தொன்மையும் வன்மையும்

தொன்மையும் வன்மையும்

1.

முந்தும்சீர் பாட்டேந்தி மூப்பில்லாத் தொகையேந்தி

     மூவேந்தர் தமிழாண்ட நாடு!

        மொழிகள்தம் தாயாக முல்லைப்பூ வனமாக

            முப்போதும் கவிபூக்கும் காடு!

சந்தம்சீர் தேவாரம் தண்ணாழ்வார் பாவாரம்

     தழைத்தோங்க வாயாரப் பாடு!

        தந்தான புகழ்மாலை தலைமீது நீ..சூடித்

            தமிழென்று.. தமிழென்று.. ஆடு!

சொந்தம்..இவ் வுலகாகத் துயர்போக்கும் உறவாகச்

     சொல்லும்..நம் நூலுக்கே தீடு!

        சுடர்கின்ற சிலம்பென்ன? தொடர்கின்ற மணியென்ன?

            சொர்க்கத்தை இம்மண்ணில் சூடு!

சிந்தைப்பூ பூத்தாட விந்தைப்பூ கூத்தாடச்

     சேர்ந்திங்குத் தமிழ்காக்கக் கூடு!

        வித்தாக நான்தந்த முத்தான கவியுண்க!

             விளையாது.. ஒருநாளும் கேடு!

2.

பூவேந்தும் புகழேந்தும் புதுமைச்சீர் பலவேந்தும்

     பொற்கம்பன் கவிமாட்சி சொல்லு!

        பொன்னேந்தும் ஒளியாகப் பொருளேந்தும் அருட்பாவைப்

            புவியெங்கும் நீ..ஓதிச் செல்லு!

காவேந்தும் வண்ணத்தில் கவிதந்த குயில்காரன்

     கருத்தேந்தி உலகத்தை வெல்லு!

        கனியேந்தும் வண்ணத்தைக் கழையேந்தும் எண்ணத்தைக்

            களிப்பேந்த எந்நாளும் கொள்ளு!

நாவேந்தர் உரைகேட்டு நடைபோடும் நெஞ்சத்துள்

     நன்கூறும் நற்போதைக் கள்ளு!

        நரியான பகையென்ன? அரியான பகையென்ன?

            நாராகக் கிழித்திங்குத் தள்ளு!

மூவேந்தர் போலிங்குப் பாவேந்தர் தமிழ்தந்தார்

     முன்வந்து தமிழ்காக்க நில்லு!

        முன்வந்த இனமன்றோ? அன்பீந்த மொழியன்றோ?

            முறுக்கோடு கவி..பாடித் துள்ளு!

-----------------------------------------------------------------------------------------------------

இலக்கணச்செல்வர் சோசப் விஜீ - திருச்சி

வலைப்பூ: ஊமைக் கனவுகள்

தொன்மைச்சீர் காக்கின்ற வன்மைச்சீர் வலைப்பூவாம்

     சுடர்கின்ற நம்ஊமைக் கனவு!

        தொல்காப்பி யம்கண்டு பல்காப்பி யம்சொல்லும்

            தொடரூட்டும் மொழியேந்தும் துணிவு!

தன்மைச்சீர் பன்மைச்சீர் தாமாய்ந்து கவிபாடத்

     தந்தோங்கும் யாப்பென்னும் உணவு!

        தான்கண்ட நல்லாய்வைத் தேன்கொண்டு பதிவிட்டுத்

            தலையாட்டம் இல்லாத பணிவு!

மென்மைச்சீர் மனங்கொண்டு மேன்மைச்சீர் அறங்கொண்டு

     வினையாற்றும் சோசப்..என் உறவு!

        வெண்பாவில் விளையாடித் தண்பாவில் கவிபாடி

            விளைக்கின்ற எழுத்தோதும் கனிவு!

நன்மைச்சீர் நான்கண்டு நாட்டுக்குச் சொல்கின்றேன்

     நலங்காண நீ..அங்கே உலவு!

        நன்னூலும் தொன்னூலும் பன்னூலும் நீ.கற்று

            நடைபோட்டுத் தமிழோடு குலவு!

http://oomaikkanavugal.blogspot.com/2014/09/blog-post.html

-----------------------------------------------------------------------------------------------------

கவிஞர் நா. முத்துநிலவன் - புதுக்கோட்டை

வலைப்பூ: வளரும் கவிதைகள்

பேச்சாற்றல் எழுத்தாற்றல் தமிழொன்றே தன்னெஞ்ச

      மூச்சாற்றால் நம்முத்து நிலவன்!

ஏச்சாற்றல் கொண்டிங்கே ஏமாற்றும் நபர்மாற

      எழிலாகக் கவிபாடும் புலவன்!

பாச்சாற்றல் தான்கொண்டு பகைசாய்க்கும் வகைகண்டு

      பழிநீக்கிக் கொடிநாட்டும் வலவன்!

பாச்சூட்டிப் பயனூட்டிப் பாருக்கு வளமூட்டிப்

      பண்பாட்டை விளைக்கின்ற உழவன்!

http://valarumkavithai.blogspot.com/2012/01/blog-post_23.html

-----------------------------------------------------------------------------------------------------

முனைவர் ஜம்புலிங்கம் - தஞ்சாவூர்

வலைப்பூ: முனைவர் ஜம்புலிங்கம்

நம்நாட்டு வரலாற்றை நன்காய்ந்து தருகின்ற

      நல்லாற்றல் ஒளிர்சம்பு லிங்கம்!

செம்பாட்டு நூலாய்ந்து செம்மாந்த நெறியாய்ந்து

      செழித்தோங்கச் தமிழேந்தும் சிங்கம்!

எம்பாட்டுச் சிறப்பாக ஈடில்லாச் சுவையூறும்

      இவர்பூவும் தமிழ்த்தாயின் அங்கம்!

வெம்பட்டு மலர்தூவிக் கும்பிட்டு மகிழ்கின்றேன்

      கொடுத்துள்ள பதிவெல்லாம் தங்கம்!

http://drbjambulingam.blogspot.com/2015/03/blog-post.html

-----------------------------------------------------------------------------------------------------

முனைவர் இரா. குணசீலன் - திருச்செங்கோடு

வலைப்பூ: வேர்களைத் தேடி

மொழிகொண்ட வேர்தேடி வினையாற்றும் தமிழ்வாணர்

      முனைவர்.இரா குணசீலர் என்க!

இழிகொண்ட பகையோட இவர்தீட்டும் எழுத்தெல்லாம்

      இனங்காக்க மருந்தாகும் உண்க!

வழிகண்டு சொல்கின்ற வல்லாய்வுச் செல்வர்தம்

      வலைப்பூவை நாள்தோறும் தின்க!

விழிகொண்ட பயனாக எழில்கண்டு மகிழ்ந்தாட

      விரைவாக நீயங்குச் செல்க!

http://www.gunathamizh.com/2010/04/blog-post_06.html

-----------------------------------------------------------------------------------------------------

கொ.சுப. கோபிநாத் - திண்டுக்கல்

வலைப்பூ: இலக்கணத் தேறல்

சீரேந்தும் தமிழ்த்தாயின் பேரேந்தும் ஆய்வீந்து

      செயலாற்றும் சுப.கோபி நாத்தே!

ஊரோங்க, உலகோங்க, உயர்ஞான நிலையோங்க,

      உரமாகும் மின்பூக்கள் பூத்தே!

தாரோங்கும் தமிழாட்சி தந்தோங்கும் ஆக்கங்கள்

      தேரேந்தித் தாமாடும் கூத்தே!

போரேந்தும் மாவீரன் பேரேந்தும் வலைப்பூவைப்

      போய்ப்பார்ப்பீர்! சுரக்கும்தேன் ஊற்றே!

http://www.ilakkanatheral.blogspot.in/2014/04/blog-post.html

-----------------------------------------------------------------------------------------------------

மேலும் வாசிக்க...

என் பாட்டுப் பரம்பரை

என் பாட்டுப் பரம்பரை

வலைச்சர நண்பர்களுக்கு வணக்கம்!

வலைச்சரத்தைக் கவிச்சரமாய் மின்னும் வண்ணம்

     வளர்கவிகள் வடித்திட்ட சோசப் வாழ்க!

கலைச்சரத்தை விஞ்சுகின்ற கருத்தை ஈந்து

     கனிச்சரமாய்ச் சுவைதந்த நண்பர் வாழ்க!

அலைச்சரத்தைப் போலிங்கே ஆசை பொங்கி

     அணிச்சரமாய் அந்தமிழை அணிந்தார் தம்மின்

மலைவளத்தை இன்றுரைப்பேன்! மரபைக் காக்கும்

     மனவளத்தை நன்றுரைப்பேன்! சுவைப்பீர் நன்றே!

என்னினிய மாணவர்கள் ஐவர் சீரை

     இங்கெழுதி மகிழ்கின்றேன்! வாழ்வில் என்றும்

பொன்னரிய பூந்தமிழை உயிராய்க் கொண்டு

     புனைகின்ற இவர்பாக்கள் புவியை வெல்லும்!

உன்னரிய பெயர்சொல்லும் பிள்ளை போன்றே

     என்புகழை உரைத்திடுமே இவர்தம் ஆக்கம்!

இன்னரிய அமுதத்தைக் குழைத்து நாளும்

     இடுகின்ற பதிவெல்லாம் தமிழைக் காக்கும்!

யாப்பென்னும் பூப்பறிக்க இவர்கள் வந்தார்!

     இன்றமிழின் நெறிசொன்னேன்! மரபே வாழ்வின்

காப்பென்னும் உண்மையினை உணரச் செய்தேன்!

     கருத்தெல்லாம் தமிழொளிரத் தீட்டும் செய்யுள்

தோப்பென்னும் வண்ணத்தில் தழைக்க வேண்டும்!

     தொன்மொழியைச் செம்மொழியைப் பரப்ப வேண்டும்!

பாப்பின்னும் பாசறையைக் காக்கும் வீரர்!

     பாரதியென் பரம்பரையாய் வாழ்வார் நன்றே!

-----------------------------------------------------------------------------------------------------

கவிஞர் அருணாசெல்வம்

வலைப்பூ: அருணாசெல்வம் கதம்ப வலை 

என்பாட்டுப் பரம்பரையில் முதன்மை பெற்றார்!

     இனப்பற்றும் மொழிப்பற்றும் இவர்தம் கண்கள்!

இன்பூட்டும் கதையழகும், கற்போர் நெஞ்சுள்

     இசையூட்டும் கவியழகும் நல்கும் நங்கை!

அன்பூட்டும் தாய்நிகர்த்த அருணா செல்வம்

     அறமூட்டும் அறிவூட்டும் நூல்கள் தந்தார்!

வென்றீட்டும் புகழ்மாலை மலைபோல் ஓங்கும்!

     வியப்பூட்டும் வலைப்பதிவைப் படித்துப் பாரீர்!

http://arouna-selvame.blogspot.com/2014/12/blog-post_10.html

-----------------------------------------------------------------------------------------------------

கவிஞர் சீராளன்

வலைப்பூ: என்னுயிரே

நேராளும் நன்னெஞ்சன்! அன்பின் ஊற்று!

     நிறையாளும் பொன்மதியன்! என்றன் தம்பி!

தாராளும் தண்டமிழில் மொய்க்கும் தும்பி!

     தமிழாளும் மாட்சியினை நன்றே கற்றுச்

சீராளன் வாழ்கின்றான்! சந்தம் வண்ணம்

     சிறந்தாளும் திறனுற்றான்! வாழ்த்து கின்றேன்!

பாராளும் வண்ணத்தில் பாக்கள் செய்வான்!

     பண்ணாளும் என்னுயிரே பக்கம் பாரீர்!

http://soumiyathesam.blogspot.com/2015/06/blog-post.html

----------------------------------------------------------------------------------------------------- 

கவிஞர் இளமதி

வலைப்பூ: இளையநிலா  

பொற்புடைய கவிச்செல்வி! பூவின் உள்ளம்!

     பொங்கிவரும் தமிழாற்றில் நீந்தும் செம்மீன்!

கற்புடைய பெருவாழ்வு! பகையைச் சாய்க்கும்

     கனலுடைய சொல்லாற்றல்! யாப்பின் மீது

பற்றுடைய இளமதியார் பாடும் பாக்கள்

     படைப்புலகில் புதுமையினைப் பொலியச் செய்யும்!

ஒற்றுடைய சந்தமுடன் வண்ணம் சிந்தும்

     ஒளிர்கின்ற இவர்வலையை ஓதிப் பாரீர்!

http://ilayanila16.blogspot.com/2015/08/blog-post_1.html

----------------------------------------------------------------------------------------------------- 

கவிஞர் அம்பாளடியாள்

வலைப்பூ: அம்பாளடியாள்

புலம்பெயர்ந்த வாழ்வினிலும் தமிழைக் காக்கப்

     புறப்பட்ட தமிழச்சி! மறத்தி! கொண்ட

நலம்பெயர்ந்த ஈழத்தை எண்ணி எண்ணி

     நாட்டுகின்ற பாட்டெல்லாம் வீரம் மூட்டும்!

கலம்நிறைந்த அமுதத்தைப் பதிவாய் இட்டுக்

     கமழ்அம்மாள் கவித்திறனை வாழ்த்து கின்றேன்!

குலம்நிறைந்த புகழ்வாழ்வும்! கொள்கைப் பற்றும்

     கொடுக்கின்ற வலைப்பூவைப் படித்துப் பாரீர்!

http://rupika-rupika.blogspot.com/2015/07/blog-post_31.html

----------------------------------------------------------------------------------------------------- 

கவிஞர் சசிகலா

வலைப்பூ: தென்றல்

நான்கட்டும் கவிதைகளை நன்றே கற்று

     நலங்கொட்டும் கவியரசி! சொற்கள் யாவும்

தேன்சொட்டும்! நம்நாட்டுப் புறத்தில் பூத்த

     சீர்கொட்டும்! செந்தமிழை அள்ளி உண்டு

வான்கொட்டும் மழையாக வடிக்கும் பாட்டில்

     வளங்கொட்டும் சசிகலா வாழ்க! நம்மின்

ஊன்முட்டும் வண்ணத்தில் உணர்ச்சி பொங்க

     உரமூட்டும் தமிழ்த்தென்றல் வலையைப் பாரீர்!

                        http://veesuthendral.blogspot.in/2013/01/blog-post_5.html

மேலும் வாசிக்க...

என் ஊரும் பேரும் சீரும்

வலைச்சர நண்பர்களுக்கு வணக்கம்

என் ஊரும் பேரும் சீரும்!

உலகம் போற்றும் உயர்ந்த தமிழின்

திலக மாகத் திகழும் புதுவை!

நான்கு திசையும் நற்றமிழ் மேன்மையை

ஊன்றி வளர்க்கும் ஒப்பில் புதுவை!

புலமைக் கோயில்! பொதுமை வாயில்!

வளமை வாழ்வை வழங்கும் புதுவை!

ஆலை நலமும் சோலை வளமும்

சாலை அழகும் சமைத்த புதுவை!

சந்தம் வண்ணம் சிந்துக் கவிகளை

எந்தப் பொழுதும் இசைக்கும் புதுவை!

இலக்கணம் சூடி இலக்கியம் பாடித்

தலைமை பெற்றுத் தழைக்கும் புதுவை!

குயில்போல் பாரதி கூவிக் களித்தே

உயிர்போல் தமிழை ஓதிய புதுவை!

பாட்டின் வேந்தன் பாரதி தாசன்

மீட்டிய பாக்களால் மின்னும் புதுவை!

சித்தர் பூமி! முத்தர் பூமி!

கத்தும் கடலால் கமழும் புதுவை!

சீரிய முறையில் நேரிய பாதை

பாரீசு நகரைப் பார்க்கும் சன்னல்!

புண்ணியப் புதுவையில் புலவன் யானும்

தன்னிக ரில்லாத் தமிழைக் காக்க

வந்து பிறந்தேன்! சிந்தை மணக்கத்

தந்து சிறந்தேன் தண்டமிழ் மரபை!

இரண்டாம் பாரதி தாசனாய் என்னைத்

திரண்ட அன்பால் செப்புவார் புலவோர்!

தனித்தமிழ் சாற்றல் தமிழினம் போற்றல்  

கனித்தமிழ் நாட்டைக் காத்தல் கடனே!

என் ஆசிரியர்கள்

அந்தாதி அரசர் பா.சு. அரியபுத்திரனார்!

அந்தாதி அரசர் அளித்த தமிழால்

செந்தமிழ் பாடும் திறனைப் பெற்றேன்!

யாப்பின் நுட்பம் யாவும் எனக்குக்

காப்புறத் தந்த கடவுள் அவரே!

ஏந்தூர் சடகோப இராமானுசனார்

சடகோப இராமா னுசரைச் சார்ந்தேன்

வடமொழி வேத வகைகளை உணர்ந்தேன்!

அத்தன் அருளைச் செப்பும் நூல்களில்

சித்தம் கொள்ளச் செய்தவர் அவரே!

இயலிசைப் புலவர் இராச. வேங்கடேசனார்

பாட்டுக் கலையில் பயிற்சி அளித்தே

ஏட்டில் என்னை எழிலுறச் செய்தவர்!

இயலிசைப் புலவர் இராச. வேங்கடர்

உயர்நலம் ஊட்டி உவந்தவர் அவரே!

இலக்கணச்சுடர் முனைவர் 

இரா. திருமுருகனார்

கொள்கைத் தமிழைக் குழைத்துக் கொடுத்துத்

துள்ளும் சந்தத் துறைகள் காட்டி

ஓங்கச் செய்தார் ஒண்திரு முருகனார்

தாங்கும் வலிமை தந்தவர் அவரே!

பாவலர்மணி சித்தன்

 

சித்தன் என்னும் சிறந்த புலவர்

நித்தம் என்றன் நெஞ்சுள் நிற்பவர்!

பாட்டின் நுண்மை! படைப்பின் தன்மை

ஊட்டும் தாயாய் உவந்தார் அவரே!

சந்தக் கவிஞர் தே. சனார்த்தனனார்

எந்தை சனார்த்தனர் என்ற கிருட்டினர்

சந்தக் கவிஞர்! தங்கத் தமிழைத்

துள்ளி யாடித் தொடரும் அகவையில்

அள்ளி அள்ளி அளித்தவர் அவரே!

என் வலைப்பூ

மரபுத் தமிழின் மாண்பைப் பரப்ப

விரவும் அன்பால் விளைந்த என்வலை!

கவிதை பாடும் கலையை வழங்கும்!

சுவையைச் சொல்லச் சொற்கள் இல்லை!

பற்றாய் நாளும் படித்து வந்தால்

முற்றும் மனத்துள் முத்தமிழ் யாப்பே!

சென்று பாரீர்! செந்தமிழ்க் கனிகளைத்

தின்று பாரீர் தெரியும் நன்மையே!

http://bharathidasanfrance.blogspot.fr/2013/12/blog-post_18.html

மேலும் வாசிக்க...

வலைச்சரத்தில் தமிழ் விருந்து தந்து விடைபெறுகிறார் சாமானியன் சாம், தமிழ் அமுது மரபுக் கவி மழையாய்! பொழிய வருகிறார்! கவிஞர் கி.பாரதிதாசன்

நண்பர்களே! நல்வணக்கம்!

இந்த வார வலைச்சரம் ஆசிரியப் பணியை அழகுற நிறைவு செய்யும் ‘சாமானியனின் கிறுக்கல்கள்’ வலைஞர், சாமானியன் சாம் அவர்கள் மிகவும் திறம்பட,  பயனுள்ள பல பதிவுகளை பகிர்ந்தளித்து, பலதரப்பட்ட  சிறந்த பதிவர்களை நமக்கெல்லாம் அறிமுகம் செய்து வைத்து, வலைச்சரத்திற்கு மேலும்  சிறப்பினை சேர்த்தமைக்காக ! அவருக்கு, வலைச்சரம் குழு நன்றி கலந்த பாராட்டுக்களை வழங்குகிறது.

அவரது சிறப்பினை சீர்த்தூக்கிப் பார்க்கும் நன்மதிப்பு பட்டியல் இதோ!

சாமானியன் சாம் உங்களிடமிருந்து,

276 க்கும் மேற்பட்ட மறுமொழிகளும்,

 61 - தமிழ் மணம் வாக்குகளையும்,

1435 - க்கும்மேற்பட்ட பக்கப்பார்வைகளும் இதுவரையில் பெற்றுள்ளார்.

தமது, வலைச்சர வாரத்தை, வலைஞர்களின் எதிர்பார்ப்பினை பூர்த்தி செய்யும் வகையில், அவரது அருந்தமிழ் பணியை நமக்கெல்லாம்  பகிர்ந்தளித்து நமது நம்பிக்கையை பெற்று விடை பெறுகிறார். 

நண்பர் சாமானியன் சாம்  அவர்களை,

நன்றி பாராட்டி, வாழ்த்தி வழியனுப்புவதில் 'வலைச்சரக் குழு' பெரு மகிழ்ச்சியடைகிறது.

நாளை முதல் துவங்கும் வாரத்திற்கு வலைச்சர ஆசிரியர் பொறுப்பேற்க....  கவிஞா் கி. பாரதிதாசன்     விருப்பம் தெரிவித்து முன்வந்துள்ளார்.

மூப்பைத் தீண்டா யாப்பை யளிக்கும்

யாப் பெருங்கலக் காரிகை -நூற்பா

கோர்க்கும் கோப் பெருங் கவியேநீ!

வார்க்கும் கவி மரபு!

புதுவையில் பிறந்தவர்!

பிரான்சு நாட்டில் வாழ்பவர்!

தனித்தமிழ்

தமிழ்மொழி காப்பதுவும் பரப்புவதும்

தமிழின முன்னேற்றம்

முக்கொள்கையைக் கொண்டு இயங்குபவர்!

பிரான்சு கம்பன் கழகத்தின் தலைவர்

மரபுக் கவிஞர்

இலக்கண ஆசிரியர்

சொற்பொழிவாளர்

எனப் பன்முகம் படைத்த

கவிஞா் கி. பாரதிதாசன்  அவர்கள்

இவ்வாரம் 'வலைச்சரத்தை'க் கவிச்சரமாய் மின்ன  ஆசிரியராக

பொறுப்பேற்கிறார்.

தமிழ்ப் பணி செய்வதில் தனி ஆர்வமிக்க நன்னூல்  வழி காட்டும் நன்னெறியாளர்

 "கவிஞர் கி.பாரதிதாசன்" அவர்களை,

இந்த வாரம் வலைச்சரம் ஆசிரியராக  "வருக... வருக..." என அழைத்து ஆசிரியர் பொறுப்பில் அமர்த்துவதில், வலைச்சரக்குழு பெருமகிழ்ச்சி அடைகிறது

நல்வாழ்த்துகள் சாமானியன் சாம்

நல்வாழ்த்துகள் கவிஞர் கி.பாரதிதாசன்

நட்புடன்,
புதுவை வேலு

மேலும் வாசிக்க...

புதியதோர் உலகம் செய்வோம் !

மற்ற எந்த மொழிகளையும் விட தமிழின் வலைப்பூ உலகம் மிகவும் பரந்துப்பட்ட ஒன்று. பன்முகத்தன்மை கொண்டது.

ஆங்கில, பிரெஞ்சு வலைதளங்கள் கூட ஒரு குறிப்பிட்ட வட்டத்தினுள் இயங்குபவை. பெரும்பாலும் பொழுதுபோக்கு ரசணை சார்ந்தவை. உதாரணமாக மீன்பிடிப்பதை பொழுதுபோக்காக கொண்டவர்கள் தங்கள் அனுபவங்களை பகிர்ந்துகொள்ளவும் தொழில்நுட்பங்களை பரிமாறிகொள்ளவும் ஒரு குழுவாக நடத்தும் வலைதளங்கள். தமிழில் இதுபோன்ற வகைசார்ந்து பெரும் வெற்றிபெற்ற வலைப்பூ குழு காமிக்ஸ் ரசிகர்கள் ! அழிவின் விளிம்பில் நின்ற தமிழ் காமிக்ஸ் கலையை தங்களுக்குள்ளான தகவல் பரிமாற்றத்தின் மூலம் மீட்டெடுத்த சாதனையாளர்கள்.

தினசரி செய்திகள் தொடங்கி கதை, கவிதை, கட்டுரை என ஊடகம் மற்றும் இலக்கியத்தின் அனைத்து வீச்சிலும் இயங்கும் தமிழ் வலையுலகம், பதிவர் சந்திப்புகள, மாநாடு என வலிமையான சமூக இயக்கமாகவும் உருபெற்று வருகிறது. லாப நோக்கமற்ற பல சமூக அக்கறை கொண்டவர்களின் முயற்சியின் பலன் இது.

ஒருமாபெரும் தேசத்தின் லட்சிய சிறகுகளை விரிக்க தன் வாழ்நாள் முழுவதையும் அர்ப்பணித்த மாமனிதர் அப்துல் கலாம் மறைந்த வாரம் இது...

பலகோடி இளைஞர்களிடம் லட்சிய கனவுகளை விதைத்த திருப்தியுடன் மீளாதுயிலில் ஆழ்ந்துவிட்ட அந்த நல்ல மனிதரின் கனவினை நனவாக்கும் பணியினை நாம் அனைவரும் முன்னெடுக்க வேண்டும். அவரின் சரிதையான அக்னி சிறகுகளை படித்தவர்களுக்கு அவர் தன் ஆசிரியர்களின் மேல் வைத்திருந்த பற்று புரியும்.

தமிழ் வலைதளம் நடுத்துபவர்களில் பலர் ஆசிரியர், ஆசிரியைகள் என்பது தமிழ் வலையுலகின் தனிப்பெரும் சிறப்பு.

ஒரு தலைமுறையையே உருவாக்கும் புனிதமான பணி ஆசிரியபணி !...

பெற்றோர்களுக்கு அடுத்த படியாக ஒரு நல்ல மனிதனின் வளர்ச்சி அவனுக்கு கல்வியை போதிக்கும் ஆசிரியர்களை சார்ந்தே இருக்கிறது. இது எந்த தேசத்துக்கும் எந்த மண்ணுக்கும் பொருந்தும் !

ஒரு ஆசிரியர் நினைத்தால் காந்தியின் கட்டுப்பாடையும், பாரதியின் நெஞ்சுரத்தையும், பெரியாரின் சீர்த்திருத்ததையும், கலாமின் லட்சியத்தையும் ஒரு சேர மாணவர்களுக்கு புகட்ட முடியும் !

" ஐரோப்பாவில், பாரீஸ் மாநகர்... 

பனிபடர்ந்த டிசம்பர் மாதத்தில் கிறிஸ்துமஸ் பண்டிகைக்கு தயாராகும் மக்கள் கூட்டம்... 

பணக்காரர்கள்  SAMARITAINE, GALLERY LA FAYETTE போன்ற பெரும் ஷாப்பிங் மால்களில் மொய்க்க, நடுத்தர மக்கள் சூப்பர் மார்க்கெட்டுகளில் வரிசையில் நிற்கிறார்கள். மால்களுக்கும் சூப்பர் மார்க்கெட்டுகளுக்கும் வெளியே கடும் குளிரை பொருட்படுத்தாது கையேந்தி நிற்கும் ஏழைகள் ! 

உரையாடல்களை உற்று கேட்டால்... அரசியல் நிலவரம்... வேலை பிரச்சனை... நேரமின்மை... காதல்... பிரிவு.... நம்பிகை... துரோகம்... ! 

கண்களை மூடினால் பூகோள எல்லைகள் தொடங்கி சாதி, மதம், மொழி, இனம், கலாச்சாரம் என அனைத்தும் மறந்துவிடுகிறது.

 சந்தைகளும் திருவிழா கூட்டங்களும் ஒரே மாதிரிதான் இருக்கின்றன. தாயின் அன்பும், மழலையின் சிரிப்பும், காதலின் கிளுகிளுப்பும், பிரிவின் துயரமும், நட்பின் கதகதப்பும், துரோகத்தின் வலியும், தோல்வியின் கழிவிறக்கமும், இளமை முறுக்கும், முதுமையின் தளர்வும் உலகெங்கும் ஒரே அதிர்வைதான் ஏற்படுத்துகின்றன. "

சாதிமத வேறுபாடுகளற்ற, மொழிகள் எல்லைகள் கடந்து மனிதம் போற்றும் புதியதோர் உலகம் செய்ய கனவு காண்போம்... அந்த கனவினை நம் வாழ்நாளிலேயே நனவாக்குவோம் !

 தான் கற்றதையும் பெற்றதையும் அனைவருக்கும் அளிக்க, ஒளிப்பதிவாளர் விஜய் ஆம்ஸ்ட்ராங் நடத்தும் வலைதளம். அதிகம் அறியப்படாத ஆனால் அனைவரும் வாசிக்க வேண்டிய தளம்.

கற்றது கையளவு கல்லாதது உலகளவு என்ற தலைப்புடன் திகழும் சொர்னமித்ரனின் சாத்தான்குளம் வாசகசாலையினுள் சிறுகதைகள், கட்டுரைகள் தொடங்கி ஆன்மீகம்வரை வாசகர் தேடும் எதுவும் கிடைக்கும் !

" எல்லோரும் எல்லாமும் பெற வேண்டும் " என மின்னும் வரிகளுடன் காணப்படும் மின்னல்வரிகளில் நகைச்சுவை, இலக்கியம், சிறுகதை, சினிமா என பல்சுவை கார மிக்சர் ரெடி !

முத்தான தகவல்கள் தாங்கிய முத்தரசுவின் முத்துதமிழ் !

கதைகளும், சுவையான தகவல்களும் தாங்கி ராஜலக்ஷ்மிபரம்சிவத்தின் அரட்டை !

ரெளத்திரம் பழகு என்ற தலைப்பில் " ஏதோ என்னால் முடிஞ்சது " என அடக்கமாய் பதிவுகளிடும் தமிழ்ழ்மொட்டு தம்பியின் பதிவுகளில் சமூக அவலங்களை சாடும் ரெளத்திர நெருப்பு !

நீலன் சமூகத்தின் மீது கொண்ட அன்பால் சமூகத்து சீரழிவுகளை சொல்லால் வறுத்தெடுக்கும் வலைப்பூ !

சசிதென்றல், சகோதரி சசிகலாவின் கவிதை சாரல்கள் தாங்கிய குளிர் தென்றல் !

எளிமையான யதார்த்தம் கூறும் உமையாள் காயத்ரியின் தளத்தில் சுவையான சமையல் குறிப்புகளுடன் அமைதி தரும் ஆன்மீகமும் உண்டு !



நன்றியுடன்...

தமிழ் வலையுகம் என்னும் நந்தவனம் கண்ணுக்கெட்டிய தூரம்வரை பரந்து விரிந்த தோட்டம் ! அதில் நான் தொகுத்ததெல்லாம் நேரமும் காலமும் அனுமதித்த அளவில் என் கண்களுக்கு எட்டி கைகளில் கொண்டவைதான் !

இந்த ஒருவார காலத்தில் அறிமுகப்படுத்தப்படாத வலை நண்பர்கள் அனைவருக்கும் அவரவர் தளம் சிறக்க என் வாழ்த்தினை தெரிவித்து கொள்கிறேன்.

இந்த வார வலைச்சர பணியை எனக்களித்த பொறுப்பாசிரியர் சீனா அவர்களுக்கும், தமிழ்வாசி பிரகாஷ் மற்றும் யாதவன் நம்பி அவர்களுக்கும் நன்றிகள் பல. இந்த பொறுப்பினை முன்மொழிந்து தொடர் ஊக்கமளித்த நண்பர் புதுவை வேலு (யாதவன் நம்பி) அவர்களுக்கு மனமார்ந்த நன்றி.

என் வலைச்சர பொறுப்பினை தனிப்பதிவாகவே வெளியிட்டு வாழ்த்திய சகோதரி மகிழ்நிறை மைதிலி கஸ்துரி ரெங்கன் தொடங்கி என்னை வாழ்த்தி வரவேற்று, பின்னூட்டங்கள் பதிந்து என்னை அங்கீகரித்த அன்பர்கள் அனைவருக்கும்...

" இந்த முகமற்ற சாமானிய மனிதன்பால் நீங்கள் கொண்ட அன்புக்கும் நட்புக்கும் என்ன தவம் செய்தேன் நான் ? "

நன்றி என்ற ஒரு வார்த்தையில் என் நெகிழ்ச்சியை அடைத்துவிடமுடியாது பெருமக்களே !

வேறுபல பதிவர்களின் காமிக்ஸ் தளங்களை நண்பர் ஈரோடு விஜயின்  பெயரில் அறிமுகப்படுத்தியது, நண்பர் காரிகனை டி எம் எஸ் ரசிகராக்கியது, நண்பர் தளிர் சுரேஷின் முதல் கதை பூந்தளிரில் வெளிவந்ததாக குறிப்பிட்டது போன்ற தவறுகளுக்கு வருந்துகிறேன். மேலும் ராஜு முருகனின் நூலை வட்டியும் முதலும் என்பதற்கு பதிலாக கற்றதும் பெற்றதும் என தவறாக குறிப்பிட்டிருந்தேன். சுட்டிக்காட்டப்பட்ட அவற்றை உடனடியாக திருத்திவிட்டேன் என்றாலும் இனி இதுபோன்ற தவறுகள் நேராமல் இருக்க அதிக கவனத்துடன் செயல்பட முயற்சிக்கிறேன். நன்றி



பதிவுகளில் தொடருவோம் !


பட உதவி : GOOGLE

இப்பதிவு பற்றிய உங்கள் எண்ணங்களை பதிவு செய்யுங்கள். நன்றி.

மேலும் வாசிக்க...