வலைச்சரத்தில் எனது முதல் நாள்

வலைச்சர நண்பர்கள் அனைவருக்கும் அன்பு வணக்கங்கள்,

நானும் வலைச்சர ஆசிரியனாக ஆவேன் என்று நினைத்துக் கூட பார்த்ததில்லை. சரியாய் ஒன்றரை மாதத்திற்கு முன்பு நண்பர் புதுவை வேலு அவர்களிடமிருந்து தொலைபேசி அழைப்பு வந்தது. வலைச்சர ஆசிரியராக ஒரு வாரம் பணியாற்றுவதற்கான தகவல் அது.

அப்போதுதான் புதிதாக வெளிவரும் நாளிதழின் ஆசிரியப் பொறுப்பை ஏற்றிருந்தேன். மூச்சுவிடக் கூட நேரமில்லை. பணிகள் சுமையாய் அழுத்திக் கொண்டிருந்த காலம். வலைச்சர வாய்ப்பையும் விட மனமில்லை. முடிந்தவரை தள்ளிப்போடுங்கள். கட்டாயமாக செய்கிறேன், என்றேன்.

தள்ளிப் போட்ட நாளும் வந்துவிட்டது. இனியும் கடத்த முடியாது என்ற நிலை.. இப்போதும் அதே வேலைப்பளு கொஞ்சம் கூட குறையாமல் அப்படியே தான் இருக்கிறது. அதனால், இரவுநேர தூக்கத்தை தியாகம் செய்து விடுவது என்ற முடிவுக்கு வந்து விட்டேன். சொற்பிழையோ, பொருட்பிழையோ, வாக்கியப் பிழையோ இருந்தால் தயவுசெய்து பொறுத்துக் கொள்ளுங்கள் நண்பர்களே!

எத்தனை துயர்ப்பட்டாலும் நண்பர்களை சந்திக்கும் போது தனி மகிழ்ச்சி பிறக்கத்தானே செய்கிறது. அதனால் வலைச்சரத்திற்கு வந்துவிட்டேன். எனக்கு இந்த வாய்ப்பை நல்கிய நண்பர் புதுவை வேலு அவர்களுக்கும்,  ஐயா சீனா அவர்களுக்கும், நண்பர் தமிழ்வாசி பிரகாஷ் அவர்களுக்கும் எனது மனமார்ந்த நன்றி. 

இனி என்னைப் பற்றி...

என்னைப் பற்றி பெரிதாக சொல்லிக்கொள்ள ஒன்றுமில்லை.

மதுரையில் பிறந்து, கடவுளின் சொந்த பூமியான கேரளாவில் குழந்தைப் பருவத்தை கழித்து, அதன்பின் சங்ககிரி, சேலம், ஈரோடு ஆகிய இடங்களில் பள்ளிப் படிப்பை முடித்து, பின் மீண்டும் கல்லூரிப் படிப்புக்கு மதுரை வந்து சேர்ந்தேன். அப்போதிருந்து வாழ்க்கை மதுரையில்தான் உருண்டோடுகிறது.

சொந்த தொழிலில் பெரிதாக சாதிக்க வேண்டும் என்று ஆரம்பித்து, கையை சுட்டுக்கொண்டவர்களில் நானும் ஒருவன். அதன்பின் பத்திரிகையில் நுழைந்து பட்ட துயரங்கள் கொஞ்ச நஞ்சமல்ல. இப்போதுதான் துயரங்கள் எல்லாம் கொஞ்சம் கொஞ்சமாக விலகிக் கொண்டிருக்கின்றன.

சரி, என் சோகத்தை சொல்லி உங்களை கஷ்டப்படுத்த விரும்பவில்லை.

சொந்தத் தொழில் இருந்து பத்திரிகை துறைக்கு வந்த கதையை மட்டும் சொல்லிவிடுகிறேன். அதை ஒரு விபத்து என்று தான் சொல்ல வேண்டும்.

நிர்கதியாய் நின்று கொண்டிருந்த எனக்கு 'தினத்தந்தி'யில் பகுதி நேர நிருபர்கள் தேவை என்று வந்திருந்த விளம்பரம் பெரும் நம்பிக்கையை கொடுத்தது. உடனே விண்ணப்பித்தேன். அழைப்பும் வந்தது.

இதில் பெரிய வேடிக்கை என்னவென்றால், நான் அதுவரை தினத்தந்தியை படித்ததே இல்லை. நான் சிறுவனாக இருக்கும் போது எங்கள் வீட்டில் 'தினமணி' வாங்கினார்கள். அதன்பின் 'தினமலர்'. ஆக தினத்தந்திக்கும் எனக்குமான பாந்தம் வெகு தொலைவில் இருந்தது.

அப்போதெல்லாம் பகுதி நேர நிருபர்களை கிராமங்களிலும் சிறிய நகரங்களிலும் மட்டும்தான் பணியில் அமர்த்துவார்கள். மதுரை போன்ற பெருநகரங்களுக்கு முழுநேர நிருபர்கள் மட்டுமே இருப்பார்கள். முதன்முதலாக மதுரை மாநகருக்கு பகுதிநேர நிருபராக என்னை நியமித்தார்கள்.

எழுத்தை வைத்து வேலையை கொடுத்துவிட்டார்கள். ஆனால், செய்தியை எங்கிருந்து எப்படி சேகரிக்க வேண்டும்? அதற்கு என்ன வழிமுறை என்ற எந்த விவரமும் எனக்கு தெரியவில்லை.

எனக்கு மூன்று காவல் நிலையங்களை ஒதுக்கியிருந்தார்கள். அதிலிருந்து எந்த தகவல் கிடைத்தாலும் செய்திதான். அதனால், நாள் தவறாமல் காவல் நிலையங்களுக்கு சென்று வந்தேன். ஒன்றல்ல, இரண்டல்ல, பத்து நாட்கள் சென்றன. மூன்று நிலையங்களிலும் ஒரு எப்.ஐ.ஆர். கூட பதிவாகவில்லை. இப்படியே போனால் நம்மை வேலையைவிட்டு தூக்கிவிடுவார்கள். செய்தி சேகரிக்க நமக்கு தெரியவில்லை. தெரிந்ததை செய்தால் என்ன என்று யோசித்தேன். 

அதற்கு முன்பே சில பத்திரிகைகளில் கட்டுரைகளை எழுதியிருந்தேன். அதேபாணியை 'தினத்தந்தி'க்கும் கடைப்பிடித்தேன். முதல் கட்டுரையாக பூம்புகாரில் இருந்து மதுரை நோக்கி வந்த கோவலன் கண்ணகி வைகை ஆற்றைக் கடந்து மதுரைக்குள் நுழைந்த இடம், கண்ணகியை விட்டுச் சென்ற இடம், கோவலன் பிடிப்பட்ட இடம், கோவலனை கொன்ற இடம், அவனது தலை புதைக்கப் பட்ட இடம் என்று ஒவ்வொரு இடத்தையும் புகைப்படத்துடன் கூடிய நீண்ட கட்டுரையாக எழுதினேன். கிட்டத்தட்ட அனைத்து பதிப்புகளிலும் அந்தக் கட்டுரை வந்தது. 

அதற்கடுத்து காந்தியை எழுதினேன். காந்தி ஐந்து முறை மதுரைக்கு வந்திருக்கிறார். அவர் எளிய உடைக்கு மாறிய இடமும் மதுரைதான், எனது சத்தியாகிரகம் தோற்றுப்போனது என்று அவர் மனம் நொந்த இடமும் மதுரைதான். அவர் சென்ற இடத்தையும் பேசிய பேச்சுக்களையும் எழுதினேன். அது தினத்தந்தி அதிபர் சிவந்தி ஆதித்தன் அவர்களிடமிருந்தே பாராட்டைப் பெற்றுத்தந்தது. 

ஒரு மாநகருக்கு மட்டுமே நிருபராக நியமிக்கப்பட்ட என் நிலை மதுரை பதிப்பு செல்லும் மதுரை, ராமநாதபுரம், சிவகங்கை, விருதுநகர் மாவட்டங்களில் எங்கு வேண்டுமானாலும் சென்று கட்டுரை எழுதலாம் என்ற நிலைக்கு உயர்த்தியது. அப்போது தினத்தந்திக்கு கட்டுரைகள் எழுதுவதற்கான ஆட்கள் தேவையாக இருந்தார்கள். அதனால் நான் செய்தி பக்கமே போகாத நிருபராக இல்லை, கட்டுரையாளராக உயர்வு பெற்றேன்.

தினமும் எதாவது ஒரு தகவலை சொல்லலாமே என்பதற்காக 'தினம் ஒரு தகவல்' என்ற பகுதியை தினத்தந்தியில் தொடங்கினேன். முதலில் மதுரைப் பதிப்பில் மட்டும் ஒரு மாதம் வெளிவந்தது. அதன்பின் அனைத்துப் பதிப்புகளிலும் 12 வருடங்களாக தொடர்ந்து வெளிவந்துக் கொண்டிருக்கிறது. இதுவரை 4,000-க்கும் மேற்பட்ட தகவல்களை எழுதியுள்ளேன். அவற்றில் சில தகவல்கள் புத்தகமாக வெளிவர இருக்கிறது. 

மிக நீண்ட பதிவாகிவிட்டது என்று நினைக்கிறேன். இன்னொரு சந்தர்ப்பத்தில் மீதியை எழுதுகிறேன். 

கூட்டாஞ்சோறு

senthilmsp.blogspot.com

இதுதான் எனது வலைப்பூ. என்னை சிலருக்குத் தெரியும். பலருக்கு தெரியாது. 20 வருடங்களாக நான் பத்திரிகைகளில் எழுதிய கட்டுரைகளை சேமித்து வைக்கும் நோக்கத்துடனே இந்த வலைப்பூவை தொடங்கினேன். இதில் பலவித சுவைகள் இருக்கும் என்பதற்காகவே 'கூட்டாஞ்சோறு' என்று பெயர் வைத்தேன். அதில் சில சுவைகள் இங்கே: 

ஆன்மிகம் 

எனக்கு ஆன்மிகத்தில் பெரிதாக ஈடுபாடு கிடையாது. 2002-ம் ஆண்டு தினத்தந்தியில் 'உங்களுக்காக தினமும் அரைப்பக்கம் ஒதுக்குகிறேன். அதில் ஆன்மிகத்தைப் பற்றி எழுதுங்கள். நாம் ஆன்மிக செய்திகளை தருவதில்லை என்று வாசகர்கள் கூறுகிறார்கள்' என்று எனது ஆசிரியர் என்னிடம் சொன்னபோது ஆன்மிகத்தைப் பற்றி எனக்கு 'அ'னா, 'ஆ'வன்னா கூட தெரியாது. 

ஆனால், தினமும் அரைப்பக்கம் தருவது சாதாரண விஷயமல்ல. கோவில் கோவிலாக அலைந்தேன். பெரிய கோவில்களைவிட சின்னஞ்சிறிய கோவில்களைப் பற்றி நிறைய எழுதினேன். கிராமத்து தெய்வங்களை எழுதினேன். தினமும் கோவில்களில் பரிவட்டம், மாலை மரியாதை. கிட்டத்தட்ட ஒரு வருடமாக இந்த ஆன்மிகப்பணி தொடர்ந்தது. அந்த ஒரு வருடமும் வீட்டில் தேங்காயே வாங்கியதில்லை. 

  புதிதாக உருவாகும் பிரமாண்ட கோவில்கள்

http://senthilmsp.blogspot.com/2015/05/blog-post_2.html

நான்கு மதங்களின் புனித இடம்

http://senthilmsp.blogspot.com/2014/12/blog-post_27.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

சித்தர் அற்புதம் 

இதுவும் அப்படித்தான் திடீரென்று வாய்த்தது. சென்னை தினத்தந்தியில் இருந்து நண்பர் முருகானந்தம் 'சித்தர்களைப் பற்றி ஒரு தொடர் எழுதுங்களேன்.' என்றார். அகத்தியர், போகர் என்று சில சித்தர்களைப் பற்றி அறிந்திருந்த எனக்கு அது ஒரு சவாலான வேலை. சித்தர்களைப் பற்றி நிறைய தேடினேன். பலரிடம் விளக்கம் கேட்டேன். அவற்றையெல்லாம் தொகுத்து 'சித்தர் அற்புதம்' என்ற தொடர் எழுதினேன். இது 2010-ல் வெள்ளிக்கிழமை தோறும் வெளிவரும் 'வெள்ளிமலர்' இணைப்பில் ஒரு வருடம் வெளிவந்தது.

சீனாவில் சமாதியடைந்த காலங்கிநாதர்

http://senthilmsp.blogspot.com/2015/01/blog-post_29.html

ஐம்பதில் வந்த கல்யாண ஆசை

http://senthilmsp.blogspot.com/2014/11/blog-post_17.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

பயணம் 

எனக்கு மிகவும் பிடித்த விஷயம். இதைப் பற்றி 'ஹாலிடே நியூஸ்' பத்திரிகையில் அதிகமாக எழுதியிருக்கிறேன். அதில் பாதாமி சென்று வந்த அனுபவம் பசுமையாக எப்போதும் நினைவில் இருக்கிறது. 

பாதாமி பயணம் - குகைக் கோயில்கள்

http://senthilmsp.blogspot.com/2015/03/blog-post_9.html

மகாராஜாவாக வாழுங்கள்

http://senthilmsp.blogspot.com/2015/03/blog-post_29.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

மனிதர்கள் 

பலவகையான மனிதர்களை சந்தித்து அவர்களைப் பற்றி எழுதும் பகுதி இது. பெண்களின் மாதவிடாய் பிரச்னையை தீர்ப்பதற்காக தந்து உடலில் ரத்தம் நிறைந்த பையைக் கட்டிக்கொண்ட அபூர்வ மனிதர். 

மாதவிலக்கு ஆண் 

http://senthilmsp.blogspot.com/2014/11/blog-post_19.html

கூகுள் இளவரசன்

http://senthilmsp.blogspot.com/2014/11/blog-post_61.html

தனிமனிதன் உருவாக்கிய பெருங்காடு

http://senthilmsp.blogspot.com/2015/03/blog-post_88.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

சுற்றுலா 

உலகம் பல விசித்திரமான இடங்களை கொண்டது. அதைப் பற்றி சொல்லும் பகுதி இது. 

வியப்பூட்டும் வித்தியாசமான தீம் ஹோட்டல்கள்

http://senthilmsp.blogspot.com/2014/11/blog-post_21.html

சித்தர்கள் பூமியில் சிலிர்ப்பான பயணம் 

http://senthilmsp.blogspot.com/2015/01/blog-post.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

விவசாயம் 

மிக உன்னதமான தொழிலை செய்து வரும் விவசாயிகளை அறிமுகப்படுத்துவதே இந்த பகுதியின் நோக்கம். அமெரிக்க ஜனாதிபதியே இவரை தேடி வந்திருக்கிறார் என்றால் அது சாதாரண விஷயமா..!

அமெரிக்க ஜனாதிபதியை ஈர்த்த விவசாயி

http://senthilmsp.blogspot.com/2015/05/blog-post_29.html

பத்மஸ்ரீ விவசாயியுடன் ஒரு நாள்

http://senthilmsp.blogspot.com/2015/02/blog-post_19.html

சரித்திரம் படைத்த விவசாயி

http://senthilmsp.blogspot.com/2015/02/blog-post_23.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

சினிமா 

நவீன வாழ்வியலில் மனிதனின் மிக முக்கிய பங்காக மாறியிருக்கும் சினிமாவைப் பற்றி அபூர்வ செய்திகள். 

சினிமாவின் முதல் கலைஞன்

http://senthilmsp.blogspot.com/2015/05/blog-post_13.html

கிளாப் அடித்தலில் இத்தனை இருக்கா?

http://senthilmsp.blogspot.com/2015/04/blog-post_24.html

-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-o-

அதிகமாக சுயபுராணம்  பாடிவிட்டது போல் தெரிகிறது. முதல் நாள் அறிமுகம் என்பதால் வேறு வழியில்லை. நாளை நமது நண்பர்களின் பதிவுகளோடு சந்திப்போம். 

நன்றி,

அன்புடன், 

எஸ்.பி.செந்தில்குமார் 

*****

மேலும் வாசிக்க...

கவிதை மழை பெய்து விடைபெறுகிறார் கவிஞர் கி.பாரதிதாசன், தமிழ்க் கூட்டாஞ்சோறு தருகிறார் S.P. செந்தில்குமார்

நண்பர்களே! நல்வணக்கம்!

இந்த வார வலைச்சரம் ஆசிரியப் பணியை கவிதை மழையால் பதிவர்களின் மனதை குளிர்வித்த கவிஞர் கி.பாரதிதாசன் மிகவும் திறம்பட, வலைச்சரத்தை ஆடுகளமாக கொண்டு அவர் தேடும் தேன் தமிழை நமக்கெல்லாம் இனிக்க தந்து விடை பெறுகிறார்.

கவிஞருக்கு  வலைச்சரம் குழு நன்றி கலந்த பாராட்டுக்களை வழங்குகிறது.

வலைச்சரத்தில் அவரது சிறப்பினை சீர்த்தூக்கிப் பார்க்கும் நன்மதிப்பு பட்டியல் இதோ!

கவிஞர் கி.பாரதிதாசன் உங்களிடமிருந்து,

385 க்கும் மேற்பட்ட மறுமொழிகளும்,

 87 - தமிழ் மணம் வாக்குகளையும்,

1985- க்கும்மேற்பட்ட பக்கப்பார்வைகளும் இதுவரையில் பெற்றுள்ளார்.

அவரது அருந்தமிழ் பணியை நமக்கெல்லாம் கவிதை வடிவில் நல்கிய கவிஞர் கி.பாரதிதாசன் அவர்களை, நன்றி பாராட்டி, வாழ்த்தி வழியனுப்புவதில் 'வலைச்சரக் குழு'  மகிழ்ச்சியடைகிறது.

நாளை முதல் துவங்கும் வாரத்திற்கு, வலைச்சர ஆசிரியர் பொறுப்பேற்க.... நண்பர்    S.P. செந்திகுமார் விருப்பம் தெரிவித்து முன்வந்துள்ளார்.

இந்த வாரம் வலைச்சரம் ஆசிரியராக அவரை "வருக... வருக..." என  அழைத்து ஆசிரியர் பொறுப்பில் அமர்த்துவதில்,  வலைச்சரக்குழு பெருமகிழ்ச்சி அடைகிறது.

ஒரு எழுத்தாளருக்கு, வலிமை நிறைந்த ஆயுதம் எது? என்று பார்ப்போமேயாயின், நிச்சயம்! அது அவரது திற"மை" நிறைந்த..... எழுதுகோலாகத் தான் இருக்கும்.

அத்தகைய அறிய சிறப்பினை பெற்ற இவர் பத்திரிகைத் துறையில் 15 ஆண்டுகளுக்கும் மேலாக பணியாற்றி வருகிறார். சங்கம் அமைத்து தமிழ் வளர்த்த மதுரையில் பிறந்து வளர்ந்தவர்.

இவர், யாத்ரிகன்,  கலாதேவி,  கண்மணி ப்ரியங்கா போன்ற பெயர்களில்
பல பத்திரிகைகளில், கட்டுரைகள் எழுதிவருகிறார். தற்போது 'ஹாலிடே நியூஸ்' சுற்றுலா மாத இதழின் இணை ஆசிரியராகவும்,  'அக்ரி டாக்டர்' விவசாய நாளிதழுக்கு செய்தி ஆசிரியராகவும்,  தந்தியில் நிருபராகவும் பணியாற்றி வருகிறார்.

கூட்டாஞ்சோறு வலைப்பூவின் மூலம் கடந்த 9 மாதங்களாக  நம் அனைவரையும் சந்தித்து  பயனுள்ள பதிவுகளை நமக்கெல்லாம் நாளும் தந்து வரும் இவரது கை வண்ணத்தில் வலம் வரும் வலைச்சரம் வாரத்தை வாசித்து மகிழ்வோம் வாருங்கள்.

'கூட்டாஞ்சோறு' வலைப்பூ -  S.P.செந்தில்குமார் அவர்களை,
இந்த வாரம் வலைச்சரம் ஆசிரியராக  "வருக... வருக..." என அழைத்து ஆசிரியர் பொறுப்பில் அமர்த்துவதில், வலைச்சரக்குழு பெருமகிழ்ச்சி அடைகிறது.

நல்வாழ்த்துகள் கவிஞர் கி.பாரதிதாசன்

நல்வாழ்த்துகள் S.P.செந்தில்குமார்

நட்புடன்,
புதுவை வேலு

மேலும் வாசிக்க...

பெண்ணின் பெருந்தக்க யாவுள?

வலைச்சர நண்பர்களுக்கு வணக்கம்

பெண்ணின் பெருந்தக்க யாவுள?

வெண்பாக் கொத்து

குறள் வெண்பா

பெண்ணின் பெருமையைப் பேணும் உலகினில்

மண்ணும் மணக்கும் மலர்ந்து!

நேரிசைச் சிந்தியல் வெண்பா

பெண்ணின் அழகால் பெருகிவரும் பாட்டாறு!

கண்ணுள் புகுந்து களிப்பூட்டும்! - தண்மலரின்

வண்ணம் மணக்கும் மலர்ந்து!

இன்னிசைச் சிந்தியல் வெண்பா

பெண்ணின் விடுதலையைப் பேணாத் திருநாட்டில்

நண்ணும் இருளே! நரிகள் அரசாண்டால்

மாண்பு வருமோ மலர்ந்து?

நேரிசை வெண்பா

பெண்ணின் சிறப்பால் பெருகும் வளம்ஏற்பீர்!

பண்ணின் இனிய பயனேற்பீர்! - விண்ணருளின்

ஆட்சி மணக்கும் அழகேற்பீர்! அந்தமிழின்

மாட்சி மணக்கும் மலர்ந்து!

இன்னிசை வெண்பா

பெண்ணின் தவமுணர்ந்து பேசும் நிலத்தினிலே

எண்ணிலா ஏற்ற எழில்மேவும்! நல்லியற்கைத்

தண்மை தழைக்கும்! தமிழ்காட்டும் வள்ளலென

வண்மை தழைக்கும் மலர்ந்து!

பஃறொடை வெண்பா

பெண்ணின் வடிவமாய்ப் பேசும் மொழிகொண்டோம்!

மண்ணின் வடிவமாய் மாண்பளித்தோம்! - தண்ணதிக்கு

அன்னை பெயர்படைத்தோம்! அன்பு வயலென்றோம்!

பொன்னை நிகர்த்த பொலிவென்றோம்! - உன்னை

அளித்த அருமறையே அம்மா! இதனை

உளத்துள் பதித்தால் உயர்வாய்! - வளமெய்தக்

கண்ணின் மணியாய்க் கருந்தேந்தும்! இங்குரைத்த

உண்மை உணர்ந்தே உலகம் உருண்டால்

நலங்கள் மணக்கும்! நறுஞ்சோலை போன்று

வளங்கள் மணக்கும் மலர்ந்து!

இலக்கண விளக்கம்

வெண்பாத் கொத்தெனும் இப்பாட்டில் குறள் வெண்பா, நேரிசைச் சிந்தியல் வெண்பா, இன்னிசைச் சிந்தியல் வெண்பா, நேரிசை வெண்பா, இன்னிசை வெண்பா, பஃறொடை வெண்பா இடம்பெறவேண்டும்.

அனைத்து வெண்பாக்களிலும் முதல் சீர் ஒன்றாக வரவேண்டும். ஈற்றுச்சீரும் ஒன்றாக வரவேண்டும்.

மேல் உள்ள வெண்பாக்கள் 'பெண்ணின்', என்ற சீரை முதல் சீராகக் கொண்டுள்ளன. 'மலர்ந்து' என்ற சீரை ஈற்றுச் சீராகக் கொண்டுள்ளன.

------------------------------------------------------------------------------------------------------------

கவிஞர் சிமோன் இராசசேவரி - பிரான்சு

வலைப்பூ: பிரான்சு கம்பன் மகளிர் அணி

செம்மைத் தமிழ்ப்பூ! சிறக்கும் வழிகாட்டும்!

தம்மை அளித்துத் தமிழ்காக்கும் - கம்பன்

கழக மகளிர் நடத்துகின்றார்! காண்க

அழகின் சிகரம் அது!

http://francekambanemagalirani.blogspot.fr

 

------------------------------------------------------------------------------------------------------------

மாலதி - புதுக்கோட்டை

வலைப்பூ: Malathi

மணக்கும் தமிழ்த்தாயின் மாண்புகளை அள்ளி

இணைக்கும்! இனிமை இசைக்கும்! - குணமிகுந்த

மாலதி பின்னும் வலைப்பூ! செழுந்தமிழின்

பாலதில் ஊறும் படி!

http://malathik886.blogspot.fr/2015/03/blog-post_31.html#more

------------------------------------------------------------------------------------------------------------

மு. கீதா - புதுக்கோட்டை

வலைப்பூ: Thendral

வண்ணத் தமிழை வலம்வரும் மு.கீதா!

எண்ணம் முழுதும் எழில்தமிழே! - தண்ணிலவு

பாட்டரங்கம் பாடிப் படைத்திடுவார்! பண்ணிசை

மீட்டரங்கம் என்பேன் வியந்து!

http://velunatchiyar.blogspot.com/2015/08/blog-post_7.html

------------------------------------------------------------------------------------------------------------

மைதிலி கஸ்துாரி ரங்கன் - புக்கோட்டை

வலைப்பூ: மகிழ்நிறை

மகிழ்நிறை வண்ண வலைகண்டேன்! அங்குப்

புகழ்நிறை ஆக்கம் புசித்தேன்! - அகழ்வினை

ஏந்தி அளித்த எழுத்துக்குள், இன்றமிழாள்

நீந்திக் குளிப்பாள் நெகிழ்ந்து!

http://makizhnirai.blogspot.com/2015/05/small-wonder-semmozhi.html

------------------------------------------------------------------------------------------------------------

ஞா. கலையரசி

வலைப்பூ: ஊஞ்சல்

கலையரசி நற்பதிவைக் காணும் மனத்தார்

வலையரசி என்றுபுகழ் வார்ப்பார்! - மலையரசி

நற்றாள் திருவருளால் பொற்றமிழ்ச் சீர்யாவும்

கற்[று]ஆள் சிறப்பினைக் காண்!

http://unjal.blogspot.com/2015/05/blog-post_26.html

------------------------------------------------------------------------------------------------------------

தேனம்மை லெக்ஷ்மணன்

வலைப்பூ:  சும்மா

தேனம்மை பூவலை! தென்தமிழின் பாவலை!

வானொண்மை கொண்ட மணிவலை! - நானும்மைக்

காண அழைத்தேன்! கவிதைக் கலையழகைப்

பேண அழைத்தேன் பிணைந்து!

http://honeylaksh.blogspot.fr/2015/08/blog-post_96.html

------------------------------------------------------------------------------------------------------------

வேதா. இலங்காதிலகம்

வலைப்பூ: வேதாவின் வலை

வேதா தரும்எழுத்துள் வெல்லும் வியன்தமிழ்

மாதா இருந்து மகிழ்திடுவாள்! - ஓதுவதில்

காட்சி அளிப்பாள்! கனிக்கவிதை வந்தொளிர  

மாட்சி அளிப்பாள் மணந்து!

https://kovaikkavi.wordpress.com

------------------------------------------------------------------------------------------------------------

மகேசுவரி பாலச்சந்திரன்

வலைப்பூ: பாலமகி பக்கங்கள்

கோலமிகும் வண்ணம் குளிர்தமிழ் கொண்டொளிரும்

பாலமகி பக்கங்கள் பார்த்துவந்தேன்! - ஞாலமிதில்

தொன்மை நிலையுணர்த்தும்! சொல்லும் சுவையுணர்த்தும்!

நன்மை நிலையுணர்த்தும் நன்கு!

http://balaamagi.blogspot.com/2015/05/ii.html

------------------------------------------------------------------------------------------------------------

தேன்மதுரத்தமிழ் கிரேஸ்

வலைப்பூ: தேன் மதுரத் தமிழ்

தேமதுரச் செந்தமிழைச் செப்புகிறார்! உண்டுநான்

மாமதுரம் என்றே மயங்குகிறேன்! - பா..மதுர

பாரதி சொல்கின்றேன்! பாவை கிரேசிடம்

சீரதிகம் பொங்கும் செழித்து!

http://www.thaenmaduratamil.blogspot.com

------------------------------------------------------------------------------------------------------------

மனோ சாமிநாதன்

வலைப்பூ: முத்துச்சிதறல்

முத்துச் சிதறல்! முகங்காட்டும் கண்ணாடி!

கொத்து மலர்குவிப்பு! கொஞ்சுதமிழ் - கத்துகடல்

போல்தொடரும்! கற்ற புலவரின் ஆற்றலுக்கு

மேல்படரும்! இன்பெய்த மேவு!

http://www.muthusidharal.blogspot.fr/2015/08/blog-post.html

------------------------------------------------------------------------------------------------------------

உமையாள் காயத்ரி

வலைப்பூ: R.Umayal Gayathri

புதுக்கவிதை பூக்கும்! மதுக்கவிதை ஏந்தும்!

பொதுப்புவியைக் காணநடை போடும்! - புதுமையொளிர்

மின்பூவை மீட்டும் வியன்உமையாள் காயத்ரி

இன்பூவைக் காண்பீர் இனி!

http://www.umayalgayathri.blogspot.com/2015/07/rain-kavithai.html

------------------------------------------------------------------------------------------------------------

கீத மஞ்சரி

வலைப்பூ: கீத மஞ்சரி

நற்கீத மஞ்சரி நன்வலை! நற்றமிழின்

பொற்கீத மஞ்சரி! போற்றிடுவேன்! - கற்பனைக்கு

எட்டாத காட்சிகளை ஏந்தும்! மிகவிரைவில்

கிட்டாத தேனின் கிடங்கு!

http://geethamanjari.blogspot.fr/2015/08/blog-post.html

------------------------------------------------------------------------------------------------------------

பவித்ரா நந்தகுமார் - ஆரணி

வலைப்பூ: பவித்ரா நந்தகுமார்

ஆரணி வாழும் அரும்பவித்ரா நந்தகுமார்

சீரணி கொண்ட செழும்மறத்தி! - பேரணிபோல்

கொஞ்சும் கவிதைகள் கோல விழாநடத்தும்!

நெஞ்சம் நெகிழும் நினைந்து!

http://pavithranandakumar.blogspot.fr/2015/07/blog-post_14.html

------------------------------------------------------------------------------------------------------------

கோமதி அரசு

வலைப்பூ: திருமதி பக்கங்கள்

திருமதி பக்கங்கள்! தீந்தமிழ்த் தாயின்

பெருமதி பக்கங்கள்! பேணும்! - அரும்மதியார்

கோமதியார் தீட்டும் குளிர்ந்த எழுத்தெல்லாம்

பா..மதியார் தீட்டும் படைப்பு!

http://mathysblog.blogspot.com/2015/08/blog-post_8.html

------------------------------------------------------------------------------------------------------------

மாலதி - சென்னை

வலைப்பூ: மாலதியின் சிந்தனைகள்

மாலதியின் சிந்தனைகள் மாண்புடைத்து! போராடும்

வேலதின் கூர்மை மிகுவுடைத்து! - ஆலதில்

உள்ள வலிமை உடைத்து! வலைமுழுதும்

அள்ளச் சுரக்கும் அமுது!

http://thmalathi.blogspot.fr/2015/08/2016.html

------------------------------------------------------------------------------------------------------------

நன்றி மலர் துாவுகிறேன்

நல்ல கருத்து நறுங்கவிகள் நல்கினார்

வல்ல வலைப்பணி மாண்பேந்த!  - சொல்லரிய

ஊமைக் கனவோதும் ஒண்சோசப்! என்நன்றி

ஆமை அடக்கம் அணிந்து!

நாளும் வருகையை நல்கிய அன்பர்முன்

தோளும் உயர்த்தித் தொழுகின்றேன்! - மூளும்

மொழியுணர்வு தந்தேன்! முதுதமிழ் காக்க

வழியுணர்வு தந்தேன் வடித்து!

புதுவை நகர்வேலு பொற்பணி யாற்றப்

புதுமைக் கவியெனைப் போந்தார்! - எதுகையொளிர்

பாக்கள் படைத்தேன்! பசுந்தமிழால் நன்றியெனும்

பூக்கள் படைத்தேன் புகழ்ந்து!

மேலும் வாசிக்க...