வாழிய செந்தமிழ், வாழ்க நற்றமிழர்!

இன்று தேசத்தந்தை மகாத்மா காந்தியின் பிறந்த நாள். அவருக்காக மகாகவி பாடிய ஒரு பாடல்:

வாழ்க நீ! எம்மான், இந்த வையத்து நாட்டி லெல்லாம்
தாழ்வுற்று வறுமை மிஞ்சி விடுதலை தவறிக் கெட்டுப்
பாழ்பட்டு நின்ற தாமோர் பாரத தேசந் தன்னை
வாழ்விக்க வந்த காந்தி மஹாத்மா நீ வாழ்க, வாழ்க!

வலைச்சரத்தில் எனக்கு இடப்பட்ட பணியினை நிறைவு செய்யும் பதிவு. கல்கி அவர்கள் ஓரிடத்தில், குழந்தை கையில் பலகாரத்தை வைத்துக் கொண்டு, சாப்பிடவும் ஆசை, சாப்பிட்டு முடித்த பின் தீர்ந்து விடுமே என்று அதற்கும் யோசனை என்று தவிப்பதாகக் கூறியிருப்பார்! இன்று சொல்லப் போகும் சில பதிவர்களையும் முதலிலே சொல்லாமல், இப்படித் தான் இறுதி வரை என் குறிப்புகளில் வைத்திருந்தேன்!

'நான் ஒரு எழுத்தாளனும் அல்ல, கவிஞனும் அல்ல, மொழி ஆர்வலனும் அல்ல ஆனால் நேர்மையாக வாழ துடிக்கும் ஓர் கிராமத்தான்...' என்று சொல்லித் தம் எழுத்தால் நம்மைக் கவர்ந்திழுக்கும் சங்கவி - அஞ்சறைப்பெட்டி என்று அவ்வப்போது உள்ளூரிலிருந்து உலகச் செய்தி வரை கலந்து கொடுப்பார்! மருத்துவக் குறிப்புகளும் உண்டு - இதோ வேப்பிலையைப் பற்றி!

மொக்கைகளும் பின்னே ஞானும் - என்றும் சொல்லிக் கொண்டு, நாம் மகிழ்வதைக் காட்டிலும், பிறரை மகிழ்விப்பதிலேயே அதிக மகிழ்ச்சி இருக்கிறது என்றும் சொல்பவர், ஜெய்லானி - பிளாக்-கின் பெரிய சந்தேகத்தைத் தீர்த்து வைப்பதிலாகட்டும், ஒரு மௌஸின் துணையோடு வாங்க பழகலாம்னு சொல்வதிலாகட்டும், சுவாரஸ்யமாக எழுதுகிறார்!

தம்மைப் பற்றிச் சொல்ல நிறைய இருக்கு என்று மட்டும் சொல்லியிருக்கும் MANO நாஞ்சில் மனோ - அனைவருக்கும் அறிமுகமானவர்! இவரது பின்னூட்டங்களிலேயே உற்சாகம் தொற்றிக் கொள்ளும்! குடும்பத்தை விட்டு வெளிநாட்டில் வாழ்வோரின் உணர்வுகள் பற்றி இவர் பதிவுகளில் தெரிந்து கொள்ளலாம். சிரிப்பின் வகையில் யாரையாவது/எதையாவது விட்டு வைத்திருக்கிறாரா, பாருங்கள்! கி்ண்டல் பதிவுகள் தவிர, சில தகவல் களஞ்சியங்களும் அளிப்பார் - இதோ கன்யாகுமரி மாவட்டம் பற்றி!

நினைவில் நின்றவை என்ற வலைப்பூவில் எழுதும் கே.ஆர்.விஜயன் அவர்களும் சமூக அக்கறையுடன் பற்பல விஷயங்களைப் பகிர்ந்து கொள்கிறார். புற்றுநோய் பற்றிய அவர் விழிப்புணர்வுப் பகிர்வு இதோ! மருந்தால் தீராதது மந்திரத்தால் தீருமா எனற அவர் கேள்வி அனைவரின் மனதிலும் எழும்!

ரோஜாப்பூந்தோட்டம் -என்று தலைப்பையே அழகாக வைத்திருக்கும் பாரத்..பாரதி... (சொல்லாம விடலாமா?!) அரசியல் பதிவுகளையும் உள்ளூர ஓடும் நகைச்சுவையோடு சொல்வதில் வல்லுநர். இதோ விஜயகாந்திற்கு ஒரு ஆலோசனை!

உயர்ந்த உள்ளங்களுக்கு மகிழ்ச்சி அளிப்பது வெற்றியன்று... போராட்டமே என்ற வாசகத்தோடு எழுதும் தமிழ் உதயம் - சிறுகதைகள், கட்டுரை என்று நன்றாக எழுதுகிறார். எங்கும் அமைதி..எதிலும் மகிழ்ச்சி, விவாகரத்து சரியா, தவறா போன்ற இவர் பதிவுகள் என்னைக் கவர்ந்தவற்றுள் சில.

குமரன் அவர்கள் எழுதும் தமிழ் வளர்ப்போம் என்ற வலைப்பூவில் பல தொழில்நுட்பத் தகவல்கள் கொட்டிக் கிடக்கின்றன. Excel , pinnacle, இன்னும் விளையாட்டுக்கள் எனப் பல இடுகைகள்!

இன்றுடன் என் வானவில் பதிவர்களின் படடியல் வலைச்சரத்தில் நிறைவு பெறுகிறது! என்னைக் கவர்ந்த பதிவர்கள் இன்னும் உளர்! நாள்தோறும் வளரும் நம் பதிவர்களினால் இந்த எண்ணிக்கையும் நீளும்! நான் எனக்குப் பிடிதத ஏழு படிகள் வரை சொல்லியிருக்கிறேன்! ஆனால், இந்தப் படிகள் முடிவேயில்லாதது, இந்தப் படத்தைப் போல:

(வானவில்லின் கடைசி நிறமான சிவப்பு - உற்சாகத்தின் வெளிப்பாடாகும்! ஆசை, உற்சாகம், சக்தி, வெற்றி இவற்றைக் குறிக்கும் நிறமுமாகும்!)

என்னை இங்கே எழுத வைத்த வலைச்சர ஆசிரியர் குழுவுக்கு மறுபடி என் நன்றி! ஊக்கம் கொடுத்த அனைவருக்கும் நன்றி! குறை இருப்பின் மன்னித்து விடுங்கள்! நன்றி!

மேலும் வாசிக்க...

புதிய கோணங்கி!

பேரன்புமிக்க வலையுலகப் பெருந்தகையீரே! அன்புமிக்க மிடில் கிளாஸ் மாதவி அம்மையாரே!!

என்னை உங்களுக்குத் தெரிந்திருக்கும். நான் தான் முத்தமிழையும் கரைத்துக் குடித்து, ஆங்கில மீடியத்திலேயே ஆங்கிலத்திலேயே தமிழ் படித்தவன், என் தலைமையில் புதிய கட்சி தொடங்கியுள்ளேன்! ஔ-ஃ என்ற எங்கள் கட்சி தான் வரும் 2021-ம் ஆண்டில் மத்தியில் ஆட்சியை அமைக்கப் போகிறது! இப்போது எனது தலைமையில் ஏழாவது அணியை அமைக்கலாம் என்று எண்ணம்!

எனது கட்சி அங்கத்தினர்கள் கூறியதைச் சிரமேற்று - ஆம், தோழர்களே, நான் கட்சியின் கடைசி உறுப்பினர் சொல்வதையும் கேட்பேன் - எதிர்க்கட்சிக்காரர்கள் என் கட்சியில் இரண்டே பேர்தான் இருக்கிறார்கள் என்று சொல்வதை நம்பாதீர்கள்! எங்கள் கட்சிக்கு தமிழ்நாடு முழுதும் எண்ணிலடங்கா தொண்டர் படை உள்ளது! - அத்தகைய கடலலை அனைய என் கட்சித் தொண்டர்கள், பெண்தெய்வம் மிடில் கிளாஸ் மாதவி அம்மையார் உங்களை ஆதரித்தால், உங்களுக்கு வரும் இடைத் தேர்தல், கடைத் தேர்தல், சே, உள்ளாட்சித் தேர்தல் எல்லாவற்றிலும் வெற்றி நிச்சயம் என்று சொன்னதால் இங்கு பிரச்சாரத்திற்கு வந்துள்ளேன்! பிரபலமான வலைச்சரம் என்ற ஒன்றில் அவர் எழுதுகிறாராமே!

இங்கு மேடையில் அமர்ந்திருக்கும் அந்த அம்மையார், அவர் சார்பாகச் சில பதிவர்களை நான் அறிமுகப்படுத்த வேண்டும் என்று வேண்டுகோள் விடுத்ததால், அந்த வேண்டுகோளைக் கட்டளையாக ஏற்று இங்கே அவர்களை உங்களுக்கு அறிமுகப்படுத்துகிறேன்!

'சொற்களைத் தொலைக்க வந்தேன்..சொல்லற சும்மாயிருக்க!' என்று சொல்லும் தம்பி செங்கோவி ஒரு தொடர் கதையையும் எழுதி வருகிறார். இந்த அன்புத் தம்பி திரை விமர்சனங்கள் எழுதி வரும் வரிசையில் 'வெடி' விமர்சனத்தையும் சொல்லியிருக்கிறார். உண்ணாவிரதங்கள் பற்றியும் தம்பி அலசி ஆராய்ந்திருக்கிறார்! எம் கட்சிக்கு இவரைப் போன்ற தலைவர்கள் தேவை. என்னங்க, ஓ, இங்கே அதைச் சொல்ல வேண்டாமா, சரி சரி!!

'கற்றது கையளவு, கல்லாதது உலகளவு' என்று சொல்லும் தம்பி 'பலே பிரபு'என்னும் பிரபு கிருஷ்ணா - கற்ற தம் அறிவை உலகம் பெற, தொழில்நுட்பச் செய்திகளை அழகாகச் சொல்லிக் கொடுக்கிறார்! உதாரணத்துக்கு ஃபோல்டர் லாக் செய்யும் தொழில்நுட்பத்தையும்,டெலீட் ஆன வலைப்பூவை மீட்பது எப்படி என்பதையும் மிக எளிமையாக விளக்கியுள்ளார்!

இந்தத் தொழில்நுட்பத் தம்பி, புதிர் போடலாம் என்னும் புதிர்கள் வலைப்பூவையும் நடத்தி வந்து, ஆகஸ்ட் மாதத்துடன் விட்டு விட்டார்! எமது மேடை நாயகி மிடில் கிளாஸ் மாதவிக்கும் அவர் I.Q.Queen என்ற விருதை ஒரு முறை கொடுத்துள்ளார்! இந்த விருதைக் கூட வரும்... என்ன, இதுவும் சொல்லக் கூடாதா?... சரி, சரி! இந்தத் தம்பியை மேலும் புதிர்களைத் தொடரும்படி எம் கட்சித் தொண்டர்களின் சார்பில் கேட்டுக் கொள்கிறேன்!

மன்னையில் பிறந்து, சென்னை தாண்டி அண்டைய மாநிலத்தில் வந்து குப்பை கொட்டுபவன் என்று தம்மை அறிமுகப் படுத்திக் கொள்ளும் மாதவன் ஸ்ரீனிவாச கோபாலன் 'மன்னை மைந்தர்களில் ஒருவன்' என்ற பெயரில் வலைப்பூ வைத்திருக்கிறார். இவருடைய பதிவுகள் சிரிக்கவும் சிந்திக்கவும் வைக்கக் கூடியன. சமீபத்தில் அவருடைய சின்னக் குழந்தைகள் கேட்ட இரண்டு கேள்விகளைப் பாருங்கள்! பையன் கேட்ட கேள்விக்கு எம் அரசாங்கம் வந்த பிறகு... என்ன, சரி, சொல்லலை... ம்க்கும், செஸ்ஸில் இவரிடம் கணிணியே தோற்று விட்டதாம்!

நடுவில் சோடா, கலர் ஏதும் கிடையாதா... ம், சரி! சகோதரி புவனேஸ்வரி ராமனாதன் மரகதம் என்ற வலைப்பூவில் ஆன்மீகம், சங்கீதம், சமையல், பயணம் என்று பலதரப்பட்ட பதிவுகளை இட்டுள்ளார்! வாணி ஜெயராமின் இனிய பாடல்கள், ஜவ்வரிசிப் பொங்கல், கொல்லிமலையின் அழகு என்று சொல்லிக் கொண்டே போகலாம்!

இந்திராவின் கிறுக்கல்கள் - இந்திரா இம்சிக்கிறேன் - என்ற அறிவிப்புடன் எழுதும் சகோதரியின் வலைப்பூவில் சமூக அக்கறையுடன் பதிவுகளும், கண்களுக்கு வேலை தரும் காட்சிப் பதிவுகளும் இணைந்திருக்கும். தற்சமயம் புகைப்படத்தைப் பார்க்கச் சொல்லியிருக்கிறார், எனக்கு நோட்ஸ் எடுத்துக் கொடுத்த என் தொண்டர் இன்னும் நடுங்கிக் கொண்டிருக்கிறார்!!

தடுக்கி விழும்போது தாங்கிப் பிடிச்சா லவ்வருதுடோய்! என - சீரியலில் ரியல் லைஃப் காட்டக் கூடாதாங்கற ஆதங்கத்தையும் தெரிவிக்கிறார்!!

'யோவ் எனும் புனைப்பெயரில் கவிதைகள் எழுதும் ப. சதீஸ் பிரபு ஆகிய நான்!' என அறிமுகப்படுத்திக் கொள்ளும் இவரது தொலைந்து போன செல்ஃபோன் கவிதை ரசிக்கும்படி உள்ளது!

'என்னை என் பதிவுகளிலிருந்து தெரிந்து கொள்வீர்கள்' எனனும் அறிமுகத்தோடு அன்பே சிவம் என்ற வலைப்பூவில் முகில் எழுதுகிறார். செப்டம்பர் 2011 முதல் எழுதுகிறார். கூகிள் தேடல் - ஒரு எளிமையான வழிமுறை என உபயோகமான பதிவு இட்டிருக்கிறார்!

ஆகவே, பேரன்பு மிக்க பதிவர்களே, உங்கள் பொன்னான வாக்குளை...... என்ன, இதை படிக்கிறவங்க எல்லாரும் உலகம் முழுக்க இருக்காங்களா... தமிழ் நாட்டு ஓட்டு வந்து கொட்டும்னு தான பேச வந்தேன்.... ம்... எப்படியோ எனக்குச் சொன்ன வேலையைச் செய்து விட்டேன். என் ஔ-ஃ கட்சிக்கே வாக்களியுங்கள்! நன்றி!

********#####**********

என் குறிப்பு:

1. மேலே உள்ள அரசியல்வாதி கற்பனையே; யாரையும் குறிப்பது அல்ல!

2. அன்புத் தோழர் Ramani அவர்கள் என் இரண்டாம் நாள் பதிவில் எழுதிய கருத்து என் கருத்தில் நின்றதில், பதிவர்களுக்கான கொலுவை ஏழு படிகளாக்கலாம் என்று இந்தப் பதிவு! அவருக்கு எனது நன்றிகள்! எனது இந்த வாரப் பணிக்கான கடைசிப் பதிவு ஞாயிறு மதியம் கொணர முயற்சிக்கிறேன

மேலும் வாசிக்க...

மாநிலம் பயனுற வாழ்வதற்கே!

இன்று புரட்டாசி மாதத்தின் ஒரு சனிக்கிழமை!. என்ன திடீர்னு பஞ்சாங்கம் படிக்கிறேன்னு பார்க்கறீங்களா, புரட்டாசி மாத சனிக்கிழமைன்னாலே எனக்கு என் அப்பா ஞாபகம் வரும்! (வீட்டில் ஒருத்தரையும் பாக்கி வைக்க மாட்டாங்களா என்று முணுமுணுப்பது காதில் விழுகிறது!!. இல்லை, இன்னும் நிறைய பேர் இருக்காங்க!) என் அப்பா சொன்ன ஒரு துணுக்கைத் தான் சொல்லப் போறேன்.

ஆங்கிலேயர்களிடம் நம் நாட்டவர்கள் கைகட்டி வாழ்ந்திருந்த காலம். அப்போது ஞாயிற்றுக்கிழமை மட்டும் தான் விடுமுறை, பண்டிகைகளைத் தவிர!. ஒரு புரட்டாசி சனிக்கிழமையன்று எப்படியாவது விடுமுறை வாங்க வேண்டுமென்று வெள்ளைக்கார மேலதிகாரியிடம் நான்கைந்து பேராகப் போனார்களாம்! புரட்டாசி சனிக்கிழமை ஒரு இந்துப் பண்டிகை என்று சொல்லி விடுப்பு கேட்க, புதிதாக வந்திருந்த அந்த அதிகாரியோ, 'போன வருடம் இதற்கு விடுமுறை விடப்பட்டதா?' என கேட்டாராம்! இந்தப் புத்திசாலிகள், 'லாஸ்ட் இயர் புரட்டாசி சனிக்கிழமை ஃபெல் ஆன் அ சண்டே சார்! (Last year purattasi sanikkizhamai fell on a Sunday Sir) என்று சொல்லி லீவ் விட வைத்தார்களாம்!

இன்று உலக முதியோர் தினமுமாகும். இன்று முதியோரை நாம் மதித்து வாழ்ந்தால் தான், இதைப் பார்த்து வளரும் நம் குழந்தைகளுக்குப் பெரியவர்களின். பெற்றோரின் பெருமை புரியும், நாம் முதியோராகும் போது அது நமக்குப் புரியும்!!

இன்றைய இடுகையில், அவரவர் வல்லமையைச் சொல் திறத்தில் காட்டி, மாநிலம் பயனுற வாழும் பதிவர்களைப் பார்ப்போமா?

தமக்கு முதல் (கிண்டல்) விமர்சகராகத் தன் 'மைண்ட் வாய்ஸை' வைத்திருக்கும் அப்பாவி தங்கமணி! (இவர் பாணியை நானும் ஒரு பதிவில் காப்பியடிச்சேன்!) அப்பாவி தங்கமணிகளின் பிரதிநிதியாக என்னை அதிகாரபூர்வமாக ஏற்று கொண்ட சக தங்கமணிகள் அனைவருக்கும் நன்றிகள் கோடி என்று தம் வலைப்பூவில் பிரகடனப்படுத்தியுள்ளார்!!. ஒரு நட்புக்கு பிறந்த நாள் வாழ்த்துக்கள் சொல்றாங்க, இந்தக் கவிதையில்! கோவை சரளாவுடன் பேட்டியும் எடுத்திருக்காங்க!!

'யார் சார் இந்தப் பையன்?' என்று கேட்க நினைக்க வைக்கும் 'Philosophy Prabhakaran'! வலைப்பூவின் பெயரே கருத்தைக் கவரும் - பிரபாகரனின் தத்துபித்துவங்கள்! ஒரு உளவுத்துறை செய்தியை - முரண் - பதிவில் விளக்கியிருக்கிறார்!! பிரபாகரனின் ஒயின் ஷாப் என்று பெண்களுக்குப் பிடிக்காத பெயரை வைத்து பற்பல செய்திகளைத் தொகுத்து வழங்குகிறார்! புதிய பதிவர்கள் அனைவருக்கும் முன்னின்று ஆதரவு தரும் மூத்த பதிவர்!

'வாழும் மட்டும் நன்மைக்காக வாழ்ந்து பார்ப்போம்' என்னும் கொள்கையோடு குடந்தையூர் என்ற பெயரில் வலைப்பூவில் எழுதுகிறார், r.v.saravanan. மருமகளான மாமியார் எனச் சிறுகதையும் படைப்பார், எனது கேள்விக்கு எனது பதில் என்னும் பல்சுவைப் பதிவும் கொடுப்பார்!

'தேடலில் பிச்சைக்காரனாய் இரு.. உலகில் பார்வையாளனாய் இரு' என்று தன் வலைப்பூவில் போட்டுக் கொண்டிருக்கும் பிச்சைக்காரன், 'நானோர் பரதேசி.. நல்லோர் கால் தூசி' என்று தன்னைப் பற்றிச் சொல்லிக் கொள்கிறார்! சமூகத்தில் அவ்வப்போது எழும் பிரச்னைகளுக்குத் தம் பார்வையில் பதிவுகளைச் சுவையாகத் தருபவர். ஒரு புதிய அறிவியல் கண்டுபிடிப்பு பற்றித் தற்சமயம் பகிர்ந்துள்ளார்! நாழிகை தமிழ்ச் சொல்லா என்ற இடுகையும் நான் ரசித்தவற்றுள் ஒன்று!

'விச்சு என்ற புனைபெயரில் எழுதும் மாரிமுத்து.நிறைய எழுத ஆசை' என்று சொல்லும் இவர், அலையல்ல...சுனாமி என்ற பெயரில் வலைப்பூ வைத்துள்ளார். செப்டம்பர் 2011 வலைப்பூவில் எழுத ஆரம்பித்திருக்கும் இவர் தாவரவியல் - அறிவியல் சம்பந்தமாக நிறையப் பயனுள்ள இடுகைகளைப் பதிந்துள்ளார்! டிகிரியோ டிகிரி என்ற பதிவின் பெயரும் கருத்தும் என்னைக் கவர்ந்தன! நீரில் மிதக்கும் ஊசி - எளிமையான முறையில் அறிவைப் புகட்டுகிறது!

நீ-நான்-உலகம் - அருண்குமாரின் இந்த வலைப்பூ சமீபத்தில் பார்க்கக் கிடைத்தது. ரத்த வகைகள் பற்றி நன்றாக விளக்கிச் சொல்லியிருக்கிறார். உலகப் போரில் பயன்படுத்தப்பட்ட பீரங்கிகள் பற்றியும் விளக்கியிருக்கிறார். அரசியல், சினிமா பதிவுகளும் நன்றாக எழுதுகிறார்.

'நினைவோடு வாழ்தல் தவமென்பர்.. வரமென்கிறேன் நான்..' -லோகு - இவர் தம்மை 'சாம்பலாய் போன வாழ்க்கையில் கல்லறையாய் எழுந்து நிற்கிறேன்..பூஜைக்கு போகாது என தெரிந்தும் மலர்ந்து கிடக்கின்றன மலர்கள் என்னில்.. சில நினைவுகளாய்.' என்று சொல்லிக் கொள்கிறார். அவர் வலைப்பூ மறவாதே கண்மணியே.. ஒரு கவிதைப்பூங்கா! காதலின் சோகத்தை சொல்லும் அவர் கவிதைகள் - குட்டி, அன்பே, அன்பே...

எனக்குப் பிடித்த வானவில் இடுகைகள் உங்களுக்கும் உகந்ததாயிருக்கும் என நம்பகிறேன். வானவில்லின் ஆரஞ்சு நிறம் அறிவார்ந்த சிந்தனையையும் ஆளுமையையும் குறிப்பதாம்! ஒருவரின் படைபாற்றலைத் தூண்டி வாழ்வில் நிலையான தன்மையையும் தருமாம்!

தமிழ்மணத்தில் ஓட்டுப் போட மறக்காதீங்க!

மேலும் வாசிக்க...

கனவு மெய்ப்பட வேண்டும்!

இந்த முறை நவராத்திரியில் ஒரே ஒரு வெள்ளிக்கிழமை தான்! கோயில்களில் கூட்டம் நெரியும்! நாம் நவராத்திரி நாயகியரை இங்கேயே தரிசிப்போம்!

என் அம்மாவுக்காக, பாரதியாரின் இன்னுமொரு நவராத்திரிப் பாட்டு இன்று இதோ: (இல்லையென்றால் உம்மாச்சி கண்ணைக் குத்தாட்டாலும் என் அம்மா என்னைத் திட்டுவார்! பாட்டு மூன்று தேவியரையும் குறித்துப் பாடுவதால், கொஞ்சம் நீளம்!)

தலைப்பைப் பார்த்து, திருப்பி நேற்றைய கனவுக்குப் போய் விட்டேனோ என்று எண்ணி விடாதீர்கள். அந்தக் கனவு மெய்ப்பட்டால் நன்றாகத் தான் இருக்கும்! இன்றைய என் பதிவர்களைப் பற்றிப் பார்ப்போம்! ஒவ்வொருவர் வலைப்பூ எழுதும் போதும் தம்மிடம் மற்றவர்களுடன் பகிரத்தக்க விஷயங்கள் இருக்கிறது என்ற நம்பிக்கையில் தான் எழுதுகிறார்கள். எழுதும் ஒவ்வொருவருக்கும் கனவு இருக்கும்! அவரவர் கனவு கட்டாயம் மெய்ப்பட வேண்டும் என்று எல்லாவற்றுக்கும் மேலான பரம்பொருளை வேண்டிக் கேட்டுக் கொள்கிறேன். நன்மையே நினைத்தும் செய்தும் வந்தால், நல்ல கனவெல்லாம் பலிக்கும் என்பதை அனுபவபூர்வமாக நம்மில் பலர் உணர்ந்தும் இருப்போம்!

முதலில் யாரைப் பற்றிப் பதியலாம் என்று 'உட்கார்ந்து யோசித்த' போது, மனங்கவரும் நடிகர் நாகேஷின் படத்தை அடையாளமாக வைத்திருக்கும் சேட்டைக்காரன் நினைவு வந்தது! 'இங்குள்ள மொக்கைகளைப் படிப்பதால் ஏற்படும் பின்விளைவுகளுக்கு கம்பெனி பொறுப்பல்ல!' என்று சொல்வதைத் தாண்டி தைரியமாக உள்ளே நுழையலாம்! பொருத்தமாக அன்னை காளிகாம்பாள் பற்றி அவர் எழுதிய பாடல்கள் அழகு! அவருடைய 'சேட்டை' பதிவுகளுக்கு அறிமுகமே தேவையில்லை! சமீபத்தியது அந்த நாள் ஞாபகம் நெஞ்சிலே வந்ததே!

'நட்பு என்னும் மந்திரச் சொல் எனக்கும் தெரியும், உச்சரித்ததும் வாய்க்கிறது பேரானந்தம், என்றும் அழியாமல் கூடவே துணை நின்று !' - யாரைப் பற்றிச் சொல்கிறேன் என்று கண்டுபிடித்திருப்பீர்கள் - பத்திரிகை உலகிலே எழுத்தாளராகப் பிரபலம் ஆன ரிஷபன் - அவர் பதிவுகள் அத்தனையுமே அருமை! - கதையாகட்டும், கவிதையாகட்டும், ஒரு ரிஷபன் டச்சோடு இருக்கும்! சமீபத்திய அவர் இடுகைகள் - குட்டி நாய் சிறுகதை - இதில் யார் பரிதாபத்துக்குரியவர்? அன்பின் மொழி - கவிதை - கவிதை!!

கற்றலும் கேட்டலும் என்று அழகுப் பெயரில் வலைப்பூ வைத்திருக்கும் ராஜி, எழுத்தின் பல துறைகளிலும் எழுதுகிறார்; கதை, கட்டுரை, ஆன்மிகம் என்று எழுதி வந்த இவர், கவிதைகளிலும் ஜமாய்க்கிறார்! பல வருடங்களுக்கு முன் வீதியில் வந்த மிட்டாய்க்காரர்கள் போன்ற தொலைந்த தொழிலாளிக்கு வருந்தும் அவருடைய ஒரு கவிதை! உறவுகளைப் பற்றி நெகிழச் செய்யும் ஒரு கதை! அழகில்லாத ஓவியமா-இதில் ஜெய்ப்பூர் ஓவியங்களை ரசிக்கலாம்!

அய்யம்மாளின் அழகுத் தமிழ் நினைவலை - இந்த வலைப்பூவில் எழுதி வரும் அய்யம்மாள் ஒரு புதிய பதிவர்! சில சமையல் குறிப்புகள் எழுதியிருக்கிறார். பூரண கொழுக்கட்டையும் உண்டு; பொள்ளாச்சி சிக்கன் பிரியாணியும் உண்டு இவர் இடுகைகளில்! இவர் ‘தெய்வகுளத்து காளியம்மன்’ என்ற பெயரில் ஒரு கோவிலைப் பற்றியும் அழகாகப் பகிர்ந்திருக்கிறார்.

'ஃப்ரீயா ஒரு இடம் கெடைச்சா விடுவோமா... ஆரம்பிச்சுட்டோம்ல்ல ப்ளாக்க... ' என்று அதிரடியாகச் சொல்லும் ஸ்வர்ணரேக்கா, பூசலம்பு என்ற வலைப்பூவின் சொந்தக்காரர். நடுவில் காணாமல் போயிருந்த(!) அவருடைய சமீபத்திய பதிவு பார்க்க, கேட்கப் பிடிக்காத பாடல்கள்! சரியாகத் தான் படித்தீர்கள், அது பிடிக்காத பாடல்கள் தான்!

Mano - !¡...என் செய்வேன்...¡! என்ற வலைப்பூவைப் பார்ப்போம். டைரக்டர் கே.பாலச்சந்தர் பற்றி ஒரு இடுகையும் எழுத்தாளர் சுஜாதாவின் மின்னூல்களை அளித்து ஒரு இடுகையும் என்னை மிகவும் ஈர்த்தன.

கொஞ்சம் கனவு,கொஞ்சம் கண்ணீர்,கொஞ்சம் புன்னகை,நிறைய ஆசைகள் கொண்டவன்.. உலகையும் மனிதர்களையும் ரசிப்பவன்.. என்று தன்னைப் பற்றிச் சொல்லிக் கொள்ளும் Raazi !..யாதும் ஊரே...! என்ற பெயரில் ஜூலை 2011 முதல் எழுதுகிறார். இவருடைய லேடிஸ் பர்ஸ்ட் என்ற நகைச்சுவைப் பதிவு வலை மேய்கையில் கண்ணில் பட்டது.

பல நிறம் கொண்ட வானவில் போன்று விதவிதமான பதிவர்களின் இடுகைகளை நீங்களும் ரசித்திருப்பீர்கள் என நம்புகிறேன். வானவில்லின் ஐந்தாவது நிறமான மஞ்சள் ஆக்கசக்தியின் வெளிப்பாடாம்! இந்த நிற உடைகளை அணிந்து கொண்டால், எந்தப் பிரச்னையிலும் தீர்க்கமாக ஆலோசித்துத் தெளிவான முடிவை எடுக்க முடியுமாம்!

டிஸ்கி: பேரன்புடைய வலையுலகப் பெருந்தகையீரே! வலைச்சரப் பதிவுகள் தமிழ் மணத்துடன் இணைக்கப்பட்டுள்ளன. உங்கள்/உங்களுக்குப் பிடித்த பதிவுகள் பலரைச் சென்றடைய ஓட்டுப் போட மறக்காதீர்கள்! நன்றி!

மேலும் வாசிக்க...

வானகமிங்கே தென்பட வேண்டும்!

வானகமிங்கே தென்பட வேண்டும் என்று தட்டச்சும் போது என் மூத்த மகன் வந்தான். 'வானத்தை இங்கு தெரிய வைக்கணுமா, என்ன கண்ணாடி ஏதும் வைச்சு ரிஃப்லெக்ஷன் அது மாதிரி...' என்று கிண்டலாகவும் கொஞ்சம் பயத்தோடும் கேட்டான். காரணம், கணிணியில் ஏதாவது தெரிந்து கொள்ளணும் என்றால் அவனைத் தானே படுத்துவேன்!! 'இல்லையடா, இதன் அர்த்தம், சொர்க்கமே பூமிக்கு வரணும் - அதாவது பூமியே சொர்க்கமாக மாறணும்னு எடுத்துக்கலாம். இந்தத் தலைப்பில் எழுதப் போறேன்' என்று அவனிடம் சொன்னேன். 'ஏதோ பண்ணு, எனக்கு கொஞ்சம் கம்ப்யூட்டரில் பார்க்கணும், நீ வேலைய முடிச்சுட்டு கூப்பிடு' என்று சொல்லி விட்டுப் போனான்.

இன்று எந்தப் பதிவர்களைப் பற்றி இடுகையிடலாம் என்று யோசித்தவாறு, வலையை மேய்ந்து கொண்டிருந்தேன். கூடவே என் கணவர் பக்கத்து அறையில் கேட்டுக் கொண்டிருந்த மெல்லிசை, காதில் விழுந்து கொண்டிருந்தது. நானும் கம்ப்யூட்டரின் ஸ்பீக்கரை இயக்க வேண்டியிருந்ததால், கதவை ஒருக்களித்து மூடி விட்டு, தனிமையிலே இனிமையாய் வலைப்பூக்களைப் பார்த்துக் கொண்டிருந்தேன். சொர்க்கம் இங்கு வந்தால் எப்படியிருக்கும் என்று யோசனை வேறு!

திடீரென்று பக்கத்தில் யாரோ என்னைப் பார்த்துக் கொண்டிருப்பது போல உணர்ந்து பார்த்தால், பாரதியார்! சுற்றி சுகந்தமான புகைமூட்டமாய் இருந்தது! 'யார், யார்..' என்று நான் உளற ஆரம்பிக்க, 'நான் தான் பாரதி..யார்! உன்னை பார்க்கணும்னு சொர்க்கத்தை இப்போது உன் அறைக்கு கொண்டு வந்திருக்கிறேன்!' என்றார். 'நிஜமாகவா, இது நிஜமா?' என்று நான் மேலும் உளற, அவர் புன்னகைத்தார்.

'நீங்கள் சொர்க்கத்தில் இருந்து வந்திருக்கீங்க, இங்குள்ள நடப்பெல்லாம் உங்களுக்குத் தெரியுமா?' என்று கேட்க, அதற்கும் ஒரு தெய்வீகச் சிரிப்பு! என்ன செய்வதென்று தெரியாமல், பக்கத்தறையில் என் கணவரைக் கூப்பிட வாயெடுத்தேன். 'நாம் பேசுவது யாருக்கும் தெரியாது' என்று பதில் வந்தது. அப்படியும் எட்டிப் பார்த்தபோது, கதவு சாத்தப்பட்டு இருந்தது. இசைச் சத்தமும் இல்லை!

என்ன பேசுவது என்று தெரியாமல், பக்கத்திலிருந்த கணிணியைக் காட்டி 'இப்பல்லாம் எல்லாரும் எழுதலாம்! வலைப்பூ என்றொரு விஷயம் கணடுபிடித்து, விரும்பியவர்கள் தாம் சொல்ல நினைக்கும் கருத்தைச் சொல்லலாம்! கணிணியின் மூலம் பலவும் சாத்தியமாயிருக்கிறது' என்று சொல்லி, 'உங்களுக்கு, இந்தப் பாட்டைத் தெரிகிறதா?' என்று கொஞ்சம் வம்புடனே, முந்தாநாள் போட்ட 'நெஞ்சுக்கு நீதியும்' போட்டுக் காண்பித்தேன். 'பாட்டைத் திறப்பது பண்ணாலே!' என்று பண்புடனே பதில் வந்தது. 'உஜ்ஜயினி' பாட்டையும் ரசித்ததாகத் தெரிந்தது. பதிவுகளைப் பார்த்தவர், 'இன்று யாரைப் பற்றிச் சொல்லப் போகிறாய்?' எனக் கேட்டார்!

மகாகவியல்லவா, முதலில் ஒரு கவிதைப் பதிவரைக் காண்பிப்போம் என எல் கேயின் கவிச் சோலைக்கு கூட்டிப் போனேன். சங்கப் பாடல்களையும் அவற்றுக்கு புதுக் கவிதைகள் படைத்துக் கொடுத்திருப்பதையும் ரொம்பவே ரசித்தார்! சமீபத்திய பதிவு செங்கால் மடநாராய் பதிவைப் பாராட்டினார்!

அப்படியே அதே பதிவரின் பாகீரதி யையும் காண்பித்தேன். உறுதி கதையையும் ஹேப்பி பர்த்டே கிருஷ்ணாவில் பாடல்களையும் மற்ற சமூக அக்கறைப் பதிவுகளையும் காண்பித்தேன். 'பலே பாண்டியா' என்றார்!

இவர் தொடர்கதைகளும் எழுதுவாரே என்றவுடன், தொடர் நாயகர்கள் ஞாபகத்துக்கு வந்தார்கள்! அவர்களின் பதிவுகளையும் பார்த்தோம்.

பெரிய சிறு கதைகளைத் தொடர்களாக வெளியிட்டு, அடுத்த பாகம் எப்போ என்று தேட வைக்கும் வை.கோபாலகிருஷ்ணன் - சாதாரணமானவன் தான் ஆனால் ஏதாவது சாதிக்க வேண்டும் என்று மனதில் எப்போதும் நினைப்பவன் என்று தன்னடக்கமாகச் சொல்லிக் கொள்பவர், இப்போதைய பதிவுகளில் கதைக்கான ஓவியங்களையும் அவரே தீட்டுகிறார். இவர் கதைகளைப் படிக்கும் போது கண்முன்னே அந்தக் காட்சிகள் விரிவது மாதிரி, அழகாகக் கதை சொல்லுவார். சமீபத்திய பதிவுகளான ஏமாறாதே, ஏமாற்றாதே சிறுகதையையும் ஓவியத்தையும் சகுனம் சிறுகதை இரண்டு பகுதிகளையும் காண்பித்தேன். பாரதியாருக்கு மிகவும் பிடித்திருந்தது, அதுவும் இரண்டாவது கதை - மூட நம்பிக்கைகளின் எதிரி அல்லவா?!

அப்படியே அவரை எங்கள் Blog பக்கம் கூடடிப் போனேன். ஸ்ரீராம், kggouthaman, raman, kg, Kasu shobana என்று ஐவர் ராஜ்ஜியம் இது என்றவுடன் அவருக்கு ரொம்பவே சந்தோஷம். அதுவும் 'நம்ம வூடுதான்! உள்ள வாங்க! படியுங்க! படியுங்க!! படிச்சுகிட்டே...இருங்க' என்ற வரவேற்பைப் பார்த்தவுடன் ஜாஸ்தியாகிவிட்டது! ஜே.கேயின் சிந்தனைகள், இந்த வார செய்தி அரட்டை எனப் பார்த்து ரசித்தார்! ஞாயிறு ஃபோட்டோக்கள், கேயைத் தே....டும் தொடர் எல்லாம் பார்த்தார்!

இப்போது பாரதி என்னை ஒரு கேள்வி கேட்டார் - 'நான் என்ன கடவுள் பாட்டுகள் மட்டுமா பாடியிருக்கிறேன்? கண்ணன், கண்ணம்மா பாடல்கள் உனககுப் பிடிக்காதா?' என்று! ஆகா, இப்படிக் கேட்டு விட்டாரே என்று வருந்தி, அவருடைய எல்லாப் பாடல்களும் பிடிக்கும் எனறும் உதாரணத்துக்கு ஒரு பாடலைப் போட்டுக் காடடுவதாகவும் சொல்லி, இந்தப் பாடலைப் போட்டேன்:

பாட்டை ரசித்துக் கேட்டபின், இன்னும் பதிவர்களைப் பார்க்கலாமா என்று பாட்டுக்கொரு புலவன் கேட்க, நானும் தயாரானேன். மோகன்குமார் என்றொரு சட்டம் படித்தவரின் வீடு திரும்பல் பார்க்கலாமா என்று கேட்டவுடன், 'ஆகா, என் நண்பர் வ.உ.சி. போல் வக்கீலா' என்று ஆனந்தப்பட்டார்! இல்லாமற் போகுமோ சரித்திரத்தில் ஒரு சிற்றிடம் எனக்கு? என்று கேட்கும் இந்தப் பதிவருடைய சமீபத்திய பதிவு நடிகர் நாகேஷ் பற்றி! வானவில் என்று பல்சுவைக் குறிப்புகளாக எழுதும் இவர், அவற்றில் சட்டச்சொல் விளக்கங்களும் எழுதுவது எனக்குப் பிடிக்கும்! (நடிகர் நாகேஷை சொர்க்கத்தில் தெரியுமாம் பாரதிக்கு!!)

பின்னர் அரசியல் பற்றி எழுதும் ஒரு புதிய பதிவரின் இடுகைகளை எடுத்தேன். ராஜன் என்பவரின் எல்லைகள் என்ற வலைப்பூவில் நமது சட்டமன்ற உறுப்பினர்கள் ஏழைகளா என்ற பதிவைக் காண்பித்தேன். இன்றைய அரசியல் அவல நிலை சொர்க்கத்திலும் எல்லாரும் வருத்தப்படும் டாபிக் என்றுவிட்டார் பாரதி!

இன்னொரு புதிய பதிவரைச் சற்றே பெருமையுடன் அறிமுகப்படுத்தினேன், ஸ்டாலின் என்பவர் மார்ச் 2011 முதல் எழுதும் என்டர் தி வேர்ல்ட் -உனக்குள்ளே உலகம்! பற்பல செய்திகள் இருக்கிறது இந்த வலைப்பூவில், ஒரு செய்திச் சானலின் லிங்க்கும் இருக்கிறது! கூகுளில் சில நகைச்சுவைத் தேடல்களைப் பார்த்து நாமும் முயன்று பார்க்கலாம்! HTML தொடர்- லிங்க் பட்டன் உருவாக்குதல் பற்றித் தெரிந்து கொள்ளலாம்! சில வார இதழ்களின் பதிவிறக்கத்துக்கும் வழியிருக்கிறது! பாரதியார் 'பலே பாண்டியா' என்று மீண்டும் சொன்னது போல் காதில் விழுந்தது!


'வாருங்கள், இன்னொரு தளத்துக்குப் போகலாம்' என்று ஓம் சிவாய நம என்ற வலைப்பூவிற்கு அழைத்துச் சென்றேன். ஆன்மிகமாக பல திருத்தலங்கள் பற்றி பதிவுகள் உள்ளன. திருச்செங்கோடு அர்த்தநாரீஸ்வரர் கோயில் பற்றி பதிவு அழகாய் இடப்பட்டுள்ளது. பங்குச் சந்தைக்குப் புதியவரானால் இந்தப் பதிவைப் படிக்கலாம்!

இவையெல்லாம் பார்த்த பாரதியார், நல்ல முன்னேற்றம் என்று சொல்ல, நானோ அவரிடம் என்னை ஆசீர்வதிக்குமாறு கேட்டேன். அவர் காலில் விழுந்து வணங்க, அவர், 'எழுந்திரம்மா' என்றார்! என்னை அவர் திருக்கரங்களால் தொட்டு எழுப்பவும் செய்தார்!

என்ன, திடீரென்று அவர் குரல் வேறு மாதிரி மாறிவிட்டது? எழுந்து பார்த்தால் என்னைத் தட்டி மறுபடி எழுந்திருக்கச் சொன்னது என் மகன்! 'அம்மா, பக்கத்து வீட்டு ஆன்ட்டி அப்புறம் சமயம் இருக்காது என்று உன்னை அவர்கள் வீட்டுக் கொலுவுக்குக் கூப்பிட வந்திருக்காங்க!' என்றான். 'பாரதி எங்கே,புகை...' என்று நான் மறுபடி உளற, 'நீ தூங்கிட்டே, அப்பா உனக்குத் தொந்தரவாக இருக்கும்னு பாட்டை நிறுத்திட்டு ஹாலில் ஐபாடு கேட்கிறார்! பாட்டி சாம்பிராணி பத்தி ஏத்தினது தான் புகை!' என்று விளக்கமும் கொடுத்தான். நம்பவும் முடியவில்லை, நம்பாமல் இருக்கவும் முடியவில்லை!!

வானவில்லாக வர்ணஜாலம் காட்டும் பதிவர்களுக்கு வாழ்த்துக்கள்! அப்புறம். வானவில்லின் நடுவில் அரசோச்சும் பச்சை நிறம், வளமை, ஒற்றுமை, இசைவு, வளர்ச்சி இவற்றைக் குறிக்கிறதாம்!!

மேலும் வாசிக்க...

மண் பயனுற வேண்டும்!!

நவராத்திரி கொலு ஆரம்பமாகி விட்டது. விக்கிபீடியாவின் கொலுவைக் கீழே பார்க்கலாம் (என்னிடம் இப்போதே சுண்டல் கேட்கக் கூடாது என்பதால் இந்த எச்சரிக்கை!! :-)) எங்கள் வீட்டு ஷோகேஸ் கொலுவுக்குச் சாயங்காலம் தான் சுண்டல் - எனவே மாலையில் எங்கள் வீட்டுச் சுண்டலையும் பகிர்ந்து கொள்ளலாம்!!):

கொலுவைப் பார்த்துவிட்டு நவராத்திரிப் பாட்டைக் கேட்காமலா? பாடல் பின்னணியில் ஒலிக்க ஆரம்பித்து விட்டதா?!:

'தேடி நிதஞ் சோறு தின்று' எனத் தொடங்கும் வேடிக்கை மனிதருக்கான பாடலைச் சிறு வயதில் என் புத்தக அலமாரியின் மேல் எழுதி ஒட்டியிருப்பேன்.நாம் இந்த மண்ணில் பிறந்தாயிற்று; வெறும் கதை பேசி, வேடிக்கை மனிதராய் வாழ்ந்தால்  போதுமா? பிறந்த மண்ணும் சுற்றியுள்ள மாந்தரும் பயன் பெற வேண்டாமா? தாம் பெற்ற பட்டறிவை எம் பதிவர்கள் எப்படியெல்லாம் அவர்தம் இடுகைகளில் சொல்கிறார்கள் என்பதை இன்று என் பார்வையில் பார்க்கலாம்:

ப்ரியமுடன் வசந்த் -தன்னை ப்ரியம்,கவிதை,கற்பனை, ரசனை,இசை, நக்கல் இவற்றால் கலந்த காபி நான்..! என்று வர்ணித்துக் கொள்கிறார் இவர். ஜோவெனப் பெய்யும் மழை எனும் இவரது கவிதைகளைப் படித்து இன்புறலாம். சினிமாச் செய்திகளும் உண்டு இவர் வலைப்பூவில்.

கோமாளி! செல்வா - நான் எப்படியாவது வானொலி நிகழ்ச்சித் தொகுப்பாளர் ஆகிடனும்னு இலட்சியத்தோட இருக்கேனுங்க என்று சொல்லும் இவர், பதிவுலகின் செல்லப் பிள்ளையாகவே எனக்குத் தெரிகிறார். இவரை எத்தனைப் பதிவுகளில் வம்பிழுத்து பதிவிட்டாலும், ஜாலியாகவே பதில் சொல்வார்!! செல்வா கதைகள் என்று தனியே எழுதுகிறார். அதற்கான லிங்க் பொம்மையைப் பார்த்தாலே சிரிப்பு வரும்! இவர் தன் வலைப்பூவில் நேர்த்திக்கடன் என்று முருகனை கைக்குள் போடும் வித்தையைச் சொல்கிறார்!

இராஜராஜேஸ்வரி - எனக்குப் பிடித்த இவருடைய பதிவுகளை அறிமுகப்படுத்தினால், அதற்குத் தனியாக ஒரு நாளை ஒதுக்க வேண்டும்!! ஆன்மிகமும், குடும்பமும் தன் விருப்பமான விஷய்ங்கள் என்று சொல்கிறார் இவர். பற்பல கோயில்கள், (அனைத்தும் வண்ணமயமான, சமயத்தில் அனிமேடட் படங்களுடன்!) சுற்றுலா செல்ல பலதரப்பட்ட இடங்கள் என்று விதவிதமான பதிவுகள்! மோட்சபுரி ஹரித்வார், இரயில் பயணங்களில், மெச்சத்தகுந்த மெல்போர்ன் நகர்,... என்று நான் ரசித்த பதிவுகளைச் சொல்லிக் கொண்டே போகலாம்!

கோபி ராமமூர்த்தி, கும்பகோணத்தில் பிறந்து, வளர்ந்து, தற்சமயம் பெங்களூரில் பணிபுரிவதாகத் தம்மை அறிமுகம் செய்து கொள்கிறார். இவர் புத்தக விமர்சனம், சினிமா விமர்சனம், கதைகள், கவிதைகள் என்று எல்லாப் பிரிவிலும் திறம்பட எழுதுகிறார்! தற்சமயம் வேலூர் புத்தகத் திருவிழா பற்றி எழுதியிருக்கிறார். காபி போடுவது எப்படி என்று கூடச் சுவையாக எழுதியிருக்கிறார்! சமீபத்திய சினிமா விமர்சனமும் பார்க்கலாம்!

கெக்கேபிக்குணி - எனக்குத் தோணினதைச் சொல்வேன் என்று சொல்லும் இவர், கெக்கே பிக்கேன்னு பேசறது என் ஸ்டைலுன்னு பெயர்க் காரணமும் சொல்லியிருக்கிறார். கதை, கவிதை, கட்டுரை என்று பல்துறைகளிலும் எழுதுகிறார்; இயற்கை உலகம் பற்றி படத்துடன் பகிர்ந்துள்ளார். இந்த வருடக் கோடை விடுமுறையில் தம் குழந்தைகளின் குறுமபுகளைப் பற்றி எழுதியுள்ளார். இந்தப் பதிவு போடும் சமயத்தில் புதிதாக 'வேப்பமுத்து' சிறுகதையை இடுகையிட்டுள்ளார்!

சம்பத்குமார் எழுதும் தமிழ் பேரன்ட்ஸ் என்ற வலைப்பூவைச் சமீபத்தில் பார்த்தேன். துன்பத்திலும் தோள் கொடுப்பான் தோழன் என்று தன் அறிமுகத்தில் அவர் சொல்லிக் கொள்கிறார்! பெற்றோர் குழந்தைகளிடம் கவனிக்க வேண்டியது பற்றி மிக நன்றாகச் சொல்லியிருக்கிறார். தேர்வெழுதும் குழந்தைகளின் பயம் நீங்க, பெற்ற குழந்தைகளை அவமானப்படுத்தும் பெற்றோர் என, பெற்றோர் படிக்க வேண்டிய பதிவுகள்.

மதுரகவி என்ற பதிவெழுதும் RAMVI தம்மை எது நடந்தாலும் நல்லதுக்குதான் என்று எடுத்துக்கொள்ளும் சுபாவம் கொண்டவள் என்கிறார். சமீப காலமாகத் தான் பதிவெழுதும் இவரது பதிவுகள் ஒரு தேர்ந்த எழுத்தாளரின் பதிவுகளாகவே இருக்கின்றன. எண்ணம், செயல் என்ற அவர் பதிவு ஆக்கபூர்வமாக உள்ளது. அறிந்து கொள்வோம் என்ற தலைப்பில் சில கடினமான ஆங்கில வார்த்தைகளுக்கு அழகாக விளக்கம் கொடுக்கிறார்!

இன்றைய வானவில் பதிவர்களுக்கு என் சார்பில் என் வாழ்த்துக்களைத் தெரிவித்துக் கொள்கிறேன். மென்மேலும் உங்கள் பணி சிறக்கட்டும்!

வானவில்லின் நீல நிறம் - நீங்கள் நினைத்தது சரி தான்! - கடவுளைக் குறிக்கிறது! (அவதார்??!!) நீல நிறம் வானத்தையும் கடலையும் மட்டுமன்றி, அமைதியையும் புரிந்து கொள்ளுதலையும் குறிக்கிறதாம்! மன நிம்மதிக்கும் ஆறுதலுக்கும் உதவும் நிறம். (நீல நிறம், வானுக்கும் கடலுக்கும் நீல நிறம் என்று நீங்கள் பாட ஆரம்பித்தால் நான் பொறுப்பல்ல!!)

மேலும் வாசிக்க...

சொல் புதிது...சுவை புதிது... பொருள் புதிது...

சொல் புதிது...சுவை புதிது... பொருள் புதிது... ஆம், இன்று நிலவும் புதியது! (New moon's day!).

இன்று மஹாளய அமாவாசை. இதற்கு முந்தைய 14 நாட்களை மஹாளய பட்சம் என்றும் சொல்கின்றனர். 'கர்ண' பரம்பரை(செவிவழி)க் கதையாக, கொடைக்கு ஒரு உதாரணமாக விளங்கிய கர்ணர், இறந்து சொர்க்கத்துக்குப் போன போது, அவருக்கு பொன்னும் பொருளும் நிறையக் கொடுக்கப்பட்டதே தவிர அன்னமோ நீரோ கிடைக்கவில்லையாம். காரணம் கேட்ட போது, அவர் அதற்கு முன் உணவைத் தானமாகக் கொடுத்ததில்லை எனத் தெரிய வந்ததாம். உடனே, மேலிடத்தில் கேட்டுக் கொண்டு, 14 நாட்கள் பூவுலகம் வந்து, உணவையும் நீரையும் தானமாகக் கொடுத்ததாகச் சொல்லப்படுகிறது. இந்நாட்களில் முன்னோரை நினைத்து வழிபடுதல் நல்லது எனவும் பல்வேறு தானங்கள் (முக்கியமாக அன்னதானம்) கொடுத்தால் பற்பல நற்பலன்கள் கிடைக்கும் என்றும் சொல்கிறார்கள். இந்தப் 14 நாட்களில் செய்யாததை, நிறைவு நாளான அமாவாசை நாளன்று செய்யலாம் எனவும் சொல்கிறார்கள். பயத்தின் மூலமாகவும், பக்தியின் மூலமாகவும் நம் முன்னோர்கள் நம்மை நல்ல காரியங்கள் செய்ய வைக்கிறார்கள்!!

முக்கியமாக வரவிருக்கும் நவராத்திரிக்காக இன்று கொலு பொம்மைகளை எடுத்து அடுக்கும் நாள். பெண்களுக்கு மட்டுமன்றி அனைவருக்கும் அவரவர் கற்பனை வளத்துக்கு உருக்கொடுக்கும் நாள். நீங்கள் கொலு வைக்க ரெடியா? என்ன, வேலை செய்ய சோம்பலா? இந்தப் பாட்டைக் கேளுங்கள்:

எள்ளத்தனைப் பொழுதும் பயனின்றி இராமல் சக்தி கொடுக்க நான் விரும்பிக் கேட்கும் பாடல் இது!

வலைச்சரத்தில் என் கொலு இன்றே ஆரம்பம். இதோ, கொலுவில் வீற்றிருப்பவர்கள் - இந்தப் பதிவர்களை வரிசைப்படுத்துவது என் ஞாபகத்தில் தான் - இந்த வரிசையில் ஏறுமுகமோ, இறங்குமுகமோ இல்லை.

ஆரம்பத்தில் நான் எனக்குப் பிடித்த பதிவர்களாகச் சொல்லப் போகிறவர்களை உங்கள் அனைவருக்கும் தெரிந்திருக்கும். ஏனென்றால் இவர்கள் பிரபலப் பதிவர்கள். பூக்கடைக்கு விளம்பரம் தேவையா என்ன? தொடர்ந்து மற்றப் பதிவர்களையும் பார்க்கலாம்

அவருடைய நிழலுடன் கூட வம்பு வைத்துக் கொள்ளக் கூடாது என்று சொல்லும் பரிசல்காரன்- ரசிப்போர் விழி தேடி அவர் தரும் இடுகைகளில் எனக்கு சமீபத்தில் பிடித்தது ஒரு அஞ்சு நிமிஷத்து வேலை. இன்னொரு பதிவான எமகிங்கரர்களில் பைக்கில் போகும் போது சந்திக்கும் பல்வேறு வகையானவர்களுக்கு பெயர் சூட்டியிருக்கிறார் பாருங்கள்!!

ஊர்ல சொல்றது சொலவடை, உண்மையைச் சொல்றது இட்லிவடை - இந்த வலைப்பூவில் அரசியல் நெடி அதிகம். அதற்குள் நான் இங்கு போகப் போவதில்லை (நெடி அலர்ஜி!) ஆனாலும் அதில் மஞ்சள் கமெண்ட்ஸ் ரசிககும்படி இருக்கும்! கிண்டல் பதிவுகளும் இருக்கும் - என்னங்க்ண்ணாவைப் பாருங்களேன்!

நம்பிக்கை இருக்கும்வரை தோல்விகள் வருவதில்லை என தன்னம்பிக்கை டானிக் கொடுக்கும் பனித்துளி சங்கர் - பயனுள்ள தகவல்கள், ஜோக்ஸ், கவிதைகள் என்று அவர் பதிவுகள் களைகட்டும். சிரிப்பைப் பற்றி அவர் எழுதியதை ரசிக்கலாம்! கடிகாரத்தைப் பற்றிய தகவல்களையும் அறிந்து கொள்ளலாம்!

கவிதையாய் நினைவுகளும் புதினமாய் நிகழ்வுகளும் ஓவியமாய் சந்திப்புகளும் புதைந்திருக்கும் நெஞ்சுக்குள் என்ன சொல்ல என்னைப்பற்றி... எனத் தன்னடக்கமாய்ச் சொல்லிக் கொள்ளும் மாணவன் எழுதும் எல்லா இடுகைகளுமே நன்றாக இருக்கும். குறிப்பாக, வரலாற்று நாயகர்கள் என்று சாதனை சரித்திரம் படைத்த சாதனையாளர்களைப் பற்றி எழுதுபவை சரித்திரப் பாடத்தில் வைக்குமளவுக்குச் சிறந்தவை. இந்தச் சுட்டியில் முதல் பாகத்தைப் பதிவிறக்கமும் செய்து கொள்ளலாம்! 25 பேரின் சரித்திரத்தைச் சொல்லும் இதனை நான் பதிவிறக்கம் செய்து என் மகன்களைப் படிக்கச் சொல்லியிருக்கிறேன்! சமீபத்திய பதிவு மைக்கேல் ஃபாரடே குறித்து.

சில தொழில் நுட்ப வலைப்பூக்களைப் பார்ப்போமா?
தெரிந்து கொளளலாம் வாங்க-வில் பல செய்திகளைத் தெரிந்து கொள்ளலாம். கம்ப்யூட்டரின் செயல் வேகம் அதிகப்படுத்த, ஜி-மெயில் செய்தியில் படங்கள் ஒட்டி அனுப்ப என்று பல விவரங்கள் தெரிந்து கொள்ளலாம்.

ஏப்ரல் 2011ல் பதிவுலகில் அடியெடுத்து வைத்திருக்கும் M.R. ன் இரண்டு வலைப்பூக்களை சமீபத்தில் ரசித்தேன். அன்பு உலகம் என்ற வலைப்பூவில் பல்வேறு மருத்துவக் குறிப்புகளையும் மற்றக் குற்ப்புகளையும் இவர் தருகிறார், இங்கே - யோகா கற்றுக் கொள்ளுங்கள்! ஒரே கிளிக்கில் அன்-இன்ஸ்டால் செய்யவும் சொல்லித் தருகிறார்!

இவரே பங்கு மார்க்கெட் என்று மற்றொரு வலைப்பூவிலும் தற்போது எழுதத் தொடங்கியுள்ளார்! பாராட்டுகள்.

சட்டம், சட்டக் கல்வி மற்றும் சட்ட விழிப்புணர்வுக்கான வலைப்பதிவு இது என்று சொல்லி சட்டப்பார்வை என்னும் வலைப்பூவில் எழுதும் அட்வகேட் P.R.ஜெயராஜன், சொல்வதற்கு நான் ஒன்றும் சாதிக்கவில்லை...... நேரம் வரும்.... காத்திருக்கிறேன் ... என்கிறார்! பேருந்து நடத்தனருக்குத் தேவையா என்று அவர் சட்டப் பார்வையில் கேட்கிறார்.

இன்று என் பார்வையில் சில பதிவர்களைச் சொன்னேன். மற்றவர்களைப் பின்வரும் நாட்களில் பார்ப்போம். வானவில்லும் வர்ணங்களும் எங்கே என்று கேட்பது காதில் விழுகிறது. மேலே உள்ள பல கண்ணோட்டங்களில் எழுதும் பதிவர்களே வானவில்! போதவில்லையென்றால், இந்த வரிகளின் வண்ணங்களைப் பாருங்கள்!

சொல்ல மறந்துட்டேனே, வானவில்லின் இண்டிகோ கலர் அறிவையும் தன்னம்பிக்கையையும் குறிக்கிறதாம்! மேலும் இது முதலுக்கும் முடிவுக்கும் முடிச்சுப் போடும் தன்மையுடையதாம்!

மேலும் வாசிக்க...

ஊருக்கு நல்லது சொல்ல...

என்னைத் தெரியுமா?

என்னை நீங்கள் எங்கேயும் பார்த்திருக்கலாம். ஒரு சாதாரண மிடில் கிளாஸ் குடும்பத்தைச் சேர்ந்த பணிக்குச் செல்லும் பெண்மணி. மனைவியாக, இரண்டு மகன்களுக்கு அன்னையாக, வயதான ஒரு தாய்க்கு மகளாக, புகுந்த வீட்டுக்கு அவர்கள் வீட்டுப் பெண்ணாக, இதற்கு மேல் நேர்மையான, உண்மையான உழைக்கும் பெண்மணியாக ஒரு சராசரி குடும்பத் தலைவி. சுருக்கமாக, உங்களைப் போல ஒருத்தி!

மகாகவி பாரதியை எனக்கு மிகவும் பிடிக்கும். அவரது பாடல்களை மிகவும் ரசிப்பேன். அடுத்து எழுத்தாளர் கல்கியின் எழுத்துகளை முடிந்தவரை திருப்பித் திருப்பி சுவாசித்து வாசித்திருக்கிறேன். எழுத்தார்வத்துக்கு இவர்கள் காரணம். மகாகவிக்கு சமர்ப்பணமாக எனக்குப் பிடித்த அவர் பாடல் முதலில்:

ஆத்தி சூடி இளம்பிறை அணிந்து
மோனத்திருக்கும் முழுவெண்மேனியான்
கருநிறம் கொண்டு பாற்கடல் மிசைக் கிடப்போன்
மகமது நபிக்கு மறையருள் புரிந்தோன்
ஏசுவின் தந்தை எனப்பல மதத்தினர்
உருவகத்தாலே உணர்ந்துணராது
பலவகையாகப் பரவிடும் பரம்பொருள்
ஒன்றே; அதனியல் ஒளியுறும் அறிவாம்
அதனிலை கண்டார் அல்லலை அகற்றினார்
அதனருள் வாழ்த்தி அமரவாழ்வு எய்துவோம்

எனக்கு இங்கே எழுத வாய்ப்பளித்த வலைச்சரக் குழுவினருக்கு நன்றி!

சென்ற வாரம் ஆசிரியப் பணியைச் சீரிய வகையில் செய்திட்ட திரு மகேந்திரன் அவர்களுக்கு வாழ்த்துகள்! குவிக்கும் கவிதைக் குயிலாகச் சிறந்து பணியாற்றினார்!

இனி, என் வலைப்பூ பற்றி -

எனக்கு வலைப்பூவை அறிமுகம் செய்து, நான் எழுத ஆரம்பித்தது எப்படி என்பதை இந்தப் பதிவில் பாருங்கள். இதில் என் பெயர்க் காரணமும் இருக்கும். சில சமயம், ஞாபக மறதியை ஜெயிப்பது எப்படி?, மொக்கை -ஆராய்ச்சி என்று நகைச்சுவையாக எழுதுவேன். சில சமயம், உயில் எழுதுவதின் முக்கியம், தற்கொலையைத் தவிர்ப்போம் போன்ற பதிவுகளும் இடுவேன். காரட் கீர், புளிமிளகாய் ஊறுகாய் போன்ற சமையல் குறிப்புகளும் உண்டு. பல்வேறு சமயங்களில் என்னைப் பாதித்த விஷயங்களைத் தொகு(டு)த்து கதம்பம் என்றும் பதிவிடுகிறேன், (கொடுத்திருக்கும் லிங்க் சமீபத்தியது)

சிறுகதைகளுக்கு :தண்ணி, , 50-50, மொழிமாற்றக் கதை... கவிதையிலும் கைகளைச் சுட்டுக் கொண்டிருக்கிறேன் மூன்று வார்த்தைகள், சமமான கல்வி { ;-( }; என் முதல் சிறுகதை அனுபவத்தையும் பதிவிட்டிருக்கிறேன்! லாஜிக்கா, மொக்கையா என்றே தெரியாமல் சில சமயம் கேள்விகள் கேட்பதுமுண்டு! எனது பதிவுகளில் அதிகம் படிக்கப்பட்டது இந்தியா தோற்காது! - கிரிக்கெட்டும் நானும் மற்றும் சொந்த சரக்கில்லையும் தாம்!

என்னை ஊக்கப்படுத்தி இவ்வளவு தூரம் எழுத வைத்த தோழமை உள்ளங்களுக்கு நன்றியாக 'தோழமை என்றவர் சொல்லிய சொல் ஒரு சொல்லன்றோ?' சக பதிவர்களுக்காக நகைச்சுவையாக ச்சும்மா- காமெடிக்கு!

சுய புராணம் எனக்கு பழக்கமில்லை (?!!) எனவே அறிமுகம் போதும் என நினைக்கிறேன். ஏழு நாட்கள் உங்களுடன் என் பார்வையை பகிர்ந்து கொள்ளும் வாய்ப்பளித்தவர்களுக்கு மறுபடியும் என் மனமார்ந்த நன்றிகள். என்னை வரவேற்று வாழ்த்தளித்த உள்ளங்களுக்கும் நன்றி!

ஏழு என்றவுடன் என்ன ஞாபகம் வருகிறது? என்னைப் போன்ற ஹாரி பாட்டர் ரசிகர்களுக்கு அது ஒரு மாய எண். ஆனால், எனக்கு இந்த சந்தர்ப்பத்தில் உடனே ஞாபகத்துக்கு வந்தது, வானவில் தான். என் பார்வையை வலையுலகில் வலைச்சர ப்ரிசம் (prism) மூலம் பார்ப்பதில் வானவில்லாகப் பதிவர்கள் தெரிகிறார்கள். வானவில்லின் ஒவ்வொரு நிறத்துக்கும் ஒவ்வொரு குணம் உண்டாம்! உதாரணத்துக்கு வயலட் நிறம் மனித நேயத்தையும் தெய்வீகத் தன்மையையும் காட்டுகிறதாம்!

என் பார்வையில் வானவில்லாக வர்ணஜாலம் காட்டும் பதிவர்களை நாளை முதல் காண்போம்! 

மேலும் வாசிக்க...