்புகிறார். இவரது வலைப்பூவில் நுழைந்தால் நீதிபோதனை வகுப்பிற்குள் போனது போலவே இருக்கும்.

நிறைய பதிவுகள் உள்ளன.  அனைத்து பதிவுகளையும் நீங்களும் படித்திருப்பீர்கள். அவற்றிலிருந்து ஒன்றிரண்டு பதிவுகளை உங்கள் பார்வைக்கு வைக்கிறேன்.

முயற்சி+பயிற்சி=வெற்றி என்ற தலைப்பில் பள்ளிக் குழந்தைகளின் நகைச்சுவை, கவிதைகள், கட்டுரைகள், பொன்மொழிகள் என  அவர்களின் திறமைகளை இங்கே வெளியிட்டு அவர்களின் மனதிலும் மகிழ்ச்சியை விதைத்திருக்கிறார்.

'நம்மையன்றி வேறு யாரால் முடியும்' என்ற தலைப்பில் பள்ளிக் குழந்தைகளின் திறமைகளைத் தொகுத்து இங்கே கொடுத்திருக்கிறார். இதிலுள்ள நகைச்சுவையை விரும்பி படித்தேன்.

உன்னால் முடியும் நம்பு என்ற பதிவிலும் குழந்தைகளின் திறமை வெளிப்படுகிறது. இவற்றைத் தொகுத்துக் கொடுத்ததிலேயே இவரது திறமையும் புலனாகிற‌து.

இவரது பின்னூட்டத்தால் நான் உட்பட நிறைய பேர் உற்சாகத்துடன் பதிவுகளை வெளியிட்டுக் கொண்டிருக்கிறோம். வாழ்த்துகள்.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,    


2) மனம் போன போக்கில் என்ற வலைப்பூவின் ஆசிரியர் என்.சொக்கன். தன் குழந்தைகளுடனான அனுபவங்களைப் பகிர்ந்துகொள்கிறார். நிறைய புத்தகங்கள் எழுதியிருக்கிறார்.

"சினிமா பாடலும் ஒரு கவிதைதான், கலாச்சார தொடர்ச்சிதான். ஒரு சினிமாபாடல் புகழை அடையும்போது இசையையும், பாடியவரையும், அவ்வளவு ஏன் வாயசைத்தவரையும் கொண்டாடும் நாம் ஏன் பாடலாசிரியரை மறந்துவிடுகிறோம் ? "  இதற்கு மாற்று என்ன? 'நாலு வரி' என்ற தலைப்பில் ஆசிரியர் என்னதான் சொல்கிறார் என்று இங்கே போய்த்தான் பார்ப்போமே !

'தினம் ஒரு பா' என்ற வலைதளத்தில் இவர் எழுதிய கட்டுரைகள் இதே பெயரிலேயே நூலாக வெளிவந்திருக்கிறது. ஒரு பழைய புத்தக்ககடையில் பத்து ரூபாய்க்கு வாங்கிய ‘குறுந்தொகை : புலியூர் கேசிகன் உரை’ என்ற‌ இந்த நூல்தான் இதை எழுதத் தூண்டியதாக  பா(க்கள்) என்ற தலைப்பில் சொல்கிறார்.

வந்தாளே ராக்கம்மா பதிவில் ஆசிரியரும் அவரது மகள் நங்கையும் ஒரு கர்நாடக நாட்டுப்புற பாடலுக்கு தமிழில் வார்த்தைகளைப் போட்டு பாடியதைக் கேட்கும்போது, நம்மையும் அறியாமல் நம் உதடுகளும் அப்பாடலை முணுமுணுக்கத் தொடங்கிவிடுகிறது.  அவர் பணி மேலும் சிறக்க வாழ்த்துகள்.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,


3)  விழியன் என்ற புனைபெயரில் கதைகளை எழுதுபவர் எழுத்தாளர் திரு.உமாநாத். இவரது வலைப்பூ விழியன் பக்கம். குழந்தைகள் புத்தகத்திற்காக பல விருதுகள்  வாங்கியிருக்கிறார். சிறுவர்களுக்கான அறிவியல் கதைகளையும் எழுதியிருக்கிறார்.

 நாம் குழந்தைகளுக்கு ஒரு கதையைச் சொல்லும்போது அது இருவருக்குமான உரையாடலாக அமைய வேண்டும். அவர்களின் கற்பனைத் திறனையும், மொழித் திறனையும் வளர்ப்பதாக இருக்க வேண்டும். நீதியை அவர்களிடமும் கேட்டுத் தெரிந்துகொள்ள வேண்டும் என்பதை பாட்டி வடை சுட்ட கதையைக் கொண்டு விளக்குகிறார்.

பெற்றோர் பெரிய காதுகளை வளர்த்துக்கொள்ள வேண்டுமாம், ஏன்? "சற்றே பெரிய காதுகள்" என்ற தலைப்பில் விளக்கம் சொல்கிறார் இங்கே ! முடிவில் நாமும் வளர்க்க ஆரம்பித்துவிடுவோம் என்பது உண்மை.

இதுமட்டுமல்லாமல் இந்த பக்கத்திற்கு சென்றால் நல்ல தெளிவான புகைப்படங்களைப்  பார்த்து ரசிக்கலாம். அதில் வண்ணத்துப்பூச்சி, /மழைத்துளிகள் இவையெல்லாம் அழகு.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,


4) திருமதி ஆதிவெங்கட் அவர்களின் வலைப்பூ கோவை2தில்லி. இவரும் பன்முக எழுத்தாள‌ர். சமையல் மட்டுமல்லாது பயணக் கட்டுரைகள், புத்தக விமர்சன‌ங்கள், அனுபவம் என அனைத்திலும் கலக்குகிறார்.

தற்போது தன் மகளின் மழலைப் பள்ளி வாழ்க்கையைப் படம் பிடித்துக்கொண்டிருக்கிறார். இவை எல்லாம் நினைதுநினைத்து மகிழ வேண்டிய நினைவுகள். இவற்றைப் படிக்கும்போது நம் ஒவ்வொருவரின் நினைவுகளும் அந்த பசுமையான நாட்களில் மூழ்குவது உறுதி.

நம்வீட்டு அஞ்சறைப்பெட்டியில் இருக்கும் பொருள்களை வைத்து மறந்தேபோன கஷாயம் செய்யும் முறையை இங்கே  சொல்லித் தருகிறார்.

இங்கே தான் படித்த புத்தகங்களைப் பற்றிய விமர்சனமும் உண்டு.

சமீபத்தில் தான் மேற்கொண்ட இன்ப சுற்றுலாவைப் பற்றி இங்கே சுவைபடக் கூறுகிறார்.

இவரது கணவரின் வலைப்பூ வெங்கட்நாகராஜ். நிறைய‌ பயணக் கட்டுரைகள்,புத்தக விமர்சனங்கள் எழுதுகிறார். வெள்ளிக் கிழமைகளில் இவர் தரும் ஃப்ரூட் சாலட் பிரசித்தமானது.

இவர்களது மகள் ரோக்ஷ்ணியும் வெளிச்சக் கீற்றுகள் என்ற வலையில் தான் வரைந்த கணினிப் படங்களைப் பதிவேற்றுகிறார்.

வரும் காலங்களில் இவர்கள் மூவரும் ஒரே இடத்திலிருந்து பதிவுகளை வெளியிட வாழ்த்துவோம்.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,


5)  திருமதி அதிரா அவர்களின் வலைப்பூ  என்பக்கம். இவரும் ஒரு பன்முகத் திறமையாளர். சமையல், கதைகள், பயணக்கட்டுரைகள்,கைவேலை என அனைத்திலும் திறமையானவர். இவரது வலைப்பூவில் கலகலப்புக்கு பஞ்சமிருக்காது. சோர்வாக இருக்கும் நேரத்தில் இங்கே சென்று வந்தால் புத்துணர்ச்சி வந்துவிடும். இவர் தளத்திற்கு போய் பதிவுகளைப் படித்துவிட்டு சத்தம் போடாமல் பூனை மாதிரி வெளியேறி விடுவேன்.

ஒரு மனத்தக்காளி செடிக்காக இங்கே இவர் படும்பாட்டை பாருங்களேன்.

இவர் நகைச்சுவையாக எழுதுவதோடு மட்டுமல்லாமல் 'கங்கையிலே என் படகு மிதந்து கொண்டிருக்கிறது!!!' என்ற தலைப்பில் ஒரு உண்மை சம்பவத்தை கதையாக்கி வாசகர்களை குடம்குடமாக கண்ணீர் சிந்தவும் வைத்துவிடுகிறார்.

 'அப்பாவின் அட்வைஸ்....' என்ற பதிவில் இவரது அப்பா இவர்மேல் கொண்டிருந்த நம்பிக்கையை வெளிப்படுத்துகிறார்.

இப்படியே தொடர்ந்து கலகலப்பாகப் பதிவுகளை வழங்க வாழ்த்துவோம்.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,


6) சமையல் அட்டகாசங்கள் என்ற வலைப்பதிவின் ஆசிரியர் சகோதரி ஜலீலாகமால். சைவ,அசைவ உணவு வகைகள், குழந்தை வளர்ப்பு, அவர்களுக்கான உணவு முறை, தையல் டிப்ஸ் என பலவற்றிலும் தன் பங்களிப்பை வழங்கியுள்ளார். எல்லாவற்றையும் ஒருசேர பார்க்க அவரது வலைதளத்திற்குள் சென்று வந்தால்தான் முடியும். அவ்வளவு கொட்டிக் கிடக்கிற‌து !

 டயட்டில் இருப்பவர்களுக்காக நிறைய குறிப்புகள் இங்கேயுள்ளன. கர்ப்பிணி பெண்கள், பிள்ளை பெற்றவர்களுக்குமான சமையல் குறிப்புகளும் உள்ளன.

சகோதரி பல்வேறு சமையல் போட்டிகளில் கலந்துகொண்டு வாங்கிய பரிசுகளையும், விருதுகளையும் பார்க்க வேண்டுமா? இங்கே சென்று பார்த்துவிட்டு வாருங்களேன். இவரது திறமைக்கு இதுவே சான்று.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

பதிவுகளைப் படித்துவிட்டு, கருத்துகளைப் பகிர்ந்துகொண்டு, நாளை நடக்கும் பிரிவுபசார விழாவிற்கு தவறாம‌ வந்திடுங்க, கடையைக் கட்டுவதற்குள் போனால்தான் நிதானமாகப் பார்த்து வாங்க முடியும், அதாங்க 'கிஃப்ட்'ஐச் சொன்னேன். மறக்காம, கையோடு எடுத்திட்டும் வந்திடுங்க.....!!  நன்றி !
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

மேலும் வாசிக்க...

வலைச்சரத்தில் ஐந்தாம் நாள் _ வெள்ளி மலர்

 அனைவருக்கும் இனிய காலை வணக்கம். இன்றும் சில பதிவர்களுடன் உங்களை சந்திக்க ஆவலுடன் வந்துள்ளேன். முன்பே அறிமுகமானவர்களாக இருந்தாலும் அவர்களை என்னுடைய பார்வையிலிருந்து உங்களுக்கு அறிமுகப்படுத்த விருப்பம் கொண்டுள்ளேன். படித்துவிட்டு உங்களின் கருத்துகளையும் பகிர்ந்துகொள்ளலாமே !!
               ::::::::::::::::::::::::::::::::::::::::::::::

1) திருமதி இராஜலக்ஷ்மி அவர்களின் வலைப்பூ அரட்டை . இவர் அரட்டையை ஆரம்பித்தால் எல்லோரும் வந்து களைகட்ட வைத்துவிட்டுத்தான் போவார்கள். இவருக்கு வரும் பின்னூட்டங்களை வைத்தே இவர் எவ்வளவு பிரபலமானவர் என்பதைத் தெரிந்துகொள்ளலாம். இப்போதெல்லாம் ப்ளாக் ஹெட்டரை மாற்றிமாற்றி போட்டு பொறாமைபட வைத்துக்கொண்டிருக்கிறார்.

இவரது பதிவுகளில் வரிக்குவரி நகைச்சுவை இழைந்தோடும். சில எழுத்தாளர்கள் தங்களது கதை மாந்த‌ர்களுக்கு ஒரு பெயரை நிர்ணயித்து அவர்களது எல்லா கதைகளிலும் அவர்களை உலவ விடுவார்கள். அதைப் போலவே இவருடைய பதிவுகளிலும் வரும் விக்ஷ்ணு, இராசி என்ற இருவருமே வாசகர்களிடத்தில் பிரபலம்.

இவரது பதிவுகள் மட்டுமல்லாது மின்மடல்களும்கூட நகைச்சுவையாகத்தான் இருக்கும். ஒருமுறை உதவி என்று ஓடியபோது, "இதுவரைக்கும் போதுமா, இன்னும் கொஞ்சம் வேணுமா" என்று கேட்டு மங்கல்ராயனுடன் போட்டிபோட்டு சீறிப் பாய்ந்துகொண்டிருந்த என் டென்ஷனை அப்படியே பூமிக்குத் திருப்பிவிட்டு வெற்றிக்கோட்டைத் தொடவிடாமல் செய்த பெருமை இவரையே சாரும். அதை இப்போது நினைத்தாலும் சிரிப்புதான்..

வரலாற்றுத் தலைவர்களைப் போல ராசியும் இங்கே சரித்திரம் படைத்திருக்கிறாராம், அது எப்படி என சென்று பார்த்துவிட்டு வருவோமே.

இவரது கணவரின் கனவுக்கன்னி யார்? எதற்காக அவர்களைப் பார்த்தால் இவருக்கு பொறாமையாக இருக்கிறதாம்? எல்லாவற்றிற்கும் இங்கே தன் நகைச்சுவை எழுத்துக்களாலேயே பதிலைத் தருகிறார்.

'ராசி " சூப்பர் சிங்கர் "ஆகிறாள்' இந்தப் பதிவை எத்தனை முறை படித்தாலும் அலுக்காது.

உதாரணத்துக்கு சொன்னவை ஒருசில‌தான். உள்ளே போனால் நீங்கள் விழுந்துவிழுந்து சிரிக்காமல் வெளியேறமாட்டீர்கள்.

விக்ஷ்ணுவும் ராசியும் சேர்ந்து மேலும்மேலும் கலக்க வாழ்த்துகள்.
           ;;;;;;;;;;;;;;;;;;;;;;;;;;;;;;;;;;;;;;;;;;;;;;;

2)  'சமைத்து அசத்தலாம்' வலையின் ஆசிரியர் சகோதரி ஆஸியா ஓமர் அவர்கள். இவரும் வலையுலகில் பிரபலமானவர். சமையல்,கதை,கவிதை என எல்லாமும் இங்கு உண்டு. வலைப்பதிவிற்கான விளக்கம் போலவே சைவ அசைவ சமையல் எல்லாம் செய்து அசத்துகிறார்.வீடியோ சமையலும் உண்டு. இது மட்டுமல்லாமல் இன்னும் சில தளங்களிலும் தன் பங்களிப்பை அளித்துள்ளார்.

இப்போது  'சிறப்பு விருந்தினர் பக்கம்' என்ற புதுமையான முயற்சியை அறிமுகப்படுத்தி இருக்கிறார். சமையலில் ஆர்வமுள்ளவர்கள் கலந்துகொண்டு சிற‌ப்பிக்கலாம்.

அல்‍_ஐன் ல் உள்ள ஒரு பூங்காவில் செயற்கையாக வடிவமைக்கப்பட்ட பூந்தோட்டத்தை தன் காமிராவில் 'க்ளிக்'கிக்கொண்டு வந்து பாலைவனத்தில் இப்படியொரு சோலையா என இங்கே வியப்படைய வைக்கிறார்.

அனைவருக்கும் பயன்படும் வகையில் இங்கே ஆங்கிலத்தில் உள்ள உணவுப் பொருள்களுக்கு தமிழில் மொழிமாற்றம் செய்து கொடுத்து பயன‌டைய வைத்திருக்கிறார்.

அசத்தல் மேன்மேலும் சிறப்படைய வாழ்த்துகள்.
         ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

3)  'சமையல் சுவைகள்' என்ற சமையல் தளத்தை நிர்வகிப்பவர் சகோதரி யாஸ்மின் அவர்கள். இவரது சமையல் குறிப்புகள் எல்லாம் படிப்படியாக, படங்களுடன் விளக்கப்பட்டிருக்கும். சைவம், அசைவம் என‌ இரண்டுமே இருக்கும்.

ப்ரெட் வகைகளும்,  கேக் வகைகளும்கூட இருக்கின்றன‌. எல்லா குறிப்புகளும் செய்வதற்கு எளிதானதாக படங்களுடன் உள்ளன.

இவருக்கு பலாப்பழம் ரொம்பவும் பிடிக்குமாம். இப்படித்தான் ஒரு கீற்று வாங்கி, அதை குழந்தைகள் வீட்டிற்கு வருமுன் நறுக்கி அழகாக வைத்தால் யாருக்குதான் பிடிக்காது !

பால்கோவா செய்யச்சொல்லி கற்றுக்கொடுத்துவிட்டு,  செய்ததை பாக்கெட் போட்டு வைத்திருப்பதைப் பார்த்தால் பார்சல் வீடு தேடி வரும்போல. இனிப்பு
பிரியர்களுக்கு நிறைய இனிப்புகள் உள்ளன. நீங்களும் போய் பார்த்து மனதள‌வில் மகிழலாமே !

ஏனோ, கொஞ்ச நாட்களாக எழுதாமல் இருக்கிறார். மீண்டும் தொடர வாழ்த்துகள்.
              ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

4) ல‌க்ஷ்மி அம்மா அவர்களின் வலைப்பூ குறை ஒன்றுமில்லை . சமையல், தனது அனுபவங்கள், பயணங்கள் இவைபற்றியெல்லாம் எந்தவிதமான மேல்பூச்சும் இல்லாமல், ஆடம்பரமில்லாத வார்த்தைகளால் எழுதுவதே இவரின் சிறப்பு.

பயணங்கள் என்று சொல்லும்போது அமெரிக்கா, ஐரோப்பா என வளர்ந்த நாடுகளைப் பற்றியே நிறையப் படித்திருக்கிறோம். முதல்முறையாக இங்குதான் ஆப்பிரிக்க நாட்டு பயண அனுபவத்தைப்பற்றி படித்தேன். ஆப்பிரிக்க நாடான 'கென்யா'வுக்கு தான் மேற்கொண்ட பயணத்தை படிப்போருக்கு ஆர்வம் ஏற்படும் வகையில் இங்கே எவ்வளவு அழகாக எழுதியிருக்கிறார். நிறைய பதிவுகள் உள்ளன. அதேபோல் சிங்கப்பூர் பற்றிய பயணமும் பல பதிவுகளாக உள்ளன‌.நேரம் கிடைக்கும் போதெல்லாம் இவருடைய பதிவுகளை மீண்டும்மீண்டும் படித்துப் பார்ப்பேன்.

அனுபவம் வாய்ந்தவராச்சே, சமையலிலும் கலக்குகிறார். நிறைய குறிப்புகள் உள்ளன. அவற்றிலிருந்து உதாரணத்திற்கு ஒன்று இந்த  புல்கா ரொட்டி .

ஏனோ இப்போதெல்லாம் எழுதுவதில்லை. இவர் எழுதாமல் விட்ட சமயத்தில்தான் இவரது தளம் படிக்க நேர்ந்தது. முன்புபோல் மீண்டும் வந்து எழுத வேண்டுமென வேண்டிக்கொள்கிறேன்.
            ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

 5)  'என் ஓவிய உலகம் ' என்றொரு வலைப்பூ.  இதில் அழகான ஒரு ஓவியமும், அதற்கு பொருத்தமாக ஒரு சிறு கவிதையும் என பதிவுகள் வெளியாகி வருன்றன. ஓவியமும், கவிதையும் ஒன்று சேர‌ வரும் திறமை ஒருசிலருக்கே அமையும். ஆசிரியரின் கற்பனை வளத்தைப் போய் பார்வையிட்டு வருவோமே !!

அவற்றிலிருந்து  உதாரணத்திற்கு ஒன்று  விடியல் . இதுபோல் நிறைய இருக்கின்றன.

 குழந்தையின் சிரிப்பில் இறைவன்
   காண முடியும் - படிப்பின்
உலகில்  விடியல் காண முடியும்
   கல்வி கற்போம்
விடியல் கொள்வோம் !

3 – டி கிறுக்கல்  என்ற தலைப்பில் 3_டி யிலும் ஒரு படத்தை வரைந்திருக்கிறார். எப்படி இருக்கிறது என்று போய் பார்ப்போமே !

மேலும் கற்பனை சிறந்து நிறைய கவிதகளும், ஓவியங்களும் வெளியிட வாழ்த்துகள்.
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

 இன்றைய பதிவர்களை இத்துடன் முடித்துக்கொண்டு, நாளை வேறுசில பதிவர்களுடன் உங்களை சந்திக்க வருகிறேன், நன்றி !
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

மேலும் வாசிக்க...

வலைச்சரத்தில் நான்காம் நாள் _ வியாழன் மலர்

அனைவருக்கும் இனிய காலை வணக்கம். வந்துட்டேங்க, இன்றைக்கு அறிமுகமாகின்ற‌ பதிவர்களுடனும், அவர்களின் பதிவுகளுடனும்....படித்துவிட்டு கருத்தைப் பகிர்ந்துகொள்வோமே !!
                                         ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

1) திருமதி மகி அவர்களின் வலைப்பூ வெல்கம் டூ மகிஸ் ஸ்பேஸ். இவர் எல்லோருக்கும் நன்கு அறிமுகமானவரே. கோவையில் பிறந்துவளர்ந்து தற்பொழுது USA ல் தன் கணவர், பெரியண்ணா,  புதுவரவான தன் குட்டிப் பாப்பாவுடனும் வசிக்கிறார்.

இவரது வலைப்பூவில் சமையல் மட்டுமின்றி இவரது அனுபவங்கள், நினைவுகள், இயற்கை காட்சிகள் என எல்லாமும் இருக்கும். பன்முகத் திறமையாளர். இவரது உலகத்தில் நுழைந்தாலே கலகலப்புக்கு பஞ்சமிருக்காது. மற்றவரையும் கலகலப்பாக்கிவிடுவார். இந்தத் தன்மை எல்லோருக்கும் எளிதில் வந்துவிடாது.

இப்போல்லாம் பூமி ஒழுங்காதான் சுத்துதா ? அதுல பயிர்பச்சை எதுவும்  விளையுதா? ஜனங்க நடமாடிட்டுதான் இருக்காங்களா? இதுல எதைப் பற்றியுமே கவலைப்படாமல் இவங்க ஒரு உலகத்துல சுத்திட்டிருக்காங்கலாம் ! இரவுபகல் தெரியாத(ம்ம், நல்ல்ல்லா வேணும்) அந்த உலகம் என்ன‌, எதுன்னு, வாங்க நாமும் போய் பார்த்துட்டு வந்திடலாம் ! 

எந்தப்பதிவு வெளி வந்தாலும் கூடவே (சமைத்த)காய்கறிகளுடன் கூடிய ஒரு சாப்பாட்டுத் தட்டும் வந்து தவறாமல்  நம் கண்ணைப்பறிக்கும்.

இவர் தன் வீட்டில் தொட்டிச்செடிகள் வளர்த்து, அதிலிருந்து அறுவடை செய்து   சமையலே செய்து  அசத்தியிருக்கிறார் பாருங்கள் .

ஓரிகாமி காகிதங்களை வைத்து 3D ஓரிகாமி உருவங்களை எப்படி செய்வது என சொன்னதோடு நின்றுவிடாமல் பூக்கூடை, பூ ஜாடி போன்றவற்றையும் இங்கே செய்துகாட்டுகிறார்.

கோவைக்கு அருகேயுள்ள அனுவாவி சுப்பிரமணியர் திருக்கோயில் த‌ரிசனத்தின் முதல் பகுதியை இங்கேயும்,  இரண்டாம் பகுதியை இங்கேயும்  காணலாம்.

ஒருமுறை அவள்விகடனில் இவரது கட்டுரை கண்களில் விரியும் கவிதைப்பூக்கள் என்ற தலைப்பில் வெளியாகியிருக்கிறது. இவரைப்போய் எப்படி நான் அறிமுகம் செய்து வைப்பது?  நீங்களே சொல்லுங்கள் !!!

கடைசியா, அவங்க வீட்டில் நமக்காக சுட்டு வைத்திருக்கும் முறுக்கில் ஆளுக்கொன்றாக எடுத்து கடித்துக்கொண்டே போவோமே !!
                        ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

 2) இது இமாவின் உலகம்  வலையின் ஆசிரியர் திருமதி.இமாக்றிஸ்.  உண்மையிலேயே இவர் ஒரு ஆசிரியையும்கூட.

இவரது பதிவுகள் கொஞ்சம் வித்தியாசமானவைகளாக இருக்கும். படித்தோமா, பின்னூட்டம் கொடுத்தோமா என அத்துடன் முடிவதாக இருக்காது. கொஞ்சம் சிந்திக்கத்தூண்டும். சில சமயங்களில் என்னதான் மூளையைப் போட்டுக் கசக்கினாலும்.....ம்ஹூம்.

இவரது பதிவில் உள்ள அழகான ஈழத்தமிழில் இருக்கும் சில வார்த்தைகளை பலமுறை, பலமாக‌ யோசித்து மீண்டும்மீண்டும் படித்துப்பார்ப்பேன். எத்தனை தடவை படித்தாலும் சுவையாகவே இருக்கும்.

இங்கு இல்லாத விஷயங்களே இல்லை எனலாம். குப்பைக்கு போகவேண்டியவைகளை எல்லாம் என்னமாய் சிந்தித்து இங்கே  மீள்சுழற்சி செய்திருக்கிறார் பாருங்கள்.

செல்லப்பிராணி வளர்ப்பவர்களுக்கு அவை செய்யும் குறும்புகளை ரொம்பவே பிடிக்கும்.  அப்படி எடுக்கப்பட்டவைதான் இங்குள்ள படங்கள்.

ரோஜா பூத்து முடித்த பிறகு அதில் நிறைய காய்கள் வருவ‌தைப் பார்த்திருக்கிறேன். அதற்குமேல் அதைப் பற்றித் தெரியாது. அதன் பயன்களை இங்கே சென்று படித்துப் பாருங்களேன்.

இதுமாதிரி ஏராளமானவை கொட்டிக்கிடக்கின்றன. நேரம் கிடைக்கும்போது சென்று பார்வையிட்டால் உங்களுக்கு நேரம் போவதே தெரியாது.
                         ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

3) பென்சில் நதி  என்ற  இந்த வலைப்பூவின் ஆசிரியர் திரு இராஜா சந்திரசேகர். அவருடைய எண்ணற்ற‌ புதுக்கவிதைகளை இந்த வலைப்பூவில் பதிவாக்கியிருக்கிறார்.

இங்கே உள்ளதுபோல் சிறுசிறு கவிதைகளாக இருந்தால் என்னைப் போன்ற ஆட்களுக்கு ஒரு வரப்பிரசாதம். எந்தக் கவிதையைத் தேர்ந்தெடுப்பது ! இந்தக் கவிதைதான் என்றில்லை, ஒவ்வொன்றும் படிக்க படிக்க இனிமை சேர்க்கிறது.

'பூ' பற்றி இங்கே என்ன சொல்கிறார் பாருங்கள்:


உன் புன்னகையிலிருந்து
விழுகிறது பூ
கவிதைச் சூடிக்கொள்ள

 'அப்பா சட்டை'  பற்றி:

அப்பா சட்டையைப்
போட்டு வந்து
காட்டுகிறது குழந்தை
தன்னை இளமையாகப்
பார்க்கிறார் அப்பா

 எப்படியும் ....என்ற தலைப்பிலுள்ள நம்பிக்கைக்கவிதை இங்கே.

எப்படியும் விடிந்துவிடும்
என்ற நம்பிக்கையில்
விழித்திருக்கிறேன்

இவரது கவிதைத் தொகுப்புகள் பல விருதுகளைப் பெற்றுள்ளன என்பது மகிழ்ச்சியைத் தரக்கூடியது.

                         ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

4)  இராமநாதபுரம் மாவட்டத்தில் உள்ள கீழக்கரை எனும் கடற்கரை நகரத்தைச் சேர்ந்தவரான musabbihu என்பவர் இந்த வலைப்பதிவை எழுதியிருக்கிறார்.

மொத்தமாக மூன்று வலைப்பதிவுகளை எழுதியிருக்கிறார். ஒன்றில் மீன், இன்னொன்றில் சிக்கன், அடுத்தது மட்டன் என எல்லாமே அசைவப் பிரியர்களுக்கானது.

மீனில்  மீன் பிரியாணி , மீன் சூப்  , மீன் புட்டு   என நிறைய குறிப்புகள் உள்ளன.
மீன் செய்முறையில் ஸ்டெப் பை ஸ்டெப் படங்களுடன் ஏராளமான குறிப்புகள் உள்ளன. 

அதென்ன ரோகினி சிக்கன்? இங்கே சென்றுதான் பாருங்களேன்.

மட்டன் சமோசா போன்ற வித்தியாசமான குறிப்புகள் எல்லாம் உள்ளன. 

நான்வெஜ் சமையல் குறிப்பு வேண்டுவோர் இங்கே சென்று பயனடையலாம்.
                             ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

5) சிவா என்பவரால் நிர்வகிக்கப்படும் 'தோட்டம்' என்னும் வலைப்பதிவில் தோட்டம் போடுவதற்கான எல்லா குறிப்புகளும் உள்ளன.


விதை விதைத்து, முளைத்து, பாதுகாப்பாக வளர்த்து, பூத்து, காய்த்து, காயாகவோ அல்லது கனியாகவோ அறுவடை செய்யும்வரை ஒன்று விடாமல் படங்களுடன் பகிர்ந்துகொள்வது பார்ப்பவர்களுக்கு 'ஏன் நாமும் ஒரு தோட்டம் போடக்கூடாது' எனும் எண்ணத்தைத் தூண்டும் என்பது நிச்சயம்.

செடிகொடிகளை படம் எடுத்துப் போடும்போது எவ்வளவு நேரம் அவற்றைப் பார்த்தாலும் நேரம் போவதே தெரியாது.

தோட்டம் போடுவதற்கு நிகராக அவரது புகைப்படம் எடுக்கும் ஆர்வமும் தெரிகிறது.

வெங்காயம் விற்கும் விலையில் 'இதை நாமே தோட்டத்தில் பயிரிட்டால் என்ன' என்று நினைக்கத் தோன்றுகிறதுதானே !

ரோஜா முதல்  காலிஃப்ளவர் போன்ற காய்கறிகள் வரை இங்கு பயிர்செய்து அறுவடை செய்யப்பட்டுள்ளன.

தோட்டத்தை நன்றாகச் சுற்றிப் பார்த்துவிட்டு களைப்பு தீர இங்கேயுள்ள தர்பூசணி ஜூஸை ஆளுக்கொரு க்ளாஸாக எடுத்துக்கொள்வோம்.
                     ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;
நாளை மீண்டும் வேறுசில பதிவர்களுடன் வருகிறேன், நன்றி !
                   ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

'வலைச்சரம் எனக்கு எப்படி அறிமுகமானது' ......... (தொடர்ச்சி)

ஒருமுறை தோழி ரஞ்ஜனி அவர்கள் 'உங்களுக்குத்தான் தெரியுமே வலைச்சரத்தைப் பற்றி...' என்று கூறியிருந்தார். உண்மையில் எனக்கு அதைப்பற்றி ஒன்றுமே தெரியாது. எல்லாம் ஒரு சோம்பல்தான். நாம் எங்கோ ஒரு மூலையில் இருக்கிறோம். அதனால் (வலைச்சர)நாட்ல என்ன நடக்குதுன்னு தெரிந்துகொள்ளும் ஆவல் இல்லை. இவர்வேறு 'உங்களுக்குத்தான் தெரியுமே' என்று சொல்லிவிட்டதால்..... இவரையேக் கேட்டிருக்கலாம்தான். ஆனாலும் தெரியாதென்று காட்டிக் கொள்ளவில்லை.

அதன்பிறகு 'அப்படி என்னதான் நடக்குது அங்கே' என நேரத்தை செலவழித்து, பொறுமையாக படித்துப் பார்த்தேன். இருந்தாலும் சில சந்தேகங்க‌ள் தொடர்ந்தன. ஆகட்டும், ரஞ்ஜனி அவர்கள் பொறுப்பேற்கும்போது என்ன செய்கிறார்,  என பார்க்கும் ஆவலில் காத்திருந்தேன்! அந்த ஒரு வாரத்தில் வலைச்சரத்திற்கு தினமும் விடாமல் வந்து பார்வையிட்டுத் தெரிந்துகொண்டேன் ஆசிரியரைப் பற்றியும், அதன் பணிகள் என்னவென்றும் !!
                ;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;;

மேலும் வாசிக்க...

வலைச்சரத்தில் மூன்றாம் நாள்: புதன் மலர்

அனைவருக்கும் இனிய காலை வணக்கம். இன்றைய தினத்தில் மேலும் சில பதிவர்களை அறிமுகம் செய்ய வந்துள்ளேன். அறிமுகங்களைப் படித்துவிட்டு உங்கள் கருத்துகளைப் பகிர்ந்துகொள்ளுங்களேன் !.

1) இன்றைய முதல் அறிமுகமாக திருமதி ரஞ்ஜனி அவர்களின் வலைப்பூ ரஞ்ஜனிநாராயணன். இவரைத் தெரியாதவர்கள் இருக்க முடியாது. இவரைப்போலவே இவரது பதிவுகளும் பிரபலமானவை. இவரை நான் அறிமுகப்படுத்தித்தான் ஆக வேண்டுமென்பதில்லை. ஆனாலும் நான் விரும்பிச் சென்று படிக்கும் தளங்களில் இவருடையதும் ஒன்று.

இவர் இரண்டு பிரபலமான பதிவுகளை நான்கு பெண்கள் தளத்திற்காக எழுதிக் கொண்டிருக்கிறார். இதுவரை வெளிவந்த பதிவுகளை தொகுத்து வைத்திருக்கிறார்கள். விரும்பியதை 'க்ளிக்' செய்து படித்து பயன்பெறலாம்.

அதில் ஒன்று குழந்தை பராமரிப்பு பற்றியது. இது இளம் தாய்மார்களுக்கும், அம்மாவாகப் போகிறவர்களுக்கும் மிகுந்த பயன் கொடுக்கக்கூடியது. பதிவுகள் முழுவதும் லேசான நகைச்சுவையுடன் நகர்த்தியிருப்பது அழகு.

மற்றொரு பதிவு நோய்நாடி நோய்முதல்நாடி என்ற மருத்துவத்தொடர். இங்கும் சில இடங்களில் நகைச்சுவையைச் சேர்த்தும், சில இடங்களில் உதாரணங்களுடனும், தன் அனுபவங்களுடனும் சொல்லிச்செல்வதும் அழகு.

இதுதவிர‌ தன்னுடைய‌  திருவரங்கத்திலிருந்து  என்னும் வலைப்பூவிலும் எழுதுகிறார். இங்கு கட்டுரைகளும், பல பதிவுகளை நகைச்சுவையாகவும் எழுதியிருக்கிறார்.

சாம்பார் ஊத்தும்மா……!    என்ற பதிவில் தன் தோழியுடன் தான் சினிமா பார்த்த அந்த நகைச்சுவைக் காட்சியைக் கூறுகிறார். போய் படித்துவிட்டு வாய்விட்டு சிரித்துவிட்டு வருவோமே.

'நலம் நலம் தானே நீயிருந்தால்' என்ற பதிவில் தன் வா.து வுடன் மருத்துவமனை சென்று வந்ததை நகைச்சுவையாகக் கூறுகிறார். அதென்ன வா.து. உங்களை மாதிரிதான் முதலில் நானும் முழித்தேன். நீங்களும் போய் பார்த்துவிட்டு வாங்க அது யார் என்று.

மேலும் இரண்டாவது எண்ணம் என்ற வலையும் உள்ளது. இங்கும் கட்டுரைகள், நகைச்சுவை பதிவுகள் என்று கலக்குகிறார்.

ஆதார் அட்டை படுத்தும் பாட்டை எவ்வளவு நகைச்சுவையாக எழுதியிருக்கிறார் பாருங்கள்.

இங்கே மலாலா பற்றி இவர் எழுதிய கட்டுரையை வாசித்துப் பாருங்கள்.

மேன்மேலும் எழுத வாழ்த்துவோமே !!

                        ................................................................

2)  காவேரிக்கரை என்றொரு வலைப்பூ.

"கவிதை,கட்டுரை,கொஞ்சம் தத்துவம்,சில புகைப்படம் இப்படியா ஒரு சின்ன கிறுக்கல்கள்", இவற்றை உள்ளடக்கியதாக இருக்கும் இந்த வலைப்பூ' என்கிறார் புதிதாக வலைப்பூவை ஆரம்பித்து அழகழகான கவிதைகளை முயற்சித்துக்கொண்டிருக்கும் ஆசிரியர் முனைவர் நா.சிவாஜி கபிலன்.

 பாட மறக்கும் பாட்டு என்ற தலைப்பில், ஒப்பாரிப் பாடல் காணாமல் போனதால் தமிழனின் அருமருந்தான மனச்சுமையைக் குறைக்க முடியாமல் போய்விட்டதாகப் புலம்புகிறார். உண்மைதான், ஆராய்ச்சிகளும் அதைத்தானே சொல்கின்றன. இக்கவிதையில் வரும் அருக்காணி அக்கா மனதில் நிலைத்து நிற்கிறார்.

பெருந்தீ என்னும் தலைப்பில் இன்னொரு கவிதை. வெளியூரில் இருந்து புகைவண்டியில் வீடு திரும்பும் ஒரு இளைஞனின் கண்ணெதிரில் பசுமை சூழ்ந்த தன் கிராமம் இப்போது எப்படி வெறிச்சோடிக் கிடக்கிறது என்பதுதான் இக் கவிதை. நம்மையும் அவருடன் அவரது கிராமத்திற்கே அழைத்துச்சென்று விடுகிறார் கவிதையின் வாயிலாக.

தலைப்பில்லாமல் இங்கொரு கவிதை உள்ளது. இதிலுள்ள வரிகள் எவ்வளவு வலிமையானவை என்பதை வாசித்துப் பாருங்களேன்.இன்னும் நல்லநல்ல கவிதைகள் எழுதிட வாழ்த்துவோம்.
                              ...........................................................

3) அஞ்சு அவர்களின் வலைப்பூ காகித பூக்கள்

கைவினை, சமையல் என பன்முகத் திறமை கொண்டவர்.

அழகழகான க்வில்லிங் வேலைப்பாடுகளை செய்து அசத்துகிறார். இங்கே 'க்வில்லிங் எப்படி செய்வது' என எளிதாகப் புரிந்துகொள்ளும் வகையில் படிப்படியாக கற்றுகொடுக்கிறார். எனக்குத்தான் வராது, விருப்பமுள்ளவர்களாவது இங்கு  சென்று கற்றுக்கொள்ளலாமே.

அம்மாஞ்சி குழம்பு_ பெயர் வித்தியாசமாக இருக்கிறதுதானே ? மாம்பிஞ்சுகள் கிடைத்தால் செய்துபார்க்கலாம். செய்வதென்ன, செய்வதற்குமுன் நான் அவற்றை என்னிடமிருந்தே பாதுகாக்க வேண்டும் ! அதனால் இப்போதைக்கு 'உச்சு' கொட்டுவதைத் தவிர வேறொன்றும் செய்வதற்கில்லை.

/இவரைப் போலவே இவரது குட்டி ஏஞ்சலினும் கைவினையில் திறமை உடையவராக‌ இருப்பதை Flowers Crafty Room என்ற‌ அவரது வலைப்பூவுக்கு சென்று பார்த்து, வாழ்த்திவிட்டு வருவோமே !.
                                        .........................................

4)  'புத்தக அலமாரி'   என்னும் வலைப்பூவின் எழுத்தாளர் த.பெ.கேசவமணி. வலைப்பூவின் பெயரைக் கேட்கும்போதே நூல் நிலையத்தின் நினைவு வருகிறது. இலக்கியத்தின்மீது ஆர்வம் கொண்டு கல்லூரி நாட்களில் கதைகள்,கட்டுரைகள் என எழுதியிருக்கும் இவர் அப்போதே ‘அக்கினிக் குஞ்சு’ என்ற கையெழுத்துப் பிரதியையும் நடத்தியிருக்கிறார்.

'அரிய புத்தகங்கள் கொண்ட நூலகம்' அமைக்க விரும்பும் இவரிடம் சுமார் 300 புத்தகங்கள் உள்ளனவாம். இவரது ஆசை நிறைவேற வாழ்த்துவோம்.

இவர் எழுதிய கவிதைகளை நானும் நீயும் என்ற தலைப்பில் ஒரு தொகுப்பாக‌ பதிந்து வைத்திருக்கிறார், சென்று வாசித்து மகிழுங்கள்.

த‌ன் மனதில் துளிர்த்த சில சிந்தனைகளை சிறுசிறு கவிதைகள் வடிவில்  இங்கே வடித்திருக்கிறார்.

 கி.ராஜநாராயணனின் கதவு, சுந்தர ராமசாமியின் முதலும் முடிவும், புதுமைப்பித்தனின் ஆற்றங்கரைப் பிள்ளையார் போன்ற பிரபல எழுத்தாளர்களின் சிறுகதைகளை அப்படியே கொடுத்துள்ளார். கதைப் பிரியர்கள் இங்கே  சென்று வாசித்து மகிழலாம்.
                                   ...............................................................

5) தன் மனதில் உள்ளதை வாசகர்களுடன் பகிர்ந்துகொள்ள அனுவின் பதிவுகள் என்ற வலைப்பூவில் எழுதுகிறார் ஆசிரியர் அனு. இவரது பதிவுகளில் உறவுகளின் வலிமை புலப்படும்.

'அப்படியே கண்ணு கலங்கிடுது, பொலபொலன்னு தண்ணி கொட்டுதே" என்று பொதுவாக பெண்களைப் பார்த்துதான் சொல்லுவார்கள். அப் பெண்ணின் கண்ணீருக்குப் பின்னால் உள்ள கதையைத் தெரிந்துகொள்ளும் ஆவல் இருக்கிறதா ?  பெண்ணின் கண்ணீர்….' என்ற தலைப்பில் இவரெழுதியுள்ள பதிவைப் பார்த்து தெரிந்துகொள்ளலாம்.

உதவி தேவைப்படும் நேரத்தில் ஒரு தப்பனாரால்கூட செய்ய முடியாத சில‌ வேலைகளை இவரது மாமனார் இவருக்கு செய்ததை தாயுமானவன்…… என்ற தலைப்பில் எவ்வளவு அழகாக நினைவு கூர்கிறார். அப்படியானால் இவர் எப்படிப்பட்ட மருமகளாக இருந்திருப்பார் எனும்போது ஆச்சரியமாகத்தான் உள்ளது.

தனக்கு கடுக்காயும் கணக்கும் ஒன்றுதான் என்று தனக்கும் கணக்குப் பாடத்திற்குமான தொடர்பை இங்கே எவ்வளவு நகைச்சுவையாகக் கூறுகிறார், படித்துதான் பாருங்களேன்.

முதியோர் இல்லத்திற்கு சென்றபோது அவர்கள் சொன்ன விஷயங்கள் இவர் மனதை எவ்வாறு பாதித்தது என்பதை 'ஆத்ம திருப்தி' என்ற தலைப்பில் இங்கே பகிர்ந்துகொள்கிறார்.

சில பதிவுகளே எழுதியிருந்தாலும் அவை எல்லாமே சிறப்பாக உள்ளன என்பதே அவரது வலையின் சிறப்பு.
                  ********************************************
 இத்துடன் இன்றைய அறிமுகங்களை முடித்துக்கொண்டு, நாளை வேறுசில அறிமுகங்களுடன் வருகிறேன். நன்றி !
                                             ...............................................................              

          'வலைச்சரம் எனக்கு எப்படி அறிமுகமானது' ......... (தொடர்ச்சி)

அதன்பிறகு ஒரு 3 மாதங்கள் கழித்து திண்டுக்கல் தனபாலன் அவர்கள் வந்து என்னுடைய பதிவை வலைச்சரத்தில் அறிமுகம் செய்திருப்பதாகக் கூறினார். முந்தைய பெயரிலிருந்து இந்தப்பெயர் வித்தியாசமா இருக்கேன்னு, உடனே அங்கே போய் பார்த்தால் சௌந்தர் என்பவர் அறிமுகப்படுத்தி இருந்தார். மீண்டும் குழப்பம். வந்து சொன்னவர் ஒருவர், அறிமுகம் செய்தது வேறொருவராய் இருக்கிறாரே என்று. ஒருவேளை இருவரும் ஒருவர்தானோ என நினைத்து (எதற்கு வம்பென)பெயர் எதுவும் குறிப்பிடாமால் நன்றி மட்டும் சொல்லிவிட்டு வந்துவிட்டேன். நான் மனதிற்குள் நினைத்துக்கொண்டது 'ஒருவேளை வலைச்சரம் தளம் கைமாறிக்கொண்டே இருக்கிறதோ' என்று.

மெல்லமெல்ல மற்ற‌ வலைகள் பக்கம் வந்தபோதுதான் கவனித்தேன், DD அவர்கள் 'அறிமுகம்' செய்திருப்பதாகக் கூறும் பின்னூட்டம் எங்கும் தென்பட்டதால் ஒரு கட்டத்தில் 'DD அவர்கள்தான் ஆசிரியர்' என்ற முடிவுக்கே வந்துவிட்டேன். அப்படியே சில நாட்கள் போனது. பிறகு அதுவும் நீண்ட நாட்கள் நீடிக்கவில்லை. அதற்கும் வந்தது ஆப்பு..........அது தோழி திருமதி.ரஞ்ஜனி அவர்களின் மின்மடல் வாயிலாக...........(தொடரும்)

 ........................இப்பகுதி எங்கே என மேலே தேடினீங்கதானே !!

மேலும் வாசிக்க...

வலைச்சரத்தில் இரண்டாம் நாள் : செவ்வாய் மலர்

அனைவருக்கும் இனிய காலை வணக்கம். இன்று சில பதிவர்களுடன், அவர்களின் பதிவுகளையும் உங்களுக்கு அறிமுகம் செய்யப்போகிறேன். உங்களுக்கு அவர்களை முன்பே தெரிந்திருக்கும், இருந்தாலும் அவர்களின் எழுத்து ஏதோ ஒரு வகையில் என்னைக் கவர்ந்ததால் பகிர்ந்துகொள்ள விரும்புகிறேன்.

அதற்குமுன் 'வலைச்சரம் எனக்கு எப்படி அறிமுகமானது' என்று ஒன்றிரண்டு வரிகளில்......

'வலைச்சரம்' பற்றி அறிந்திராத சமயத்தில் ஒருமுறை திரு.வெங்கட்நாகராஜ் அவர்கள் என் வலைப்பூவின் ஒரு பதிவில் 'வலைச்சரத்தில் உங்களை அறிமுகப்படுத்தி இருக்கிறேன்' என்று பின்னூட்டமிட்டிருந்தார். எதற்காக என்னை அறிமுகம் செய்ய வேண்டும்? எனக்கு ஒன்றும் புரியவில்லை. அவர் கொடுத்த 'லிங்க்'கை க்ளிக் செய்து பார்த்தேன். அங்கே எல்லோரும் அவருக்கு நன்றி சொல்லியிருந்தனர். அதனால் நானும் நன்றி சொல்லிவிட்டு வந்துவிட்டேன். இவர்தான் வலைச்சரத்தின் ஆசிரியர் என்று நினைத்திருந்தேன். அது நீடித்ததா........ (நாளை தொடரும்)
                                               .......................................................................

1) காமாக்ஷி அம்மாவின் வலைப்பூ 'சொல்லுகிறேன்'.

வலையுலகில் இவரைப்பற்றி அறியாதவர்கள் இருக்க முடியாது. சமையல், கதை, அனுபவம்,  நினைவுகள் என எதுவாக இருந்தாலும் அவற்றை சொல்லும் விதமே வித்தியாசமானதாய், விரும்பத்தக்கதாய் இருக்கும். அவரது காலத்திற்கே நம்மை அழைத்துச் சென்றுவிடுவார். இவரைப்பற்றி ஒரு சிறு அறிமுகத்தில் அடக்கிவிட முடியாது. இருந்தாலும் முயற்சிக்கிறேன்.

அவரது சமையல் குறிப்புகள் அனைத்தும் எதிரில் இருப்பவரிடம் பேசுவது போலவே இருப்பதுதான் அதன் சிறப்பே. நிறைய கொட்டிக்கிடக்கின்றன. அதில் உதாரணத்திற்கு ஒன்றான‌ பால்போளி யை கண்ணாலேயே சாப்பிட்டுப் பார்த்து, எப்படி இருக்குன்னு சொல்லுங்க. என்ன பார்த்து, சுவைத்துவிட்டீர்களா ! 

அம்மாவின் சமையலையும் தாண்டி அவரது கதைகள் என்னை நிறையவே பாதித்தன‌. 'ஹலோ ஹலோ ஹலோ' என்ற கதையில் நீண்ட நாட்களுக்குப் பிறகு சந்தித்துக்கொள்ளும் இரண்டு வயதான தோழிகளின் தொலைபேசி உரையாடல்தான் கதையாகக் கொடுக்கப்பட்டிருக்கிறது. அதில் ஒருவர் தொணதொணவென தன் குறைகளைச் சொல்பவராகவும், மற்றொருவர் அதைக் கேட்க பிடிக்காமல் நடிப்பவர் போலவும் காட்டியிருப்பது அருமை. வயதானவர்களின் நிலையை இதைவிட சிறப்பாக எப்படி சொல்ல முடியும் !

இது எனக்குப் பிடித்த இன்னொரு கதை. தோழிகள்போல் பழகும் விதவை அம்மாவும், அவரது பெண்ணுமாக இரண்டு பேர், அவர்கள் அருகில் விமானப் பயணம் மேற்கொள்ளும் அந்தக்கால அம்மா, ஆனாலும் இந்தக் காலத்திற்கேற்ப தன்னை மாற்றிக்கொண்டு, விதவைப் பெண்ணிற்கு கூறிய ஒரு சிறு அறிவுரை அப்பெண்ணின் வாழ்வில் எவ்வளவு முக்கியத்துவம் வாய்ந்த முடிவை எடுக்க வைத்தது என்பதுதான் தை பிறந்தால் கதை. படித்துப்பாருங்கள், விறுவிறுப்பாக இருக்கும்.

மேலும்  'எங்கள் ஊர் நினைவுகள்' என்ற தலைப்பில் அவரது இளமைக்கால நினைவுகளை நம்முடன் பகிர்ந்து கொள்வதோடு அந்தக்கால வளவனூர் எப்படி இருந்தது என்பதை, அக்கால பேச்சு வழக்கின்படியே, நம் கண்முன்னே கொண்டுவந்து நிறுத்துகிறார். அடிக்கடி போன ஊர் என்பதால் இந்தப் பதிவை நான் விரும்பிப் படித்தேன்.

அவர் வீட்டு வரலக்ஷ்மி பூஜை யைக் கொண்டாடியதை நம்முடன் பகிர்ந்துகொண்டதுடன் அதைக் கொண்டாடும் முறையையும் இங்கே சிரமம் பாராமல் எல்லாவற்றையும் ஒன்று விடாமல் தட்டச்சு செய்து கொடுத்திருக்கிறார்.

மே மாதம் வரும் அன்னையர் தினத்தை முன்னிட்டு எழுதியபோது தன் அம்மாவின் நினைவுகளை இங்கே பதிந்து வருகிறார். இதுவரை ஒன்பது பதிவுகளாக வந்துள்ளது. மேலும் தொடர தம்பதி சமேதராய்  ஆரோக்கியமான நல்ல உடல்நிலையை அவர்களுக்கு அருளுமாறு கடவுளிடம் வேண்டிக்கொள்வோம்.
       ......................................................................................................................

2) Dr.M.K.முருகானந்தன் அவர்களின் வலைப்பூ 'முருகானந்தன் கிளினிக்' .

டொக்டர்.முருகானந்தன் ஐயா அவர்களின் மருத்துவப் பதிவுகளைப் படிக்க நேர்ந்தபோது "நம்ம ஊரில் இப்படியும் ஒரு மருத்துவரா! மருத்துவராய் இருப்பவர் இவ்வளவு நகைச்சுவையாளராக இருப்பாரா " என எண்ணி ஆச்சரியப்பட்டு போனேன். படிப்பவரும் மருத்துவப் பதிவாச்சே என‌ பயந்துபயந்து படிக்காமல் கொஞ்சம் ரிலாக்ஸாக படிக்க முடியும்.

முன்பெல்லாம் நமக்கு காது பிரச்சினை என்றால் என்ன செய்வோம்? முதலில் நம் கைக்கு சிக்குவது தலையில் போடும் ஹேர் பின் அல்லது சேஃப்டி பின்தான். இவையெல்லாம் தவறு என இப்போதுள்ள குட்டிப்பிள்ளைகளே சொல்லிவிடுவார்கள். இங்கே ஐயாவிடம் வந்தவர் என்ன செய்துவிட்டு வந்தார்? ஏன் அவரைப் பற்றி சொல்லும்போது    காது பொரியல் சட்டியல்ல என்று சொல்கிறார். இந்த‌ பதிவைப் படித்தபோது என்னை மறந்து சிரித்துவிட்டேன்.

'வாடகைத் தாய்மார்கள் மருத்துவத்தின் சங்கடங்களும் சாதகங்களும்' என்ற தலைப்பில் மனதை கசக்கிப் பிழியும் சில உண்மைகளை தெளிவாக விளக்குகிறார். வாடகைத் தாய்மார்களின் எண்ணிக்கை இந்தியாவில்தான் அதிகமாம். ஏழைத் தாயின் உயிர் துச்சம், (பணக்கார)குழந்தையின் உயிர் விலை மதிப்பில்லாதது என்பதை அறியும்போது மனம் கலங்குவது இயல்பே.

மேலும் முருகானந்தன் கிளிக்குகள்  என்ற வலைப்பூவில் அழகழகான, ஆடம்பரமில்லாத, நம்மண்ணின் புகைப்படங்களும், அவற்றிற்கான ஒரு சிறு கவிதையும் இடம் பெறுவது இன்னும் சிறப்பு.

           ........................................................................................................................

3) விமரிசனம் என்ற இந்த வலைப்பூவின் ஆசிரியர் காவிரிமைந்தன் என்னும் புனைபெயரில் எழுதுகிறார்.

இவரது வலைப்பூவில் சூடான சமூக, அரசியல் பதிவுகள் நிறைய வந்துகொண்டிருக்கும். படிக்கவே சுவாரசியமாக இருக்கும். ஒருசில தடவை இவற்றிலிருந்து கொஞ்சம் வித்தியாசமான பதிவுகளும் வரும். அவற்றிலிருந்து சில‌ பதிவுகளை இங்கே பகிர்ந்துகொள்கிறேன்.

கோவில்கள் என்றாலே நமக்கு பக்தி, ஆன்மீகப் பணிகள்தான் முதலில் நினைவுக்கு வரும். 'இப்படி ஒரு கோயில்' என்னும் தலைப்பில் இவர் எழுதியுள்ள பதிவிலிருந்து திருச்சிக்கு அருகே உள்ள சுவாமி ஐயப்பன் கோவிலில் கால மாற்றத்திற்கேற்ப  ஆன்மீகத்துடன், சமூக சேவைகளையும் செய்வதாகக் கூறுகிறார், ஆச்சரியமாகத்தானே இருக்கிறது ! அவை என்ன என்பதை பதிவின் மூலமாகவும், நேரிலும் சென்று பார்த்து வருவோமே  ! அங்கேயே முகவரியையும் கொடுத்திருக்கிறார்.

"தம்படி, காலணா, அரையணா, ஒரணா, இரண்டணா,நாலணா, எட்டணா, அரை ரூபாய்"_______  இவையெல்லாம் நான்கு நூற்றாண்டுக்கால அரிய இந்திய நாணயங்களாம். அவற்றைப் பார்க்க விருப்பமா? ஆசிரியர் அவரது பேத்திக்காக தேடியபோது கிடைத்த அந்த அரிய பொக்கிஷங்களை நாமும் பார்த்து பயன்பெறும் வகையில் இங்கே  கொடுத்திருக்கிறார். எப்படித்தான் இருக்கும்? ஒரு எட்டுபோய் பார்த்துவிட்டு வருவோமே !

அந்தக்கால அரிய கருப்புவெள்ளை புகைப்படங்களை இங்கே நிறைய பதிந்து வைத்திருக்கிறார். பார்த்து பயன்பெறுவோமே. 

             ...................................................................................................................

 4) அடுத்து ஒரு மாறுதலுக்காக‌  மஹாலக்ஷ்மி விஜயன் அவர்களின் 'எண்ணங்கள் பலவிதம்' என்ற வலைப்பூவுக்கு செல்வோமா !

இவர் தனது அன்றாட வாழ்க்கையில் நடக்கும் சின்னசின்ன நிகழ்ச்சிகளை தனக்கேயுரிய நகைச்சுவையுடன் தன் எண்ணங்களாக சிறுசிறு கவிதைகள் வடிவில் இங்கே  பகிர்கிறார். ஆங்காங்கே தன் மகன்களின் குறும்புகளையும் நகைச்சுவையாகப் பதிவது மேலும் சிறப்பு. இவையெல்லாம் தன் எண்ணங்களின் நீரூற்று என்கிறார்.

இவரது பதிவுகளைப் படிக்கும்போது "அட நாமும் இதைத்தானே நினைத்தோம், ஆனால் இவர் டக்கென்று, அழகாக, கோர்வையாக, சொல்லிவிட்டாரே. நமக்கு சுட்டுப்போட்டாலும் வரமாட்டேங்கிறதே " என நினைக்கத் தோன்றும்.

இவர் மகனிடம் கதை சொல்ல போய், அதற்கு இவரது மகனின் ப‌தில் என்னவாக இருந்திருக்கும். இங்கே போய் கேட்போமே.

மேலும் ஊதக்காற்றிடம் இவர் விடும் சவால், அழகழகாக இடியாப்பம் வராமல் போனது   இதுமாதிரி நிறைய இருக்கின்றன. படித்தால் நேரம் போவதே தெரியாது.

'சப்பாத்தி சொல்லும் வாழ்க்கை பாடம்' என்ற தலைப்பில் நாம் நினைத்தே பார்த்திராத வாழ்க்கைத் தத்துவத்தை எப்படியெல்லாம் சொல்கிறார் பாருங்கள். கடைசியில் ஒரு 'பன்ச்' வச்சார் பாருங்க, அங்கதான் மஹா ஸ்ட்ராங்கா நிக்கிறாங்க. நீங்களும்தான் என்ன, ஏதுனு போய் பார்த்துட்டு வாங்களேன்.  நீரூற்று வற்றாமல் பாய்ந்தோட வாழ்த்துவோம் !
         ......................................................................................................

இத்துடன் இன்றைய அறிமுகங்களை முடித்துக்கொண்டு, நாளை வேறுசில அறிமுகங்களுடன் வருகிறேன். நன்றி !

மேலும் வாசிக்க...

வலைச்சரத்தில் முதல் நாள் : திங்கள் மலர்

வலைச்சரத்திற்கு வருகை தரும் அனைவருக்கும் இனிய‌ காலை வணக்கம்.

இன்று முதல் ஒரு வார கால‌த்திற்கு வலைச்சர பொறுப்பாசிரியர் பொறுப்பு எனக்குக் கிடைத்துள்ளதில் மகிழ்ச்சி.

இந்த வலைச்சரத்தில் என்னுடைய வலைப்பூக்களையும், அதிலிருந்து சில பதிவுகளையும் அறிமுகம் செய்துகொள்ள அருமையான வாய்ப்பளித்த சீனா ஐயாவுக்கு எனது நன்றி.

வலைச்சரத்தில் என்னையும் ஒரு பூவாக சேர்த்துக்கொண்டதற்கு முதலில் சீனா ஐயாவுக்கு நன்றி. இந்தப் பூவும் அந்தப் பூக்களைப்போல் மணம்வீச வேண்டும் என்ற ஆவலில் வந்துள்ளேன். இதுநாள்வரை என்னை வலைச்சரத்தில் அறிமுகப்படுத்திய அனைத்து நல்லிதயங்களுக்கும் நன்றி பல‌.

வலைச்சரத்தில் பங்குகொள்ள முதலில் கொஞ்சம் தயக்கம் இருந்தது உண்மைதான். ஆனால் நேற்று பதிவர்கள் என்னை வாழ்த்தி, வரவேற்றதைப் பார்த்த பிறகு 'எங்கே அந்தத் தயக்கம்'  என‌ தேடும்படி ஆகிவிட்டது.

யாரைப்பற்றியாவது விமர்சனம் செய்யச் சொன்னால் வலிய வந்து எளிதாக, போட்டுக் கொடுத்துவிட்டு போய்விடலாம். ஆனால் 'நம்மைப்பற்றி' எனும்போது எப்படியெல்லாம் யோசிக்க வேண்டியிருக்கு! இருந்தாலும் சொல்லித்தானே ஆகவேண்டும்.

என்னுடைய‌ சொந்த ஊர் பண்ருட்டிக்குப் பக்கத்தில் உள்ள அழகிய ஒரு கிராமம். முருகனின் பெயரைச் சொல்லச்சொல்ல இனிப்பதுபோல், எங்கள் ஊரின் பெயரைச் சொல்லும்போதும் நாவில் ஒரு இனிப்பு தெரியும். பெயரைக் கண்டுபிடிப்பவருக்கு அந்த இனிப்பில் ஒன்று பரிசாக அனுப்பி வைக்கப்படும், நம்புங்க ! (S & H உங்கள் செலவில்)

சமையல் வலைப்பதிவை வைத்துக்கொண்டு கடையில் வாங்கிய இனிப்புகளுடன் உங்களை வரவேற்க மனம் இல்லாமல் நானே என் கைப்பட செய்த பாரம்பரியமான‌ இனிப்பான அதிரசங்களை செய்துகொண்டு வந்திருக்கேன், வேண்டிய‌மட்டும் எடுத்து, சாப்பிட்டுப் பார்த்து எப்படி இருக்குன்னு சொல்லுங்க !

"பார்க்க நல்லாத்தான் இருக்கும், சாப்பிட்டுப் பார்த்தால்தானே தெரியும்", என்று நினைக்கிறீர்களா ! பிட்டு சாப்பிட‌ சிரமப்படுவீர்களே என்று நினைத்துதான் உங்களுக்காகவே நம்ம ஊர் சுத்தி,கோடரி இவை பத்தாதுன்னு அயலகத்தில் இருந்து ராட்சஸ இயந்திரங்களை எல்லாம் வாடகை கொடுத்து, வரவழைத்து உடைத்தே எடுத்து வந்துவிட்டேன். அதனால பயப்படாம எடுத்துக்கலாம்.

இந்தப் பதிவில் என்னுடைய வலைப்பதிவுகளையும், அதிலுள்ள சில பதிவுகளையும் உங்களுக்கு அறிமுகப்படுத்தப் போகிறேன். ஆனால் அவற்றில் எதை அறிமுகப்படுத்துவது, எதை விடுவது என எனக்குத் தெரியவில்லை. இரண்டு வலைகளிலும் உள்ள பதிவுகள் எல்லாமே எனக்குப் பிடித்தமானவையே. இருந்தாலும் சிலவற்றை சொல்லியே ஆகவேண்டும்.

நான் இரண்டு வலைப்பூக்களில் எழுதுகிறேன். ஒன்றில் சமையல் பற்றியும், மற்றொன்றில் பொழுதுபோக்காக, அதாவது எல்லாமே இருக்கும், ஆனால் எதுவுமே இருக்காது என்ற அளவிலும் இருக்கும். 

முதல் வலைப்பூ:  http://chitrasundar5.wordpress.com/

என்னதான் விதவிதமாக சமைத்து அல்லது ரெஸ்டாரண்டில் சாப்பிட்டாலும் என் அம்மா, ஆயா (பாட்டி) சமைத்து, அறிமுகம் செய்து கொடுத்த‌ அந்த கிராமத்து சமையல்தான் இன்னமும் நாவில் சுவையாக இருக்கிற‌து. அதை விட்டுவிடக்கூடாது, வீட்டில் உள்ளவர்களுக்காக, அவர்கள் பயன்பெறும் வகையில் அவற்றை இங்கே பதிவு செய்து வைத்துள்ளேன். விரும்பியவர்கள் சென்று பார்க்கலாமே.

அதிலும் இந்த‌  பொருளங்கா உருண்டை  , அரிசி உருண்டை, பொரிஉருண்டை  இவை எல்லாம் திகட்டாத நம்ம ஊர் இனிப்புகள். சின்ன வயசுல இந்தப் பொரி உருண்டையை வாங்க நான் பட்டபாடு, அதாவது அப்பா, அண்ணன் இல்லாத சமயமாகப் பார்த்து விற்பவர் வந்தால்தான் தப்பிக்க முடியும். அது செய்வதற்கு இவ்வளவு சுலபமாக இருக்கும் என்று அப்போது எனக்குத் தெரியாது. தெரிந்திருந்தாலும் என் அம்மாவின் பாடு அவ்வளவுதான் !

சுவையான ஆப்பம் இங்கே . இந்த ஆப்பத்திற்காகவே ஒரு 7 கிமீ தொலைவில் இருக்கும் எங்கள் சித்தி வீட்டிற்கு அடிக்கடி படையெடுப்போம்.

மறந்தேபோன புட்டு  செய்முறைகள்கூட‌  இங்கே உள்ளன.

அரிசிமாவு புட்டு, கேழ்வரகு புட்டு எல்லாம் சரிதான், இதென்ன 'வெண்ணெய் புட்டு' என்கிறீர்களா? இந்த‌ இனிப்பை எங்கம்மா அடிக்கடி செய்து தருவாங்க. இதன் செய்முறையை அம்மாவிடம் கேட்டுவாங்கி நானும் அடிக்கடி செய்வதுண்டு. ஒருமுறை செய்து பாருங்க, பிறகு உங்க வீட்டிலும் அடிக்கடி இதைப் பார்க்கலாம்.

முக்கியமாக கேழ்வரகு கூழ் . கோடையை இதை வைத்தே சமாளித்துவிடலாம்.

எளிய பொருள்களை வைத்துக்கொண்டு சில வெளிநாட்டு உணவுகளையும் முயற்சித்திருக்கிறேன், செய்து, சுவைத்து பாருங்கள். இன்னும் நிறைய நல்லநல்ல சமையல் எல்லாம் உள்ளது. நேரமிருக்கும்போது வந்துட்டு போங்க. 

இது சமையலுக்கான தளம் என்றாலும் சில புகைப்படங்களையும் இங்கு காணலாம்.

அதிலும் குளிர் காலத்தில் கலிஃபோர்னியா காடைக் குருவிகள் எப்படி இந்தக் கடுங்குளிரிலிருந்து தப்பிக்கின்றன என்பதை இங்கே சென்று பார்த்து தெரிந்துகொள்ளலாம்.

அதுமட்டுமல்ல இங்கே சிலந்தியார் எப்படி தன் குளிர்கால நிலைய சமாளிக்கிறார் பாருங்கள்.

இரண்டாவது வலைப்பூ: http://chitrasundars.blogspot.com/

இதைத் தொடங்கி ஒருவருடம் ஆகப் போகிறது. என்னுடைய பொழுதுபோக்குக்காகவும், நான் எடுக்கும் புகைப்படங்களை சேமித்து வைக்கும் இடமாகவும் இதைப் பயன்படுத்துகிறேன்.

எங்கள் ஊர் இலையுதிர்காலம் எப்படி இருக்கிறதென்று இங்கே வந்துதான் பாருங்களேன்.

என்னுடைய முதல் நகைச்சுவையை இங்கே முயற்சித்திருக்கிறேன், படித்துவிட்டு சிரிப்பு வருகிறதா என பாருங்கள்.

மீள்சுழற்சி முறையில் செடிகளை வளர்க்கும் முறையில் நான் வளர்த்த கொத்துமல்லி செடியை இங்கே காணலாம்.

எங்கள் ஊரில் என‌க்கு அறிமுகமான கார்த்திகை தீபம், தீபாவளி இவற்றை உங்கள் ஊரில் நீங்கள் கொண்டாடியவற்றுடன் ஒப்பிட்டுப்பார்த்து சொல்லுங்களேன்.

இப்போதே பதிவு நீண்டுவிட்டது. மேலும் (சுய)தம்பட்டம் அடித்து உங்களையும், ஏன் என்னையுமே சோர்ந்துவிடச் செய்ய வேண்டாமென முடிவெடுத்து, இன்று இத்துடன் முடித்து விடைபெறுகிறேன்.

மீண்டும் நாளை சில பதிவர்களுடன், அவர்களின் பதிவுகளையும் அறிமுகம் செய்ய வருவேன், நன்றி.

மேலும் வாசிக்க...